ᐊᒡᓗᒃᑲᖅ ᓄᓇᕗᒥᐅᓂᒃ ᐃᓚᐅᖁᔨᕗᖅ ᐱᓐᖑᐊᕐᔪᐊᕐᓇᐅᓂᐊᖅᑐᒧᑦ

November 05, 2009

ᓄᓇᕗᑦ - ᓕᐅᓇ ᐊᒡᓘᒃᑲᖅ, ᐱᖁᔭᓕᐅᖅᑎ ᓄᓇᕗᒥᐅᓄᑦ, ᒥᓂᔅᑕ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ ᐱᓕᕆᐊᖃᖅᖢᓂᓗ ᓄᓇᕗᒥᐅᓄᑦ ᐅᓪᓗᓂ ᑐᓴᖅᑎᑎᖃᐅᕗᖅ ᑲᓇᑕᐅᑉ ᒐᕙᒪᒃᑯᖏᑦ ᐃᑲᔪᖅᓱᐃᓂᖏᓐᓄᑦ ᓄᓇᓕᖕᓂ ᖁᕕᐊᓱᒃᑎᑎᓂᐊᖅᑎᓪᓗᒋᑦ ᐱᓐᖑᐊᕐᔪᐊᕐᓂᕐᒧᑦ ᐃᑯᐊᓛᖅᑐᒥᒃ ᑎᒍᒥᐊᖅᑕᐅᓂᐊᖅᑐᒥᒃ ᐊᒡᔭᖅᑐᖅᑕᐅᓂᐊᖅᑐᒥᒃ ᑲᓇᑕᓕᒫᒧᑦ ᓄᓇᓕᖕᓄᑦ.

"ᐃᑯᐊᓛᖅᑐᖅ ᓇᓗᓇᐃᒃᑯᑕᖅ ᑎᑭᒃᑳᖓᑦ ᓄᓇᓕᖕᓄᑦ ᓄᓇᕗᒥ, ᑕᐃᒪᓐᓇ ᐃᖃᐃᓕᓴᕐᓂᕐᒧᑦ ᐱᓐᖑᐊᕈᑎᓂᒃ ᐃᒃᐱᒋᖃᑦᑕᕐᓂᐊᖅᐳᑦ ᑭᒃᑯᑐᐃᓐᓇᐃᑦ," ᐅᖃᓚᐅᖅᐳᖅ ᐊᒡᓘᒃᑲᖅ.

ᐃᑯᐊᓛᖅᑐᖅ ᓇᓗᓇᐃᒃᑯᑕᖅ ᖁᕐᓗᖅᑑᒦᓐᓂᐊᖅᐳᖅ ᓄᕕᐱᕆ 5-ᒥ, ᐊᓘᑦᒥ ᓄᕕᐱᕆ 8-ᒥ, ᐊᒻᒪ ᐊᐅᓱᐃᑦᑐᒥ, ᖃᐅᓱᐃᑦᑐᒥᓗ, ᐃᖃᓗᖕᓂᓗ ᓄᕕᐱᕆ 9-ᖑᓕᖅᐸᑦ.

ᑲᓇᑕᐅᑉ ᒐᕙᒪᒃᑯᖏᑦ ᓄᓇᓕᖕᓂᒃ ᓄᓇᕗᒥ ᑮᓇᐅᔭᖃᖅᑎᑎᓂᐊᖅᐳᑦ ᖁᕕᐊᓱᒍᑎᖃᖁᓪᓗᒋᑦ ᓄᓇᓕᖕᓂ ᑕᒪᑐᒪ ᒥᒃᓵᓄᑦ.

ᑕᒪᒃᑯᐊ ᓄᓇᓕᖕᓂ ᖃᓄᐃᓕᐅᖅᑎᑎᔨᐅᔪᑦ ᑎᑎᕋᐅᔭᖅᑎᑦ ᓴᓇᖑᐊᖅᑎᑦ ᐊᓯᖏᓪᓗ ᖃᐅᔨᒪᑎᑕᐅᒍᑕᐅᓂᐊᖅᐳᑦ ᖃᓄᐃᓕᐅᖁᔭᐅᓗᑎᒡᓗ ᒪᒃᑯᒃᑐᑦ ᐊᓯᖏᓪᓗ ᑕᑯᓐᓇᒐᒃᓴᓂᒃ ᐱᓕᕆᐊᖃᖅᑎᑕᐅᓗᑎᒃ.

ᑲᓇᑕᒥ, ᐊᑐᓂ ᓄᓇᓕᖕᓂ ᖁᕕᐊᓱᒍᑎᖃᕐᓂᐊᕐᓂᖏᓐᓄᑦ ᐊᔾᔨᒌᖏᑦᑑᓂᐊᖅᐳᑦ, ᐊᔾᔨᐅᖏᑦᑐᓂᒃ ᑲᓇᑕᒥᐅᑕᐃᑦ ᑐᓐᖓᓱᒃᑎᑎᓗᑎᒃ ᐃᖃᐃᓕᓴᕐᓂᕐᒧᑦ ᐱᓐᖑᐊᕐᔪᐊᕐᓂᕐᒧᑦ ᓇᓗᓇᐃᒃᑯᑕᒥᒃ ᐃᑯᐊᓛᖅᑐᒥᒃ. ᑕᒪᒃᑯᐊ ᖃᓄᐃᓕᐅᕈᑕᐅᓂᐊᖅᑐᑦ ᑲᓇᑕᒥᐅᓄᑦ ᓴᕆᒪᓱᒍᑕᐅᓂᐊᖅᐳᑦ ᐃᖃᐃᓕᓴᖅᑎᓄᑦ ᐱᓐᖑᐊᖅᑎᓄᑦ, ᐃᓕᖁᓯᑐᖃᖏᓐᓂᒡᓗ ᐱᓕᕆᐊᖃᖅᑎᑕᐅᓗᑎᒃ ᓄᓇᒥᖕᓂᒡᓗ.

"ᕚᓐᑰᕙᒥ 2010-ᖑᓕᖅᐸᑦ ᐱᓐᖑᐊᕐᔪᐊᓕᖅᐸᑕ ᑎᒍᒥᐊᖃᑦᑕᕐᓗᑎᒃ ᐃᑯᐊᓛᖅᑐᒥᒃ ᐊᑯᓂᐊᓛᖑᓂᐊᖅᐳᖅ ᑕᒪᓐᓇ ᐱᓕᕆᐊᕆᔭᐅᓂᖓ ᑕᐃᒪᖓᓕᒫᒥᑦ," ᐅᖃᓚᐅᖅᐳᖅ ᒋᐅᕆ ᓚᓐ, ᒥᓂᔅᑕ ᐱᓐᖑᐊᕐᔪᐊᖅᑐᓕᕆᓂᕐᒧᑦ ᐃᖃᐃᓕᓴᐅᑎᓂᒃ. "ᑖᓐᓇ ᐃᑯᐊᓛᖅᑐᖅ ᑎᒍᒥᐊᖅᑕᐅᓂᐊᖅᖢᓂ 12,000-ᓄᑦ ᐊᒥᓲᓂᖃᖅᑐᓄᑦ 1,000 ᓄᓇᓕᖕᓄᑦ ᑲᓇᑕᒥ. ᑲᓇᑕᒥᐅᑕᐃᑦ ᐃᓚᐅᖁᑦᓯᐊᖅᐸᒃᑲ ᑕᒪᓐᓇ ᓇᓗᓇᐃᒃᑯᑕᖅ ᐱᔾᔪᑎᒋᓪᓗᒍ."

ᑐᑭᓯᒋᐊᒃᑲᓐᓂᕈᒪᔪᑦ ᒐᕙᒪᒃᑯᑦ ᐃᑲᔪᖅᑐᐃᓂᖏᓐᓄᑦ ᐱᓐᖑᐊᕐᔪᐊᕐᓇᐅᓂᐊᖅᑐᒥ 2010-ᒥ ᐃᑯᐊᓛᖅᑐᒥᒃ ᑎᒍᒥᐊᖃᑦᑕᕐᓂᖅ ᐊᒡᔭᖅᓯᖃᑦᑕᕐᓂᖅ ᐱᔾᔪᑎᒋᓪᓗᒍ ᑎᒥᒥᒍᑦ ᐊᔪᕈᑎᖃᖅᑎᓪᓗ ᐱᓐᖑᐊᕐᔪᐊᖃᑕᐅᓂᐊᕐᓂᖏᓐᓄᑦ ᐅᑭᐅᒃᑯᑦ, ᖃᐅᔨᒋᐊᕈᓐᓇᖅᐳᑦ ᖃᕆᑕᐅᔭᒃᑯᑦ ᐅᕗᖓ
www.Canada2010.gc.ca.