*

May 16, 2012
ᒪᐃ 16, 2012 (ᐊᑐᕙ, ᐋᓐᑎᐅᕆᔫ) -- ᓂᕈᐊᖅᑕᐅᓯᒪᔪᖅ ᓕᐅᓇ ᐊᒡᓘᒃᑲᖅ, ᒥᓂᔅᑕ ᐋᓐᓂᐊᖅᑐᓕᕆᓂᕐᒧᑦ ᐊᒻᒪᓗ ᒥᓂᔅᑕᐅᔪᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕈᑎᒃᓴᓂᒃ ᐱᕙᓪᓕᐊᑎᑦᑎᓂᕐᒧᑦ ᐱᓕᕆᕕᖕᒥ, ᐅᓪᓗᒥ ᓴᕿᑎᑦᑎᖃᑕᐅᔪᑦ ᐅᑯᓂᐊ ᐅᖃᐅᓯᒃᓴᒥᓂᒃ:



ᐅᓪᓗᒥ ᑲᑎᒪᖃᑎᒋᖃᐅᒐᒃᑯ ᐅᓕᕕᔭᐃ ᑕᓴᑦᑐᕐ, ᓄᓇᕐᔪᐊᕐᒥᐅᑦ ᑲᑐᔾᔨᖃᑎᒌᖏᓐᓄᑦ ᐊᔾᔨᐅᖏᑦᑐᒥᒃ ᑎᓕᔭᐅᓯᒪᔪᑦ ᐅᓂᒃᑳᖁᔭᐅᓪᓗᓂ, ᐱᔪᓐᓇᐅᑎᖃᕐᓂᕐᒧᑦ ᓂᕿᒃᓴᖃᕈᓐᓇᕆᐊᖃᕐᓂᕐᒥᒃ.

ᓄᓇᖃᖄᖅᑑᖃᑕᐅᓪᓗ ᐅᑭᐅᖅᑕᖅᑐᒥᐅᑕᐅᓪᓗᖓ, ᓈᒻᒪᒋᖏᑕᒻᒪᕆᐊᓗᒋᖃᐅᕙᕋ ᓴᑑᑉ ᓂᕈᐊᖅᓯᒪᓂᖏᑦ "ᖃᐅᔨᓴᕈᒪᓂᖅ" ᐅᕙᑦᑎᓐᓂᒃ, "ᐳᓚᕋᓐᓂᕋᖏᔅᓱᓂ" ᐅᕙᑦᑎᓂᒃ. 

ᓲᖃᐃᒻᒪᓗᓐᓃᑦ, ᒥᔅᑕ ᑎᓴᑦᑐᕐ ᓇᓗᓇᐃᖅᓯᓚᐅᖅᑐᖅ ᐅᑭᐅᖅᑕᖅᑐᒥᐅᑕᓄᑦ ᓄᓇᓕᖕᓄᐊᓚᐅᖏᑦᑎᐊᕐᓂᕐᒥᓂᒃ ᑲᓇᑕᒦᓐᓂᕐᒥᓂᒃ ᒪᕐᕈᖕᓂᒃ ᐱᓇᓱᐊᕈᓰᖕᓂᒃ ᑎᑭᓯᒪᓪᓗᓂ ᑲᓇᑕᒧᑦ.



ᐊᐱᓚᐅᖅᑕᕋ ᖃᓄᐃᓕᖓᓂᐊᕐᒪᖔᑦ ᐅᓂᒃᑳᓕᐊᖓ ᖃᐅᔨᒪᖏᑦᑎᐊᖅᑎᓪᓗᒍ, ᓯᓚᕐᔪᐊᕐᒥᐅᑕᓄᓪᓗ ᐱᐅᖏᓐᓂᕋᖅᑕᐅᖃᑦᑕᖅᑎᓪᓗᒋᑦ ᓇᑦᓯᖅᓯᐅᖅᐸᖕᓂᖏᑦ ᓇᓐᓂᐊᖅᐸᖕᓂᖏᓪᓗ ᐊᔪᕐᓇᕈᑕᐅᒃᑲᓐᓂᕐᓂᐊᓕᖅᑎᓪᓗᒋᑦ ᐃᓅᔾᔪᑎᒃᓴᖃᕈᓐᓇᕐᓂᖏᓐᓄᑦ. ᐅᖃᐅᑎᓚᐅᖅᑕᕋ ᕿᒥᕐᕈᐊᑦᑎᐊᕐᓂᐊᕐᓂᕋᖅᓱᒋᑦ ᑭᖑᓪᓕᖅᐹᑦ ᐅᓂᒃᑳᓕᐊᖏᑦ ᐅᔾᔨᖅᑐᑦᑎᐊᕐᓗᖓ, ᖃᐅᔨᔪᒪᒐᒪ  ᐊᔭᐅᖅᑎᐅᕙᒃᑐᓂᒃ ᓯᕐᓇᖅᑎᓂᒃ ᐊᑐᓕᖁᔭᓕᐅᕐᓂᐊᕐᒪᖔᑦ, ᐸᒡᕕᓴᖃᑦᑕᖁᔨᔪᓐᓃᕐᓂᐊᕐᒪᖔᑦ ᐊᖑᓇᓱᖃᑦᑕᕐᓂᕐᒥᒃ ᐊᒻᒪᓗ ᓂᕿᒃᓴᖅᓯᐅᖃᑦᑕᕆᐊᖃᖅᑐᓂᒃ ᐱᐅᓯᑐᖃᕐᒥᒍᑦ.

ᐃᓱᒪᓘᑎᖃᓚᐅᕋᒪ ᑐᑭᓯᐅᒪᑦᑎᐊᖏᓗᐊᕐᓂᖏᓐᓂᒃ ᐊᑲᐅᖏᓕᐅᕈᑕᐅᓂᖏᓐᓂᒃ ᑲᔪᓯᔪᓐᓃᖅᑎᑕᐅᓂᖏᓐᓂᒃ ᑎᑎᖃᕐᓂᐊᕐᕕᒃᑯᑦ ᓂᖀᑦ ᑎᑭᓴᖅᑕᐅᖃᑦᑕᓚᐅᕐᓂᖏᓐᓄᑦ ᐊᑭᑭᒡᓕᒋᐊᕈᑕᐅᓯᒪᓂᖏᓐ ᑎᑭᓴᖅᑕᐅᒑᖓᒥᒃ ᓄᓇᒃᑰᕈᑏᑦ ᐊᒃᓴᓗᐊᒃᓴᖏᑦ ᐊᒻᒪᓗ ᓯᑭᑐᑦ ᐃᓚᒃᓴᖏᑦ, ᓴᓂᐊᓂ ᓂᕿᑦᑎᐊᕙᓕᕆᔾᔪᑎᐅᓕᖅᑐᑦ ᐅᑭᐅᖅᑕᖅᑐᒥ, ᐱᐅᓯᕚᓪᓕᕈᑕᐅᕙᓕᖅᑎᓪᓗᒋᑦ ᐱᔪᓐᓇᖃᑦᑕᕐᓕᕐᓂᖅ ᓂᑦᑎᐊᕙᖕᓂᒃ ᐊᒻᒪᓗ ᓱᕈᖅᓴᕋᐃᑦᑐᓂᒃ ᓂᕿᓂᒃ. 


ᐊᒥᓱᒐᓴᖕᓂᒃ ᐃᓱᒪᒋᔭᐅᖁᔨᓚᐅᖅᑐᖅ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐸᒡᕕᓴᒍᑕᐅᓕᕋᔭᖅᑐᓂᒃ ᐊᐅᓚᑦᑎᔨᐅᕝᕕᒋᔭᖏᓐᓂᒃ ᐊᓯᖏᑦ ᒐᕙᒪᒃᑯᑦᓐᓂᒃ ᐊᐅᓚᑦᑎᔨᐅᔪᓂᒃ. ᓇᓗᓇᕈᓐᓃᓚᐅᖅᑐᖅ ᑐᑭᓯᐅᒪᖏᓗᐊᕐᓂᖓ ᑲᓇᑕᐅᑉ ᐊᐅᓚᑦᑎᔨᐅᔪᓐᓇᐅᑎᖏᓐᓂᒃ ᐊᕕᒃᑐᖅᑕᐅᓯᒪᔪᓂᒃ ᑲᓇᑕᓕᒫᒧᑦ, ᑲᓇᑕᐅᑉ ᐊᕕᒃᑐᖅᓯᒪᓂᖏᓐᓄᑦ, ᐊᒻᒪᓗ ᓄᓇᓕᖕᓄᑦ, ᐅᓂᒃᑳᕐᕕᐅᓯᒪᒐᓗᐊᕋᒥ ᒪᓕᒐᓕᕆᔨᖏᓐᓂᒃ ᑲᓇᑕᐅᑉ ᒐᕙᒪᒃᑯᖏᓐᓄᑦ. 

ᒐᕙᒪᒋᔭᕗᑦ ᑲᒪᔪᒻᒪᕆᐅᓚᐅᖅᑐᑦ ᑖᒃᑯᐊ ᑎᒥᖁᑎᖓᑦ ᐱᓕᕆᐊᖃᖅᑐᔮᕐᓂᖏᓐᓂᒃ ᒐᕙᒪᓕᕆᓂᕐᒥᒃ ᐱᔾᔪᑎᖃᖔᖅᑐᔮᖅᑐᓂᒃ, ᖃᓄᖅᑑᕈᑎᒃᓴᐅᖏᖔᖅᑐᓂᒃ ᓂᕿᒃᓴᖃᑦᑎᐊᖏᓐᓂᕐᒥᒃ ᐱᕙᓪᓕᐊᓕᖅᑐᓂ ᓄᓇᖃᖅᑐᓂ .
  
ᓄᓇᕐᔪᐊᕐᒥ ᑲᑐᔾᔨᖃᑎᒌᑦ ᓇᖕᒥᓂᖅ ᖃᐅᔨᓴᖅᓯᒪᔭᖏᓐᓄᑦ ᓇᓗᓇᐃᖅᑕᐅᓯᒪᔪᓂ, ᑲᓇᑕ 6-ᒋᔭᐅᓂᕋᖅᑕᐅᓯᒪᔪᖅ ᐱᐅᓂᖅᐹᖑᓂᖅ ᓄᓇᕐᔪᐊᕐᒥ ᓄᓇᓕᐊᓗᖕᓂ ᐃᓄᐃᑦ ᐱᔪᓐᓇᐅᑎᖃᕐᓂᖏᓐᓄᑦ ᐱᕚᓪᓕᖅᑎᑕᐅᓯᒪᓂᖏᓐᓄᓪᓗ ᓇᓗᓇᐃᒃᑯᑕᕆᔭᖓᒍᑦ. 
  


ᑲᓇᑕᒥᐅᑕᐃᑦ ᑐᓂᓯᓲᖑᔪᑦ ᐊᖏᔪᐊᓗᖕᓂᒃ ᑮᓇᐅᔭᓂᒃ ᐊᑐᒐᒃᓴᓂᒃ ᐊᔪᖅᓴᖅᑐᓄᑦ ᐱᕐᓕᕋᖅᓯᒪᔪᓄᓪᓗ ᑳᖕᓂᕐᒧᑦ ᓄᓇᕐᔪᐊᕐᒥ, ᑕᒪᓐᓇᓗ ᓈᒻᒪᖏᒻᒪᕆᒃᐳᑦ ᑕᒪᒃᑯᐊ ᐊᑐᒐᒃᓴᐃᑦ ᐊᑐᖅᑕᐅᖏᓐᓂᖏᓐᓂᒃ ᓂᕆᔭᒃᓴᖃᖏᑦᑐᓄᑦ ᓄᓇᓕᒡᔪᐊᕐᓄᑦ ᐃᑲᔪᖅᑕᐅᓂᖅᐹᖑᔭᕆᐊᖃᖅᑐᓄᑦ.