November 18, 2009

ᒥᓂᔅᑕ ᔨᒻ ᕕᓕᐅᕋᑎ, ᑮᓇᐅᔭᓕᕆᓂᕐᒧᑦ ᒥᓂᔅᑕ, ᐊᒻᒪ ᒥᓂᔅᑕ ᓕᐅᓇ ᐊᒡᓗᒃᑲᖅ, ᒥᓂᔅᑕ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ, ᐅᓪᓗᒥ ᐃᖃᓗᖕᓂ ᑐᓴᖅᑎᑎᓚᐅᖅᐳᑦ ᐃᖃᓗᖕᓂ ᑲᑎᒪᕐᔪᐊᕐᓂᐊᕐᒪᑕ G7 ᑮᓇᐅᔭᓕᕆᓂᕐᒧᑦ ᒥᓂᔅᑕᐃᑦ ᑕᒪᕐᒥᒃ 2010-ᒥ (ᐊᒻᒪ ᑮᓇᐅᔭᒃᑯᕕᓕᕆᓂᕐᒧᑦ ᑲᑎᒪᔨᑦ ᒐᕙᓄᐃᑦ). ᓄᓇᕗᒥ ᓯᕗᓪᓕᖅᐸᐅᖃᑕᐅᓂᐊᖅᐳᑦ ᐱᒻᒪᕆᐅᔪᓂᒃ ᓯᕗᓪᓕᖅᐹᒥ ᑲᑎᒪᕐᔪᐊᕐᓇᐅᓂᐊᖅᑐᖅ ᓯᓚᕐᔪᐊᒥ ᑲᓇᑕᒦᓐᓂᐊᖅᖢᓂ 2010-ᒥ, ᐊᒻᒪᓗ G8 ᐊᒻᒪᓗ G20 ᓯᕗᓕᖅᑎᑦ ᑲᑎᒪᕐᔪᐊᕐᓂᐊᖅᖢᑎᒃ ᕼᐊᑦᕕᐊ, ᐋᓐᑎᐅᕆᔪᒥ ᔫᖑᓕᖅᐸᑦ, ᐊᒻᒪᓗ G8 ᑲᑎᒪᕐᔪᐊᕐᓂᐊᖅᖢᑎᒃ ᓯᓚᐅᑉ ᐊᑭᐊᓂ ᒥᓂᔅᑕᐃᑦ ᒐᑎᓄ, ᑯᐸᒃᒥᑦ ᒫᑦᓯᐅᓕᖅᐸᑦ.

"ᕕᕗᐊᕆᒥ ᑲᑎᒪᓕᖅᐸᑕ ᑲᑎᒪᑐᐃᓐᓇᕐᓂᐊᖅᐳᑦ ᐱᓕᕆᐊᖃᓪᓚᕆᒡᓗᑎᒃ," ᐅᖃᓚᐅᖅᐳᖅ ᒥᓂᔅᑕ ᕕᓕᐅᕋᑎ. "ᑮᓇᐅᔭᒃᓴᐅᑎᑦ ᐊᓯᔾᔨᖅᐸᓪᓕᐊᑐᐃᓐᓇᖅᑎᓪᓗᒋᑦ ᓯᓚᕐᔪᐊᒥ G7 ᐱᕙᓪᓕᐊᑎᑕᐅᖏᓐᓇᕐᓂᐊᖅᐳᖅ, ᐸᐃᑉᐹᓂᒃ ᐱᔾᔪᑎᖃᓗᐊᖏᓪᓗᑕ ᑭᒃᑯᑐᐃᓐᓇᕐᓂᒃ ᐱᔾᔪᑎᖃᕐᓗᑕ - ᑐᓴᐅᒪᒍᑎᑐᐃᓐᓇᐅᓂᐊᖏᑉᐳᑦ ᐊᖏᕈᑎᑐᐃᓐᓇᐅᓂᐊᖏᑦᖢᑎᒡᓗ, ᑲᑎᒪᓪᓚᕆᖃᑎᒌᒡᓗᑕ ᑲᔪᓯᒍᑎᖃᕐᓗᑕᓗ ᑮᓇᐅᔭᓕᐅᕐᓂᕐᒧᑦ ᐱᕙᓪᓕᐊᒍᑎᒃᓴᓂᒃ ᑕᒪᒃᑯᐊ ᓯᓚᕐᔪᐊᒥᐅᓄᑦ ᐱᓕᕆᐊᕆᔭᐅᒋᐊᖃᕐᒪᑕ ᐊᒃᓱᕈᕈᑕᐅᓗᑎᒃ."

"ᐱᒻᒪᕆᐅᓕᖅᑎᓪᓗᒍ ᐊᒃᓱᕈᕐᓇᓕᖅᑎᓪᓗᒍᓗ ᐅᓪᓗᒥᐅᓕᖅᑐᖅ ᑕᐃᒪᓐᓇ ᐃᓂᖃᑦᓯᐊᕐᓂᐊᖅᐳᒍᑦ ᐱᔾᔪᑎᒋᔭᐅᔪᓂᒃ ᓯᓚᕐᔪᐊᒥᐅᓂᒃ ᑲᑎᒪᔾᔪᑎᖃᕐᓗᑕ  ᑕᒪᒃᑯᐊ ᐊᒃᓱᕈᕈᑎᒋᒋᐊᖃᖅᑕᕗᑦ ᑕᒪᑦᑕ ᐱᔾᔪᑎᒋᓗᒋᑦ," ᐅᖃᓚᐅᖅᐳᖅ ᒥᓂᔅᑕ ᐊᒡᓗᒃᑲᖅ. "ᑕᐃᑦᓱᒪᓂᑐᖃᖅ ᐃᓄᐃᑦ ᓄᓇᕗᒥᐅᑦ ᑲᓇᑕᐅᑉ ᐅᑭᐅᖅᑕᖅᑐᖓᓂᒥᐅᑕᐅᓪᓗᑎᒃ ᐃᑲᔪᖅᑎᒌᖃᑦᑕᐃᓐᓇᕐᒪᑕ ᐊᒃᓱᕈᕈᑕᐅᔪᓂᒡᓗ ᐊᓂᒍᐃᓯᒪᖃᑦᑕᖅᖢᑎᒃ. ᓴᓐᖏᓂᖏᑦ ᒪᑭᑕᐃᓐᓇᕈᓐᓇᕐᓂᖏᓪᓗ ᑕᒫᓂᒥᐅᑦ ᓇᓗᐃᕈᑕᐅᓂᐊᕐᒪᑦ ᑲᓇᑕᒥᐅᑕᐅᖃᑕᐅᓂᕗᑦ, ᑕᐃᒪᓐᓇ ᖁᕕᐊᓱᓪᓚᕆᒃᐳᖓ G7 ᑲᑎᒪᕐᔪᐊᖅᑎᑎᓂᐊᕐᒪᑕ ᓯᕗᓪᓕᕐᒥᓗ ᖃᐅᔨᑎᑕᐅᓗᑎᒃ ᑲᑎᒪᖃᑕᐅᔪᑦ ᑕᐃᑲᓂ.
ᑲᑎᒪᔾᔪᑎᖃᕐᓂᐊᖅᐳᑦ ᐊᒥᓱᓂᒃ ᓯᓚᕐᔪᐊᒥ ᑲᑎᒪᕐᔪᐊᖅᑎᑕᐅᓪᓗᑎᒃ ᒐᕙᒪᒃᑯᑦ ᐱᓕᕆᐊᕆᖃᑦᑕᖅᓯᒪᔭᖏᓐᓂᒃ ᑮᓇᐅᔭᓕᐅᕋᓱᐊᕐᓂᕐᒧᑦ ᑮᓇᐅᔭᓕᕆᓂᕐᒧᓪᓗ ᐊᑲᐅᖏᓕᐅᕈᑎᒋᔭᐅᔪᑦ ᐱᔾᔪᑎᒋᓪᓗᒋᑦ ᐃᒪᓐᓇ:

• ᖃᓄᖅ ᑮᓇᐅᔭᓕᕆᓂᕐᒧᑦ ᐱᓕᕆᐊᖃᖅᑐᑦ ᐋᖅᑭᒃᑕᐅᓯᒪᒋᐊᖃᕐᒪᖔᑕ;
• ᓴᓐᖏᓕᖅᑎᑕᐅᒋᐊᖃᕐᓂᖏᑦ ᓯᓚᕐᔪᐊᒥ ᑮᓇᐅᔭᓕᕆᒍᑕᐅᔪᑦ ᑮᓇᐅᔭᓕᐅᕈᑎᒃᓴᓄᑦ ᐃᑲᔪᕋᓱᐊᕐᓂᖅᓴᐅᖁᓪᓗᒋᑦ, ᓯᓚᕐᔪᐊᒥᐅᓂᒃ ᐃᑲᔪᕋᓱᐊᕈᓐᓇᖁᓪᓗᒋᓪᓗ ᐅᓪᓗᒥᐅᓕᖅᑐᖅ; ᐊᒻᒪ
• ᖃᓄᖅ ᒪᑭᑕᑦᓯᐊᕈᑎᒃᓴᒃᑯᑦ ᓯᓚᕐᔪᐊᒥ ᑮᓇᐅᔭᑎᒍᑦ ᒪᑭᑉᐸᓪᓕᐊᔪᓐᓇᖁᓪᓗᒋᑦ.

ᐱᕙᓪᓕᐊᔪᓕᕆᔨᑦ ᐊᓯᖏᓪᓗ ᖃᓄᖅ ᐃᖏᕐᕋᔭᒍᑕᐅᓂᐊᖅᑐᑦ ᐱᔾᔪᑎᒋᓪᓗᒋᑦ ᕕᕗᐊᕆᒥ G7 ᑲᑎᒪᕐᔪᐊᕐᓂᐊᕐᓂᖏᓐᓄᑦ ᑐᓴᖅᑎᑎᑕᐅᒍᑕᐅᓂᐊᖅᐳᑦ ᐅᕙᑦᓯᐊᕈᒃᑲᓐᓂᖅ.