ᑲᓇᑕ ᐊᓪᓗᕆᐊᕈᑎᖃᒃᑲᓐᓂᒻᒪᕆᑦᑐᑦ ᓇᓄᓕᕆᓂᕐᒧᑦ ᓄᖑᓗᐊᑦᑕᐃᓕᒪᑎᑦᓯᓂᕐᒧᑦ

October 30, 2009

ᑲᖏᖅᖢᔅᓱᐊᖅ, ᑲᓛᔅᖡᑦ ᓄᓈᑦ  -- ᑲᓇᑕᐅᑉ ᐊᕙᑎᓕᕆᔨᕐᔪᐊᒃᑯᓐᓄᑦ ᒥᓂᔅᑕᖓᑦ, ᔨᒻ ᐳᕋᓐᑎᔅ, ᓄᓇᕗᑦ ᒥᓂᔅᑕᖓᑦ ᐊᕙᑎᓕᕆᔨᒃᑯᓐᓄᑦ, ᑖᓂᐊᓕ ᓲᓴᒃ, ᐊᒻᒪᓗ ᑲᓛᔅᖡᑦ ᓄᓈᓐᓂ ᒥᓂᔅᑕᖓᑦ  ᐃᒪᕐᒥᐅᑕᓕᕆᔨᒃᑯᓐᓄᑦ, ᐊᖑᓇᓱᑦᑐᓕᕆᓂᕐᒧᑦ ᐱᕈᖅᓴᐃᔪᓕᕆᓂᕐᒧᓪᓗ, ᐋᓐ ᕼᐊᓐᓴᓐ, ᐅᓪᓗᒥ ᐅᖃᐅᓯᖃᖅᑲᐅᔪᑦ ᐊᑎᓕᐅᖅᑕᐅᓂᖓᓂᒃ ᐊᖏᖃᑎᒌᒍᑎ ᒐᕙᒪᒃᑯᖏᓐᓄᑦ ᑲᓇᑕᐅᑉ, ᓄᓇᕗᑦ, ᐊᒻᒪᓗ ᑲᓛᔅᖡᑦ ᓄᓈᓐᓂ ᓇᓗᓇᐃᖅᑕᐅᓯᒪᖁᓪᓗᒍ ᓴᐳᒻᒥᔭᐅᓯᒪᒋᐊᖃᕐᓂᖏᑦ ᑕᒪᒃᑮᓐᓄᑦ ᓇᓐᓄᕝᕕᐅᕙᑦᑐᑦ.
 
ᑐᑭᓯᐅᒪᖃᑎᒌᓐᓂᕐᒧᑦ ᐊᖏᖃᑎᒌᒍᑦ ᑐᑦᓯᕋᕈᑕᐅᔪᖅ ᓴᖅᑭᖅᑕᐅᖁᓪᓗᒍ ᑲᓇᑕᒥ - ᑲᓛᔅᖡᑦ ᓄᓈᓐᓂ ᑲᑐᔾᔨᔨᐅᓗᑎᒃ ᑲᑎᒪᔨᓂᒃ ᐊᑐᓕᖁᔨᔾᔪᑎᓕᐅᖃᑦᑕᕋᔭᖅᑐᓂᒃ ᖃᓄᑎᒋ ᓇᓐᓄᕝᕕᐅᖃᑦᑕᕈᓐᓇᕐᒪᖔᑕ, ᐊᒡᒍᖅᑕᐅᑦᓯᐊᕈᓐᓇᕐᒪᖔᑕᓗ ᓇᓐᓄᕝᕕᐅᖃᑦᑕᕐᓂᖏᑦ. ᑲᑐᔾᔨᔨᐅᓗᑎᒃ ᑲᑎᒪᔨᐅᓂᐊᖅᑐᑦ, ᐃᓚᒋᔭᖃᕐᓗᑎᒃ ᑭᒡᒐᖅᑐᐃᔨᓂᒃ ᑲᓇᑕᒥ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᓄᓇᕗᑦ ᑐᙵᕕᒃᑯᓐᓂᒃ ᕿᑭᖅᑖᓗᒃ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓂᒃ, ᑐᑭᒧᐊᖅᑎᑦᓯᖃᑦᑕᕋᔭᕐᒥᔪᑦ ᖃᐅᔨᓴᖅᑕᐅᔪᑦᓴᓂᒃ, ᐃᓕᖅᑯᓯᑐᖃᒃᑯᑦ ᖃᐅᔨᒪᓂᐅᔪᓂᒃ, ᐊᐅᓚᑦᓯᓂᕐᕙᑦᑐᓂᒃ ᑐᓴᕆᐊᖅᑎᑦᓯᖃᑦᑕᕐᓂᖏᓐᓂᓪᓗ ᖃᓄᐃᓕᐅᕈᑕᐅᕙᑦᑐᓂᒃ.
 
ᓄᓇᖃᖅᑳᖅᑐᒥᓃᑦ ᒐᕙᒪᓕᒫᓪᓗ, ᓴᖅᑭᓚᐅᖅᓯᒪᙱᑦᑐᒥᒃ ᐊᑦᓱᕉᑎᖃᕐᓂᐊᖅᑐᑦ ᓄᖑᓗᐊᖅᑕᐅᑦᑕᐃᓕᖁᓪᓗᒋᑦ ᐊᐅᓚᑕᐅᑦᓯᐊᕈᓐᓇᖁᓪᓗᒋᓪᓗ ᓇᓄᐃᑦ ᑲᓇᑕᒥ. ᐊᑎᓕᐅᖅᑕᐅᓂᖓ ᑐᑭᓯᐅᒪᖃᑎᒌᓐᓂᕐᒧᑦ ᐊᖏᖃᑎᒌᒍᑎ ᐅᓪᓗᒥ ᓴᖅᑭᕈᑕᐅᔪᖅ ᐱᒻᒪᕆᐊᓗᒻᒥᒃ ᐊᓪᓗᕆᐊᕈᑎᐅᔪᒥᒃ ᐊᑦᓱᕉᑎᖃᐃᓐᓇᕐᓂᖏᓐᓄᑦ ᓴᐳᒻᒥᔭᐅᓯᒪᖁᓪᓗᒋᑦ ᓇᓄᐃᑦ.
 
“ᑲᓇᑕᐅᑉ ᒐᕙᒪᒃᑯᖏᑦ ᐊᑦᓱᕉᑎᖃᕈᒪᔪᑦ ᑲᑐᔾᔨᖃᑎᖃᕈᒪᓪᓗᑎᒃ ᓴᐳᒻᒥᔭᐅᒍᓐᓇᖁᓪᓗᒋᑦ ᑲᓇᑕᒥ ᐃᓕᓴᕐᓇᕈᑕᐅᔪᒥᒃ - ᑲᓇᑕᓕᒫᒥᓗ - ᓇᓗᓇᐃᒃᑯᑕᖓᓂᒃ. ᖃᐅᔨᒪᔭᐅᔪᒻᒪᕆᐅᔪᖅ ᐆᒪᔪᖅ, ᐊᔾᔨᐅᙱᓐᓂᖓ ᓴᙱᔪᐊᓘᓂᖓᓗ ᐱᐅᔪᒻᒪᕆᐊᓘᒻᒪᑦ ᐃᖅᑲᐃᑎᓐᓇᒻᒪᕆᑦᑐᒥ ᑲᓇᑕ ᓄᓇᕐᔪᐊᓕᒫᒥ ᐅᑭᐅᖅᑕᖅᑐᒥᐅᑕᐅᖃᑕᒻᒪᕆᐅᓂᖏᓐᓂᒃ. ᑐᑭᓯᐅᒪᖃᑎᒌᓐᓂᕐᒧᑦ ᐊᖏᖃᑎᒌᒍᑎ ᓇᓗᓇᐃᖅᓯᓯᒪᒍᑕᐅᓂᐊᖅᑐᖅ ᓄᖑᓗᐊᖅᑕᐅᑦᑕᐃᓕᖁᓪᓗᒋᑦ ᐅᓚᑕᐅᑦᓯᐊᕈᓐᓇᖁᓪᓗᒋᓪᓗ ᑳᒃᕕᔾᔪᐊᕐᒥ ᓴᓐᓂᕈᑎᐅᓪᓗ ᐃᒪᖓᓂ ᓇᓄᐃᑦ ᓯᕗᓂᑦᓴᑎᓐᓄᑦ,” ᐅᖃᖅᓯᒪᔪᖅ ᒥᓂᔅᑕ ᐳᕋᓐᑎᔅ.
 
“ᓄᖑᓗᐊᑦᑕᐃᓕᒪᑎᑦᓯᓂᖅ ᐊᐅᓚᑦᓯᑦᓯᐊᕐᓂᕐᓗ ᓇᓄᕐᓂᒃ ᐱᒻᒪᕆᐊᓘᒻᒪᑦ ᐊᑯᑭᑦᑑᑉ ᓄᓇᖓᓄᑦ, ᐃᓕᖅᑯᓯᖅᑎᒍᑦ, ᐃᓅᓯᓕᕆᓂᕐᒧᑦ ᑮᓇᐅᔭᓕᐅᕈᑕᐅᒍᓐᓇᕐᓂᖏᓐᓄᓪᓗ ᐱᔾᔪᑕᐅᓪᓗᓂ. ᑕᐃᒪᐃᒻᒪᑦ ᐅᐱᒍᓱᑦᑐᖓ
ᐊᑎᓕᐅᖃᑕᐅᒍᓐᓇᕋᒪ ᓯᕗᓪᓕᖅᐹᒥ ᑐᑭᓯᐅᒪᖃᑎᒌᓐᓂᕐᒧᑦ ᐊᖏᖃᑎᒌᒍᑎᒧᑦ ᑲᓛᔅᖡᑦ ᓄᓈᓐᓄᑦ, ᑲᓇᑕᒧᑦ ᓄᓇᕗᒻᒧᓪᓗ. ᐱᒻᒪᕆᐅᒋᒐᑦᑎᒍ ᑲᑐᔾᔨᓗᓂ ᐊᐅᓚᑦᓯᔨᐅᖃᑎᒌᓐᓂᕐᒧᑦ ᐊᖏᖃᑎᒌᒍᑏᑦ ᐋᖅᑭᑦᑕᐅᖃᑦᑕᖁᓪᓗᒋᑦ ᓄᓇᓕᕐᔪᐊᓄᑦ ᓇᓐᓄᕝᕕᖃᖃᑎᒌᑉᐸᑦᑐᓄᑦ ᓇᓗᓇᐃᖅᑕᐅᓯᒪᖁᓪᓗᒍ ᑕᒪᒃᑮᓐᓂᒃ ᓇᓐᓄᕝᕕᐅᖃᑦᑕᕐᓂᖏᑦ
ᐅᖓᑖᓅᖅᓯᒪᖁᓇᒍ ᐊᒥᓱᕐᖑᐸᓪᓕᐊᒍᓐᓇᐃᓪᓕᓗᑎᒃ. ᐱᒻᒪᕆᐅᒻᒥᔪᖅ ᐃᓕᖅᑯᓯᑐᖃᖅᑎᒍᑦ ᖃᐅᔨᒪᓂᐅᔪᑦ ᐊᑐᖅᑕᐅᒋᐊᖃᕐᓂᖏᑦ ᖃᐅᔨᖅᓴᑐᓕᕆᓂᕐᓗ ᐊᑕᐅᑦᓯᒃᑯᑦ. ᑲᓛᔅᖡᑦ ᓄᓈᓐᓂ ᓂᕆᐅᑦᓯᐊᖅᑐᑦ
ᑲᔪᓯᒍᑎᖃᕐᓂᐊᕐᓂᕐᒥᓂᒃ ᐊᑦᓱᕉᑎᖃᕐᓗᑎᒃ ᐊᑐᓕᖅᑎᑦᓯᕙᓪᓕᐊᓂᕐᒥᒃ ᐊᐅᓚᑦᓯᔨᐅᖃᑎᒌᓐᓂᕐᒧᑦ ᐊᖏᖃᑎᒌᒍᑎᒥᒃ ᑲᓇᑕᒧᑦ / ᓄᓇᕗᒻᒧᓪᓗ”, ᐅᖃᖅᓯᒪᔪᖅ ᐋᓐ ᕼᐊᓐᓴᓐ ᑲᓛᔅᖡᑦ ᓄᓈᓐᓂ ᒥᓂᔅᑕ ᐃᒪᕐᒥᐅᑕᓕᕆᓂᕐᒧᑦ, ᐊᖑᓇᓱᑦᑐᓕᕆᓂᕐᒧᑦ ᐱᕈᖅᓴᐃᔪᓕᕆᓂᕐᒧᓪᓗ.
 
“ᑖᒃᑯᐊ ᑐᑭᓯᐅᒪᖃᑎᒌᓐᓂᕐᒧᑦ ᐊᖏᖃᑎᒌᒍᑎᑎᒍᑦ ᒪᑐᐃᖅᓯᒍᑕᐅᔪᖅ ᓯᕗᓂᑦᓴᑎᓐᓂ ᑲᑐᔾᔨᖃᑎᒌᒍᑎᖃᕈᒪᓂᕐᒥᒃ ᓯᕗᓪᓕᐅᔾᔭᐅᖁᔭᐅᓯᒪᓗᐊᖅᑐᓂᒃ ᓇᓄᕐᓂᒃ ᐊᐅᓚᑦᓯᓂᕐᒧᑦ,” ᐅᖃᖅᓯᒪᔪᖅ ᓄᓇᕗᒻᒥ ᐊᕙᑎᓕᕆᔨᒃᑯᓐᓄᑦ ᒥᓂᔅᑕ, ᑖᓂᐊᓕ ᓲᓴᒃ. “ᑐᑭᒧᐊᑦᓯᖃᑎᒌᓐᓂᖅ ᐊᑦᓱᕉᑎᒋᔭᑦᑎᓐᓂᒃ ᖃᓄᖅ ᖃᐅᔨᓴᖅᑕᐅᖃᑦᑕᕆᐊᖃᕐᓂᖏᓐᓂᒃ

ᑕᐅᖅᓰᒍᑎᖃᖃᑦᑕᓂᕐᒧᓪᓗ ᖃᐅᔨᒪᓂᐅᔪᓂᒃ ᓯᓚᑐᓂᖅᐹᒃᑯᑦ ᐊᐅᓚᑦᓯᓂᕐᒧᑦ ᐃᓱᒪᓕᐅᕈᑎᖃᕈᓐᓇᖃᑦᑕᓛᖅᑐᒍᑦ ᓇᓄᖁᑎᑦᑎᓐᓄᑦ. ᓂᕆᐅᑦᓯᐊᖅᑐᒍᑦ ᖃᐅᔨᓴᕐᓂᐊᕐᓂᑎᓐᓂᒃ ᐊᒥᓱᓂᒃ ᑲᑐᔾᔨᔨᐅᓪᓗᑎᒃ ᑲᑎᒪᔨᐅᔪᑦ
ᐱᓕᕆᐊᕆᓂᐊᖅᑕᖏᓐᓂᒃ ᑕᑯᔪᒪᔭᑦᑎᓐᓄᑦ ᓯᕗᓂᑦᓴᑎᓐᓂ ᓇᓄᕐᓂᒃ ᓄᖑᓗᐊᑦᑕᐃᓕᑎᑦᓯᓂᕐᒧᑦ.”
 
ᑕᕝᕙᓂ ᐊᕐᕌᒍᒥ ᐱᒋᐊᕋᑖᖅᑎᓪᓗᒍ, ᒥᓂᔅᑕ ᐳᕋᓐᑎᔅ ᑐᙵᓱᑦᑎᑦᓯᓚᐅᖅᑐᖅ ᑲᓇᑕᓕᒫᒥ ᑲᑎᒪᑎᑦᓯᓪᓗᓂ ᓇᓄᓕᕆᓂᕐᒧᑦ ᐊᕕᑦᑐᖅᓯᒪᓂᐅᔪᓃᖔᖅᑐᑦ, ᖃᓪᓗᓈᓂ ᐊᕕᑦᑐᖅᓯᒪᓂᖏᓐᓂᒃ, ᐆᒪᔪᓕᕆᔨᕐᔪᐊᑦ ᑲᑎᒪᔨᖏᓐᓂᒃ ᐊᓯᖏᓐᓂᓪᓗ ᐊᐅᓚᑦᓯᔨᐅᖃᑕᐅᓂᕐᒧᑦ ᓄᖑᓗᐊᑦᑕᐃᓕᒪᑎᑦᓯᓂᕐᒧᓪᓗ ᐱᓕᕆᐊᑦᓴᖃᖅᑎᐅᖃᑕᐅᔪᓂᒃ ᓴᐳᒻᒥᔭᐅᓯᒪᖁᓪᓗᒋᑦ ᑲᓇᑕᒥ 15,500-ᕈᔪᐃᑦ ᓇᓄᐃᑦ. ᑲᑎᒪᑎᓪᓗᒋᑦ, ᐱᑕᖃᕆᐊᖃᕐᓂᖓᓂᒃ ᐊᖏᖃᑎᒌᒍᑎᒥᒃ ᐊᐅᓚᑦᓯᔨᐅᖃᑎᒌᓐᓂᕐᒧᑦ ᓇᓄᕝᕕᒋᖃᑦᑕᖅᑕᖏᓐᓂᒃ ᓇᓗᓇᐃᖅᑕᐅᓚᐅᖅᓯᒪᔪᖅ ᓯᕗᓪᓕᐅᔾᔭᐅᖁᔭᐅᓪᓗᓂ.
 
ᑲᓇᑕᒥ 13-ᖑᑎᓪᓗᒋᑦ ᐃᓛᒃᑰᖅᑐᑦ ᓇᓄᖃᕐᕕᖏᑦ, ᑳᒃᕕᔾᔪᐊᕐᒥ ᓴᓐᓂᕈᑎᐅᓪᓗ ᐃᒪᖓᓂ ᓇᓄᖏᑦ ᓇᓐᓄᕝᕕᐅᕙᑦᑐᑦ ᓄᓇᕗᒻᒥᐅᓄᑐᐊᖅ ᐊᑯᑭᑦᑐᕐᒥᐅᑐᐊᓄᓪᓗ.