ᑮᓇᐅᔭᖃᖅᑎᑦᓯᓂᖏᑦ ᐃᖅᑲᓇᐃᔮᖅᑖᕈᑕᐅᓂᐊᖅᑐᑦ, ᐊᕕᑦᑐᖅᓯᒪᓂᐅᔪᓂᓗ ᑮᓇᐅᔭᓕᐅᕈᑕᐅᒃᑲᓐᓂᕈᓐᓇᕐᓗᑎᒃ
 
ᐃᖃᓗᐃᑦ, ᓄᓇᕗᑦ - ᓕᐅᓇ ᐊᒡᓗᒃᑲᖅ, ᒥᓂᔅᑕ ᐋᓐᓂᐊᖃᕐᓇᖏᑦᑐᓕᕆᔨᕐᔪᐊᒃᑯᓐᓄᑦ, ᐊᒻᒪᓗ ᒥᓂᔅᑕ ᖁᐊᓴ ᑯᓱᒐᖅ, ᒥᓂᔅᑕ ᓄᓇᓕᓐᓂ ᒐᕙᒪᒃᑯᓂᓪᓗ ᐱᔨᑦᓯᕋᖅᑎᒃᑯᓐᓄᑦ, ᐅᓪᓗᒥ ᐅᖃᐅᓯᖃᖅᑲᐅᔫᒃ ᒐᕙᒪᒋᔭᖏᒃ
ᑲᑐᔾᔨᒍᑎᖃᕐᓂᐊᕐᖓᑎᒃ ᑮᓇᐅᔭᖃᖅᑎᑦᓯᓗᑎᒃ 18-ᓂᒃ ᐊᑭᑐᔫᑎᓂᒃ ᐱᓕᕆᐊᓂᒃ ᓄᓇᕗᓗᑦᑕᒥ. ᑖᒃᑯᐊ ᐱᓕᕆᐊᑦ ᐱᒻᒪᕆᐅᔪᓂᒃ ᐊᑭᑐᔫᑎᑖᕈᑕᐅᓂᐊᖅᑐᑦ ᓄᓇᕗᒻᒥ ᐃᑲᔪᕈᑕᐅᓗᑎᓪᓗ ᓄᓇᓕᓐᓂ ᑮᓇᐅᔭᓕᐅᕈᑎᖃᕈᓐᓇᓂᕐᒧᑦ
ᐃᓅᓯᓕᕆᓂᒃᑯᓪᓗ ᐱᕚᓪᓕᕈᑕᐅᓗᑎᒃ ᓄᓇᕗᒻᒥ.
 
“ᐊᑭᑐᔫᑎᓄᑦ ᑮᓇᐅᔭᖃᖅᑎᑦᓯᓂᐅᔪᑦ ᐱᒻᒪᕆᐅᔪᒥᒃ ᐃᑲᔪᕈᑕᐅᔪᑦ ᑮᓇᐅᔭᓕᐅᕈᓐᓇᓂᕐᒧᑦ ᒪᑭᑉᐸᓪᓕᐊᒐᓱᐊᕐᓂᑎᓐᓄᑦ ᐃᖅᑲᓇᐃᔮᑦᓴᓂᓪᓗ ᐱᕙᓪᓕᐊᑎᑦᓯᒐᓱᐊᕐᓂᑎᓐᓄᑦ ᑲᓇᑕᒥᐅᓕᒫᓄᑦ,” ᐅᖃᖅᓯᒪᔪᖅ ᒥᓂᔅᑕ ᐊᒡᓗᒃᑲᖅ. “ᐅᐱᒍᓱᑦᑐᖓ
ᐊᑦᓱᕉᑎᖃᕐᓂᖏᓐᓂᒃ ᒐᕙᒪᒋᔭᕗᑦ ᒪᓕᑦᓯᐊᕋᓱᐊᖅᑐᑎᒃ ᐅᑭᐅᖅᑕᖅᑐᒧᑦ ᖃᓄᖅᑑᕈᑎᒋᓯᔭᑦᑎᓐᓄᑦ. ᐊᑭᑐᔫᑎᓄᑦ ᑮᓇᐅᔭᖃᖅᑎᑦᓯᓂᐅᕙᑦᑐᑦ, ᑖᒃᑯᐊᑎᑐᑦ ᐅᓪᓗᒥ ᐅᖃᐅᓯᐅᔪᑎᑐᑦ, ᐊᑑᑎᖃᑦᓯᐊᖅᑐᓂᒃ ᐱᕚᓪᓕᕈᑕᐅᓂᐊᖅᑐᑦ ᓄᓇᕗᒻᒥ
ᑮᓇᐅᔭᓕᐅᕈᑎᖃᕈᓐᓇᓂᕐᒧᑦ ᐃᓅᓯᓕᕆᓂᕐᒧᓪᓗ ᐊᑦᑐᐃᓂᖃᕐᓂᐊᕐᓂᖏᓐᓄᑦ ᓂᕆᐅᓇᑦᓯᐊᖅᑐᒥᒃ ᐅᓗᕆᐊᓇᙱᑦᑐᒥᓪᓗ ᓯᕗᓂᑦᓴᖃᑦᓯᐊᕈᓐᓇᖁᓪᓗᒋᑦ ᓄᓇᕗᒻᒥᐅᓕᒫᑦ ᑕᒫᓂᒥᐅᓄᑦ ᐃᖅᑲᓇᐃᔭᖅᑐᓄᓪᓗ.”
 
“ᑲᓇᑕᒥᒃ ᐋᖅᑭᑦᓱᐃᕙᓪᓕᐊᓂᕐᒧᑦ ᑮᓇᐅᔭᐃᑦ ᐃᑲᔪᕈᑕᐅᓂᐊᖅᑐᑦ ᑲᒪᒐᓱᐊᖅᑎᓪᓗᑕ ᑐᕌᒐᑦᑎᓐᓄᑦ ᐋᖅᑭᑦᑕᐅᓯᒪᔪᓄᑦ ᓄᓇᕗᑦ ᒐᕙᒪᒃᑯᖏᓐᓄ,” ᐅᖃᖅᓯᓚᔪᖅ ᒥᓂᔅᑕ ᑯᓱᒐᖅ. “ᑖᒃᑯᐊ ᑮᓇᐅᔭᐃᑦ ᓴᖅᑭᕈᑕᐅᑐᐃᓐᓇᔾᔮᖏᑦᑐᑦ ᐃᖅᑲᓇᐃᔮᑦᓴᓂᒃ
ᓄᓇᑦᑎᓐᓂ, ᑭᓯᐊᓂᑦᑕᐅᖅ ᐊᑐᐃᓐᓇᕈᕈᑕᐅᓗᑎᒃ ᐱᑕᖃᕆᐊᖃᓪᓚᕆᑦᑐᓂᒃ ᐊᑭᑐᔫᑎᓂᒃ ᓲᕐᓗ ᕼᐊᒻᓚᒃᑯᑦ ᐊᓪᓚᕝᕕᖏᓐᓂᒃ, ᐱᙳᐊᕐᕕᓐᓂᒃ, ᖃᖓᑕᔫᒃᑯᕕᒻᒥ ᓯᕐᓗᐊᓂᒃ ᓄᓇᕗᒻᒥᐅᓕᒫᓄᑦ.”
 
ᑮᓇᐅᔭᐃᑦ ᐅᓪᓗᒥ ᐅᖃᐅᓯᐅᔪᑦ ᐃᑲᔪᕈᑕᐅᓂᐊᖅᑐᑦ ᓴᓇᒍᑕᐅᓗᑎᒃ, ᓄᑖᕐᖑᖅᓯᒋᐊᕈᑕᐅᓗᑎᓪᓗ 18-ᓂᒃ ᐱᓕᕆᐊᓂᒃ, ᓇᓗᓇᐃᖅᑕᐅᓯᒪᔪᓂᒃ ᓯᕗᓪᓕᐅᔾᔭᐅᖁᔭᐅᓪᓗᑎᒃ ᓄᓇᕗᒻᒥ 2007-08, 2008-09, 2009-10-ᒥᓗ ᐊᑭᑐᔫᑎᓄᑦ
ᐸᕐᓇᐅᑎᖏᓐᓂ, ᒪᓕᑦᑐᒋᑦ ᖃᓪᓗᓈᓂ-ᐅᑭᐅᖅᑕᖅᑐᒥᓗ ᑮᓇᐅᔭᖅᑖᖑᕙᑦᑐᑦ, ᐃᓚᒋᔭᐅᖃᑕᐅᔪᑦ ᑲᓇᑕᒥᒃ ᐋᖅᑭᑦᓱᐃᕙᓪᓕᐊᓂᕐᒧᑦ ᐸᕐᓇᐅᑎᖓᓂ.
 
ᐃᓚᒋᔭᐅᔪᑦ ᐱᒋᐊᖅᑎᑕᐅᓯᒪᔪᓂ ᓴᓇᔭᐅᓂᐊᕐᓂᖏᑦ ᓄᑖᑦ ᖃᖓᑕᔫᒃᑯᕕᓐᓂ ᓱᓇᒃᑯᑖᓄᑦ ᓯᕐᓗᐊᑦ; ᓴᓇᔭᐅᓗᑎᒃ ᓄᑖᑦ ᕼᐊᒻᓚᒃᑯᑦ ᐊᓪᓚᕝᕕᖏᑦ; ᓄᑖᕐᖑᕆᐊᖅᑕᐅᓗᑎᓪᓗ ᖁᐊᖅᑎᑕᒐᓕᖅᑕᐅᓗᑎᓪᓗ ᓄᓇᓕᓐᓂ ᐊᑐᕆᐊᑦ. 18
ᐱᒋᐊᖅᑎᑕᐅᓯᒪᔪᑦ ᑲᑐᔾᔭᐅᓪᓗᑎᒃ ᑮᓇᐅᔭᖃᖅᑎᑕᐅᔪᑦ ᑲᓇᑕᐅᑉ ᓄᓇᕗᓪᓗ ᒐᕙᒪᒃᑯᖏᓐᓄᑦ ᑲᑎᓕᒫᖅᑐᒋᑦ ᐅᖓᑖᓃᑦᑐᓄᑦ $70 ᒥᓕᐊᓐ. ᓄᓇᕗᑦ ᐱᓕᕆᖃᑎᖃᑦᓯᐊᖅᑐᑦ ᒐᕙᒪᑐᖃᒃᑯᓐᓂᒃ ᓇᓗᓇᐃᖅᓯᓯᒪᒍᒪᓪᓗᑎᒃ ᐊᑭᑐᔫᑎᓄᑦ ᑮᓇᐅᔭᐃᑦ
ᐊᑐᖅᑕᐅᓂᐊᕐᓗᑎᒃ ᓯᕗᓪᓕᐅᔾᔭᐅᖁᔭᐅᓯᒪᔪᓄᑦ ᓄᓇᕘᓗᑦᑖᒥ.

ᑲᓇᑕ-ᓄᓇᕗᑦ ᖃᓪᓗᓈᓂ-ᐅᑭᐅᖅᑕᖅᑐᒥᓗ ᑮᓇᐅᔭᖃᖅᑎᑕᐅᓂᕐᒧᑦ ᐊᖏᖃᑎᒌᒍᑎᒃᑯᑦ, ᓄᓇᕗᑦ ᑐᓂᔭᐅᓂᐊᖅᑐᑦ ᑲᑎᓕᒫᖅᑐᒋᑦ $182.68 ᒥᓕᐊᓐᓂᒃ ᑲᓇᑕᐅᑉ ᒐᕙᒪᒃᑯᖏᓐᓂᒃ ᐊᑭᑐᔫᑎᓄᑦ ᐱᓕᕆᐊᓄᑦ ᓲᕐᓘ ᐃᒥᖅᑕᕐᕕᓕᕆᓂᕐᒧᑦ,

ᑭᓈᓗᓕᕆᓂᕐᒧᑦ, ᐆᒻᒪᖅᑯᑐᕐᓂᕐᒧᑦ ᓴᓗᒪᓂᖅᓴᒃᑯᑦ, ᐊᕕᑦᑐᖅᓯᒪᓂᐅᔪᓂ ᓄᓇᓕᓐᓂ ᖃᖓᑕᔫᒃᑯᕕᓐᓄᑦ, ᐊᒻᒪᓗ ᐊᑦᑕᓇᙱᓂᖅᓴᐅᓕᖁᓪᓗᒋᑦ ᐊᑐᕆᐊᑦ, ᐱᙳᐊᕐᕕᕈᔪᓐᓄᓪᓗ ᐊᑭᑐᔫᑎᓄᑦ.
 
 
ᑲᓇᑕᐅᑉ ᒐᕙᒪᒃᑯᖏᑕ ᐱᕙᓪᓕᐊᑎᑦᓯᒐᓱᐊᕐᓂᕐᒧᑦ ᐸᕐᓇᐅᑎᖓᑦ ᓱᑲᓕᖅᑎᑦᓯᒋᐊᕈᑕᐅᔪᑦ ᐊᖏᓪᓕᒋᐊᖅᑎᑦᓯᒍᑕᐅᓪᓗᑎᒃ ᒐᕙᒪᑐᖃᒃᑯᑦ ᑮᓇᐅᔭᖃᖅᑎᑦᓯᒌᖅᓯᒪᓂᖏᓐᓄᑦ $33 ᐱᓕᐊᓐᓂᒃ ᐊᑭᑐᔫᑎᓄᑦ $12 ᐱᓕᐊᓐᑲᓴᐃᑦ ᓄᑖᓄᑦ ᐊᑭᑐᔫᑎᓄᑦ
ᑲᔪᖏᖅᓴᐃᒍᑎᐅᓪᓗᑎᒃ ᑮᓇᐅᔭᖃᖅᑎᑦᓯᒍᑕᐅᓂᐊᖅᑐᑦ ᐊᕐᕌᒎᓐᓄᑦ ᒪᕐᕉᓐᓄᑦ.
 
ᑐᑭᓯᒋᐊᒃᑲᓐᓂᕈᒪᒍᕕᑦ ᐊᑭᑐᔫᑎᓄᑦ ᐱᓕᕆᐊᓂᒃ ᓄᓇᕗᒻᒥ, ᑕᑯᒋᐊᕐᓗᑎᑦ  www.creatingjobs.gc.ca.
 
ᖃᐅᔨᒋᐊᒃᑲᓐᓂᕈᒪᒍᕕᑦ ᑲᓇᑕᐅᑉ ᐱᕙᓪᓕᐊᑎᑦᓯᒐᓱᐊᕐᓂᕐᒧᑦ ᐸᕐᓇᐅᑎᖓᑕ ᒥᑦᓵᓄᑦ, ᑕᑯᒋᐊᕐᓗᑎᑦ  www.actionplan.gc.ca.



ᑭᖑᓂᑦᑎᓐᓂ ᖃᓄᐃᓕᐅᕈᑕᐅᓯᒪᔪᑦ
 
 
ᑲᓇᑕ ᓄᓇᕗᓪᓘ ᐃᑲᔪᖅᓱᐃᓂᖏᑦ ᐊᑭᑐᔫᑎᓂᒃ
 
ᑲᓇᑕ ᓄᓇᕘᓗ ᐱᓕᕆᖃᑎᒌᑦᑐᑦ ᐃᑲᔪᖅᓱᐃᓪᓗᑎᒃ ᐱᑕᖃᕆᐊᖃᓪᓚᕆᑦᑐᓂᒃ ᐊᑭᑐᔫᑎᓂᒃ ᑮᓇᐅᔭᖏᑎᒍᑦ ᑲᓇᑕᒥᒃ
ᐋᖅᑭᑦᓱᐃᕙᓪᓕᐊᓂᕐᒧᑦ, ᑲᓇᑕᐅᑉ ᒐᕙᒪᒃᑯᖏᑕ ᐊᑭᑐᔫᑎᓄᑦ ᐸᕐᓇᐅᑎᖏᑦ.
 
18 ᐱᒋᐊᖅᑎᑕᐅᓯᒪᔪᑦ ᓇᓗᓇᐃᖅᑕᐅᓯᒪᔪᑦ ᑮᓇᐅᔭᖃᖅᑎᑕᐅᓂᐊᕐᓂᖏᑦ ᖃᓪᓗᓈᓂ-ᐅᑭᐅᖅᑕᖅᑐᒥ
ᑮᓇᐅᔭᖃᖅᑖᖑᕙᑦᑐᑎᒍᑦ ᓄᓇᕗᒻᒥ 2007-08, 2008-09 2009-10-ᒥᓗ ᐊᑭᑐᔫᑎᓄᑦ ᐸᕐᓇᐅᑎᖏᒍᑦ ᐅᓪᓗᒥ
ᐅᖃᐅᓯᐅᖅᑲᐅᔪᑦ. ᑲᑎᓕᒫᖅᑐᒋᑦ ᑮᓇᐅᔭᖅᑖᕈᑕᐅᓂᐊᖅᑐᑦ ᐱᓕᕆᐊᓄᑦ $70.03 ᒥᓕᐊᓐ ᑲᑐᔾᔭᐅᓗᑎᓪᓗ
ᑮᓇᐅᔭᖃᖅᑎᑕᐅᓂᐊᖅᑐᑦ ᒐᕙᒪᒃᑯᖏᓐᓄᑦ ᑲᓇᑕᐅᑉ ᓄᓇᕘᓪᓗ.
 
ᖄᒃᑲᓐᓂᖓᒍᑦ ᐅᓪᓗᒥ ᐅᖃᐅᓯᐅᔪᑦ, ᓄᕕᐱᕆ 20, 2009, ᒐᕙᒪᒃᑯᖏᑦ ᑲᓇᑕᐅᑉ ᓄᓇᕘᓪᓗ ᐅᖃᐅᓯᖃᓚᐅᕐᒥᔪᑦ
ᑮᓇᐅᔭᖃᖅᑎᑦᓯᓂᐊᕐᓂᕋᖅᑐᑎᒃ ᒥᑦᑎᒪᑕᓕᒻᒥ ᐊᓐᓂᑭᑦᑐᕐᕕᒻᒥᒃ, ᐱᓕᕆᐊᖅ ᓇᓗᓇᐃᖅᑕᐅᓯᒪᔪᖅ ᓄᓇᕗᒻᒥ 2009-2010
ᐊᑭᑐᔫᑎᓄᑦ ᐸᕐᓇᐅᑎᖏᓐᓂ. ᒐᕙᒪᑐᖃᒃᑯᑦ ᓄᓇᕘᓪᓗ ᒐᕙᒪᒃᑯᖏᑦ ᑲᑐᔾᔨᓪᓗᑎᒃ ᑮᓇᐅᔭᖃᖅᑎᑦᓯᓂᐊᖅᑐᑦ $4.564
ᒥᓕᐊᓐ ᐱᓕᕆᐊᒧᑦ.
 
ᐃᐳᕈ 9, 2009-ᒥᓗ, ᑲᓇᑕᐅᑉ ᓄᓇᕘᓪᓗ ᒐᕙᒪᒃᑯᖏᑦ ᐅᖃᐅᓯᖃᓚᐅᕐᒥᔪᑦ ᑮᓇᐅᔭᖃᖅᑎᑦᓯᓂᐊᕐᓂᕐᒥᓂᒃ
ᓴᓇᔭᐅᓂᐊᕐᓂᖓᓄᑦ ᐱᖅᑯᓯᓕᕆᕝᕕᑦᓴᒧᑦ ᑲᖏᖅᑐᒑᐱᒻᒥ, ᐱᓕᕆᐊᖅ ᓇᓗᓇᐃᖅᑕᐅᓯᒪᔪᖅ ᓄᓇᕗᒻᒥ 2008-2009
ᐊᑭᑐᔫᑎᓄᑦ ᐸᕐᓇᐅᑎᖏᓐᓂ.
 
ᖃᓪᓗᓈᓂ-ᐅᑭᐅᖅᑕᖅᑐᒥ ᑮᓇᐅᔭᖅᑖᖑᕙᑦᑐᑎᒍᑦ, ᑲᓇᑕ ᑮᓇᐅᔭᖃᖅᑎᑦᓯᓂᐊᖅᑐᖅ $182.68 ᒥᓕᐊᓐᓂᒃ ᐊᑕᖏᕐᓗᒋᑦ
ᐊᑭᑐᔫᑎᓄᑦ ᐱᓕᕆᐊᓄᑦ ᓄᓇᕗᓗᑦᑖᒥ.