ᐊᑐᕚ - ᒥᓂᔅᑕ ᓕᐅᓇ ᐊᒡᓗᒃᑲᖅ, ᑲᑎᒪᔨᕐᔪᐊᖑᖃᑕᐅᔪᖅ ᓄᓇᕗᒥᐅᓂᒃ ᑭᒡᒐᖅᑐᐃᓪᓗᓂ, ᒥᓂᔅᑕ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᑲᒪᒋᔭᖃᖅᖢᓂ ᓄᓇᕗᒥᐅᓂᒃ ᐅᓪᓗᒥ ᐅᖃᓚᐅᖅᐳᖅ ᐅᓂᒃᑳᕈᑎᖃᖅᖢᓂᓗ ᖃᓄᐃᓕᐅᕈᑕᐅᓚᐅᖅᓯᒪᔪᓂᒃ ᐊᕐᕌᒍᑦ ᐊᕙᑎᐅᓕᖅᑐᓂ ᑕᐃᑲᓂ ᐃᓕᓐᓂᐊᕐᕕᖕᒥ ᒪᓐᑐᕆᔮᒥ l’école Polytechnique ᖁᑭᐊᓪᓗᓂ ᑐᖁᕋᐃᓚᐅᖅᓯᒪᔪᒥ. ᐊᕐᕌᒍᑦ ᐊᕙᑎᐅᓕᖅᑎᓪᓗᒋᑦ ᐅᓪᓗᒥ, 14 ᐊᕐᓇᐃᑦ ᒪᒃᑯᒃᑐᑦ ᐃᓄᐊᖅᑕᐅᓚᐅᕐᒪᑕ ᑕᐃᑲᓂ ᐃᓕᓐᓂᐊᕐᕕᖓᓂ ᒪᓂᑐᕆᔮᑉ ’école Polytechnique de Montreal ᐱᔾᔪᑎᖃᑐᐃᓐᓇᖅᖢᓂ ᐊᕐᓇᓂᒃ ᕿᐸᒍᓱᒃᖢᓂ. ᑕᐃᒪᓐᓇ ᐊᕐᓇᓂᒃ ᐃᓄᐊᖅᓯᔪᖃᖅᑎᓪᓗᒍ ᐊᕐᓇᐅᑐᐃᓐᓇᕐᓂᖏᓐᓄᑦ ᖁᐊᖅᓵᕈᑕᐅᓚᐅᖅᐳᖅ ᑲᓇᑕᒥᐅᓄᑦ ᐊᒻᒪᓗ ᖃᐅᔨᕚᓪᓕᕈᑕᐅᓪᓗᓂ ᐊᕐᓇᐃᑦ ᐋᓐᓂᖅᑎᖅᑕᐅᖃᑦᑕᕐᓂᖏᓐᓄᑦ.
1991-ᒥ ᑲᓇᑕᐅᑉ ᑲᑎᒪᔨᕐᔪᐊᖏᑦ ᐋᖅᑭᒃᓯᓚᐅᖅᐳᑦ ᐅᓪᓗᒥ ᐊᑎᖃᖅᑐᒥᒃ ᐅᓪᓗᖅ ᐃᖅᑲᐅᒪᓐᓇᖅ ᖃᓄᐃᓕᐅᕈᑎᖃᕆᐊᖃᕐᓂᕐᓗ ᐋᓐᓂᖅᑎᖅᑕᐅᖃᑦᑕᕐᓂᖏᓐᓄᑦ ᐊᕐᓇᐃᑦ.
"ᐃᖅᑲᐅᒪᒍᒪᕙᒃᑲ ᑕᒪᕐᒥᒃ ᐊᕐᓇᐃᑦ ᑐᖁᑕᐅᓯᒪᔪᑦ ᑕᒪᕐᒥᒃ ᐊᕐᕌᒍᓂ ᐊᒥᓱᓂ ᓂᖓᖅᑕᐅᓪᓗᑎᒃ ᓄᓇᕗᒥ," ᐅᖃᓚᐅᖅᐳᖅ ᐊᒡᓗᒃᑲᖅ. "ᐋᓐᓂᖅᑎᖅᑕᐅᓂᖅ ᐱᑦᓯᐊᖅᑕᐅᖏᓐᓂᕐᓗ ᐅᓗᕆᐊᓇᕈᑕᐅᖏᓐᓇᖅᐳᖅ ᐊᒥᓱᓄᑦ ᐊᕐᓇᓄᑦ ᓄᓇᕗᒥ ᑲᓇᑕᓕᒫᒥᓗ," ᐊᒡᓗᒃᑲᖅ ᐅᖃᓚᐅᖅᐳᖅ. ᖃᓄᑐᐃᓐᓇᖅ ᐱᑦᓯᐊᖅᑕᐅᖃᑦᑕᖏᒻᒪᑕ ᐋᓐᓂᖅᑎᖅᑕᐅᖃᑦᑕᕐᒪᑕᓗ ᐊᕐᓇᐃᑦ ᑕᒪᑦᑕᓗ ᐃᑲᔪᕆᐊᖃᖅᐳᒍᑦ ᑕᒪᓐᓇ ᓄᖅᑲᖅᑎᑕᐅᖁᓪᓗᒍ ᐃᓚᒌᓄᑦ ᓯᖁᑦᑎᕈᑕᐅᖃᑦᑕᕐᒪᑦ, ᓄᓇᓕᖕᓂᒥᐅᓄᓪᓗ ᐋᓐᓂᖅᑕᐅᕙᒃᖢᑎᒡᓗ ᑎᒥᒥᒍᑦ ᐊᕐᓇᐃᑦ, ᐃᓱᒪᒥᒍᓪᓗ ᐃᒃᐱᒋᔭᒥᑎᒍᓪᓗ ᐃᓱᒪᒃᑯᑦ ᐃᓗᒃᑯᑦ. ᐅᐱᒋᓚᐅᖅᐸᕋ ᒥᓂᔅᑕᐅᔪᓐᓇᓚᐅᖅᓯᒪᒐᒪ ᐊᕐᓇᕐᓄᑦ ᓄᓇᕗᒥ ᒐᕙᒪᒃᑯᓐᓂ ᒥᓂᔅᑕᐅᓪᓗᖓ, ᑕᒪᓐᓇ ᐆᒻᒪᑎᒃᑯᑦ ᐱᓕᕆᐊᕆᒐᒃᑯ," ᐅᖃᓚᐅᖅᐳᖅ ᐊᒡᓗᒃᑲᖅ.
"ᓯᕗᒻᒧᒃᐸᓪᓕᐊᓂᑦᑎᓐᓂ, ᑎᓕᐅᕈᒪᕙᒃᑲ ᐊᕐᓇᐃᑦ ᓱᕈᓯᓪᓗ ᐱᕐᔪᐊᖅᐸᓪᓕᐊᓂᕐᒧᑦ ᐱᕙᓪᓕᐊᓂᖃᖁᓪᓗᒋᑦ ᑕᒪᑦᑕᓗᒃᑖᖅ ᖃᓄᑐᐃᓐᓇᖅ ᐃᑲᔪᕐᓂᖃᖅᑐᒥᒃ ᐱᓕᕆᐊᖃᕈᓐᓇᕋᑦᑕ. ᐱᓕᕆᒍᑎᒋᐊᖃᖅᐸᕗᑦ ᐊᕐᓇᐃᑦ ᐃᓚᐅᑎᑕᐅᑦᓯᐊᖁᓪᓗᒋᑦ ᐃᓅᓯᖃᖁᓪᓗᒋᓪᓗ ᐃᓱᒪᖅᓱᕐᓗᑎᒃ ᐊᔾᔨᒌᒃᑎᑕᐅᓗᑎᒡᓗ ᑭᒃᑯᑐᐃᓐᓇᕐᓄᑦ, ᐋᓐᓂᖅᑎᖅᑕᐅᖃᑦᑕᖏᓪᓗᑎᒃ ᐊᑭᕋᖅᑐᖅᑕᐅᖏᓪᓗᑎᒡᓗ," ᐅᖃᓚᐅᖅᐳᖅ ᐊᒡᓗᒃᑲᖅ.
ᐋᓐᓂᖅᑎᖅᑕᐅᖃᑦᑕᕐᓂᖏᑦ ᐊᕐᓇᐃᑦ ᐱᒻᒪᕆᐅᓪᓗᓂ ᐊᑲᐅᖏᓕᐅᕈᑕᐅᕗᖅ ᐱᓕᕆᐊᕆᔭᐅᒋᐊᖃᖅᖢᓂᓗ ᑭᒃᑯᑐᐃᓐᓇᕐᓄᑦ ᑕᒪᐃᓐᓄᑦ ᒐᕙᒪᒃᑯᓐᓄᑦ, ᐸᓖᓯᓄᑦ, ᐃᖅᑲᖅᑐᐃᔨᓕᕆᔨᒃᑯᓐᓄᑦ, ᐃᓅᖃᑎᒋᔭᐅᔪᑦ ᐱᓕᕆᐊᕆᔭᐅᖃᑦᑕᕈᓯᖏᑦᑎᒍᑦ ᐊᓯᖏᓪᓗ ᐱᓕᕆᖃᑕᐅᓗᑎᒃ ᑕᒪᓐᓇ ᓄᖅᑲᐅᑕᐅᖁᓪᓗᒍ.
ᐊᐱᖁᑎᒃᓴᖃᖅᑐᑦ ᐃᓱᒫᓗᒍᑎᖃᖅᑐᓪᓗ ᑕᒪᓐᓇ ᐱᔾᔪᑎᒋᓪᓗᒍ, ᖃᐅᔨᒋᐊᕈᓐᓇᖅᐳᑦ ᓕᐅᓇᐅᑉ ᐊᓪᓚᕕᖓᓄᑦ ᐅᕙᓂ:
ᐅᖃᓚᐅᑎᖓ: 613.992.2848/866.267.7701
ᓱᑲᔪᒃᑦ: 613.996.9764/867.979.4193
ᖃᕆᑕᐅᔭᒃᑯᑦ:
Aglukkaq.L@parl.gc.ca 