ᐃᖃᓗᑦ, ᓄᓇᕗᑦ - ᓄᓇᕗᒥᐅᑦ ᐃᑲᔪᖅᑕᐅᓂᖅᓴᐅᓂᐊᓕᖅᐳᑦ ᐱᕚᓪᓕᖅᑎᑕᐅᒃᑲᓐᓂᕐᓂᐊᕐᒪᑦ ᕿᓂᒃᑯᑦ ᐱᑐᒃᓯᒪᒍᑦ ᖃᕆᑕᐅᔭᒃᑯᑦ, ᐱᓕᕆᖃᑎᒌᒡᓗᑎ ᑲᓇᑕᐅᑉ ᒐᕙᒪᒃᑯᖏᑦ, ᓄᓇᕗᒥᓗ ᐱᑐᒃᓯᒪᒍᑎᓕᕆᔨᒃᑯᑦ ᐱᕙᓪᓕᐊᔪᓕᕆᓂᕐᒧᑦ ᑯᐊᐳᕇᓴᒃᑯᑦ (NBDC), ᐊᒻᒪᓗ SSi Micro, ᐊᐅᓚᑦᓯᔨᐅᖃᑦᑕᖅᑐᑦ ᕿᓂᕐᒥᒃ.
ᒥᓂᔅᑕ ᓕᐅᓇ ᐊᒡᓗᒃᑲᖅ, ᑲᓇᑕᐅᑉ ᒐᕙᒪᒃᑯᖏᓐᓂ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᒥᓂᔅᑕ, ᐊᒻᒪᓗ ᑎᐊᕈ ᐅᕼᐅᑲᓐᓄᐊᒃ, ᐃᒃᓯᕙᐅᑕᕆᔭᐅᔪᖅ (NBDC)-ᑯᓐᓄᑦ, ᐊᒻᒪ ᔨᕝ ᐱᓕᑉ, ᐊᖓᔪᖃᕆᔭᐅᔪᖅ SSi Micro-ᑯᓐᓄᑦ, ᑐᓴᖅᑎᑎᓚᐅᖅᐳᑦ ᑮᓇᐅᔭᖅᑐᖅᑎᒋᓗᑎᒃ $1,500,000 ᓄᑖᖑᖅᑎᑕᐅᓂᐊᕐᒪᑕ ᕿᓂᖅ ᐱᐊᓂᒃᑕᐅᓂᐊᕐᓗᓂ ᑎᓴᐱᕆ 11-ᒥ. ᑲᓇᑕᐅᑉ ᒐᕙᒪᒃᑯᖏᑦ ᑮᓇᐅᔭᖅᑐᕈᑎᖃᓚᐅᖅᐳᑦ $750,000-ᓂᒃ ᑕᒪᓐᓇ ᓄᑖᖑᖅᑎᑕᐅᔪᓐᓇᖁᓪᓗᒍ, ᐊᖏᓂᖅᓴᒃᑯᑦ ᑲᓇᑕᐅᑉ ᒐᕙᒪᒃᑯᖏᑦ ᑮᓇᐅᔭᖃᖅᑎᑎᓂᐊᖅᐳᑦ $21.6-ᒥᓕᔭᓐᑖᓚᓂᒃ. SSi Micro-ᑯᑦ ᐊᑐᒐᒃᓴᒥᖕᓂᒃ ᐃᓕᓯᓚᐅᖅᐳᑦ ᐊᔾᔨᖏᓐᓂᒃ ᑲᓇᑕᐅᑉ ᒐᕙᒪᒃᑯᖏᑦᑕ ᐊᑭᓕᐅᑎᖏᓐᓂᒃ $750,000-ᓂᒃ. ᑕᒪᓐᓇ ᐱᓕᕆᐊᕆᔭᐅᓂᐊᕐᓂᖓ ᐃᓚᖓᒍᑦ, ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪᓗ SSi Micro-ᑯᑦ ᑮᓇᐅᔭᖅᑐᕈᑎᖃᕐᓂᐊᖅᐳᑦ $18.5 -ᒥᓕᔭᓐᑖᓚᓂᒃ ᓂᐅᕕᕐᓂᐊᖅᖢᑎᒃ ᖁᒻᒧᐊᒃᑎᑕᐅᓯᒪᔪᒥᒃ.
"ᒐᕙᒪᕗᑦ , ᓯᕗᓕᖅᑎᖃᖅᖢᑎᒃ ᓯᑎᕙᓐ ᕼᐋᐳᒥᒃ, ᖃᐅᔨᒪᕗᑦ ᑮᓇᐅᔭᑎᒍᑦ ᐃᑲᔪᖅᐸᑕ ᐱᖁᑎᓄᑦ ᐱᓕᕆᐊᒃᓴᖅᑖᕈᑕᐅᓂᐊᕐᒪᑕ, ᑮᓇᐅᔭᒃᓴᐅᑎᒃᓴᖃᖅᑎᑕᐅᓕᕐᓗᑎᒡᓗ ᐃᓅᓯᖅ ᐱᕚᓪᓕᕐᓗᓂᓗ," ᐅᖃᓚᐅᖅᐳᖅ ᒥᓂᔅᑕ ᐊᒡᓗᒃᑲᖅ. "ᑕᐃᒪᓐᓇ ᓄᑖᖑᖅᑎᑕᐅᓂᐊᕐᓗᑎᒃ ᐱᓕᕆᒍᑎᖏᑦ ᓄᓇᕗᒥᐅᑦ ᖃᕆᑕᐅᔭᒃᑰᕈᓐᓇᕐᓂᖅᓴᐅᑎᑕᐅᓂᐊᖅᐳᑦ ᑮᓇᐅᔭᒃᑯᕕᓕᕆᒍᑎᓂᒃ, ᐃᓕᓐᓂᐊᕐᓂᕐᒥᒃ, ᐋᓐᓂᐊᖅᑐᓕᕆᔭᐅᓂᕐᒥᒃ ᐊᒻᒪᓗ ᓇᖕᒥᓂᖅ ᐱᓕᕆᐊᒃᓴᖃᖅᑐᑦ."
"ᑕᒪᒃᑯᐊ ᐱᐊᓂᒃᑕᐅᒃᐸᑕ ᓄᑖᖑᖅᑎᑕᐅᔪᑦ ᓄᓇᕗᒥᐅᑦ ᑕᒪᕐᒥᒃ ᓄᓇᓕᖃᖅᑐᑦ 25-ᓂ ᑐᑭᓯᐅᒪᒍᑎᒃᓴᓂᒃ ᐱᓕᕆᐊᖃᕐᓂᖅᓴᐅᓂᐊᖅᐳᑦ, ᑕᐃᒪᓐᓇ ᐊᑭᓕᖅᑐᐃᒃᑲᓐᓂᖏᓪᓗᑎᒃ ᕿᓂᒃᑯᑦ," ᐅᖃᓚᐅᖅᐳᖅ ᒥᔅᑕ ᐅᕼᐅᑲᓐᓄᐊᒃ. "SSi Micro-ᑯᑦ ᐋᖅᑭᒃᓯᓯᒪᓂᐊᓕᖅᑎᓪᓗᒋᑦ ᖁᒻᒧᐊᒃᑎᑕᐅᓯᒪᔪᒥᒃ ᑮᓇᐅᔭᖅᑎᑕᐅᓂᐊᖏᑉᐳᑦ, ᑕᐃᒪᓐᓇᓗ ᑮᓇᐅᔭᐃᔭᖅᑎᑕᐅᖏᓐᓂᖅᓴᐅᖃᑕᐅᓗᑎᒃ ᓄᓇᕗᒥᐅᑦ.
"ᑕᐃᒪᓐᓇ ᐱᑐᒃᓯᒪᒍᑎᖃᖅᑎᑎᔨᐅᓪᓗᑎᒃ, SSi Micro-ᑯᑦ ᖁᕕᐊᓱᒃᐳᑦ ᓇᖕᒥᓂᖃᖅᖢᑎᒃ ᑕᐃᒪᓐᓇ ᓯᕗᓪᓕᖅᐸᐅᑎᑎᓂᕐᒥᖕᓂᒃ ᕿᓂᒃᑯᓐᓂᒃ," ᐅᖃᓚᐅᖅᐳᖅ ᒥᔅᑕ ᐱᓕᑉ. "ᐊᒥᓱᐃᑦ ᐃᓄᐃᑦ ᖃᐅᔨᒪᖏᑦᑐᒃᓴᐅᒐᓗᐊᖅᐳᑦ ᑭᓯᐊᓂ ᕿᓂᖅ ᓯᓚᕐᔪᐊᒥᐅᓂ ᐃᓚᒋᔭᐅᖃᑕᐅᕗᖅ ᐊᔪᖏᓐᓂᖓᓄᑦ ᕙᐃᔭᖃᖏᑦᖢᓂ ᖁᒻᒧᐊᒃᑎᑕᐅᓯᒪᔪᒃᑯᑦ ᐊᐅᓚᑕᐅᓪᓗᓂ ᐱᑐᒃᓯᒪᒍᑕᐅᓂᖓᓄᑦ, ᐅᐱᑦᓯᐊᖅᐳᒍᓪᓗ ᑕᐃᒪᓐᓇ."
ᓯᕗᓪᓕᖅᐹᒥ ᑮᓇᐅᔭᐃᔭᕈᑕᐅᓚᐅᖅᑐᖅ ᐋᖅᑭᒃᓱᐃᒍᑦ ᐊᑐᕈᓐᓇᖅᑎᑎᓚᐅᕐᒪᑦ ᐱᑐᒃᓯᒪᔪᓂᒃ 2000-ᓂᒃ, ᑭᓯᐊᓂ ᐊᑐᖅᑕᐅᒍᒪᓗᐊᕐᓂᑯᐊᓄᑦ ᕿᓂᖅ, ᐊᒥᓱᖑᖅᑐᒻᒪᕆᐅᓚᐅᕐᒪᑕ, ᓱᒃᑲᐃᓕᕈᑕᐅᓕᖅᖢᓂᓗ ᐱᑐᒃᓯᒪᔪᓄᑦ. ᑕᐃᒪᓐᓇ ᑮᓇᐅᔭᐃᔭᕈᑕᐅᒃᑲᓐᓂᖅᑐᖅ ᐊᑐᖅᑕᐅᔪᓐᓇᕐᓂᐊᓕᖅᐳᖅ ᐊᒥᓲᓂᖅᓴᓄᑦ ᐊᑐᖅᑕᐅᔪᓐᓇᖅᓯᓗᓂ ᐊᒥᓲᓂᖃᖅᑐᓄᑦ 6800 ᔫᓐ 2012-ᖑᓕᖅᐸᑦ, ᑕᐃᒪᓐᓇᓗ ᐱᑐᒃᓵᓕᔪᓐᓇᕐᓂᖅᓴᐅᓗᑎᒃ, ᓱᑲᓐᓂᖅᓴᒃᑯᓪᓗ ᐊᒻᒪᓗ ᐱᔨᑦᓯᕋᖅᑕᐅᓂᖅᓴᐅᓕᕐᓗᑎᒃ.
ᓄᑖᖑᖅᑎᑕᐅᔪᖅ ᐊᔪᖏᓐᓂᖅᓴᐅᒍᑕᐅᓂᐊᖅᑐᕐᓗ ᐱᑐᒃᓯᒪᔪᓄᑦ ᑕᐃᒪᓐᓇ ᐊᖏᓂᖅᓴᐅᓪᓗᑎᒃ ᐱᓕᕆᐊᕆᔭᐅᓂᐊᖅᐳᑦ ᐊᕐᕌᒍᓂ ᓯᑕᒪᓂ ᑮᓇᐅᔭᖃᖅᑎᑕᐅᓗᑎᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐊᐅᒐᓯ 2008-ᖑᓚᐅᖅᑐᒥ ᐱᓂᐊᕐᓂᕋᑕᒍᑕᐅᓯᒪᓪᓗᓂ ᐋᖅᑭᒋᐊᖅᑕᐅᓂᐊᕐᓂᖏᓐᓄᑦ ᑕᒪᒃᑯᐊ ᐱᑐᒃᓯᒪᒍᑎᒃᑯᑦ ᓄᓇᕗᒥ ᐊᑯᓐᓂᖏᓐᓂ 2009 ᐊᒻᒪ 2010.
ᑲᓇᑕᐅᑉ ᒐᕙᒪᒃᑯᖏᓐᓂᑦ ᑮᓇᐅᔭᑦ ᐊᑐᖅᑕᐅᓂᐊᖅᑐᑦ ᑕᒡᕗᖓ ᑲᓇᑕᒥ ᐸᕐᓇᒃᓯᒪᒍᑎᖃᕐᓂᖏᓐᓄᑦ ᐱᖁᑎᓂᒃ ᑮᓇᐅᔭᖃᖅᑎᑎᒍᑎᓂᖔᖅᐳᑦ (CSIF) ᐃᓚᒋᔭᐅᖃᑕᐅᓪᓗᓂ ᑲᓇᑕᒥ ᖁᒻᒧᐊᒃᑎᑕᐅᓯᒪᔪᒃᑰᕈᑎᓄᑦ ᐋᖅᑭᒃᓱᖅᑕᐅᒍᑎᓄᑦ ᐊᖏᕈᑕᐅᓯᒪᓪᓗᓂᓗ ᑐᓂᐅᖃᖅᑕᐅᓂᐊᖅᐳᑦ ᓄᓇᕗᒥ ᐱᑐᒃᓯᒪᒍᑎᒃᑯᑦ ᐱᕙᓪᓕᐊᔪᓕᕆᓂᕐᒧᑦ ᑯᐊᐳᕇᓴᒃᑯᓐᓄᑦ (NBDC).
ᓄᓇᕗᒥ ᐱᑐᒃᓯᒪᒍᑎᒃᑯᑦ ᐱᕙᓪᓕᐊᔪᓕᕆᓂᕐᒧᑦ ᑯᐊᐳᕇᓴᒃᑯᓐᓄᑦ NBDC ᑮᓇᐅᔭᓕᐅᕈᑎᖃᖏᑉᐳᑦ ᑲᑐᔾᔨᖃᑎᒌᖑᓪᓗᑎᒃ ᑲᓇᑕᐅᑉ ᒐᕙᒪᒃᑯᖏᑦᑎᒍᑦ ᓇᓗᓇᐃᒃᑯᑕᖃᖅᑎᑕᐅᓪᓗᑎᒃ ᑯᐊᐳᕇᓴᐅᓪᓗᑎᒃ ᑲᑎᒪᔨᖏᑦ ᑭᒡᒐᖅᑐᐃᓪᓗᑎᒃ ᓄᓇᓕᖕᓂᒃ, ᓇᖕᒥᓂᖅ ᐱᓕᕆᕕᖃᖅᑐᓂᒃ ᐊᒻᒪᓗ ᐊᑭᑐᓗᐊᖏᑦᑐᓂᒃ ᐱᑐᒃᓯᒪᒍᑎᖃᖅᑐᓕᕆᔨᓄᑦ ᓇᖕᒥᓂᖅ ᐱᓕᕆᕕᖃᖅᑐᒧᓪᓗ ᐱᔨᑦᓯᕋᐅᑕᐅᓪᓗᓂ ᑕᒪᐃᓐᓂ ᓄᓇᓕᖕᓂ ᓄᓇᕗᒥ.
ᑐᑭᒋᐊᒃᑲᓐᓂᕈᒪᒧᑦ ᑲᓇᑕᒥ ᖁᒻᒧᐊᒃᑎᑕᐅᓯᒪᔪᒥᒃ ᐱᒋᐊᕈᑕᐅᓯᒪᔪᒥᒃ ᖃᐅᔨᒋᐊᕈᓐᓇᖅᐳᑦ ᐅᕙᖓᑦ ᖃᕆᑕᐅᔭᒃᑯᑦ:
www.broadband.gc.ca/pub/media/nsi_prog_des.htmlᑐᑭᓯᒋᐊᕈᒪᔪᑦ ᕿᓂᐅᑉ ᒥᒃᓵᓄᑦ:
www.qiniq.com ᓄᓇᕗᒥ ᐱᑐᒃᓯᒪᒍᑎᒃᑯᑦ ᐱᕙᓪᓕᐊᔪᓕᕆᓂᕐᒧᑦ ᑯᐊᐳᕇᓴᒃᑯᓐᓂᒃ NBDC:
www.nunavut-broadband.ca
ᑐᑭᓯᒋᐊᕈᒪᔪᑦ SSi Micro:
www.ssimicro.com ᐊᐱᖁᑎᒃᓴᖃᕈᑦᓯ ᐃᓱᒫᓗᒍᑎᖃᕈᑦᓯᓗ ᑕᒪᓐᓇ ᐱᔾᔪᑎᒋᓪᓗᒍ ᐊᓯᖏᓐᓂᒡᓗ ᖃᐅᔨᒋᐊᕐᕕᐅᔪᓐᓇᖅᐳᖅ ᓕᐅᓇᐅᑉ ᑎᑎᕋᕐᕕᖓ ᐅᕙᓂ:
ᐅᖃᓚᐅᑎᖓ:: 613.992.2848/866.267.7701
ᓱᑲᔪᒃᑯᑦ: 613.996.9764/867.979.4193
ᖃᕆᑕᐅᔭᒃᑯᑦ:
Aglukkaq.L@parl.gc.ca 