ᒥᑦᑎᒪᑕᓕᒃ, ᓄᓇᕗᑦ —ᐃᑦᑐᒃᑯᕕᒻᒥ ᑲᑎᒪᔨ ᑎᐊᓂᔅ ᐹᑐᓴᓐ, ᐊᒻᒪᓗᒃᑕᐅᖅ ᒥᓂᔅᑕ ᓗᐊᓐ ᑯᓱᒐᖅ, ᒥᓂᔅᑕᖓ ᓄᓇᓕᓐᓂ ᒐᕙᒪᒃᑯᓂᓪᓗ ᐱᔨᑦᑎᕋᖅᑎᒃᑯᑦ, ᐅᓪᓗᒥ ᓇᓗᓇᐃᖅᓯᕘᒃ ᒐᕙᒪᒋᔭᖏᒃ ᑲᑐᔾᔨᓂᒃᑯᑦ ᑮᓇᐅᔭᖃᑦᑎᑦᑎᓂᐅᓴᔫᒃ $4.564 ᒥᓕᐊᓐ ᓴᓇᔭᐅᓂᖓᓄᑦ ᓄᑖᖅ ᐱᓐᖑᐊᕕᒃᓴᖅ ᐊᓐᓂᑭᑦᑐᐊᔪᒃᕕᒃ ᒥᑦᑎᒪᑕᓕᒃᒥ. ᑖᓐᓇ ᐱᓕᕆᐊᒃᓴᐅᔪᖅ ᐃᑲᔪᖅᑐᐃᓂᐊᖅᑐᖅ ᐱᒻᒪᕆᐅᔪᒥᒃ ᒪᑭᒪᐅᑎᖃᕋᓱᐊᕐᓂᕐᒧᑦ ᐊᒻᒪᓗ ᐃᓅᓯᓕᕆᓂᕐᒧᑦ ᐱᕈᖅᐸᓪᓕᐊᓂᖓᓂᒃ ᐊᕕᑦᑐᖅᓯᒪᔪᓂ.
“ᒐᕙᒪᕗᑦ, ᓯᕗᒧᐊᑦᑎᖃᑦᑐᑎᒃ ᓯᑏᕙ ᕼᐋᐳᒥᒃ, ᐃᓕᑕᖅᓯᕗᖅ ᑮᓇᐅᔭᖃᑦᑎᑦᑎᓂᕐᒥᒃ ᐱᖁᑎᕐᔪᐊᒥᒃ ᐃᖅᑲᓇᐃᔮᓂᒃ ᓴᖅᑮᓂᐊᕐᒪᑦ, ᐊᐅᓚᑦᔭᐃᓗᓂ ᑮᓇᔭᓕᐅᕋᓱᐊᕐᓂᕆᔭᑦᑎᓐᓂᒃ ᐊᒻᒪᓗ ᐃᑲᔪᖅᑐᕐᓗᒋᑦ ᓄᓇᓖᑦ,” ᐅᖃᑦᑐᖅ ᐃᑦᑐᒃᑯᕕᒻᒥ ᑲᑎᒪᔨ ᐲᑕᓴᓐ. “ᐅᐱᒍᓱᑉᐳᖓ ᒐᕙᒪᑦᑕ ᐊᖏᖅᓯᒪᓂᖓᓄᑦ ᐱᓕᕆᓇᓱᐊᖅᑐᑎᒃ ᐅᑭᐅᖅᑕᖅᑐᒥ ᐊᑐᖅᑕᐅᓇᓱᐊᖅᑐᒧᑦ. ᐱᖁᑎᕐᔪᐊᑦ ᑮᓇᐅᔭᖃᑦᑎᑕᐅᔪᑦ, ᓲᕐᓗ ᑖᓐᓇ ᓄᑖᖅ ᐱᓐᖑᐊᓂᕐᒧᑦ ᐊᓐᓂᑭᑦᑐᐊᕐᔪᒃᕕᒃ, ᓴᓐᖓᑦᑎᕆᓂᐊᕐᒪᑦ ᐃᓅᓯᓕᕆᓂᕐᒥᒃ ᐊᒻᒪᓗ ᑮᓇᐅᔭᓕᐅᕋᓱᐊᕈᓐᓇᓂᕐᒥᒃ ᐃᓘᓇᖏᓐᓄᑦ ᐃᓄᓐᓄᑦ ᐊᒻᒪᓗ ᐃᓚᒌᓄᑦ ᓄᓇᖃᑦᑐᑦ ᐊᒻᒪᓗ ᐱᓕᕆᔪᓄᑦ ᒥᑦᑎᒪᑕᓕᒃᒥ.”
“ᐊᒥᓱᓂᒃ ᐱᕕᒃᓴᖃᕝᕕᐅᓂᐊᕐᒪᑕ ᐃᓅᓱᒃᑐᓄᑦ ᐃᓚᐅᔪᓐᓇᕐᓗᑎᒃ ᐱᓐᖑᐊᖅᑐᓕᕆᓂᕐᒧᑦ ᖃᓄᐃᓕᐅᕐᓂᐅᕙᑦᑐᓄᑦ ᓲᕐᓗ ᕼᐋᑭ, ᐊᓐᓂᑭᑦᑐᐊᔪᒃᑐᑦ ᐅᕝᕙᓘᓐᓃᑦ ᑰᓕᒃᑐᓄᑦ,” ᐅᖃᑦᑐᓂ ᒥᓂᔅᑕ ᑯᓱᒐᖅ. “ᐊᓯᒃᑲᓐᓂᖏᑦᑕᐅᖅ ᐱᓕᕆᐊᑦ ᐊᒻᒪᓗ ᖃᓄᐃᓕᐅᕐᓂᐅᔪᑦ ᐊᔪᓐᓇᕐᔮᕈᓐᓃᕐᒪᑕ ᑕᕝᕙᓂ ᓄᑖᒥ ᐊᓐᓂᑭᑦᑐᐊᔪᒃᕕᒻᒥ ᐊᕐᕌᒍᓗᒃᑖᖅ.”
ᒥᑦᑎᒪᑕᓕᒃᒥ ᐊᓐᓂᑭᑦᑐᐊᔪᒃᕕᖓ ᐊᑐᖅᑕᐅᓂᐊᖅᑐᖅ ᐊᕐᕌᒍᓗᒃᑖᖅ, ᕼᐋᑭᒧᑦ ᐊᒻᒪᓗ ᐊᓯᖏᓐᓄᑦ ᓂᓚᖓᓂ ᐱᓐᓂᖑᐊᕐᓂᐅᔪᑦ ᐅᑭᐅᒃᑯᑦ ᐊᒻᒪᓗ ᐊᓯᖏᑦ ᐱᓐᖑᐊᕐᓂᐅᔪᑦ ᐊᐅᔭᒃᑯᑦ. ᓴᓇᔭᐅᓂᖓ ᑖᒃᓱᒪ ᐊᓐᓂᑭᑦᑐᐊᕐᔪᒃᕕᐅᑉ ᓇᓗᓇᐃᖅᑕᐅᓚᐅᖅᑐᖅ ᓄᓇᕗᑦ 2009-2010 ᐊᑭᑐᔪᖅᑐᕈᑎᓄᑦ ᐸᕐᓇᐅᑎᖓᓂ, ᑖᒃᑯᑎᒎᓇ ᑲᓇᑕᐅᑉ ᐊᕕᑦᑐᖅᓯᒪᓂᖏᑦ-ᓄᓇᕗᑦᒦᑦᑐᓄᑦ ᑮᓇᐅᔭᖏᑎᒍᑦ.
ᑖᒃᑯᑎᒎᓇ ᑲᓇᑕᐅᑉ ᐊᕕᑦᑐᖅᓯᒪᓂᖏᑦ-ᓄᓇᕗᑦᒦᑦᑐᓄᑦ ᑮᓇᐅᔭᖏᑎᒍᑦ ᐊᖏᖃᑎᒌᒍᑎᒃᑯᑦ, ᐊᑎᓕᐅᖅᑕᐅᓚᐅᖅᑐᖅ ᔫᓐ 5, 2008-ᒥ, ᓄᓇᕗᑦ ᑮᓇᐅᔭᖅᑖᓂᐊᖅᑐᖅ ᐃᒪᓐᓇᓂᒃ $182.68 ᒥᓕᐊᓐ ᑲᓇᑕᐅᑉ ᒐᕙᒪᒃᑯᖏᓐᓂᒃ ᐱᖁᑎᕐᔪᐊᓄᑦ ᓯᕗᓪᓕᐅᔾᔭᐅᓯᒪᔪᓄᑦ ᓲᕐᓗ ᐃᒥᖅ, ᐅᐊᑦᑕᑯ, ᐊᑐᒃᑲᓐᓂᕈᓐᓇᖅᑐᓂᒃ ᐆᒪᖅᑯᑎᒥᒃ, ᐊᕕᑦᑐᖅᓯᒪᔪᓂ ᐊᒻᒪᓗ ᓄᓇᓕᓐᓂ ᖃᖓᑕᓲᒃᑯᕖᑦ, ᐊᒻᒪᓗᒃᑕᐅᖅ ᐊᑐᕆᐊᑦ ᐊᑦᑕᓇᐃᖅᓯᒪᔪᑦ, ᐊᒻᒪᓗ ᐱᓐᖑᐊᕐᓂᕐᒧᑦ ᐱᖁᑎᕐᔪᐊᑦ.
ᓄᓇᕗᑦ ᒐᕙᒪᒃᑯᑦ ᐱᓕᕆᖃᑎᖃᑦᑐᑦ ᒐᕙᒪᑐᖃᒃᑯᓐᓂᑦ ᐱᖁᑎᕐᔪᐊᓄᑦ ᑮᓈᐅᔭᐃᑦ ᐊᑐᖅᑕᐅᔪᓐᓇᖁᓪᓗᒋᑦ ᓯᕗᓪᓕᐅᔾᔭᐅᔪᒪᔪᓄᑦ ᓄᓇᕗᓗᒃᑖᒥ.
ᑲᓇᑕᐅᑉ ᒐᕙᒪᒃᑯᖏᑕ ᒪᑭᒪᐅᑎᖃᕐᓂᕐᒧᑦ ᐱᓕᕆᐊᖃᕐᓂᕐᒧᑦ ᐸᕐᓇᐅᑎᖓ ᓱᒃᑲᓕᔪᒃᑯᑦ ᐊᒻᒪᓗ ᐊᖏᓪᓕᕚᓪᓕᑎᑦᑎᔪᖅ ᐅᓪᓗᒥᐅᔪᖅ ᒐᕙᒪᑐᖃᒃᑯᑦ ᑮᓇᐅᔭᖏᓐᓂᒃ $33 ᐱᓕᐊᓐ ᐱᖁᑎᕐᔪᐊᓄᑦ ᐃᒪᓐᓇᐸᓗᐃᑦ $12 ᐱᓕᐊᓐ ᓄᑖᓄᑦ ᐱᖁᑎᕐᔪᐊᓄᑦ ᐱᕚᓪᓕᕈᑎᔅᓴᐃᑦ ᑮᓇᐅᔭᐃ ᐊᕐᕌᒎᓄᑦ ᒪᕐᕉᓐᓄᑦ.
ᑐᑭᓯᒃᑲᓐᓂᕈᒪᔪᖃᕈᓂ ᐱᖁᑎᕐᔪᐊᓂᒃ ᐱᓕᕆᐊᒃᓴᖃᕐᓂᕐᒧᑦ ᓄᓇᕗᑦᒥ, ᑕᑯᓂᐊᓚᐅᕐᕆᑦ ᐅᕙᓂ
www.creatingjobs.gc.ca.
ᖃᐅᔨᒃᑲᓐᓂᕈᒪᒍᕕᑦ ᒥᒃᓵᓄᑦ ᑲᓇᑕᐅᑉ ᒪᑭᒪᐅᑎᖃᕐᓂᕐᒧᑦ ᐱᓕᕆᐊᖃᕐᓂᕐᒧᑦ ᐸᕐᓇᐅᑎᖓᓂ, ᑕᑯᓂᐊᓚᐅᕐᕆᑦ ᐅᕗᖓ
www.actionplan.gc.ca.
