ᓕᐅᓇ ᐃᓚᐅᓚᐅᖅᐳᖅ "ᐅᑭᐅᖅᑕᖅᑐᒥᐅᓂᒃ ᖃᐅᔨᕚᓪᓕᕈᑎᒃᓴᓂᒃ ᐊᑐᖅᑎᓪᓗᒋᑦ ᖁᕕᐊᓱᒍᑎᖃᖅᖢᑎᒃ ᐃᓄᐃᑦ ᐱᖅᑯᓯᑐᖃᖏᓐᓂᒃ ᐃᓕᖁᓯᑐᖃᖏᓐᓂᒡᓗ"
ᐊᑐᕚ, ᐋᓐᑎᐅᕆᔪ - ᐅᓪᓗᒥ, ᒥᓂᖦᑕ ᓕᐅᓇ ᐊᒡᓗᒃᑲᖅ, ᑲᑎᒪᔨᐅᖃᑕᐅᔪᖅ ᐊᑐᕚᒥ ᓄᓇᕗᒥᐅᓄᑦ, ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᒥᓂᔅᑕᐅᓪᓗᓂᓗ, ᑲᒪᒋᔭᖃᖅᖢᓂᓗ ᓄᓇᕗᒥᐅᓂᒃ ᖁᕕᐊᓱᓚᐅᖅᐳᖅ ᐃᓚᐅᔪᓐᓇᓚᐅᕋᒥ "ᐅᑭᐅᖅᑕᖅᑐᒥ ᖃᓄᐃᓕᐅᕈᑕᐅᕙᒃᑐᓂᒃ ᖁᕕᐊᓱᒍᑎᖃᖅᖢᑎᒃ ᐃᓄᐃᑦ ᐱᖅᑯᓯᑐᖃᖏᓐᓂᒃ" ᑕᒪᓐᓇ ᐱᓕᕆᐊᕆᔭᐅᓚᐅᖅᖢᓂ ᐃᓄᐃᑦ ᑕᐱᕇᑦ ᑲᓇᑕᒥ.
ᑕᒪᓐᓇ ᐅᓐᓄᒃᑯᑦ ᐊᑐᖅᑕᐅᓚᐅᖅᑐᖅ ᐃᓚᒋᔭᐅᓚᐅᖅᐳᑦ ᐃᓄᐃᑦ ᑕᐱᕇᑦ ᑲᓇᑕᒥ 2010-ᒥ: ᐊᕐᕌᒍᖓᓂ ᐃᓄᐃᑦ ᐱᖅᑯᓯᑐᖃᖏᓐᓂᒃ ᐃᓕᓐᓂᐊᖅᑎᑎᓂᕐᒧᑦ ᑭᒃᑯᑐᐃᓐᓇᕐᓂᒃ. ᑕᐃᒪᓐᓇᐃᓕᐅᓚᐅᖅᖢᑎᒡᓗ ᖃᐅᔨᕚᓪᓕᕈᓐᓇᖁᓪᓗᒋᑦ ᑭᒃᑯᑐᐃᓐᓇᐃᑦ ᑲᓇᑕᒥᐅᑕᐃᑦ ᐃᓄᖕᓄᑦ ᑲᓇᑕᒥ ᐊᑲᐅᖏᓕᐅᕈᑕᐅᔪᓂᒃ, ᖁᕕᐊᓱᒍᑎᖃᖅᖢᑎᒡᓗ ᐃᓄᐃᑦ ᐱᕙᓪᓕᐊᕈᑎᒋᓯᒪᔭᖏᓐᓂᒃ ᖃᓄᐃᓕᐅᕈᑎᒋᓯᒪᔭᖏᓐᓂᒡᓗ. ᑕᒪᒃᑯᐊ ᖃᓄᐃᓕᐅᕈᑕᐅᔪᓂ ᑮᓇᐅᔭᓕᐅᕈᑕᐅᔪᑦ ᑐᓂᕐᕈᑎᒋᔭᐅᓂᐊᖅᖢᑎᒃ ᐅᑭᐅᖅᑕᖅᑐᒥ ᓱᕈᓯᕐᓄᑦ ᒪᒃᑯᒃᑐᓄᓪᓗ ᑲᑐᔾᔨᖃᑎᒌᖑᔪᓄᑦ.
"ᖁᕕᐊᓱᓚᐅᖅᐳᖓ ᐃᓚᐅᔪᓐᓇᓚᐅᕋᒪ ᐅᓐᓄᒃ ᖃᓄᐃᓕᐅᕈᑕᐅᔪᓂᒃ," ᐊᒡᓗᒃᑲᖅ ᐅᖃᓚᐅᖅᐳᖅ. "ᐱᒻᒪᕆᐅᖕᒪᑦ ᐃᑲᔪᕆᐊᖃᕋᑦᑕ ᖃᐅᔨᕚᓪᓕᖅᑎᑉᐸᓪᓕᐊᓗᒋᑦ ᖁᕕᐊᓱᒍᑎᒋᓗᒋᓪᓗ ᐃᓕᖁᓯᑐᖃᕗᑦ ᐱᖅᑯᓯᑐᖃᕗᑦ. ᖁᕕᐊᓱᓚᐅᖅᐳᖓᓗ ᑮᓇᐅᔭᑦ ᑲᑎᑕᐅᔪᑦ ᐅᓐᓄᒃ ᐃᑲᔪᕈᑕᐅᓂᐊᕐᒪᑕ ᒪᒃᑯᒃᑐᓄᑦ ᐅᑭᐅᖅᑕᖅᑐᒥᐅᓄᑦ."
ᐃᒪᓐᓇᐅᓕᐅᓚᐅᖅᐳᑦ ᐅᓐᓄᒃᑯᑦ ᒪᕐᕈᐃᖅᑕᖅᖢᓂ ᐃᓐᖏᖅᑎᐅᓂᕐᒧᑦ ᓵᓚᒃᓴᐅᑎᖃᖅᓯᒪᔪᖅ ᓲᓴᓐ ᐊᒡᓗᒃᑲᖅ ᐅᖃᓪᓚᒋᐊᖅᑐᖅᓯᒪᓪᓗᓂ, ᐊᒻᒪᓗ ᐃᓐᖏᓚᐅᖅᖢᓂ ᑕᕐᕋᓕᒃ ᐹᑐᕆᔾ, ᖃᐃᖃᑕᐅᓯᒪᓚᐅᖅᖢᓂᓗ ᐲᑕ ᒫᓐᔨᐳᕆᔾ. ᑕᑯᓐᓇᖅᑎᑕᐅᓚᐅᖅᖢᑎᒡᓗ ᐆᒃᑐᕋᐅᑎᑦ: ᑭᓐᖓᕐᓂ ᖁᕕᐊᓱᒃᑐᑦ ᐊᕐᕌᒍᓂᒃ 50-ᓂᒃ ᑎᑎᖅᑐᒐᓂᒃ ᐊᔾᔨᓕᐅᕆᖃᑦᑕᖅᓯᒪᓕᕐᓂᖏᓐᓄᑦ.
