ᑲᓇᑕᐅᑉ ᒐᕙᒪᒃᑯᖏᑦ-ᓄᓇᕗᓪᓗ ᐃᖅᑲᓇᐃᔭᖃᑎᒌᖕᓂᐊᕐᓂᖏᑦ ᐱᓕᕆᐊᒃᓴᖅᑖᖅᑎᑎᓗᑎᒃ, ᑮᓇᐅᔭᓕᐅᖅᑎᑎᓇᓱᐊᕐᓗᑎᒡᓗ

July 07, 2009

ᐃᖃᓗᐃᑦ, ᓄᓇᕗᑦ - ᒥᓂᔅᑕ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ, ᓕᐅᓇ ᐊᒡᓗᒃᑲᖅ, ᑲᑎᒪᔨᐅᖃᑕᐅᓪᓗᓂᓗ ᑭᒡᒐᖅᑐᐃᓪᓗᓂ ᓄᓇᕗᒥᐅᓄᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᓐᓄᑦ ᓯᕗᓕᖅᑎ ᐄᕙ ᐋᕆᐊᒃ, ᐅᓪᓗᒥ ᑐᓴᖅᑎᑎᓚᐅᖅᐳᑦ ᓄᓇᓖᑦ ᓄᓇᕗᒥ ᐃᑲᔪᖅᑕᐅᓂᐊᕐᒪᑕ ᑮᓇᐅᔭᑎᒍᑦ $7.2-ᒥᓕᔭᓐᑖᓚᐃᑦ ᐅᖓᑖᓄᑦ ᒐᕙᒪᒃᑯᑦ ᑲᑐᔾᔨᓪᓗᑎᒃ ᑮᓇᐅᔭᖅᑖᖅᑎᑎᓂᐊᕐᒪᑕ ᐱᖁᑎᕐᔪᐊᓕᐅᕐᓗᑎᒃ ᑲᓇᑕᐅᑉ ᒐᕙᒪᒃᑯᖏᑦᑎᒍᑦ ᐱᖁᑎᑖᖅᑐᐃᒍᑎᑎᒍᑦ ᑮᓇᐅᔭᑎᒍᑦ.

ᑲᓇᑕᐅᑉ ᒐᕙᒪᒃᑯᖏᑦ ᓄᓇᕗᓪᓗ ᐊᒻᒪᓗ ᓄᓇᓕᐸᐅᔭᒃᑯᖏᑦ ᐃᖃᓗᐃᑦ ᐊᑐᓂ ᑮᓇᐅᔭᖃᖅᑎᑎᓂᐊᖅᐳᑦ $4748,740-ᓂᒃ ᐋᖅᑭᒃᓱᐃᒍᑕᐅᓂᐊᖅᑐᓂᒃ ᓯᐊᕐᕆᔮᕐᕕᖕᒥᒃ ᐅᑭᐅᒃᑯᑦ ᐱᓐᖑᐊᕐᔪᐊᕐᓂᕐᒧᑦ ᓯᐊᕐᕆᔮᕐᕕᖕᒥᒃ. ᓴᓇᔭᐅᓂᐊᖅᖢᓂᓗ ᓄᑖᖅ ᕼᐊᒻᓚᒃᑯᑦ ᐊᓪᓚᕕᖓᑦ ᑕᓗᕐᔪᐊᓂ ᑮᓇᐅᔭᖃᖅᑎᑕᐅᓂᐊᖅᖢᓂᓗ $2.5-ᒥᓕᔭᓐᑖᓚᓂᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐊᒻᒪᓗ ᑕᐃᒫᑎᒋ ᐊᑭᓖᖕᒥᓗᑎᒃ ᓄᓇᕗᑦ ᒐᕙᒪᒃᑯᖏᑦ. "ᓴᓐᖏᔪᒃᑯᑦ ᓯᕗᓕᖅᑎᐅᓪᓗᓂ ᑲᓇᑕᐅᑉ ᒐᕙᒪᒃᑯᖏᑦᑕ ᓯᕗᓕᖅᑎᖓᑦ ᓯᑎᕕᓐ ᕼᐋᐳ, ᒐᕙᒪᕗᑦ ᓴᓇᑎᑎᓂᐊᖅᐳᑦ ᑮᓇᐅᔭᖃᖅᑎᑎᓗᑎᒡᓗ ᑮᓇᐅᔭᒃᓴᐅᑎᖃᖅᑎᑎᓇᓱᐊᕐᓗᑎᒃ ᐃᖅᑲᓇᐃᔭᒐᒃᓴᖅᑖᖅᑎᑎᓗᑎᒡᓗ ᓄᓇᕗᒥ," ᐅᖃᓚᐅᖅᐳᖅ ᒥᓂᔅᑕ ᐊᒡᓗᒃᑲᖅ. "ᑕᐃᒫᑦᓯᐊᖅ ᑕᐃᒪᓐᓇ ᐱᓕᕆᑎᑎᓂᐊᕐᒪᑕ ᒐᕙᒪᒃᑯᑦ ᑲᑐᔾᔨᑎᒌᒡᓗᑎᒃ, ᑕᐃᒪᓐᓇ ᐱᓕᕆᖃᑎᒌᒍᓐᓇᕐᓂᐊᕋᑦᑕ ᐃᑲᔪᕐᓗᒋᑦ ᓄᓇᕗᒥ ᓄᓇᓖᑦ ᐱᕙᓪᓕᐊᑎᑕᐅᔪᓐᓇᖁᓪᓗᒋᑦ ᒫᓐᓇ ᓯᕗᓂᒃᓴᐅᓂᐊᖅᑐᒥᓗ."

"ᖁᕕᐊᓱᒃᐳᒍᑦ ᐱᓕᕆᖃᑎᒌᒍᓐᓇᕐᓂᐊᕋᑦᑕ ᑲᓇᑕᐅᑉ ᒐᕙᒪᒃᑯᖏᓐᓂᒃ ᑮᓇᐅᔭᓕᐅᖅᑎᑎᓇᓱᐊᕐᓗᑕ ᐱᖁᑎᕐᔪᐊᖅᐳᓪᓗ ᐊᑲᐅᓯᕚᓪᓕᖅᑎᓪᓗᒋᑦ ᐱᐅᓯᕚᓪᓕᖅᑎᓪᓗᒋᑦ," ᐅᖃᓚᐅᖅᐳᖅ ᓯᕗᓕᖅᑎ ᓄᓇᕗᑦ ᒐᕙᒪᒃᑯᖏᓐᓄᑦ ᐋᕆᐊᒃ. "ᐃᖃᓗᖕᓂ ᓄᓇᓕᐸᐅᔭᖅ ᐊᒻᒪᓗ ᕼᐊᒻᓚᒃᑯᖏᑦ ᑕᓗᕐᔪᐊᓂ ᐃᓚᒋᔭᐅᖃᑕᐅᓂᐊᖅᐳᑦ ᐱᖁᑎᕐᔪᐊᓕᐅᖅᑕᐅᓂᕐᒧᑦ."

"ᒐᕙᒪᕗᑦ ᑕᐃᒪᓐᓇ ᑮᓇᐅᔭᖃᖅᑎᑎᓂᐊᕐᓂᖏᑦ ᓄᓇᕗᒥ ᐱᖁᑎᕐᔪᐊᓄᑦ ᓴᓇᑎᑎᓂᐊᖅᐳᑦ ᐊᒥᓱᓂᒃ, ᐃᓅᓯᖃᑦᓯᐊᕈᓐᓇᖁᓪᓗᒋᓪᓗ ᓄᓇᕗᒥᐅᑦ, ᐃᑲᔪᖅᑕᐅᓗᑎᒡᓗ ᐱᕙᓪᓕᐊᓂᕐᒧᑦ ᑮᓇᐅᔭᓕᐅᕐᓂᕐᒧᑦ," ᐅᖃᓚᐅᖅᐳᖅ ᔮᓐ ᐱᐅᑦ, ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᖏᕐᕋᖃᑦᑕᖅᑐᓕᕆᓂᕐᒧᑦ ᐱᖁᑎᕐᔪᐊᓕᕆᓂᕐᒧᓪᓗ ᒥᓂᔅᑕ.

"ᖁᕕᐊᓱᒃᐳᖓ ᑕᒪᒃᑯᐊ ᐱᕙᓪᓕᐊᑎᑕᐅᓂᖏᓐᓄᑦ ᓴᓇᔭᐅᓂᐊᖅᑐᑦ ᐃᑲᔪᖅᑕᐅᓪᓗᑕ ᓄᓇᓕᖕᓄᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓄᑦ," ᐅᖃᓚᐅᖅᐳᖅ ᓗᐊᓐ ᑯᓱᒐᖅ, ᓄᓇᕗᒥ ᒥᓂᔅᑕ ᓄᓇᓕᕆᔨᒃᑯᓐᓄᑦ ᐱᔨᑦᓯᕋᖅᑎᒃᑯᓐᓄᓪᓗ. "ᒫᓐᓇ ᐱᖁᑎᕐᔪᐊᓕᐅᖅᑐᖃᖅᐳᖅ ᐊᒻᒪᓗ ᓂᕆᐅᒍᑎᖃᖅᐳᒍᑦ ᐃᑲᔪᖅᑕᐅᒍᑎᒃᓴᒃᑲᓐᓂᖏᓐᓂᒃ ᓄᓇᓖᑦ ᓯᕗᓂᒃᓴᐅᓂᐊᖅᑐᒥ."

ᑲᓇᑕᐅᑉ ᒐᕙᒪᒃᑯᖏᑦ ᓄᓇᕗᓪᓗ ᐱᓕᕆᖃᑎᒌᒃᐳᑦ ᓴᓇᔭᒃᓴᖅᑖᖅᑎᑎᓂᐊᖅᖢᑎᒃ ᑮᓇᐅᔭᓕᐅᖅᑎᑎᓂᐊᖅᖢᑎᒡᓗ, ᑮᓇᐅᔭᓂᒃ ᐊᑐᖅᐸᓪᓕᐊᓪᓗᑎᒡᓗ ᐃᑲᔪᖅᑕᐅᔪᓐᓇᖁᓪᓗᒋᑦ ᓄᓇᓖᑦ ᐱᖁᑎᑖᖅᑐᖅᑎᑕᐅᓂᕐᒧᑦ. ᑕᒪᕐᒥᒃ ᒐᕙᒪᒃᑯᑦ ᐊᖏᖃᑎᒌᒃᓯᒪᕗᑦ ᐱᓕᕆᖃᑎᒌᖕᓂᕐᒧᑦ ᑕᒪᒃᑯᐊ ᑮᓇᐅᔭᑦ ᑐᐊᕕᕐᓇᖅᑐᒃᑯᑦ ᐊᑐᖅᑕᐅᔪᓐᓇᖁᓪᓗᒋᑦ ᐊᐅᓪᓛᑦᓯᐊᕈᑕᐅᓗᑎᒡᓗ ᓄᓇᓕᖕᓄᑦ ᓄᓇᕗᒥ.

ᑲᓇᑕᐅᑉ ᒐᕙᒪᒃᑯᖏᑦᑕ 2009-ᒥ ᑮᓇᐅᔭᓕᐅᖅᑎᑎᓂᕐᒧᑦ ᐸᕐᓇᒃᓯᒪᒍᑎᖏᑦ ᓱᑲᑦᑐᒃᑯᑦ ᐱᕙᓪᓕᐊᕗᖅ ᐊᖏᒡᓕᕙᓪᓕᐊᓪᓗᓂᓗ ᒫᓐᓇ ᐊᑐᖅᑕᐅᓂᖏᓐᓄᑦ ᑮᓇᐅᔭᑦ $33-ᐱᓕᔭᓐᑖᓚᐃᑦ ᐱᖁᑎᑖᖅᑐᕈᑕᐅᓂᐊᖅᑐᑦ ᑲᓇᑕᓕᒫᒥ ᐊᒻᒪᓗ $12-ᐱᓕᔭᓐᑖᓚᑲᓴᐃᑦ ᓄᑖᓄᑦ ᓴᓇᒍᑕᐅᓂᐊᖅᑐᑦ ᐱᖁᑎᕐᔪᐊᓄᑦ ᐊᕐᕌᒍᓂ ᒪᕐᕉᓂᐊᖅᑐᓂ.

ᑕᒪᒃᑯᐊ ᐅᓂᒃᑳᖅᓯᒪᔪᑦ ᐱᓕᕆᐊᕆᔭᐅᓂᐊᖅᑐᓄᑦ ᓇᓗᓇᐃᔭᖅᑕᐅᓯᒪᓪᓗᑎᒡᓗ ᐱᖁᑎᕐᔪᐊᓕᐅᖅᑕᐅᓂᐊᖅᑐᑦ ᑮᓇᐅᔭᓕᐅᕈᑕᐅᓂᐊᖅᑐᓪᓗ ᐃᓕᖃᓯᐅᑎᓯᒪᕗᑦ.
ᑐᑭᓯᒋᐊᒃᑲᓐᓂᕈᒪᔪᑦ ᑕᒪᑐᒪ ᒥᒃᓵᓄᑦ ᐱᖁᑎᕐᔪᐊᓕᐅᖅᑕᐅᓂᐊᖅᑐᓂᒃ ᓄᓇᕗᒥ, ᖃᐅᔨᒋᐊᕈᓐᓇᖅᐳᑦ ᖃᕆᑕᐅᔭᒃᑯᑦ ᐅᕙᓂ www.creatingjobs.gc.ca.

ᖃᐅᔨᒋᐊᒃᑲᓐᓂᕈᒪᔪᑦ ᑲᓇᑕᒥ ᑮᓇᐅᔭᓕᐅᖅᑎᑎᓂᕐᒧᑦ ᐸᕐᓇᒃᓯᒪᒍᑕᐅᔪᓂᒃ ᖃᐅᔨᒋᐊᕈᓐᓇᖅᐳᑦ ᐅᕙᓂ ᖃᕆᑕᐅᔭᒃᑯᑦ www.actionplan.gc.ca.


ᖃᓄᐃᓕᐅᕐᓂᐊᕐᓂᖏᑦ


ᐱᖁᑎᕐᔪᐊᓕᐅᕐᓗᓂ ᑮᓇᐅᔭᓕᐅᖅᑎᑎᓂᕐᒧᑦ ᓄᓇᕗᒥ ᐸᕐᓇᒃᓯᒪᒍᑕᐅᓂᐊᖅᑐᑦ
ᐱᖁᑎᕐᔪᐊᓕᐅᕐᓗᓂ ᑮᓇᐅᔭᓕᐅᑎᑎᓂᕐᒧᑦ ᓄᓇᕗᒥ ᐸᕐᓇᒃᓯᒪᒍᑕᐅᓂᐊᖅᑐᑦ  (ISF) ᐊᑐᖅᑕᐅᕙᓪᓕᐊᓕᕇᖅᐳᑦ ᓄᓇᕗᒥ. ᒪᕐᕉᒃ ᓴᓇᔭᐅᓂᐊᖅᑐᑦ ᐊᖏᖅᑕᐅᓯᒪᓕᖅᖢᑎᒃ ᑮᓇᐅᔭᖃᖅᑎᑕᐅᓂᐊᖅᖢᑎᒡᓗ $7.2-ᒥᓕᔭᓐᑖᓚᓂᒃ ᒐᕙᒪᒃᑯᑦ ᑲᑐᔾᔨᓗᒃ ᓴᓇᓂᐊᖅᑕᖏᑦ.

ᐱᔾᔪᑎᒋᓪᓗᒍ ᐅᑭᐅᒃᑯᑦ ᐱᓐᖑᐊᕐᔪᐊᕐᓂᕐᒧᑦ ᓯᐊᕐᕆᔮᕐᕕᒃ
ᔪᓚᐃ 7, 2009-ᒥ, ᑲᓇᑕᐅᑉ ᒐᕙᒪᒃᑯᖏᑦ ᓄᓇᕗᓪᓗ, ᐃᖃᓗᖕᓂ ᓄᓇᓕᐸᐅᔭᓪᓗ, ᐊᖏᖃᑎᒌᓚᐅᖅᐳᑦ ᑮᓇᐅᔭᖃᖅᑎᑎᒍᒪᓪᓗᑎᒃ ᐋᖅᑭᒃᓱᖅᑕᐅᒍᑎᒃᓴᖓᓄᑦ ᐅᑭᐅᒃᑯᑦ ᐱᓐᖑᐊᕐᔪᐊᕐᓗᓂ ᓯᐊᕐᕆᔮᕐᕕᖕᒥᒃ.

ᓴᓇᔭᐅᓂᐊᖅᐳᖅ ᐋᖅᑭᒃᓱᖅᑕᐅᓗᓂ ᐊᑐᖅᑕᐅᖃᑦᑕᕈᓐᓇᒃᑲᓐᓂᓕᖁᓪᓗᒍ. ᓯᑯᖓ ᐊᑐᖅᑕᐅᔪᓐᓇᖏᒃᑲᓗᐊᖅᑎᓪᓗᒍ, ᓯᐊᕐᕆᔮᕐᕕᒃ ᐊᑐᖅᑕᐅᖃᑦᑕᖅᐳᖅ ᓱᓕ ᒪᒃᑯᒃᑐᓄᑦ ᐊᒻᒪᓗ ᓄᓇᓕᖕᓂᒥᐅᑦ ᑲᑎᑎᑕᐅᒑᖓᑕ. ᐋᖅᑭᒃᓱᖅᑕᐅᒃᐸᑦ ᐊᑐᖅᑕᐅᓕᕈᓐᓇᕐᓗᓂ ᐃᖃᐃᓕᓴᐅᑎᖃᖅᑎᑕᐅᖃᑦᑕᕈᓐᓇᕐᓂᐊᕐᒪᑕ ᓄᓇᓕᖕᓂᒥᐅᑦ ᐊᒻᒪᓗ ᐱᕙᓪᓕᐊᓂᖃᕐᓗᑎᒃ ᐃᖃᐃᓕᓴᐅᑎᓂᒃ ᐱᓐᖑᐊᕈᑎᓂᒃ, ᓲᕐᓗ ᑖᓂᓯᖑᐊᖅᑐᑦ ᓯᐊᕐᕆᔮᖃᑦᑕᕈᓐᓇᕐᓗᑎᒃ, ᕼᐋᑭᕐᕕᐅᖃᑦᑕᕐᓗᓂᓗ ᐊᒻᒪᓗ ᐊᖅᓴᒧᑦ ᕼᐋᑭᖑᐊᕐᕕᐅᖃᑦᑕᕐᓗᓂ. ᐋᖅᑭᒃᓱᒃᑕᐅᒃᐸᑦ ᓯᐊᕐᕆᔮᕐᕕᖓ ᑮᓇᐅᔭᓕᐅᕈᑕᐅᔪᓐᓇᕐᓗᓂ ᓄᓇᓕᐸᐅᔭᒧᑦ, ᐊᒻᒪᓗ ᐱᓐᖑᐊᕐᕕᐅᖃᑦᑕᕈᓐᓇᓕᕐᓗᓂ ᐃᖃᐃᓕᓴᐅᑎᓂᒃ ᐱᓐᖑᐊᖃᑦᑕᖅᑐᓄᑦ.

ᑲᑎᑦᖢᒋᑦ ᓴᓇᔭᐅᒍᑎᒋᓂᐊᖅᑕᖓ ᓇᓚᐅᑦᓵᖅᑕᐅᓯᒪᓪᓗᓂ ᐊᑭᖃᕋᔭᕐᓂᖓᓄᑦ $2,246,220-ᓂᒃ. ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪ ᐊᓯᖏᑦ ᒐᕙᒪᒃᑯᑦ ᐊᑐᓂ ᑮᓇᐅᔭᖃᖅᑎᑎᓂᐊᖅᖢᑎᒃ $748,740-ᓂᒃ, 1/3-ᖏᓐᓂᒃ ᐊᑭᓖᓗᑎᒃ ᐊᑐᓂ ᓴᓇᔭᐅᓂᕆᓂᐊᖅᑕᖓᓄᑦ, ᓄᓇᓕᖕᓂ ᒐᕙᒪᒋᔭᐅᔪᑦ ᐊᑭᓕᐅᑎᖃᕐᓂᐊᕐᓗᑎᒃ ᐊᒥᐊᒃᑯᖏᓐᓂᒃ.

ᐱᔾᔪᑎᒋᓪᓗᒍ ᑕᓗᕐᔪᐊᓂ ᕼᐊᒻᓚᒃᑯᑦ ᐊᓪᓚᕕᖓ
ᔪᓚᐃ 7, 2009-ᒥ, ᑲᓇᑕᐅᑉ ᒐᕙᒪᒃᑯᖏᑦ ᓄᓇᕗᓪᓗ ᐊᖏᖃᑎᒌᓚᐅᖅᐳᑦ ᑮᓇᐅᔭᓂᒃ ᐃᓕᓯᖃᑎᒌᒍᒪᓪᓗᑎᒃ ᐊᑐᖅᑕᐅᓂᐊᖅᑐᓂᒃ ᑎᑎᕋᐅᔭᖅᑕᐅᒍᑎᒃᓴᖓᓄᑦ ᓴᓇᔭᐅᔪᒃᓴᐅᓂᖓᓄᓪᓗ ᓄᑖᖅ ᕼᐊᒻᓚᒃᑯᑦ ᐊᓪᓚᕕᒃᓴᖓᑦ ᑕᓗᕐᔪᐊᓂ ᓂᕈᐊᖅᑕᐅᓯᒪᓪᓗᓂ ᐃᓂᒃᓴᕆᓂᐊᖅᑕᖓ ᕼᐊᒻᓚᒃᑯᑦ ᑕᐃᑲᓂ ᑲᑎᒪᔨᖏᓐᓄᑦ.

ᐱᐊᓂᒃᑕᐅᒃᐸᑦ ᓴᓇᔭᐅᓂᖓ ᓄᑖᖅ ᐊᑭᖃᕐᓂᐊᖅᑐᖅ $5-ᒥᓕᔭᓐᑖᓚᓂᒃ, ᑕᓗᕐᔪᐊᒥᐅᑦ  ᐊᐅᓚᑦᓯᓂᖏᓐᓄᑦ ᕼᐊᒻᓚᒃᑯᑦ ᐊᓪᓚᕕᖓᓂᒃ ᐆᒻᒪᖁᑎᓂᒃ ᐊᑐᖏᓐᓂᖅᓴᐅᓂᐊᖅᐳᖅ. ᕼᐊᒻᓚᒃᑯᑦ ᑲᑎᒪᔨᖏᑦᑕ ᑲᑎᒪᕕᒃᓴᖓᑦ ᐊᖏᔫᓂᐊᖅᖢᓂ ᐸᕐᓇᒍᑎᖏᓐᓂ ᑎᑎᕋᐅᔭᕐᓂᖏᓐᓂ ᐊᓪᓚᕕᒃᓴᖓᓐᓂ, ᑕᐃᒪᓐᓇ ᑭᒃᑯᑐᐃᓐᓇᐃᑦ ᑕᑯᓐᓇᕆᐊᖅᑐᕈᓐᓇᖁᓪᓗᒋᑦ ᑲᑎᒪᓕᕌᖓᑕ ᕼᐊᒻᓚᒃᑯᑦ ᑲᑎᒪᔨᖏᑦ.

ᑲᓇᑕᐅᑉ ᓄᓇᕗᓪᓗ ᒐᕙᒪᒃᑯᖏᑦ ᐊᑐᓂ ᑮᓇᐅᔭᓂᒃ ᐊᑭᓕᐅᑎᖃᕐᓂᐊᖅᖢᑎᒃ $2.5-ᒥᓕᔭᓐᑖᓚᓂᒃ ᓴᓇᔭᐅᓂᖓᓄᑦ.


ᐱᔾᔪᑎᒋᓪᓗᒍ ᐱᖁᑎᕐᔪᐊᓕᐅᕐᓗᑎᒃ ᑮᓇᐅᔭᓕᐅᖅᑎᑎᓂᐊᕐᓂᖏᑦ
ᑲᓇᑕᒥ ᑮᓇᐅᔭᓕᐅᖅᑎᑎᓇᓱᐊᕐᓂᕐᒧᑦ ᐸᕐᓇᒃᓯᒪᒍᑕᐅᓂᐊᖅᑐᒥ, ᑲᓇᑕᐅᑉ ᒐᕙᒪᒃᑯᖏᑦ ᐱᒋᐊᕈᑎᖃᖅᓯᒪᕗᑦ ᓄᑖᓂᒃ ᑮᓇᐅᔭᓂᒃ $4-ᐱᓕᔭᓐᑖᓚᓂᒃ ᐱᖁᑎᓕᐅᕐᓗᓂ ᑮᓇᐅᔭᓕᐅᖅᑎᑎᒍᑕᐅᓂᐊᖅᑐᓂᒃ ᑮᓇᐅᔭᑦ ᐱᔭᐅᓂᐊᖅᖢᑎᒃ ᑲᓇᑕᒥ ᓄᓇᓖᑦ ᐊᒡᒍᖅᑐᖅᓯᒪᔪᑦ, ᓄᓇᕗᒥᐅᑦ ᓄᓇᓕᖕᓂᒥᐅᓪᓗ ᓴᓇᕕᐅᓗᑎᒃ ᐱᖁᑎᕐᔪᐊᓂᒃ. ᑮᓇᐅᔭᑦ ᐊᑐᐃᓐᓇᐅᑎᑕᐅᓂᐊᖅᖢᑎᒃ ᐊᕐᕌᒍᓄᑦ ᒪᕐᕉᖕᓄᑦ ᓴᓇᔭᐅᓂᐊᖅᖢᑎᒡᓗ ᐊᕐᕌᒍᓂ 2009 ᐊᒻᒪᓗ 2010 ᐃᒡᓗᕐᔪᐊᓕᐅᕐᓇᐅᓂᖓᓂ. ᑖᒃᑯᐊ ᑮᓇᐅᔭᑦ ᐃᓚᒋᔭᐅᓪᓗᑎᒃ ᒫᓐᓇ ᑲᓇᑕᐅᑉ ᒐᕙᒪᒃᑯᖏᑦ ᐱᖁᑎᕐᔪᐊᓕᐅᕐᓂᖏᓐᓄᑦ ᕿᓚᒥᐅᔪᒃᑯᑦ ᑮᓇᐅᔭᒃᓴᐅᑎᒋᔭᐅᑎᑕᐅᓇᓱᐊᖅᖢᑎᒃ. ᐊᒻᒪᓗ ᑮᓇᐅᔭᓕᐅᖅᑎᑦᓯᒃᑲᓐᓂᕈᒪᓪᓗᑎᒃ, ᑖᒃᑯᐊ ᑮᓇᐅᔭᑦ ᐊᑐᖅᑕᐅᓂᐊᖅᖢᑎᒃ ᓴᓇᒋᐊᕐᓂᐊᕐᓂᕐᒧᑦ ᐸᕐᓇᒍᑕᐅᓗᑎᒡᓗ. ᑕᒪᕐᒥᒃ ᑮᓇᐅᔭᑦ $4-ᐱᓕᔭᓐᑖᓚᐃᑦ ᑐᓂᐅᖃᖅᑕᐅᓂᐊᖅᖢᑎᒃ ᐊᕐᕌᒍᓂ 2009-2010 ᐊᒻᒪᓗ 2010-2011-ᓂ. ᑕᒪᒃᑯᐊᓗ ᐱᑕᖃᓕᕇᖅᑐᑦ ᐋᖅᑭᒃᓱᖅᑕᐅᓂᐊᖅᖢᑎᒃ ᑕᒪᒃᑯᐊ ᐱᖁᑎᒋᔭᐅᔪᑦ ᐃᒪᓕᕆᒍᑎᑦ, ᖁᕐᕕᓕᕆᒍᑎᑦ ᐊᓇᓕᕆᒍᑎᓪᓗ, ᐸᓯᓪᓗ, ᐊᖅᑯᑎᕐᔪᐊᓪᓗ, ᐊᖅᑯᑎᓪᓗ, ᐱᖅᑯᓯᑐᖃᓕᕆᕕᐅᔪᓪᓗ, ᒥᓐᖑᐃᖅᓯᕐᕖᓪᓗ ᐊᒻᒪᓗ ᐱᓱᒃᑐᓄᑦ ᐊᖅᑯᑎᒋᔭᐅᕙᒃᑐᑦ. ᓄᓇᕗᒥ ᐱᖁᑎᒋᔭᐅᔪᑦ ᐱᔾᔪᑎᒋᓪᓗᒋᑦ, ᑲᓇᑕᐅᑉ ᓄᓇᕗᓪᓗ ᒐᕙᒪᒃᑯᖏᑦ ᐊᑐᓂ ᑮᓇᐅᔭᖃᖅᑎᑎᓂᐊᖅᐳᑦ 50%-ᓂᒃ ᐊᑭᓕᐅᑕᐅᒋᐊᖃᖅᑐᓂᒃ ᓴᓇᔭᐅᕙᓪᓕᐊᔪᓄᑦ. ᓄᓇᓕᖕᓂ ᒐᕙᒪᒋᔭᐅᔪᑦ, ᑖᒃᑯᐊ ᑐᓂᓯᓂᐊᖅᖢᑎᒃ ᑮᓇᐅᔭᓂᒃ ᑲᓇᑕᐅᑉ ᓄᓇᕗᓪᓗ ᒐᕙᒪᒃᑯᖏᑦ 2/3-ᖏᓐᓂᒃ ᐊᑭᓕᐅᑕᐅᓂᐊᖅᑐᑦ, ᓄᓇᓖᑦ ᐊᒥᐊᒃᑯᖏᓐᓂᒃ ᐊᑭᓖᑎᑕᐅᓂᐊᖅᖢᑎᒃ.