(ᐊᑐᕚ, ᐋᓐᑎᐅᕆᔪ) – ᑲᓇᑕᐅᑉ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᒥᓂᔅᑕᖓ, ᓕᐅᓇ ᐊᒡᓗᒃᑲᖅ ᐊᒻᒪᓗ ᓘᑦᑕᖅ ᓴᐃᒪᓐ ᓴᑦᑭᓕᑉ, ᐃᒃᓯᕙᐅᑕᐅᔪᖅ ᑲᓇᑕᒥ ᑲᑐᔾᔨᖃᑎᒌᓄᑦ ᑲᓐᓱᖃᖅᑐᓂᒃ ᐋᓐᓂᐊᖃᖅᑐᓂᒃ ᐊᒻᒪᓗ ᓵᓕ ᐳᕋᐅᓐ, ᑐᑭᒧᐊᒃᑎᑎᔨᐅᔪᖅ, ᐆᒻᒪᓯᕆᓂᕐᒧᑦ ᑲᑐᔾᔨᖃᑎᒌᒃᑯᓐᓄᑦ ᐅᓪᓗᒥ ᑐᓴᖅᑎᑎᓚᐅᖅᐳᑦ ᑲᓐᓱᖅᑖᖅᑕᐃᓕᒪᓂᕐᒧᑦ ᐆᒻᒪᓯᕆᑦᑕᐃᓕᒪᓂᕐᒧᓪᓗ ᐱᓕᕆᒍᑎᒃᓴᓂᒃ. ᑖᒃᑯᐊ 7-ᐅᔪᑦ ᐱᒋᐊᕈᑕᐅᔪᑦ (ᐱᓕᕆᐊᖃᑎᒌᖕᓂᖅ ᓱᓇᑐᐃᓐᓇᕐᓂᒃ ᖃᐅᔨᓴᕈᑎᓂᒃ ᐊᑐᕐᓗᑎᒃ ᐱᓕᕆᒋᐊᕈᑎᖃᕐᓗᑎᒡᓗ) ᐱᓕᕆᐊᖅ ᑲᑐᔾᔨᓂᐊᖅᐳᑦ ᐱᓕᕆᖃᑎᒌᒡᓗᑎᒃ 30-ᓂᒃ ᑎᒥᐅᔪᓂᒃ ᑲᑐᔾᔨᖃᑎᒌᓂᒡᓗ ᐱᓕᕆᐊᖃᕋᓱᐊᕐᓗᑎᒃ ᓴᐳᔾᔨᓇᓱᐊᕐᓂᕐᒧᑦ ᐋᓐᓂᐊᖅᑖᕆᔭᐅᕙᒃᑐᓂᒃ ᑳᓐᓱᓂᒃ ᐊᒻᒪᓗ ᐆᒻᒪᓯᕆᒍᑕᐅᕙᒃᑐᓂᒃ ᐱᔾᔪᑎᖃᕐᓗᑎᒃ.

"ᒐᕙᒪᕗᑦ ᐱᓕᕆᐊᖃᖅᐳᑦ ᐋᓐᓂᐊᖅᑖᕆᔭᐅᕙᒃᑐᑦ ᑲᒪᒋᔭᐅᖁᔭᐅᔪᓐᓇᖁᓪᓗᒋᑦ ᐋᓐᓂᐊᖅᑖᕆᔭᐅᕙᒃᑐᑦ ᐊᒥᓱᓄᑦ ᑲᓇᑕᒥᐅᓄᑦ ᐃᓚᖏᓐᓄᓪᓗ ᐊᕐᕌᒍᑕᒫᑦ," ᐅᖃᓚᐅᖅᐳᖅ ᒥᓂᔅᑕ ᐊᒡᓗᒃᑲᖅ. "ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐱᓕᕆᔨᐅᔪᑦ ᐱᓕᕆᖃᑎᒌᒡᓗᑎᒃ ᑲᓇᑕᒥᐅᑕᐃᑦ ᓴᐳᔾᔨᓇᓱᐊᕈᑎᖃᕐᓗᑎᒃ - ᐱᓗᐊᖅᑐᒥᒃ ᑕᒪᒃᑯᓂᖓ ᓄᓇᖃᖅᑳᖅᓯᒪᔪᑦ ᓄᓇᓕᖕᓂᒥᐅᑕᖏᓐᓂᒃ ᑕᐃᒪᓐᓇ ᐊᓐᓂᐊᖅᑖᕋᓱᖕᓂᖅᓴᐅᔪᓂᒃ ᐅᖓᒃᑐᒥᐅᓂᒃ ᓄᓇᓕᖕᓂᒥᒡᓗ--ᖃᐅᔨᕙᓪᓕᐊᒍᓐᓇᕐᓂᐊᖅᐳᑦ ᑕᐃᒪᓐᓇ ᓱᖕᒪᑦ ᐋᓐᓂᐊᖅᑖᕋᓱᒍᑎᖃᕐᓂᖏᓐᓄᑦ.

ᑕᒪᑐᒧᖓ ᐱᓕᕆᐊᕆᔭᐅᓂᐊᖅᑐᒧᑦ ᑲᑎᓪᓗᒋᑦ ᑮᓇᐅᔭᖅᑖᖅᑎᑕᐅᓂᐊᖅᐳᑦ $15.5ᒥᓕᔭᓐᑖᓚᓂᒃ ᐊᕐᕌᒍᓄᑦ ᐱᖓᓱᓄᑦ ᐊᑐᖅᑕᐅᔪᒃᓴᓂᒃ. ᑖᒃᑯᐊᓗ CPAC  ᑮᓇᐅᔭᖃᖅᑎᑎᓂᐊᖅᐳᑦ $12.5-ᒥᓕᔭᓐᑖᓚᓂᒃ, ᐊᒻᒪᓗ PHAC -ᑯᑦ ᑮᓇᐅᔭᖃᖅᑎᑎᓂᐊᖅᖢᑎᒃ $2.5 ᒥᓕᔭᓐᑖᓚᓂᒃ ᐱᖓᓱᓂᒃ ᐱᓕᕆᐊᕆᔭᐅᔪᓂᒃ ᐃᑲᔪᕈᑎᖃᕐᓂᐊᖅᖢᑎᒃ ᓴᐳᔾᔨᓇᓱᐊᕈᑎᓂᒃ ᑲᓇᑕᒥ ᐋᓐᓂᐊᖅᑖᕆᔭᐅᕙᒃᑐᓂᒃ, ᐅᑭᐅᖅᑕᖅᑐᒥᐅᓄᑦ ᓄᓇᖃᖅᑳᖅᓯᒪᔪᓄᓪᓗ, ᐊᒻᒪ ᐆᒻᒪᓯᕆᓂᕐᒧᑦ ᐋᓐᓂᐊᖅᑖᕆᔭᐅᕙᒃᑐᓄᑦ ᖃᐅᔨᓴᕈᑎᖃᕐᓂᖅ ᑮᓇᐅᔭᖃᖅᑎᑕᐅᓂᐊᖅᖢᓂ $500,000-ᓂᒃ ᒪᕐᕉᖕᓄᑦ ᐱᓕᕆᐊᕆᔭᐅᓂᐊᖅᑐᓄᑦ, ᑎᒥᐅᔪᓪᓗ ᓯᕗᓪᓕᖅᑎᐅᓗᑎᒃ ᐱᓕᕆᐊᖃᕐᓂᐊᖅᖢᑎᒃ ᑖᒃᑯᓂᖓ ᐱᖓᓱᓂᒃ.

 “CLASP -ᑯᑦ ᓯᕗᓪᓕᖅᐹᒥ ᐱᓕᕆᐊᕆᔭᐅᓂᐊᖅᐳᑦ ᐃᑲᔪᑐᐃᓗᑎᒃ ᑲᑐᔾᔨᖃᑎᒌᓂᒃ ᑕᒪᒃᑯᓂᖓ ᐋᓐᓂᐊᕋᔪᒋᔭᐅᔪᓂᒃ ᐱᓕᕆᐊᖃᕐᓗᑎᒃ," ᐅᖃᓚᐅᖅᐳᖅ ᓘᑦᑖᖅ ᓴᐃᒪ ᓴᑦᑭᓕᑉ, ᐃᒃᓯᕙᐅᑕᕆᔭᐅᔪᖅ ᑲᓇᑕᒥ ᐱᓕᕆᖃᑎᒌᖕᓂᕐᒧᑦ ᑳᓐᓱᑖᖅᐸᒃᑐᓂᒃ. "ᑖᒃᑯᐊ ᑕᐱᕇᒡᓗᑎᒃ ᐱᓕᕆᖃᑎᒌᖕᓂᐊᖅᐳᑦ -- ᖃᐅᔨᒪᔭᒥᖕᓂᒃ ᑐᓴᖅᑎᑎᖃᑦᑕᐅᑎᓗᑎᒃ ᓴᐳᔾᔨᓇᓱᐊᕈᑎᒃᓴᖅᓯᐅᕐᓗᑎᒡᓗ ᑲᓐᓱᑖᕈᑕᐅᕙᒃᑐᓂᒃ ᐆᒻᒪᓯᕆᓂᕐᒧᑦ ᐋᓐᓂᐊᖅᑖᕆᔭᐅᕙᒃᑐᓂᒡᓗ - ᑕᐃᒪᓐᓇ ᐃᑲᔪᖅᑎᒌᒍᒪᓪᓗᑎᒃ ᑕᒪᒃᑯᓄᖓ ᐊᓐᓂᐊᓄᑦ. ᖁᕕᐊᓱᒃᐳᒍᑦ ᓯᕗᓪᓕᖅᐸᐅᓪᓗᑕ ᑕᐃᒪᓐᓇ ᐃᑲᔪᕈᑎᖃᕐᓂᐊᕋᑦᑕ ᐋᓐᓂᐊᖅᑐᓕᕆᔭᐅᑦᓯᐊᖁᓪᓗᒋᑦ ᑕᒪᒃᑯᓄᖓ ᑲᓇᑕᒥᐅᑕᐃᑦ."


"ᐆᒻᒪᓯᕆᖃᑦᑕᐅᑎᓂᒃ ᐋᓐᓂᐊᖅᑖᖃᑦᑕᖅᑐᑦ ᑲᑐᔾᔨᖃᑎᒌᖏᑦ ᓴᐳᔾᔨᓇᓱᐊᕈᑎᖃᖅᓯᒪᕗᑦ ᑕᒪᒃᑯᓂᖓ ᐋᓐᓂᐊᖅᑖᕆᔭᐅᕙᒃᑐᓂᒃ," ᐅᖃᓚᐅᖅᐳᖅ ᑐᑭᒧᐊᒃᑎᑎᔨᖓᑦ ᓵᓕ ᐳᕋᐅᓐ. "ᖁᕕᐊᓱᒃᐳᒍᑦ ᐃᓚᐅᔪᓐᓇᕋᑦᑕ ᑕᒪᑐᒧᖓ ᐱᓕᕆᐊᕆᔭᐅᒍᑕᐅᓂᐊᖅᑐᒧᑦ ᑲᑐᔾᔨᖃᑎᒌᒡᓗᑕ -- ᐱᕙᓪᓕᐊᓂᖃᕈᓐᓇᖅᐳᒍᓪᓗ ᐱᓕᕆᖃᑎᒌᒡᓗᑕ."

 
CPAC -ᑯᑦ ᑎᒥᐅᕗᑦ ᓇᖕᒥᓂᖅᓱᖅᖢᑎᒃ ᑮᓇᐅᔭᖃᖅᑎᑕᐅᓂᐊᖅᑐᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᑲᓐᓱᑖᕈᑕᐅᕙᒃᑐᑦ ᐱᓕᕆᐊᕆᔭᐅᔪᓐᓇᖁᓪᓗᒋᑦ ᖃᐅᔨᓴᖅᑕᐅᒍᑕᐅᔪᓐᓇᖁᓪᓗᒋᑦ ᐃᑲᔪᖅᑕᐅᓇᓱᐊᕐᓗᑎᒃ ᑲᓇᑕᒥᐅᑕᓕᒫᑦ. ᐱᓕᕆᖃᑎᖃᖃᑦᑕᖅᖢᑎᒃ ᑲᑐᔾᔨᓪᓗᑎᒃ ᑭᒃᑯᑐᐃᓐᓇᕐᓂᒃ ᐃᓚᖃᖅᖢᑎᒃ ᐊᑐᓕᖅᑎᑎᓇᓱᐊᕈᑎᖃᖅᖢᑎᒃ ᐸᕐᓇᒃᓯᒪᒍᑕᐅᓂᐊᖅᑐᓂᒃ ᐱᓕᕆᒍᑎᓂᒃ. ᐊᒻᒪ ᓴᖅᑭᔮᖅᑎᑎᓇᓱᐊᖅᖢᑎᒡᓗ  ᐋᓐᓂᐊᖃᕐᓇᖏᑦᑐᒃᑯᑦ ᐃᓅᓯᖃᑦᓯᐊᖁᔨᓂᕐᒧᑦ ᐊᕙᑎᒥᐅᑕᖃᖁᓪᓗᒋᓪᓗ ᐋᓐᓂᐊᖃᕐᓇᖏᑦᑐᒥᒃ ᐃᖅᑲᓇᐃᔭᕐᕕᖃᑦᓯᐊᖁᓪᓗᒋᓪᓗ ᐋᓐᓂᐊᖅᑖᕐᕕᐅᓐᓇᖏᑦᑐᒥ ᑎᒥᖏᑦ ᐋᖅᑭᐅᒪᑦᓯᐊᖁᓪᓗᒋᓪᓗ, ᓯᒡᒐᓖᖅᑐᖃᑦᑕᖏᓪᓗᑎᒃ, ᐅᓗᕆᐊᓇᖅᑐᒥᒃ ᐊᕙᑎᒥᐅᑕᖃᖅᑕᐃᓕᒪᖁᓪᓗᒋᓪᓗ. ᑕᐃᒪᓐᓇ ᑲᓐᓱᑖᖏᓐᓂᖅᓴᐅᔪᓐᓇᕐᒪᑕ ᐊᓯᖏᓐᓂᒡᓗ ᐊᓐᓂᐊᕆᔭᐅᔪᓐᓇᖅᑐᓂᒃ ᐱᑕᖃᓗᐊᕐᓂᖅ ᑎᒥᒥᒍᑦ ᐅᓗᕆᐊᓇᖅᑐᒥᒃ, ᐳᕙᒡᓗᖕᓂᕐᒥᒃ ᐊᒻᒪᓗ ᐆᒻᒪᑎᒃᑯᑦ ᐋᓐᓂᐊᕈᑕᐅᕙᒃᑐᓂᒃ.

ᑖᒃᑯᐊ 7 ᐱᓕᕆᐊᕆᔭᐅᓂᐊᖅᑐᑦ ᓇᓗᓇᐃᔭᖅᑕᐅᓚᐅᖅᑐᑦ ᑖᒃᑯᓄᖓ CPAC  ᓇᖕᒥᓂᖅ ᖃᐅᔨᓴᕈᑎᖃᖅᓯᒪᓪᓗᑎᒃ.

ᑐᑭᓯᒋᐊᒃᑲᓐᓂᕈᒪᔪᑦ ᖃᐅᔨᒋᐊᕈᓐᓇᐳᑦ ᑕᒪᒃᑯᓂᖓ ᐅᕙᓂ ᖃᕆᑕᐅᔭᒃᑯᑦ
Public Heath Agency of Canada, www.partnershipagainstcancer.ca ᐊᒻᒪᓗ ᐅᕙᓂ www.heartandstroke.ca.