ᓯᓚᕐᔪᐊᒥ ᐅᑭᐅᖅᑕᖅᑐᑉ ᑲᔾᔨᖓᓂᒃ ᑲᑎᒪᒍᑎᖃᕐᓂᖅ "ᖃᐅᔨᒪᔭᐅᔪᓂᒃ ᐊᑐᖅᐸᓪᓕᐊᓂᖅ" ᑲᑎᒪᒍᑕᐅᓂᐊᖅᐳᖅ ᒪᓐᑐᕆᔮᒥ, ᐄᐳᕈ 22-27-ᒧᑦ, 2012-ᖑᓕᖅᐸᑦ

December 09, 2009

ᐊᑐᕚ, ᐊᓐᑎᐅᕆᔪ (ᑎᓴᐱᕆ 9, 2009) - ᑲᓇᑕᐅᑉ ᒐᕙᒪᒃᑯᖏᑦ ᖁᕕᐊᓱᒃᐳᑦ ᑐᓴᖅᑎᑎᒍᓐᓇᕋᒥᒃ ᓯᓚᕐᔪᐊᒥᒃ ᐱᔾᔪᑎᖃᕐᓂᖅ ᑲᑎᒪᒍᑎᖃᕐᓂᐊᕐᒪᑕ (IPY) "ᖃᐅᔨᒪᔭᐅᔪᑦ ᐊᑐᖅᐸᓪᓕᐊᓂᖏᑦ" ᑲᑎᒪᕐᔪᐊᕈᑕᐅᓂᐊᕐᒪᑦ ᒪᓐᑐᕆᔮ, ᑯᐸᒃᒥ, ᐄᐳᕈ 22-27-ᒧᑦ, 2012-ᖑᓕᖅᐸᑦ.

"ᐅᑭᐅᖅᑕᖅᑑᑉ ᑲᔾᔨᖓᓃᑦᑐᑦ ᖃᓄᐃᑉᐸᓪᓕᐊᓂᖏᓐᓄᑦ ᐃᒃᐱᒋᐅᑎᒋᔪᓐᓇᕋᑦᑎᒍ ᑕᒪᑦᑕ. ᓯᓚᕐᔪᐊᒥ ᐅᑭᐅᖅᑕᖅᑑᑉ ᑲᔾᔨᖓᑕ ᐊᕐᕌᒍᖓᓂ ᖃᐅᔨᓴᕈᓐᓇᖅᐳᒍᑦ ᒫᓐᓇ ᖃᓄᐃᒍᑕᐅᕙᓪᓕᐊᒍᑕᐅᔪᓂᒃ  ᑕᒃᐹᓂ. ᑲᓇᑕᒥᐅᑦ ᐅᖃᖅᓯᒪᕗᑦ, ᑕᐃᒪᓐᓇ ᓯᓚᕐᔪᐊᒥ ᑲᑎᒪᕐᔪᐊᕈᑎᖃᕐᓂᐊᕐᓂᖅᐳᑦ ᖃᐅᔨᒍᑕᐅᔪᓐᓇᕐᓂᐊᖅᐳᑦ ᐊᓯᖏᓪᓗ ᓄᓇᓕᕐᔪᐊᖑᔪᑦ ᖃᐅᔨᕚᓪᓕᕈᓐᓇᕐᓂᐊᖅᐳᑦ ᐊᕐᕌᒍᖃᕐᓇᐅᑎᓪᓗᒍ ᑲᒪᑦᓯᐊᕆᐊᖃᕐᓂᕐᒥᖕᓄᑦ, ᐱᕙᓪᓕᐊᑎᑎᑦᓯᐊᕆᐊᖃᕐᓂᕐᒧᑦ ᐊᕙᑎᒥᐅᑕᓂᒡᓗ ᑲᒪᑦᓯᐊᕆᐊᖃᕐᓂᕐᒧᑦ ᐃᓪᓕᕆᔭᐅᑦᓯᐊᕐᒪᑦ ᑕᒃᐸᖕᓇ," ᐅᖃᓚᐅᖅᐳᖅ ᓗᐊᕋᓐ ᑳᓇᓐ, ᒥᓂᔅᑕ ᓄᓇᓕᕐᔪᐊᖑᓕᕆᓂᕐᒧᑦ ᑲᑎᒪᔨᐅᖃᑕᐅᓪᓗᓂᓗ ᐊᑐᕚᒥ ᑲᑎᒪᔨᕐᔪᐊᓄᑦ  Pontiac, Quebec-ᒧᑦ ᑭᒡᒐᖅᑐᐃᓪᓗᓂ ᓴᒃ ᓯᑖᓪᒥᒃ, ᐃᓄᓕᕆᔨᑐᖃᒃᑯᓐᓄᑦ ᒥᓂᔅᑕ ᑲᒪᔨᐅᓪᓗᓂᓗ ᐃᖅᑭᓕᕐᓚᖕᓄᑦ ᐃᓕᑕᕆᔭᐅᓯᒪᖏᑦᑐᓄᓪᓗ ᐃᖅᑭᓕᕐᓄᑦ. "ᖁᕕᐊᓱᒃᐳᒍᓪᓗ ᑐᓴᖅᑎᑎᔪᓐᓇᕋᑦᑕ ᑖᒃᑐ ᐲᑕ ᕼᐃᐅᕆᓴᓐ,ᓯᑕᕗ ᑕᓂᖕ ᑐᑭᒧᐊᒃᑎᑎᔨᐅᓪᓗᓂᓗ ᐃᓕᓐᓂᐊᕐᕕᖕᒥᒃ ᐊᑐᐊᒐᓕᐅᕐᓂᕐᒧᑦ ᐃᓕᓐᓂᐊᕈᑕᐅᔪᓂᒃ ᐃᓕᓐᓂᐊᕐᕕᒡᔪᐊᒥ ᓯᓚᑦᑐᖅᓴᕐᕕᖓᓂ   Queen's University in Kingston, Ontario ᐃᒃᓯᕙᐅᑕᐅᔪᓐᓇᕐᓂᐊᕐᒪᑦ ᓯᓚᕐᔪᐊᒥ ᑕᐃᒪᓐᓇ ᐱᓕᕆᐊᖃᖅᑎᓪᓗᑕ ᐊᒻᒪᓗ ᑖᒃᑐ ᑳᕈ ᐅᑉ, ᑐᑭᒧᐊᒃᑎᑎᔨ ᐊᒥᐊᓕᑲᒥᐅᑦ ᓄᓇᖓᓐᓂ ᓱᓇᑐᐃᓐᓇᕐᓂᒃ ᖃᐅᔨᓴᕐᓂᕐᒧᑦ ᑲᑐᔾᔨᖃᑎᒌᒃᑯᖏᓐᓂ, ᐊᓪᓚᕕᖃᖅᖢᓂ ᐅᑭᐅᖅᑕᖅᑑᑉ ᑲᔾᔨᖓᓂ ᐱᓕᕆᐊᓂᒃ, ᐊᖏᖅᓯᒪᓕᕐᒪᑦ ᐃᒃᓯᕙᐅᑕᐅᖃᑕᐅᓂᐊᖅᖢᓂ ᑲᑎᒪᒍᑕᐅᓂᐊᖅᑐᒥᒃ ᐱᔾᔪᑎᖃᕐᓗᓂ ᐅᑭᐅᖅᑕᖅᑑᑉ ᑲᔾᔨᖓᓂ ᖃᓄᐃᓕᐅᕈᑕᐅᒋᐊᖃᖅᑐᓂᒃ 2012-ᒥ."

ᑖᓐᓇ ᑲᑎᒪᕐᔪᐊᕐᓇᐅᓂᐊᖅᑐᖅ 2012-ᒥ ᑭᖑᓪᓕᖅᐹᕆᔭᐅᓂᐊᖅᖢᓂ ᐊᕐᕌᒍᖃᖅᑎᑕᐅᑎᓪᓗᒍ ᑕᒃᐹᓂ. ᖃᐅᔨᑎᑕᐅᓯᒪᓕᖅᐳᒍᑦ ᑲᑎᒪᔭᖅᑐᖃᑕᓂᐊᖅᑐᑦ ᐊᒥᓲᓂᖃᕐᓂᐊᕐᓂᖏᓐᓄᑦ 3,000-ᓂᒃ ᓱᓇᑐᐃᓐᓇᕐᓂᒃ ᖃᐅᔨᓴᖅᑎᓂᒃ, ᐊᑐᐊᒐᓕᕆᔨᓂᒡᓗ ᒐᕙᒪᐅᔪᓂᒡᓗ ᓇᑭᑐᐃᓐᓇᖅ ᓯᓚᕐᔪᐊᒥᑦ ᖃᐅᔨᓴᕈᑕᐅᓯᒪᔪᓂᒃ ᓇᒃᓴᕐᓗᑎᒃ ᐊᑐᐊᒐᓕᐅᖅᑕᐅᒍᒪᔪᓂᒡᓗ ᐅᖃᐅᓯᖃᕐᓗᑎᒃ.

"ᖃᐅᔨᓴᕈᑕᐅᓚᐅᖅᑐᑦ ᓯᓚᕐᔪᐊᒥ ᐅᑭᐅᖅᑕᖅᑑᑉ ᐊᕐᕌᒍᖓᓂ ᐃᑲᔪᕈᑕᐅᓂᐊᖅᐳᑦ ᐅᑭᐅᖅᑕᖅᑐᒥᐅᓄᑦ ᑲᓇᑕᒥᐅᑕᐅᔪᓪᓗ ᖃᐅᔨᓴᕈᑕᐅᓯᒪᔪᓂᒃ ᖃᐅᔨᕚᓪᓕᕈᓐᓇᖁᓪᓗᑕ ᐅᑭᐅᖅᑕᖅᑐᒥ ᖃᓄᐃᑉᐸᓪᓕᐊᒍᑕᐅᓂᖓᓄᑦ," ᐅᖃᓚᐅᖅᐳᖅ ᓕᐅᓇ ᐊᒡᓗᒃᑲᖅ, ᒥᓂᔅᑕ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ, ᒥᓂᔅᑕᐅᓪᓗᓂᓗ ᑲᒪᒋᔭᖃᖅᑐᖅ ᐅᑭᐅᖅᑕᖅᑐᒥᐅᓂᒃ. "ᓂᕆᐅᒋᔭᖃᖅᐳᒍᑦ ᐱᓕᕆᖃᑎᖃᐃᓐᓇᕈᒪᓪᓗᑕ ᐅᑭᐅᖅᑕᖅᑐᒥᐅᓂᒃ, ᓄᓇᖃᖅᑳᖅᓯᒪᔪᓂᒃ, ᓄᓇᓕᖕᓂᒃ, ᒐᕙᒪᓂᒃ ᓱᓇᑐᐃᓐᓇᕐᓂᒃ ᖃᐅᔨᓴᕈᑎᖃᖅᐸᒃᑐᓂᒡᓗ ᑕᐃᒪᓐᓇᓗ ᖃᐅᔨᒪᓂᖅᓴᐅᓕᕈᓐᓇᖁᓪᓗᑕ ᖃᓄᐃᓕᐅᕈᑎᒋᔭᒃᓴᑦᑎᓐᓂᒃ."

"ᑲᓇᑕ ᓯᕗᓕᖅᑎᐅᓯᒪᕗᖅ ᓯᓚᕐᔪᐊᒥ ᐅᑭᐅᖅᑕᖅᑐᒥ ᖃᓄᐃᓕᐅᕈᑕᐅᔪᓂᒃ ᖃᐅᔨᓴᖅᓯᒪᓪᓗᑎᒃ ᖃᓄᑐᐃᓐᓇᖅ. ᐱᓗᐊᖅᑐᒥᒃᑲᓐᓂᖅ, ᑲᓇᑕ ᐱᓕᕆᓯᒪᒻᒪᕆᒃᐳᖅ ᐃᓄᖕᓂᒃ ᐱᓕᕆᐊᖃᕐᓂᕐᒧᑦ ᐃᓄᐃᑦ ᐱᖅᑯᓯᑐᖃᖏᓐᓂᒃ ᑐᓴᖅᑎᑕᐅᓯᒪᓪᓗᑎᒃ ᐊᑯᓂ ᐊᕐᕌᒍᓂ. ᑲᑎᒪᕐᔪᐊᕐᓇᐅᓂᐊᖅᑐᖅ 2012-ᒥ ᐱᒻᒪᕆᐅᑎᑕᐅᓂᐊᖅᐳᑦ ᑲᓇᑕᒥᐅᓄᑦ ᓯᓚᕐᔪᐊᒥᐅᓄᓪᓗ ᐱᒻᒪᕆᐅᔪᒥᒃ ᐱᓕᕆᓂᕐᒧᑦ ᐃᑲᔪᖅᑎᒌᒍᓐᓇᕐᓂᐊᕐᒪᑕ ᐱᓕᕆᖃᑎᒌᒡᓗᑎᒃ," ᐅᖃᓚᐅᖅᐳᖅ ᑖᒃᑐ ᐲᑕ ᕼᐃᐅᕋᓴᓐ, ᐃᒃᓯᕙᐅᑕᕆᔭᐅᓂᐊᖅᑐᖅ ᑲᑎᒪᕐᔪᐊᕐᓇᐅᓂᐊᖅᑐᒥ 2012-ᒥ.

"ᐅᑭᐅᖅᑕᖅᑐᒥ ᐊᕐᕌᒍᒋᔭᐅᓂᐊᖅᑐᒥ ᑐᑭᓯᐅᒪᕙᓪᓕᐊᒍᑎᖃᖅᐳᑦ ᒫᓐᓇ ᖃᐅᔨᓴᕈᑕᐅᓯᒪᔪᓂᒃ. ᐋᖅᑭᒃᓯᓚᐅᖅᖢᑎᒡᓗ ᓯᓚᕐᔪᐊᒥ ᐱᓕᕆᖃᑎᒌᒋᐊᖃᕐᓂᕐᒧᑦ. ᐅᒃᐱᕈᓱᒃᐳᖓ ᐊᑯᓂᐅᓂᐊᖅᑐᒥ ᐱᓕᕆᖃᑎᒌᒡᓗᑕ ᖃᐅᔨᔪᓐᓇᕐᓂᐊᖅᐳᒍᑦ ᖃᓄᐃᓕᐅᕈᑎᒃᓴᐅᓂᐊᖅᑐᓂᒃ ᑲᑎᒪᕐᔪᐊᕐᓗᑕ," ᐅᖃᓚᐅᖅᐳᖅ ᑖᒃᑐ ᑳᕈ ᐅᑉ, ᐃᒃᓯᕙᐅᑕᐅᖃᑕᐅᔪᖅ ᑲᑎᒪᕐᔪᐊᕐᓇᐅᓂᐊᖅᑐᒥ 2012-ᒥ. "ᓯᓚᕐᔪᐊᒥᐅᑕᐃᑦ ᐱᓕᕆᖃᑎᒌᒡᓗᑎᒃ ᓱᓇᑐᐃᓐᓇᕐᓂᒃ ᖃᐅᔨᓴᕐᓂᕐᒧᑦ ᐱᒻᒪᕆᐅᑎᑕᐅᓂᐊᖅᐳᑦ ᓇᓂᑐᐃᓐᓇᖅ ᓯᓚᕐᔪᐊᒥ ᐱᔾᔪᑎᒋᔭᐅᔪᓂᒃ."

"ᑲᓇᑕᒥᐅᑦ ᐅᐱᑦᓯᐊᖅᐳᑦ ᑲᑎᒪᕐᔪᐊᖅᑎᑎᓂᐊᕐᒪᑕ ᓱᓇᑐᐃᓐᓇᓕᕆᓂᕐᒥᒃ ᖃᐅᔨᓴᕈᑎᓂᒃ ᐊᑐᐊᒐᓕᐅᖅᑎᓂᒡᓗ ᐱᒻᒪᕆᐅᔪᒥ ᑲᑎᒪᕐᔪᐊᕐᓇᐅᓂᐊᖅᑐᒥ ᒪᓐᑐᕆᔮᒥ. ᑕᒪᑯᐊ ᐊᑐᖅᑕᐅᔪᓐᓇᕐᓂᐊᕐᒪᑕ ᖃᐅᔨᒪᔭᐅᓯᒪᖏᑦᑐᑦ ᐅᑭᐅᖅᑕᖅᑐᖅ ᐱᔾᔪᑎᒋᓪᓗᒍ ᖃᓄᐃᓕᐅᖅᑕᐅᔪᓐᓇᕐᓂᐊᕐᓂᖓᓄᓪᓗ ᐅᑭᐅᖅᑕᖅᑐᒥᐅᓂ," ᐅᖃᓚᐅᖅᐳᖅ ᒥᓂᔅᑕ ᑯᕆᓐᑕᓐ ᐱᐅᕋᑎ, ᒥᓂᔅᑕ ᓴᓇᔪᓕᕆᔨᒃᑯᓐᓄᑦ ᒐᕙᒪᒃᑯᑦ ᐱᔨᑦᓯᕋᖅᑎᐅᓂᖏᓐᓄᓪᓗ, ᒥᓂᔅᑕ ᑲᒪᒋᔭᖃᖅᑐᖅ ᒪᓐᑐᕆᔮᒥ, ᑲᑎᒪᔨᐅᖃᑕᐅᓪᓗᓂᓗ ᓄᓇᓕᖕᒥᑦ  Mégantic-L'Érable.

ᓯᓚᕐᔪᐊᒥ ᐅᑭᐅᖅᑕᖅᑐᒥᒃ ᐱᓕᕆᐊᖃᕐᓂᖅ ᐊᕐᕌᒍᖓ ᐊᖏᓂᖅᓴᐅᓪᓗᓂ ᐱᓕᕆᐊᕆᔭᐅᔪᖅ ᖃᐅᔨᓴᕐᓂᕐᒧᑦ ᐅᑭᐅᖅᑕᑐᒥᐅᓂᒃ ᓂᒡᒋᖅᐸᓯᖕᒥᐅᓂᒡᓗ. ᐊᒥᓱᑦ ᖃᐅᔨᓴᖅᑎᑦ 60 ᐅᖓᑖᓄᑦ ᓄᓇᓕᕐᔪᐊᓂᑦ ᓯᓚᕐᔪᐊᒥ ᐃᑲᔪᕈᑎᖃᖅᓯᒪᓕᖅᐳᑦ ᖃᐅᔨᓴᕐᓂᕐᒥᒃ ᐅᑭᐅᖅᑕᖅᑐᒥ ᑐᑭᓯᐅᒪᔪᓐᓇᖁᓪᓗᑕ ᐱᔾᔪᑎᒋᔭᐅᔪᓂᒃ ᐊᑲᐅᖏᓕᐅᕈᑕᐅᔪᒡᓗ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᓱᖏᐅᑎᕙᓪᓕᐊᒍᑎᒃᓴᓂᒡᓗ, ᐊᓯᖏᓐᓂᒡᓗ ᐱᒻᒪᕆᐅᔪᓂᒃ ᐊᑐᐊᒐᓕᐅᖅᑕᐅᓂᐊᖅᑐᓂᒃ ᖃᓄᐃᓕᐅᖅᑕᐅᒋᐊᖃᕐᓂᖓᓄᑦ ᐅᑭᐅᖅᑕᖅᑐᖅ ᐱᔾᔪᑎᒋᓪᓗᒍ.

ᑖᓐᓇ  ᐊᓪᓚᒃᕕᒃ ᐅᑭᐅᖅᑕᖅᑐᒥ ᐊᕐᕌᒍᖃᕐᓂᕐᒧᑦ ᐱᓕᕆᐊᖃᕐᓂᐊᖅᑐᖅ ᓯᕗᓕᖅᑎᐅᕗᑦ ᐸᕐᓇᒃᐸᓪᓕᐊᓪᓗᑎᒃ ᑲᒪᒋᔭᖃᖅᐸᓪᓕᐊᓪᓗᑎᒡᓗ 2012 ᑲᑎᒪᕐᔪᐊᕐᓇᐅᓂᐊᖅᑐᒥᒃ, ᐱᓕᕆᖃᑎᖃᖅᖢᑎᒃ ᑲᓇᑕᒥ ᖃᐅᔨᓴᖅᑎᑦ ᑲᑎᒪᔨᕐᔪᐊᖏᓐᓂᒃ ᓯᓚᕐᔪᐊᒥ ᐅᑭᐅᖅᑕᖅᑐᖅ ᐊᕐᕌᒍᒋᓂᐊᖅᑕᖓᓂᒡᓗ ᑲᑎᒪᔨᕋᓛᓂᒃ ᐱᖃᑎᖃᕐᓗᑎᒃ.


ᖃᓄᐃᓕᖓᓯᒪᓂᖓ
ᓯᓚᕐᔪᐊᒥ ᐅᑭᐅᖅᑕᖅᑐᖅ ᐊᕐᕌᒍᖓᓂ ᑲᓇᑕᒥ

ᑲᓇᑕᐅᑉ ᒐᕙᒪᒃᑯᖏᑦ ᐃᓚᒋᔭᐅᑦᓯᐊᖅᓯᒪᕗᑦ ᓯᓚᕐᔪᐊᒥ ᐅᑭᐅᖅᑕᖅᑐᖅ ᐊᕐᕌᒍᖓᓂ, ᐃᑲᔪᕈᑎᖃᖅᓯᒪᓪᓗᑎᒃ ᑮᓇᐅᔭᓂᒃ $156 ᒥᓕᔭᓐᑖᓚᓂᒃ 52 ᖃᐅᔨᓴᖅᑕᐅᓯᒪᓪᓗᑎᒃ ᖃᐅᔨᓴᖅᑎᖃᖅᓯᒪᓪᓗᑎᒡᓗ 1,750-ᓂᒃ ᐅᑭᐅᖅᑕᖅᑐᒥ ᑲᓇᑕᒥᐅᑕᐃᑦ. ᑲᓇᑕᒥ ᐅᑭᐅᖅᑕᖅᑐᖅ ᐊᕐᕌᒍᐊᕐᓂᖓᓄᑦ ᐱᓕᕆᐊᕆᔭᐅᓯᒪᔪᑦ, ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐱᔾᔪᑎᖃᖅᑐᑦ ᓱᖏᐅᑎᕙᓪᓕᐊᒋᐊᖃᕐᓂᖏᓐᓄᓪᓗ ᐊᓯᔾᔨᖅᐸᓪᓕᐊᓂᖓᓄᑦ ᓯᓚ, ᖃᐅᔨᓴᖅᓯᒪᓪᓗᑎᒃ ᖃᓄᑐᐃᓐᓇᖅ ᖃᓄᐃᓕᐅᕈᑕᐅᔪᓂᒃ, ᖁᐊᖅᓯᒪᐃᓐᓇᖃᑦᑕᖅᑐᓂᒡᓗ ᖃᐅᔨᓴᖅᓯᒪᓪᓗᑎᒃ, ᑕᕆᐅᓕᕆᓂᕐᒧᓪᓗ ᓯᓚᓕᕆᓂᕐᒧᓪᓗ, ᐊᐳᑎᓕᕆᓂᕐᒧᓪᓗ, ᑕᕆᐅᒥ ᓯᑯᓕᕆᓂᕐᒧᓪᓗ, ᐱᕈᖅᐸᓪᓕᐊᕙᒃᑐᓂᒡᓗ ᐱᓕᕆᐊᖃᕐᓂᕐᒧᑦ ᐆᒪᔪᓕᕆᓂᕐᒧᓪᓗ. ᑲᓇᑕᐅᑉ ᒐᕙᒪᒃᑯᖏᑦ ᑮᓇᐅᔭᖃᖅᑎᑎᓚᐅᖅᖢᑎᒡᓗ ᐱᒻᒪᕆᐅᔪᓂᒃ ᖃᐅᔨᓴᕈᑕᐅᔪᓂᒃ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐱᔾᔪᑎᒋᔭᐅᔪᓂᒃ ᐃᓄᖕᓂᒃ ᑲᒪᒋᔭᖃᕐᓂᕐᒥᒡᓗ ᓄᓇᓕᖕᓂ ᑲᓇᑕᒥ ᐅᑭᐅᖅᑕᖅᑐᒥᐅᓂᒃ.