ᐊᑐᕚ- ᑲᓇᑕᐅᑉ ᒐᕙᒪᒃᑯᖏᑦ ᑮᓇᐅᔭᓂᒃ ᐊᑐᕐᓂᐊᖅᐳᑦ $1.66 ᒥᓕᔭᓐᑖᓚᓂᒃ ᐊᕐᕌᒍᒥ ᐊᑐᖅᑐᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᖃᓄᐃᓕᐅᕈᑎᒃᓴᓄᑦ ᓄᓇᕗᒥ ᓄᓇᓖᑦ ᓱᖏᐅᑎᕙᓪᓕᐊᒍᑎᒃᓴᖏᓐᓄᑦ ᑐᑭᓯᕚᓪᓕᕈᑎᒃᓴᖏᓐᓄᓪᓗ ᐸᕐᓇᒃᓯᒪᔪᓐᓇᖁᓪᓗᒋᓪᓗ ᓯᓚ ᐊᓯᔾᔨᖅᓯᒪᓕᕐᓂᖓᓄᑦ. ᑕᐃᒪᓐᓇ ᖃᐅᔨᓴᕐᓂᐊᖅᐳᑦ ᓄᓇᒥᒃ ᐊᓯᔾᔨᖅᐸᓪᓕᐊᓂᖓᓄᓪᓗ ᓯᓚᖓᑦ ᖁᐊᖅᓯᒪᐃᓐᓇᖃᑦᑕᕐᓂᕐᓗ ᑕᕆᐅᖓᓪᓗ ᖃᓄᐃᑉᐸᓪᓕᐊᓂᖓᓄᑦ ᐱᓕᕆᐊᒃᓴᖅᑖᖅᑎᑎᓗᑎᒡᓗ ᓄᓇᓕᖕᓂᒥᐅᓂᒃ.

"ᒐᕙᒪᕗᑦ ᑮᓇᐅᔭᖃᖅᑎᑎᓂᐊᖅᐳᑦ ᑕᒪᒃᑯᓄᖓ ᐊᑐᕆᐊᖃᕋᑦᑕ ᖃᐅᔨᓴᕐᓂᕐᒥᒃ ᐅᑭᐅᖅᑕᖅᑐᒥ ᐃᓄᐃᑦ ᐱᖅᑯᓯᖏᓪᓗ ᐊᑐᕐᓗᒋᑦ, ᑕᐃᒪᓐᓇ ᓄᓇᓕᖕᓂᒥᐅᓪᓗ ᐱᓕᕆᐊᒃᓴᖃᖅᑎᑕᐅᕙᓪᓕᐊᖁᓪᓗᒋᑦ," ᐅᖃᓚᐅᖅᐳᖅ ᓖᓴ ᕋᐃᑦ, ᒥᓂᔅᑕ ᓄᓇᒥᐅᑕᓕᕆᓂᕐᒧᑦ. "ᑖᓐᓇ ᐱᓕᕆᐊᕆᔭᐅᓂᐊᖅᑐᖅ ᐃᑲᔪᕐᓂᐊᖅᐳᖅ ᐅᑭᐅᖅᑕᖅᑐᒥᐅᓂᒃ ᓄᓇᓕᖕᓂᒃ ᑐᑭᓯᐅᒪᒍᑎᒃᓴᖃᖁᓪᓗᒋᑦ ᓱᖏᐅᑎᕙᓪᓕᐊᓂᕐᒧᑦ ᓯᓚ ᐊᓯᔾᔨᖅᐸᓪᓕᐊᓂᖓᓄᑦ ᐱᔾᔪᑎᖃᖅᑐᓂᒃ."

"ᑕᐃᒪᓐᓇ ᐱᓕᕆᖃᑎᖃᕐᓂᖅ ᐱᕙᓪᓕᐊᑎᑎᓂᕐᓗ ᐅᑭᐅᖅᑕᖅᑐᒥ ᐊᐅᓪᓛᑦᓯᐊᕐᓂᐊᖅᐳᖅ ᐱᓕᕆᐊᒃᓴᓂᒃ ᓴᖅᑭᑎᑎᕙᓪᓕᐊᓗᑕ ᐃᑲᔪᖅᑕᐅᖁᓪᓗᒋᓪᓗ ᐊᑕᐅᑦᓯᒃᑯᑦ ᓯᓚ ᐊᓯᔾᔨᖅᐸᓪᓕᐊᓂᖓᓄᑦ ᓱᖏᐅᑎᕙᓪᓕᐊᒍᑎᒃᓴᓂᒃ," ᐅᖃᓚᐅᖅᐳᖅ ᒥᓂᔅᑕ ᓴᒃ ᓯᑖᓪ, ᒥᓂᔅᑕ ᐃᓄᓕᕆᔨᑐᖃᒃᑯᓐᓄᑦ ᐱᓕᕆᐊᖃᖅᖢᓂᓗ ᐃᖅᑭᓕᕐᓚᖕᓂᒃ ᐃᖅᑭᓕᓂᒡᓗ ᐃᓕᑕᕆᔭᐅᓯᒪᖏᑦᑐᓂᒃ. "ᑕᒪᓐᓇ ᐊᑐᖅᑕᐅᑦᓯᐊᕐᓂᐊᖅᐳᖅ ᐊᑐᓕᖅᑎᑎᕙᓪᓕᐊᓂᑦᑎᓐᓄᑦ ᓱᖏᐅᑎᕙᓪᓕᐊᓂᖏᓐᓄᑦ ᐸᕐᓇᒃᓯᒪᒍᑎᒃᓴᓂᒃ ᓄᓇᕗᒥ."

ᓯᓚᐅᑉ ᐊᓯᔾᔨᖅᐸᓪᓕᐊᓂᖓᑕ ᓱᖏᐅᑎᕙᓪᓕᐊᒍᑎᒃᓴᐃᑦ ᐸᕐᓇᒃᑕᐅᓯᒪᔪᑦ ᐋᖅᑭᒃᓱᖅᑕᐅᓯᒪᓂᐊᖅᐳᑦ ᐊᕐᕕᐊᓂ ᑎᑭᕋᕐᔪᐊᒥ ᑭᕙᓪᓕᕐᒥ ᐊᒻᒪᓗ ᖁᕐᓗᖅᑑᒥ ᐃᖃᓗᒃᑑᑦᓯᐊᒥᓗ ᕿᑎᕐᒥᐅᓂ. ᓄᑖᑦ ᐸᕐᓇᐅᑕᐅᓯᒪᔪᑦ ᐃᓚᒋᔭᐅᓪᓗᑎᒃ ᓄᓇᕗᒥ ᓯᓚ ᐊᓯᔾᔨᖅᐸᓪᓕᐊᓂᖓᓄᑦ ᐱᓕᕆᓂᐊᖅᑐᓄᑦ ᑲᑐᔾᔨᓗᑎᒃ, ᐊᕐᕌᒍᓂ ᐊᒥᓱᓂ ᑕᒪᓐᓇ ᐱᓕᕆᐊᕆᔭᐅᓂᐊᖅᖢᓂ ᑲᓇᑕᐅᑉ ᒐᕙᒪᒃᑯᖏᓐᓄᑦ, ᓄᓇᕗᑦ ᒐᕙᒪᒃᑯᖏᓐᓄᑦ ᑲᓇᑕᒥ ᑎᒥᐅᔪᓄᑦ ᐸᕐᓇᒃᑎᑎᔨᐅᓂᕐᒧᑦ. ᐅᓪᓗᒥᒧᑦ ᑎᑭᑦᖢᒍ, ᑲᓇᑕᐅᑉ ᒐᕙᒪᒃᑯᖏᑦ ᑮᓇᐅᔭᓂᒃ ᐊᑐᖅᓯᒪᓕᖅᐳᑦ $3.19 ᒥᓕᔭᓐᑖᓚᓂᒃ ᑕᒪᑐᒧᖓ, ᑲᓇᑕᐅᑉ ᒐᕙᒪᒃᑯᖏᓐᓄᑦ ᐱᓕᕆᐊᖑᔪᖅ ᐊᑐᕐᓂᐊᖅᖢᓂ ᑮᓇᐅᔭᓂᒃ  $85.9 ᒥᓕᔭᓐᑖᓚᓂᒃ ᐃᑲᔪᖅᑕᐅᖁᓪᓗᒋᑦ ᑲᓇᑕᒥᐅᑕᐃᑦ ᑐᑭᓯᐅᒪᓂᖅᓴᐅᖁᓪᓗᒋᑦ ᓱᖏᐅᑎᕙᓪᓕᐊᒍᑎᒃᓴᑎᒍᑦ ᐸᕐᓇᒃᓯᒪᑎᑕᐅᖁᓪᓗᒋᓪᓗ ᓯᓚ ᐊᓯᔾᔨᖅᐸᓪᓕᐊᓂᖓᓄᑦ.