ᑮᓇᐅᔭᓕᐅᖅᑎᑎᓂᕐᒧᑦ ᐸᕐᓇᒍᑕᐅᓯᒪᔪᒃᑯᑦ ᐱᓕᕆᐊᒃᓴᖅᑖᖅᑎᑕᐅᕙᓪᓕᐊᓂᐊᖅᐳᑦ ᑮᓇᐅᔭᓕᐅᖅᐸᓪᓕᐊᒍᑎᓕᐅᕐᓂᐊᖅᐳᓪᓗ

December 07, 2009

ᐊᑐᕚ, ᐋᓐᑎᐅᕆᔪ - ᒥᓂᔅᑕ ᓴᒃ ᓯᑖᓪ, ᒥᓂᔅᑕ ᐃᓄᓕᕆᔨᑐᖃᒃᑯᓐᓄᑦ ᐊᒻᒪ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐱᓕᕆᔨᐅᔪᖅ ᐃᖅᑭᓕᕐᓚᖕᓄᑦ ᐃᓕᑕᕆᔭᐅᓯᒪᖏᑦᑐᓄᓪᓗ ᐃᖅᑭᓕᕐᓄᑦ ᒥᓂᔅᑕᐅᓪᓗᓂᓗ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᓂᕐᒧᑦ, ᐅᓪᓗᓂ ᑐᓴᖅᑎᑎᓚᐅᖅᐳᖅ ᐱᕙᓪᓕᐊᓯᒪᓕᕐᓂᖏᓐᓄᑦ ᑲᓇᑕᒥ ᑮᓇᐅᔭᓕᐅᖅᑎᑎᓇᓱᐊᕐᓂᕐᒧᑦ ᐸᕐᓇᑕᐅᓯᒪᔪᒃᑯᑦ ᐱᕙᓪᓕᐊᑎᑕᐅᒍᑎᒃᓴᖏᓐᓂᒃ ᓄᓇᖃᖅᑳᖅᓯᒪᔪᑦ ᓇᓂᑐᐃᓐᓇᖅ ᑲᓇᑕᒥ ᐱᓕᕆᐊᒃᓴᖅᑖᖅᑎᑕᐅᓂᐊᕐᓂᖏᓐᓄᑦ.

"ᑲᓇᑕᐅᑉ ᒐᕙᒪᒃᑯᖏᑦ ᐱᕙᓪᓕᐊᓂᖃᖅᐳᑦ ᐱᓂᐊᕐᓂᕋᓚᐅᖅᓯᒪᔭᒥᖕᓂᒃ ᐸᕐᓇᒃᑕᐅᓯᒪᔪᒃᑯᑦ ᐱᕙᓪᓕᐊᑎᑎᓂᐊᕐᓂᕐᒧᑦ ᑲᓇᑕᓕᒫᒥ," ᐅᖃᓚᐅᖅᐳᖅ ᓴᒃ ᓯᑖᓪ. "ᑕᐃᒪᓐᓇᑎᑐᑦ ᐱᕙᓪᓕᐊᑎᑎᓗᑕ ᓴᓇᓗᑕ, ᓄᑖᓂᒃ ᐱᓕᕆᐊᒃᓴᖅᑖᖅᑎᑎᕙᓪᓕᐊᓂᐊᕋᑦᑕ ᑕᐃᒪᓐᓇᓗ, ᑲᓇᑕᒥ ᑮᓇᐅᔭᓕᐅᖅᑎᑎᕙᓪᓕᐊᓂᐊᕋᑦᑕ."

ᑲᓇᑕᒥ ᑮᓇᐅᔭᓕᐅᖅᑎᑎᓇᓱᐊᕐᓂᕐᒧᑦ ᐸᕐᓇᑕᐅᓯᒪᔪᑦ ᐱᑕᖃᖅᑎᑎᓂᐊᖅᐳᑦ ᑮᓇᐅᔭᓂᒃ $200 -ᒥᓕᔭᓐᑖᓚᓂᒃ ᐊᕐᕌᒎᓂᐊᖅᑐᓄᑦ ᒪᕐᕉᖕᓄᑦ ᓴᓇᓂᐊᕐᒪᑕ 12-ᓂᒃ ᓄᑖᓂᒃ ᐃᓕᓐᓂᐊᕐᕕᒃᓴᓂᒃ ᓄᑖᖑᖅᑎᕆᓗᑎᒡᓗ ᐃᓕᓐᓂᐊᕐᕕᖕᓂᒃ ᐃᖅᑭᓖᑦ ᓄᓇᖓᓐᓂ. ᐅᓪᓗᒥᒧᑦ ᑎᑭᑦᖢᒍ, ᐃᓕᓐᓂᐊᕐᕖᑦ ᓴᓇᔭᐅᕙᓪᓕᐊᕗᑦ ᓄᑖᖑᖅᑎᑕᐅᕙᓪᓕᐊᓪᓗᑎᒡᓗ 9-ᓂᒃ ᑳᓐᑐᕌᒃᑎᑎᒐᒃᓴᖃᐅᑎᖃᓕᖅᖢᑕ 7-ᓗ ᑳᓐᑐᕌᒐᒃᓴᐅᑎᑕᐅᓯᒪᓕᖅᖢᑎᒃ.

ᐆᒃᑑᑎᒋᓗᒍ  the Birch Narrows -ᒥᐅᑕᐃᑦ ᐃᖅᑭᓖᑦ, ᓄᓇᖃᖅᑐᑦ 490 ᑭᓛᒥᑕᓂᒃ ᐅᖓᓯᖕᓂᖃᖅᑐᒥᑦ ᐳᕆᔅ ᐃᐊᐳᑦ, ᓴᔅᑳᑦᓱᕙᓐᒥ, ᐱᑎᑕᐅᓚᐅᖅᐳᑦ ᑮᓇᐅᔭᓂᒃ  $21-ᒥᓕᔭᓐᑖᓚᓂᒃ ᑲᓇᑕᒥ ᑮᓇᐅᔭᓕᐅᖅᑎᑎᓇᓱᐊᕐᓂᕐᒧᑦ ᐸᕐᓇᒃᑕᐅᓯᒪᔪᒃᑯᑦ. ᑕᐃᒪᓐᓇ ᐃᖅᑭᓖᑦ ᐃᓕᓐᓂᐊᕐᕕᒃᑖᕈᑎᖃᕐᓂᐊᖅᐳᑦ ᐃᓕᓐᓂᐊᓕᓵᖅᑐᓄᑦ ᒍᕇᑦ 12-ᒧᑦ ᐱᓕᕆᖃᑎᖃᕐᓗᑎᒃ ᓴᔅᑳᑦᓱᕙᓐ ᒐᕙᒪᒃᑯᖏᓐᓂᒃ.

ᐊᕐᕌᒍᓂ ᒪᕐᕉᓂᐊᖅᑐᓂ $165 -ᒥᓕᔭᓐᑖᓚᐃᑦ ᐅᖓᑖᓄᑦ ᐊᑐᕐᓂᐊᖅᐳᑦ ᐃᓂᖏᓐᓂ ᐃᖅᑭᓖᑦ ᓴᓇᓂᐊᕐᒪᑕ 18-ᓂᒃ ᐃᒪᖃᐅᑎᒃᓴᓂᒃ ᖁᕐᕕᒃᑕᐅᑎᒃᓴᓂᒡᓗ. ᑖᒃᑯᓇᖓᑦ 15 ᓴᓇᔭᐅᓂᐊᖅᑐᑦ ᓴᓇᔭᐅᒋᐊᓕᓚᐅᖅᖢᑎᒃ ᑕᒡᕙᓂ ᐊᕐᕌᒍᒥ, 11 ᑳᓐᑐᕌᒐᒃᓴᐅᔪᓂᑦ ᖁᓕᑦ ᑳᓐᑐᕌᒃᑖᕆᔭᐅᓯᒪᓕᖅᖢᑎᒃ.

ᑖᒃᑯᐊ ᐃᖅᑭᓖᑦ  Sheshatshiu Innu First Nation ᑮᓇᐅᔭᖅᑖᖅᑎᑕᐅᓂᐊᖅᐳᑦ $7-ᒥᓕᔭᓐᑖᓚᐃᑦ ᐅᖓᑖᓄᑦ ᐃᒪᖃᐅᑎᖏᑦ ᓴᓇᔭᐅᓂᐊᕐᓗᑎᒃ. ᑕᐃᒪᓐᓇ ᓄᓇᓕᖕᓂᒥᐅᑦ ᐃᒪᖃᖅᑎᑕᐅᓂᖅᓴᐅᓂᐊᖅᐳᑦ ᑯᕕᖅᑕᕐᕕᓕᐅᖅᑕᐅᓗᑎᒡᓗ ᐱᐅᓂᖅᓴᓂᒃ, ᐱᓕᕆᑎᑎᓂᐊᖅᖢᑎᒡᓗ ᑭᒃᑯᑐᐃᓐᓇᕐᓂᒃ 1,600 ᐃᑲᕋᐃᑦ ᐅᖓᑖᓄᑦ ᓄᓇᓕᖕᓂᒥᐅᑦ ᑕᐃᒪᖓᓂᑦ ᓴᓇᒋᐊᓕᓚᐅᖅᖢᑎᒃ ᐊᒃᑐᐱᕆ 2009-ᒥ.

ᖁᕐᕕᖕᓄᑦ ᑯᕕᑦᑕᕐᕕᒃ ᓄᑖᖅ ᑕᐃᑲᓂ Pinaymootang, Manitoba-ᒥ ᓴᓇᔭᐅᔪᓐᓇᓚᐅᖅᖢᓂ ᑮᓇᐅᔭᓂᒃ ᐱᑎᑕᐅᓪᓗᑎᒃ $6.9 -ᒥᓕᔭᓐᑖᓚᓂᒃ ᓄᓇᖏᓐᓂ ᑕᐃᑲᓂ - ᐃᒻᒪᖃ 240 ᐊᖏᕐᕋᕆᔭᐅᔪᑦ, ᐊᒻᒪᓗ ᐃᓕᓐᓂᐊᕐᕖᑦ ᐃᖅᑭᓖᑦ ᓄᓇᒋᔭᖓᓂ. ᐱᓕᕆᐊᒃᓴᖃᖅᑎᑕᐅᓕᖅᖢᑎᒡᓗ ᐋᓐᓂᐊᕐᓇᖏᑦᑐᒦᒍᓐᓇᕐᓂᐊᓕᖅᖢᑎᒡᓗ ᐃᓄᖏᑦ 1,250 ᐊᖏᒡᓕᒋᐊᖅᑕᐅᔪᓐᓇᕐᓂᐊᖅᖢᓂᓗ ᐊᖏᒡᓕᒋᐊᖅᑕᐅᒋᐊᖃᖅᐸᑦ ᐱᕈᖅᐸᓪᓕᐊᓂᖏᓐᓂ ᐃᓄᒋᐊᕐᓂᖏᑦ.
"ᒐᕙᒪᕗᑦ ᑮᓇᐅᔭᑎᒍᑦ ᐃᑲᔪᑦᓯᐊᖅᐳᑦ ᐅᑭᐅᖅᑕᖅᑐᒥᐅᓄᑦ ᐃᑲᔪᕈᑕᐅᓂᐊᖅᑐᓂᒃ - ᐅᓪᓗᒥ ᐊᒻᒪᓗ ᓯᕗᓂᒃᓴᐅᓂᐊᖅᑐᒥ," ᐅᖃᓚᐅᖅᐳᖅ ᓕᐅᓇ ᐊᒡᓗᒃᑲᖅ, ᒥᓂᔅᑕ ᑲᒪᒋᔭᖃᖅᑐᖅ ᐅᑭᐅᖅᑕᖅᑐᒥᐅᓂᒃ ᐋᓐᓂᐊᖃᕐᓇᖏᑦᑐᓕᕆᓂᕐᒧᓪᓗ ᒥᓂᔅᑕᐅᓪᓗᓂ. "ᑕᐃᒪᓐᓇ ᓴᓇᕙᓪᓕᐊᓂᖏᓐᓄᑦ ᐅᑭᐅᖅᑕᖅᑐᒥ ᐱᓕᕆᐊᒃᓴᖃᖅᑎᑕᐅᓂᐊᖅᐳᑦ ᐊᒻᒪ ᐅᑭᐅᖅᑕᖅᑐᒥᐅᑦ ᐃᓚᐅᑎᑕᐅᔪᓐᓇᕐᓂᐊᖅᖢᑎᒃ ᐱᕈᖅᐸᓪᓕᐊᑎᑕᐅᓂᖏᓐᓂ.

"ᑲᓇᑕᒥ ᑮᓇᐅᔭᓕᐅᖅᑎᑎᓇᓱᐊᕐᓂᕐᒧᑦ ᐸᕐᓇᑕᐅᓯᒪᔪᑎᒍᑦ ᑮᓇᐅᔭᖃᖅᑎᑎᓂᐊᖅᐳᑦ $1.2 -ᒥᓕᔭᓐᑖᓚᓂᒃ ᓄᓇᑦᓯᐊᑉ ᒐᕙᒪᒃᑯᖏᑦᑕ ᐊᕙᑎᒥᐅᑕᓕᕆᔨᒃᑯᖏᓐᓄᑦ ᓄᓇᒥᐅᑕᓕᕆᔨᒃᑯᖏᓐᓄᓪᓗ ᖃᑦᑎᕈᑎᒃᓴᓂᒃ ᓇᐹᖅᑐᖏᑦ ᐃᑯᐊᓪᓚᒑᖓᑕ ᑲᒪᒍᑎᒃᓴᓄᑦ. ᓄᓇᑦᓯᐊᒥ 14 ᖃᑦᑎᕆᓂᕐᒧᑦ ᓇᐹᖅᑐᓂᒃ ᐱᓕᕆᐊᖃᕐᓂᐊᖅᐳᑦ, ᓴᓗᒻᒪᖅᓴᐃᓗᑎᒃ ᐲᔭᐃᓗᑎᒡᓗ ᓇᐹᖅᑐᓂᒃ ᐃᑯᐊᓪᓚᒃᓯᒪᔪᓂᒃ. ᑖᒃᑯᑎᒎᓇ ᐱᓕᕆᐊᒃᑯᑦ, ᐃᒻᒪᖃ 100 ᐃᓄᐃᑦ ᐱᓕᕆᑎᑕᐅᓂᐊᖅᐳᑦ ᒫᑦᓯ 2010-ᒧᑦ ᑎᑭᓪᓗᒍ ᐃᓕᓐᓂᐊᖅᑎᑎᓂᐊᕐᓗᑎᒡᓗ ᓄᓇᓕᖕᓂᒥᐅᓂᒃ.

ᐳᓚᕋᖅᑐᓕᕆᓂᖅ ᐱᒻᒪᕆᐅᖕᒪᑦ ᑮᓇᐅᔭᓕᐅᕈᑕᐅᓪᓗᓂᓗ ᔪᑳᓐᒥᐅᓄᑦ. ᑲᓇᑕᒥ ᑮᓇᐅᔭᓕᐅᕋᓱᐊᖅᑎᑎᓂᕐᒧᑦ ᐸᕐᓇᒍᑕᐅᓯᒪᔪᒃᑯᑦ ᑮᓇᐅᔭᖃᖅᑎᑕᐅᓂᐊᖅᐳᑦ  $525,000  Destination Yukon-ᒥᐅᓄᑦ, ᓂᐅᕐᕈᑎᒃᓴᓄᑦ ᑐᓴᐅᒪᒍᑎᒃᓴᓄᓪᓗ ᔪᑳᓐᓕᐊᖅᐸᓪᓕᐊᖁᓪᓗᒋᑦ ᑭᒃᑯᑐᐃᓐᓇᐃᑦ ᐳᓚᕋᕆᐊᖅᑐᕐᓗᑎᒃ ᑲᓇᑕᒥᐅᑦ ᓇᑭᑐᐃᓐᓇᖅ. Destination Yukon ᐱᓕᕆᐊᒃᓴᖃᕐᓂᐊᖅᐳᑦ 64-ᓂᒃ ᑲᓇᑕᓕᒫᒥᑦ ᑖᒃᑯᐊ  2/3 ᔪᑳᓐᒥᐅᑕᐅᓂᐊᕐᓗᑎᒃ. ᑖᒃᑯᐊ ᑮᓇᐅᔭᑦ ᐊᑐᖅᑕᐅᓂᐊᖅᑐᑦ ᐳᓚᕋᖅᑐᓕᕆᓂᕐᒧᑦ ᐊᑐᖅᑕᐅᓂᐊᕐᓗᑎᒃ 2009-2010-ᒥᓗ ᖃᖓᑕᔫᒃᑯᑦ ᐃᖏᕐᕋᖃᑦᑕᕐᓗᑎᒃ ᔪᑲᓐᒧᑦ ᐃᑲᔪᖅᑕᐅᒍᑎᖃᕐᓂᖅᓴᐅᓂᐊᖅᖢᑎᒡᓗ ᔪᑳᓐᒥᐅᑦ ᓴᐳᔾᔭᐅᔪᓐᓇᖁᓪᓗᒋᓪᓗ ᐱᓕᕆᐊᒃᓴᖏᓐᓄᑦ ᖃᖓᑕᔫᓕᕆᔨᐅᔪᑦ ᐳᓚᕋᖅᑐᓕᕆᓂᕐᒧᑦ ᐱᕙᓪᓕᐊᑎᑕᐅᔪᓐᓇᖁᓪᓗᒋᑦ.

ᑲᓇᑕᒥ ᑮᓇᐅᔭᓕᐅᕐᓂᕐᒧᑦ ᐸᕐᓇᒍᑕᐅᓯᒪᔪᑦ ᑮᓇᐅᔭᖃᖅᑎᑎᓂᐊᕆᕗᑦ  $620,000 -ᓂᒃ ᓄᓇᕗᑦ ᒐᕙᒪᒃᑯᖏᑦ ᓴᓐᖏᓕᖅᑎᑕᐅᔪᓐᓇᖁᓪᓗᒋᑦ ᐱᕙᓪᓕᐊᑎᑕᐅᔪᓐᓇᖁᓪᓗᒍᓗ Cumberland Sound ᐃᒪᖓᓂ ᐃᖃᓗᒃᓯᐅᕐᓂᕐᒧᑦ ᐃᑎᔪᒥ. ᐊᒻᒪᓗᒃᑲᓐᓂᖅ  $60,000 ᐊᑐᖅᑕᐅᓂᐊᖅᐳᑦ ᖃᐅᔨᓴᕈᑕᐅᓗᑎᒃ ᐃᖃᓗᖕᓂᒃ ᐃᒪᖓᓂ Hudson Strait. ᑕᐃᒪᓐᓇ ᖃᐅᔨᒪᒍᑕᐅᓂᐊᖅᐳᑦ ᖃᐅᔨᓴᖅᑕᐅᓂᐊᖅᑐᑦ ᓄᓇᕗᒥ ᐃᖃᓗᒃᓯᐅᕐᓂᕐᒧᑦ ᐱᕙᓪᓕᐊᑎᑕᐅᒃᑲᓐᓂᖁᓪᓗᒋᑦ, ᐱᕈᖅᐸᓪᓕᐊᖁᓪᓗᒍᓗ ᐃᖃᓗᒃᓯᐅᕐᓂᕐᒧᑦ ᑮᓇᐅᔭᓕᐅᕈᑕᐅᖃᑦᑕᖅᑐᑦ.

ᑕᒪᒃᑯᐊ ᐱᓕᕆᐊᕆᔭᐅᓂᐊᖅᑐᑦ ᓄᓇᕗᒥ ᐱᓕᕆᑎᑎᓂᐊᖅᖢᑎᒃ 22-ᓂᒃ ᐃᓄᖕᓂᒃ ᓇᓚᐅᑦᓵᖅᑕᐅᓯᒪᓪᓗᑎᒡᓗ 100 ᐃᓄᐃᑦ ᐱᓇᓱᐊᕈᓯᒥ ᐱᓕᕆᔪᓐᓇᕐᓂᐊᖅᖢᑎᒃ, ᐊᒻᒪᓗ 18 ᐱᓇᓱᐊᕈᓯᓂ ᓄᓇᕗᒥ ᐃᖃᓗᓕᕆᕕᖕᒥ ᐱᓕᕆᑎᑕᐅᔪᓐᓇᕐᓂᐊᖅᖢᑎᒃ. ᐃᓄᐃᑦ 12 ᐃᓕᓐᓂᐊᖅᑎᑕᐅᓚᐅᕆᓪᓗᑎᒃ ᐅᒥᐊᕐᔪᐊᓂᒃ ᐊᐅᓚᑦᓯᔨᐅᓂᕐᒧᑦ ᐊᖁᑎᐅᓂᕐᒧᑦ.

ᐃᓄᓕᕆᔨᑐᖃᒃᑯᑦ ᐊᕐᕌᒍᒥ ᓯᑕᒪᐃᖅᑕᖅᖢᑎᒃ ᐅᓂᒃᑳᓕᐅᖃᑦᑕᕐᓂᐊᖅᐳᑦ ᐱᕙᓪᓕᐊᔪᓂᒃ ᖃᓄᐃᓕᐅᖅᐸᓪᓕᐊᔪᓂᒃ ᓄᓇᖃᖅᑳᖅᓯᒪᔪᑦ ᐱᔾᔪᑎᒋᓪᓗᒋᑦ ᑖᒃᑯᐊᓗ ᐸᕐᓇᒃᑕᐅᓯᒪᔪᑦ ᒪᓕᒃᖢᒋᑦ. ᑐᑭᓯᒋᐊᒃᑲᓐᓂᕈᒪᔪᑦ ᑕᒪᑐᒪ ᒥᒃᓵᓄᑦ ᖃᐅᔨᒋᐊᕈᓐᓇᖅᐳᑦ ᖃᕆᑕᐅᔭᒃᑯᑦ ᐅᕙᓂ: www.ainc-inac.gc.ca

 
ᖃᓄᐃᓕᐅᕈᑕᐅᓯᒪᔪᑦ
ᓄᓇᕗᑦ
ᓄᓇᕗᑦ ᒐᕙᒪᒃᑯᖏᑦ ᑮᓇᐅᔭᖅᑖᖅᑎᑕᐅᓚᐅᖅᐳᑦ  $620,000 ᓴᓐᖏᓕᖅᑎᑕᐅᕙᓪᓕᐊᖁᓪᓗᒋᑦ ᐱᕙᓪᓕᐊᑎᑕᐅᖁᓪᓗᒋᓪᓗ  Cumberland Sound ᐃᒪᖓᓂ ᐃᖃᓗᓕᕆᒍᑎᒃᓴᓂᒃ. ᐊᒻᒪᓗᒃᑲᓐᓂᖅ $60,000 ᐊᑐᖅᑕᐅᓂᐊᕆᓪᓗᑎᒃ ᖃᐅᔨᓴᖅᑕᐅᓂᖏᓐᓄᑦ ᐃᖃᓗᐃᑦ ᑕᐃᑲᓂ ᐃᒪᖓᓂ Hudson Strait. ᑕᐃᒪᓐᓇ ᖃᐅᔨᒪᒍᑎᒃᓴᐃᑦ ᖃᐅᔨᓴᖅᑕᐅᓂᐊᖅᐳᑦ ᓄᓇᕗᒥ ᐃᖃᓗᓕᕆᕕᒃᓴᐃᑦ ᑮᓇᐅᔭᓕᐅᕈᑎᖃᖅᐸᓪᓕᐊᔪᓐᓇᖁᓪᓗᒋᓪᓗ.

ᐅᒥᐊᕐᔪᐊᓕᕆᔨᐅᓂᕐᒧᑦ ᐱᓕᕆᐊᕆᔭᐅᓂᐊᖅᑐᑦ
CanNor ᑮᓇᐅᔭᖃᖅᑎᑎᓂᐊᖅᐳᑦ $140,000 ᐊᕐᕌᒍᓄᑦ ᒪᕐᕉᖕᓄᑦ
ᑲᑎᓪᓗᒋᑦ:  $340,000 ᐊᕐᕌᒍᑦ ᒪᕐᕉᒃ ᐅᖓᑖᓄᑦ

ᑖᒃᑯᐊ ᐊᑐᖅᑕᐅᓂᐊᖅᑐᑦ ᐃᓕᓐᓂᐊᕈᑕᐅᓂᐊᖅᖢᑎᒃ ᐃᒪᕐᒥ ᐱᓕᕆᓂᕐᒧᑦ ᐃᖃᓗᒃᓯᐅᖅᑎᑦ ᐊᒻᒪᓗ ᐳᓚᕋᖅᑐᓕᕆᓂᕐᒧᑦ ᓄᓇᕗᒥ ᐊᕙᑎᒥᐅᑕᓂᒃ ᖃᐅᔨᓴᕈᑎᖃᕐᓂᕐᒧᑦ ᐅᒥᐊᓂᒃ. ᑲᑐᔾᔨᖃᑎᒌᑦ ᐃᑲᔪᓚᐅᖅᐳᑦ ᑕᒪᑐᒧᖓ ᑮᓇᐅᔭᑎᒍᑦ, ᐅᑯᐊᓗ ᓄᓇᕗᒥ ᐃᖃᓗᓕᕆᓂᕐᒧᑦ ᐃᓕᓐᓂᐊᖅᑎᑎᔨᑦ, ᓄᓇᕗᑦ ᒐᕙᒪᒃᑯᖏᑦ, ᑲᓇᑕᐅᑉ ᐃᖃᓗᓕᕆᔨᒃᑯᖏᑦ ᑕᕆᐅᕐᒥᐅᑕᓕᕆᔨᒃᑯᖏᓪᓗ, ᐊᒻᒪᓗ ᐸᖕᓂᖅᑑᒥ ᐃᖃᓗᓕᕆᓂᕐᒧᑦ ᓚᒥᑎᒃᑯᑦ.

Cumberland Sound-ᒥ ᐃᖃᓗᒃᓯᐅᕐᓂᕐᒧᑦ ᐱᕙᓪᓕᐊᑎᑎᓂᕐᒧᑦ ᐱᓕᕆᐊᕆᔭᐅᔪᖅ

CanNor ᑮᓇᐅᔭᖃᖅᑎᑎᔪᑦ:  $480,000 ᐊᕐᕌᒍᑦ ᒪᕐᕉᒃ ᐅᖓᑖᓄᑦ
ᑲᑎᓪᓗᒋᑦ:  $750,000 ᐊᕐᕌᒍᑦ ᒪᕐᕉᒃ ᐅᖓᑖᓄᑦ

ᑕᒪᓐᓇ ᐱᓕᕆᐊᕆᔭᐅᓂᐊᖅᑐᖅ ᖃᐅᔨᓴᕈᑕᐅᓂᐊᖅᐳᖅ ᖃᓕᕋᓕᒃᓯᐅᕈᑎᒃᓴᓂᒃ ᐊᐅᔭᒃᑯ ᑕᐃᑲᓂ Cumberland Sound-ᒥ, ᐅᑭᐅᒃᑯᑦ ᐃᖃᓗᒃᓯᐅᕐᕕᐅᕙᒃᑐᒥ. ᖃᐅᔨᓴᕐᓂᐊᖅᐳᑦ ᐃᖃᓗᖕᓂᒃ ᖃᐅᔨᓇᓱᐊᕐᓗᑎᒃ ᖃᓕᕋᓕᖕᓂᒃ ᓂᐅᕐᕕᒃᓴᐅᖃᑦᑕᕈᓐᓇᕋᔭᖅᑐᓂᒃ ᐱᓕᕆᐊᖃᕈᓐᓇᕆᐊᒃᓴᖅ ᐊᐅᔭᒃᑯᑦ, ᖃᐅᔨᓴᕐᓗᑎᒡᓗ ᖃᓄᐃᑦᑐᒥᒃ ᐅᒥᐊᒥᒃ ᐊᑐᕆᐊᖃᕐᓂᕐᒧᑦ ᐃᖃᓗᒃᓯᐅᕈᑎᒋᓂᐊᕐᓗᒍ. ᓄᓇᕗᑦ ᒐᕙᒪᒃᑯᖏᑦ, ᑲᑭᕙᒃ ᑲᑐᔾᔨᖃᑎᒌᒃᑯᖏᑦ ᐊᒻᒪ ᐸᖕᓂᖅᑑᒥ ᐃᖃᓗᓕᕆᔨᒃᑯᑦ ᓚᒥᑎᒃᑯᑦ ᑕᒪᑐᒧᖓ ᑮᓇᐅᔭᖃᖅᑎᑎᖃᑕᐅᓂᐊᖅᐳᑦ.

2009-ᒥ ᐊᔾᔨᒌᖏᑦᑐᓂᒃ ᐃᖃᓗᖕᓂᒃ ᖃᐅᔨᓴᕐᓂᖅ
CanNor ᑮᓇᐅᔭᖃᖅᑎᑎᓂᐊᖅᐳᑦ:$60,000
ᑲᑎᓪᓗᒋᑦ ᑮᓇᐅᔭᑦ ᐊᑐᖅᑕᐅᓂᐊᖅᑐᑦ: $588,000

ᑕᒪᒃᑯᐊ ᑲᑐᔾᔨᒍᑕᐅᓂᐊᖅᐳᑦ ᑮᓇᐅᔭᑦ ᑖᒃᑯᓄᖓ ᖃᐅᔨᓴᕈᑕᐅᓚᐅᖅᑐᑦ ᒪᓕᒡᓗᒋᑦ ᖃᐅᔨᓴᖅᑕᐅᓚᐅᖅᑐᑦ  Hudson Strait-ᒥ. ᐃᖃᓗᖕᓂᒃ ᖃᐅᔨᓴᓚᐅᖅᐳᑦ ᐅᐊᓕᓂᖅᐸᓯᖓᓂ  Hudson Bay ᐊᒻᒪᓗ ᐊᑯᑭᑦᑐᒥᒃ ᖃᓕᕋᓖᑦ. ᑕᒪᒃᑯᐊ ᐱᓕᕆᐊᕆᔭᐅᓂᐊᖅᑐᑦ ᐊᑐᖅᑕᐅᒋᐊᖃᕐᒪᑕ ᐊᐅᓚᑕᐅᑦᓯᐊᖁᓪᓗᒋᑦ ᐃᖃᓗᐃᑦ ᐱᖁᔭᑦ ᒪᓕᒡᓗᒋᑦ ᐱᖁᔭᓕᕆᔨᐅᕙᒃᑐᓪᓗ. ᓄᓇᕗᑦ ᒐᕙᒪᒃᑯᖏᑦ, ᕿᑭᖅᑖᓗᖕᒥ ᐃᖃᓗᒃᓯᐅᖅᑎᓪᓗ ᑲᑐᔾᔨᖃᑎᒌᒃᑯᖏᑦ, ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦ, ᓄᓇᕗᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᐊᒻᒪᓗ ᒪᑭᕕᒃ ᑯᐊᐳᕇᓴᒃᑯᑦ ᓄᓇᕕᖕᒥ ᐃᑲᔪᖃᑕᐅᓂᐊᕆᓪᓗᑎᒃ ᖃᐅᔨᓴᖅᑕᐅᒍᑎᓄᑦ.

ᐊᐱᖁᑎᒃᓴᖃᕈᑦᓯ ᐃᓱᒫᓗᒍᑎᖃᕈᑦᓯᓘᓐᓃᑦ ᑕᒪᒃᑯᐊ ᒥᒃᓵᓄᑦ ᐊᓯᖏᓐᓂᒡᓗ, ᖃᐅᔨᒋᐊᕐᕕᐅᔪᓐᓇᖅᐳᖅ ᓕᐅᓇ ᐊᓪᓚᕕᖓ ᐅᕙᓂ:

ᐅᖃᓚᐅᑎᖓ: 613.992.2848/866.267.7701
ᓱᑲᔪᒃᑯᑦ:  613.996.9764/867.979.4193
ᖃᕆᑕᐅᔭᒃᑯᑦ: Aglukkaq.L@parl.gc.ca