ᑕᓐᑐ ᐲ, ᐋᓐᑎᐅᕆᔪ - ᒥᓂᔅᑕ ᕼᐊᓕᓇ ᔨᐅᕆᔅ, ᒥᓂᔅᑕ (ᐊᕐᓇᐃᑦ ᐱᔾᔪᑎᒋᓪᓗᒋᑦ), ᐅᓪᓗᒥ ᑐᓴᖅᑎᑎᓚᐅᖅᐳᖅ ᐃᑲᔪᖅᑐᐃᓂᕐᒧᑦ ᐊᕐᓇᐃᑦ ᑲᓇᑕᒥ ᑲᑎᒪᔨᖏᓐᓄᑦ ᑮᓇᐅᔭᓕᐅᕋᓱᐊᕐᓂᕐᒧᑦ, ᐱᓕᕆᐊᕆᔭᐅᖁᓪᓗᒋᑦ ᐃᑲᔪᖅᑕᐅᓗᑎᒃ ᐊᕐᓇᐃᑦ ᑮᓇᐅᔭᓕᐅᕐᓂᕐᒧᑦ ᓯᕗᓕᖅᑎᐅᖃᑕᐅᓂᕐᒧᓪᓗ. ᒥᓂᔅᑕ ᔨᐅᕆᔅ ᐅᖃᐅᓯᖃᓚᐅᖅᐳᖅ ᐊᕐᓇᐃᑦ ᑲᑎᒪᔨᖏᑦ ᑲᓇᑕᒥ ᑮᓇᐅᔭᓕᐅᕐᓂᕐᒧᑦ ᐊᒃᓱᕈᖅᓯᒪᓂᖏᓐᓄᑦ ᐊᑭᓕᖅᑐᖅᑕᐅᖏᑦᖢᑎᒃ ᓇᓗᓇᐃᒃᑯᑕᖅᑖᖅᑎᑎᖃᑦᑕᕐᓂᖏᓐᓄᑦ ᖁᔭᓐᓇᒦᖅᑕᐅᒍᑎᑎᒍᑦ.

ᑖᓐᓇ ᐱᓕᕆᐊᕆᔭᐅᔪᖅ ᑕᐃᒍᖅᑕᐅᔪᖅ ᓯᕗᓕᖅᑎᐅᖃᑕᐅᓂᖅ ᐊᒻᒪ ᐊᕐᓇᐃᑦ ᑮᓇᐅᔭᓕᐅᕐᓂᕐᒧᑦ ᐱᓕᕆᐊᖃᕐᓂᖏᑦ: ᐱᕙᓪᓕᐊᓂᕐᒧᑦ ᐱᔾᔪᑎᖃᖅᑐᖅ, ᐱᓕᕆᑎᑎᓂᐊᖅᐳᖅ ᐊᕐᓇᓂᒃ 8-ᓂᒃ, ᓄᓇᓕᖕᓂ, ᑮᓇᐅᔭᓕᐅᕐᓂᕐᒧᑦ ᐱᕙᓪᓕᐊᑎᑎᓂᕐᒥᒃ ᑯᐸᒃᒥ, ᓄᓇᕗᒥ, ᐋᓐᑎᐅᕆᔪᒥ, ᐃᐊᐴᑕᒥ ᐊᒻᒪᓗ ᐳᕆᑎᔅᑲᓚᑉᐱᐊᒥ, ᐃᑲᔪᖅᑕᐅᔪᓐᓇᖁᓪᓗᒋᑦ 570 ᐊᕐᓇᓂᒃ ᑮᓇᐅᔭᓕᐅᑦᓯᐊᖏᑦᑐᓂᒃ ᐱᓕᕆᕙᓪᓕᐊᖁᓪᓗᒋᑦ, ᓯᕗᓕᖅᑎᐅᓂᕐᒧᑦ ᑮᓇᐅᔭᓕᐅᖅᐸᓪᓕᐊᓂᕐᒧᓪᓗ ᐱᕙᓪᓕᐊᑎᑕᐅᔪᓐᓇᖁᓪᓗᒋᑦ.

"ᓴᓇᖁᑎᖃᖅᑎᑎᓂᖅ ᐊᕐᓇᓂ ᑮᓇᐅᔭᓕᐅᕈᑎᖃᑦᓯᐊᓕᖁᓪᓗᒋᑦ ᑕᐃᒪᓐᓇ ᓯᓚᕐᔪᐊᒥ ᐱᕙᓪᓕᐊᓂᖃᖅᑎᑕᐅᔪᓐᓇᕐᓂᐊᖅᐳᑦ ᓴᓐᖏᓕᖅᑎᕙᓪᓕᐊᖁᓪᓗᒋᑦ ᐊᔪᖅᓴᖏᓐᓂᖅᓴᐅᔪᓐᓇᖁᓪᓗᒋᑦ," ᐅᖃᓚᐅᖅᐳᖅ ᒥᓂᔅᑕ ᔪᐊᕆᔅ. "ᐅᐱᒋᕙᒃᑲ ᐊᕐᓇᐃᑦ ᑮᓇᐅᔭᓕᐅᖅᑎᑎᓂᕐᒧᑦ ᑲᑎᒪᔨᖏᑦ, ᐱᓕᕆᕙᓪᓕᐊᑎᓪᓗᒋᑦ ᓴᓐᖏᓕᖅᑎᑎᓇᓱᐊᕐᓗᑎᒃ ᐊᕐᓇᓂᒃ ᐃᑲᔪᕈᓐᓇᖁᓪᓗᒋᑦ ᐊᕐᓇᐃᑦ ᑮᓇᐅᔭᓕᐅᖅᐸᓪᓕᐊᓂᕐᒧᑦ."

"ᑕᐃᒪᓐᓇ ᓯᕗᓕᖅᑎᖑᖅᑎᑎᓇᓱᐊᕐᓗᓂ ᑮᓇᐅᔭᓕᐅᕐᓂᕐᒧᓪᓗ ᐱᓇᓱᐊᖅᑎᑕᐅᓗᑎᒃ ᐊᕐᓇᐃᑦ, ᐃᓚᐅᑎᑕᐅᑦᓯᐊᕈᓐᓇᖅᐳᑦ ᑮᓇᐅᔭᓕᐅᕈᑎᓄᑦ ᑲᓇᑕᒥ," ᐅᖃᓚᐅᖅᐳᖅ ᒥᔅ ᕋᓱᓚᓐ ᓚᑭᐅ, ᐊᖓᔪᖃᕆᔭᐅᔪᖅ ᐊᕐᓇᐃᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᑲᑎᒪᔨᖏᓐᓄᑦ. "ᓯᕗᓕᖅᑎᐅᓂᕐᒧᑦ ᐊᕐᓇᐃᑦ ᑮᓇᐅᔭᓕᐅᕐᓂᕐᒧᓪᓗ ᐱᓕᕆᖃᑕᐅᓗᑎᒃ: ᐱᕙᓪᓕᐊᑎᑕᐅᑦᓯᐊᕐᓗᑎᒃ ᐱᓕᕆᑎᑎᒍᑦᑕ, ᑮᓇᐅᔭᓕᐅᕈᑎᖃᑦᓯᐊᕈᓐᓇᕐᓂᖅᓴᐅᓂᐊᖅᐳᑦ ᓯᕗᓕᖅᑎᐅᖃᑕᐅᓗᑎᒡᓗ ᑮᓇᐅᔭᓕᐅᑦᓯᐊᖏᑦᑐᑦ ᐊᕐᓇᐅᑦ ᐊᑐᕐᓗᑎᒃ ᐊᕐᓇᐃᑦ ᑲᑎᒪᔨᖏᓐᓂᒃ ᓄᓇᓕᖕᓂ ᐱᕙᓪᓕᐊᑎᑕᐅᓗᑎᒃ ᓴᓐᖏᓕᖅᐸᓪᓕᐊᓗᑎᒡᓗ ᐱᕙᓪᓕᐊᑎᑕᐅᓗᑎᒃ."

ᑕᒪᓐᓇ ᐱᓕᕆᐊᕆᔭᐅᓂᐊᖅᑎᓪᓗᒍ, ᑲᑎᒪᔨᑦ ᑮᓇᐅᔭᖅᑖᖅᑎᑕᐅᓯᒪᕗᑦ $444,845-ᓂᒃ ᑕᖅᑭᓄᑦ 24-ᖑᓂᐊᖅᑐᓄᑦ ᑕᐃᒪᓐᓇ ᑮᓇᐅᔭᓕᐅᕈᑎᖃᖅᐸᓪᓕᐊᓂᕐᒧᑦ ᓯᕗᓕᖅᑎᐅᓂᕐᒧᓪᓗ ᐱᓕᕆᐊᖃᕈᓐᓇᖁᓪᓗᒋᑦ. ᑲᑎᒪᔨᑦ ᐱᓕᕆᖃᑎᖃᕐᓂᐊᖅᐳᑦ 8-ᓂᒃ ᐊᕐᓇᓂᒃ ᓄᓇᓕᖕᓂ ᑕᒪᓐᓇ ᐱᓕᕆᐊᕆᔭᐅᔪᓐᓇᖁᓪᓗᒍ ᑯᐸᒃᒥ, ᓄᓇᕗᒥ, ᐋᓐᑎᐅᕆᔪᒥ, ᐃᐊᐴᑕᒥ ᐳᕆᑎᔅᑲᓚᑉᐱᐊᒥᓗ ᐃᑲᔪᕐᓂᐊᕐᓗᑎᒃ ᑮᓇᐅᔭᓕᐅᑦᓯᐊᖏᑦᓂᒃ 570-ᓂᒃ ᐊᕐᓇᓂᒃ ᐱᓕᕆᐊᒃᓴᖅᑖᖅᐸᓪᓕᐊᔪᓐᓇᖁᓪᓗᒋᑦ.

ᐊᕐᓇᐃᑦ ᑮᓇᐅᔭᓕᐅᖅᐸᓪᓕᐊᓂᖏᓐᓄᑦ ᑲᑎᒪᔨᖏᑦ ᑲᓇᑕᒥ ᑲᑐᔾᔨᖃᑎᒌᒃᐳᑦ ᓄᓇᓕᖕᓂ ᑕᐃᒪᓐᓇ ᐱᕙᓪᓕᐊᑎᑎᓂᕐᒧᑦ ᐊᕐᓇᓂᒃ ᐱᔾᔪᑎᖃᖅᖢᑎᒃ. ᐱᕙᓪᓕᐊᑎᑎᒍᒪᔪᑦ ᐊᕐᓇᓂᒃ ᓄᓇᓕᖕᓂ ᐊᔪᖅᓴᕈᓐᓃᖅᐸᓪᓕᐊᖁᓪᓗᒋᑦ ᐊᑲᐅᓯᕚᓪᓕᖅᑎᑎᓇᓱᐊᖅᖢᑎᒡᓗ ᐃᓅᓯᖏᓐᓂᒃ, ᐃᓚᒌᑦ ᐊᒻᒪᓗ ᓄᓇᓕᖏᑦ.

ᓯᕗᓕᖅᑎᖑᖅᓴᕐᓂᕐᒧᑦ ᑮᓇᐅᔭᑦ ᐊᕐᓇᐃᓪᓗ ᑮᓇᐅᔭᓕᐅᕐᓂᕐᒧᑦ ᐊᑐᖅᑕᐅᓂᐊᖅᑐᑦ: ᐱᕙᓪᓕᐊᑎᑎᓂᕐᒧᓪᓗ ᐱᔭᐅᓂᐊᐳᑦ ᐊᕐᓇᐃᑦ ᓄᓇᓕᖕᓂ ᑮᓇᐅᔭᖅᑖᕆᖃᑦᑕᖅᑕᖏᓐᓂᒃ ᐊᕐᓇᓄᑦ ᑐᕌᖅᑐᓂᑦ ᑲᓇᑕᒥ. ᑖᒃᑯᐊ ᑮᓇᐅᔭᑦ ᑲᑐᔾᔨᖃᑎᒌᓄᑦ ᐱᒋᔭᐅᓪᓗᑎᒃ ᐱᓕᕆᐊᖃᕈᑕᐅᖃᑦᑕᖅᐳᑦ ᓄᓇᓕᖕᓂ, ᓄᓇᓖᑦ ᐊᕕᒃᑐᖅᓯᒪᓂᖏᓐᓂ ᐊᖓᔪᖃᖃᕐᕕᐅᔪᓂ, ᖃᓪᓗᓈᑦ ᓄᓇᖓᓐᓂᓗ ᐊᕕᒃᑐᖅᓯᒪᔪᓂ/ᓄᓇᕗᒥ ᓄᓇᑦᓯᐊᒥᓗ ᔪᑳᓐᒥᓗ ᑲᓇᑕᓕᒫᒥᓗ.

ᐊᕐᓇᐃᑦ ᑲᑎᒪᔨᖏᑦ ᑲᓇᑕ ᑲᓇᑕᐅᑉ ᒐᕙᒪᒃᑯᖏᓐᓂ ᑎᒥᐅᔪᑦ ᐱᓕᕆᐊᖃᖅᑐᑦ ᐊᔾᔨᒌᒃᑎᑎᒍᒪᓪᓗᑎᒃ ᐊᕐᓇᓂᒃ, ᐊᒻᒪᓗ ᐃᓚᐅᑎᑕᐅᑦᓯᐊᖁᓪᓗᒋᑦ ᑮᓇᐅᔭᓕᐅᕐᓂᕐᒧᑦ, ᐃᓅᓯᖃᑦᓯᐊᕐᓂᕐᒧᑦ ᐃᓱᒪᖅᓱᖃᑕᐅᓂᕐᒧᓪᓗ ᑲᓇᑕᒥ.