ᐊᑐᕚ, ᐋᓐᑎᐅᕆᔪ (ᔭᓐᓄᐊᕆ 28, 2010) - ᒥᓂᔅᑕ ᓕᐅᓇ ᐊᒡᓗᒃᑲᖅ, ᑲᑎᒪᔨᕐᔪᐊᖑᖃᑕᐅᔪᖅ ᐊᑐᕚᒥ ᓄᓇᕗᒥᐅᓄᑦ, ᒥᓂᔅᑕᐅᓪᓗᓂᓗ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ, ᒥᓂᔅᑕᐅᓪᓗᓂᓗ ᐱᓕᕆᐊᖃᖅᖢᓂ ᐅᑭᐅᖅᑕᖅᑐᒧᑦ, ᖁᕕᐊᓱᒃᐳᖅ ᐊᑭᑦᑐᕆᐊᖅᑕᐅᓂᐊᕐᒪᑕ ᑮᓇᐅᔭᑦ ᐊᑭᑦᓯᕋᖅ ᒪᓕᒐᓕᐅᖅᑎᐅᓂᕐᒧᑦ ᐃᓕᓐᓂᐊᖃᑦᑕᖅᑐᓄᑦ. ᑕᒪᓐᓇ ᑮᓇᐅᔭᖅᑖᖅᑎᑎᖃᑦᑕᕈᑕᐅᔪᖅ ᑕᒡᕗᖓ ᐃᓕᓐᓂᐊᕈᑕᐅᔪᒧᑦ ᐊᑭᑦᓯᕋᖅ ᒪᓕᒐᓕᕆᔨᐅᓂᕐᒧᑦ ᐃᓕᓐᓂᐊᖃᑦᑕᖅᑐᓄᑦ ᐱᓕᕆᐊᕆᔭᐅᓪᓗᓂ ᐃᖅᑲᖅᑐᐃᔨᓕᕆᓂᕐᒧᑦ ᒪᓕᒐᓕᕆᓂᕐᒧᑦ ᐸᕐᓇᒍᑕᐅᓂᐊᖅᖢᑎᒃ ᑐᖏᓕᖓᓂ ᐃᓕᓐᓂᐊᖅᑎᑕᐅᓂᐊᕐᓂᖏᓐᓄᑦ ᐊᔾᔨᐅᖏᑦᑐᖅ.

"ᖁᕕᐊᓱᒃᐳᖓ ᐃᓱᒪᓕᐅᕈᑕᐅᓚᐅᖅᑐᒧᑦ ᐊᑭᑦᑐᕆᐊᖅᑕᐅᓂᐊᕐᓂᖏᓐᓄᑦ," ᐊᒡᓗᒃᑲᖅ ᐅᖃᓚᐅᖅᐳᖅ. "ᐊᑭᑦᓯᕋᖅ II, ᑕᐃᒪᓐᓇ ᓯᕗᓪᓕᖅᐸᐅᓚᐅᖅᑐᑎᑐᑦ, ᐃᓕᓐᓂᐊᕈᑎᒃᓴᕆᔭᐅᓂᐊᕐᒪᑦ ᐅᑭᐅᖅᑕᖅᑐᒥ ᒪᓕᒐᓕᕆᔨᐅᓂᕐᒧᑦ. ᐊᑐᕐᓂᖃᑦᓯᐊᖅᖢᓂᓗ ᐃᑲᔪᕈᑕᐅᓂᐊᖅᖢᓂᓗ ᐊᒥᓱᓂ ᐅᑭᐅᓂ ᓄᓇᕗᒥᐅᓄᑦ."

ᐊᕐᕌᒍᓄᑦ ᓯᑕᒪᓄᑦ ᐃᓕᓐᓂᐊᖃᑦᑕᖅᖢᑎᒃ ᑲᓇᑕᒥ ᒪᓕᒐᓕᕆᔨᐅᓂᕐᒧᑦ ᐃᓕᓐᓂᐊᕈᑎᖃᖅᑎᑕᐅᕙᒃᖢᑎᒃ ᑕᒪᐃᓐᓂᒃ ᐃᓄᒃᑎᑐᑦ ᐅᖃᐅᓯᕐᓂᕐᓗ ᐃᓄᐃᑦ ᒪᓕᒐᖏᓐᓂᒡᓗ ᐃᓕᓐᓂᐊᖃᑦᑕᕐᒪᑕ. ᐃᓄᐃᑦ ᐃᑉᓕᕆᔭᖏᓐᓂᒡᓗ ᐃᓕᓐᓂᐊᕈᑎᖃᑦᑕᖅᖢᑎᒃ ᓄᓇᕗᒥ ᐃᓕᖁᓯᑐᖃᓕᕆᓂᕐᒧᓪᓗ ᓄᓇᕗᒥ ᐃᓄᐃᑦ ᓄᓇᖏᓐᓂᓗ ᐅᑭᐅᖅᑕᖅᑐᒥ.

"ᓯᕗᓪᓕᖅ ᐃᓕᓐᓂᐊᕈᑦ ᐊᑭᑦᓯᕋᒃᑯᓐᓄᑦ ᐃᓕᑕᕆᔭᐅᓯᒪᓪᓗᓂᓗ ᐊᔪᖏᑦᑐᓂᒃ ᒪᓕᒐᓕᕆᓂᕐᒧᑦ ᐱᓕᕆᔨᒃᓴᓂᒃ ᐃᓕᓐᓂᐊᖅᑎᑎᖃᑦᑕᖅᖢᑎᒃ ᓄᓇᕗᒥᐅᓪᓗ ᐱᕙᓪᓕᐊᓂᖃᖁᓪᓗᒋᑦ," ᐊᒡᓗᒃᑲᖅ ᐅᖃᓚᐅᖅᐳᖅ. ᖃᐅᔨᒪᕗᖓᓗ ᑐᖏᓕᖓᓂ ᐃᓕᓐᓂᐊᕐᓇᐅᓂᐊᖅᑐᒥ, ᐱᓕᕆᖃᑎᖃᕐᓗᑎᒃ ᐊᑐᕚᒥ ᓯᓚᑦᑐᖅᓴᕐᕕᒡᔪᐊᒥᒃ ᓄᓇᕗᒥᓗ ᓯᓚᑦᑐᖅᓴᕐᕕᖕᒥᐅᑦ, ᑕᐃᒪᓐᓇ ᐃᓕᓐᓂᐊᖅᑎᑕᐅᑦᓯᐊᕈᑎᖃᕐᓂᐊᕐᒪᑕ ᐅᑭᐅᖅᑕᖅᑐᒥᐅᑦ," ᐅᖃᓚᐅᖅᐳᖅ ᐊᒡᓗᒃᑲᖅ.