ᐃᖃᓗᐃᑦ, ᓄᓇᕗᑦ  -  ᓄᓇᕗᒥᐅᑦ ᐱᖁᑎᑖᖅᑎᑕᐅᒻᒪᕆᖕᓂᐊᖅᐳᑦ ᐆᒻᒪᖁᑎᓕᕆᓂᕐᒧᑦ ᐊᖏᔪᒥᒃ ᓄᑖᖑᖅᑎᑕᐅᓂᐊᕐᒪᑕ ᑲᓇᑕᒥ ᑮᓇᐅᔭᓕᐅᕋᓱᐊᖅᑎᑎᓂᕐᒧᑦ ᐸᕐᓇᒃᓯᒪᒍᑕᐅᔪᓂᒃ ᑮᓇᐅᔭᓂᒃ ᐊᑐᕐᓗᑎᒃ. ᑕᒪᒃᑯᐊ ᓄᑖᖑᖅᑎᑕᐅᑎᓪᓗᒋᑦ ᐃᖅᑲᓇᐃᔭᒐᒃᓴᖅᑖᕐᕕᐅᓂᐊᖅᐳᑦ, ᖃᐅᒻᒪᖁᑎᖃᑦᓯᐊᕐᓂᖅᓴᐅᓕᕐᓗᑎᒡᓗ ᓄᓇᕗᒥᐅᑦ, ᐊᕙᑎᒥᐅᑕᐃᓪᓗ ᐃᒃᐱᒍᓱᒃᑎᑕᐅᖏᓐᓂᖅᓴᐅᓗᑎᒃ ᓱᕈᕐᓗᖕᓄᑦ.

ᑕᐃᒪᓐᓇ ᑐᓴᖅᑎᑎᓚᐅᖅᐳᖅ ᒥᓂᔅᑕ ᓕᐅᓇ ᐊᒡᓗᒃᑲᖅ, ᒥᓂᔅᑕ ᐅᑭᐅᖅᑕᖅᑐᒥᐅᓄᑦ ᐊᒻᒪ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ, ᑭᒡᒐᖅᑐᐃᓪᓗᓂ ᒥᓂᔅᑕ ᓴᒃ ᓯᑖᓪ, ᒥᓂᔅᑕ ᑲᓇᑕᒥ ᐅᑭᐅᖅᑕᖅᑐᒥ ᐱᕙᓪᓕᐊᑎᑎᓂᕐᒧᑦ ᑎᒥᐅᔪᓂᑦ (CanNor). ᓕᐅᓇ ᐱᖃᑎᖃᓚᐅᖅᖢᓂᓗ ᐲᑕ ᒪᑮ, ᐊᖓᔪᖃᕆᔭᐅᔪᖅ ᖁᓪᓕᖅ ᐆᒻᒪᖁᑎᓕᕆᔨᒃᑯᖏᑦᑕ ᑯᐊᐳᕇᓴᒃᑯᖏᓐᓄᑦ (QEC).

CanNor-ᑯᑦ ᑮᓇᐅᔭᖃᖅᑎᑎᓂᐊᖅᐳᑦ $5.8-ᒥᓕᔭᓐ ᐅᖓᑖᓄᑦ ᐊᕐᕌᒍᓄᑦ ᒪᕐᕉᖕᓄᑦ ᐊᑐᖅᑕᐅᓂᐊᖅᖢᑎᒃ ᐱᓕᕆᐊᕆᓗᒍ ᒪᓕᒡᓗᑎᒃ ᓄᓇᓕᖕᓂ ᑮᓇᐅᔭᑦ ᐊᒡᒍᖅᑕᐅᓯᒪᓗᑎᒃ ᑮᓇᐅᔭᖃᖅᑎᑕᐅᓗᑎᒃ   (CAF) ᐃᑲᔪᖅᑕᐅᔪᓐᓇᖁᓪᓗᒋᑦ ᐃᓇᖏᖅᑕᐅᓂᖓᓄᑦ ᓄᑕᐅᖏᓕᖅᑐᑦ ᖃᐅᒻᒪᖁᑎᓕᐅᕈᑎᑦ ᐊᐅᓚᑕᑎᑦ ᐊᕐᕕᐊᓂ, ᐃᖃᓗᒃᑑᑦᓯᐊᒥ, ᐃᒡᓗᓕᒑᕐᔪᖕᒥ, ᐅᖅᓱᖅᑑᒥ, ᒥᑦᑎᒪᑕᓕᖕᒥ, ᑲᖏᖅᖠᓂᕐᒥ, ᖃᐅᓱᐃᑦᑐᒥ ᐊᒻᒪᓗ ᑎᑭᕋᕐᔪᐊᒥ. ᓄᑖᑦ ᖃᐅᒻᒪᖁᑎᓕᐅᕈᑎᑦ ᓱᕋᒐᔪᖕᓂᖅᓴᐅᓂᐊᖏᒻᒪᑕ, ᐅᖅᓱᐊᓗᖕᓂᒃ ᐊᑐᓗᐊᖏᓐᓂᖅᓴᐅᓗᑎᒡᓗ ᐊᒻᒪᓗ ᐳᔪᕐᓗᖏᓐᓂᖅᓴᐅᓗᑎᒃ. ᐋᖅᑭᐅᒪᑎᑕᐅᓂᐊᖅᖢᑎᒡᓗ ᐳᔪᕐᓗᒃ ᐊᑐᖅᑕᐅᒃᑲᓐᓂᕈᓐᓇᕐᓗᓂ ᑕᐃᒪᓐᓇ ᐋᖅᑭᒃᑕᐅᒍᑎᖃᕈᓐᓇᕐᓗᑎᒃ.

"ᓱᕋᒐᔪᖏᓐᓂᖅᓴᐅᓂᐊᖅᐳᑦ ᖃᐅᒻᒪᖁᑎᑦ ᐱᔨᑦᓯᕋᐅᑕᐅᔪᑦ ᓄᓇᕗᒥᐅᓄᑦ ᐊᑭᑭᓐᓂᖅᓴᐅᓗᑎᒡᓗ ᓇᖕᒥᓂᖅ ᐱᓕᕆᕕᖃᖅᑐᓄᑦ ᐊᖏᕐᕋᕆᔭᐅᔪᓄᓪᓗ ᓄᓇᕗᒥᐅᓄᑦ," ᐅᖃᓚᐅᖅᐳᖅ ᒥᓂᔅᑕ ᐊᒡᓗᒃᑲᖅ. "ᐃᓕᐅᖃᖅᑕᐅᓕᖅᐸᑕ ᓄᓇᓕᖕᓂ ᓄᓇᕗᒥ 8-ᓂ ᐃᖅᑲᓇᐃᔭᒐᒃᓴᓂᒃ ᓴᖅᑭᑎᑎᓂᐊᖅᐳᒍᑦ ᓄᓇᓕᖕᓂ."

"ᑕᐃᒪᓐᓇ ᐳᔪᕐᓗᖃᖏᓐᓂᖅᓴᐅᔪᓂᒃ ᐊᑐᕐᓗᑕ ᐅᖅᓱᐊᓗᒃᑐᖏᓐᓂᖅᓴᐅᔪᓂᒡᓗ, ᐊᕙᑎᒥᐅᑕᓄᑦ ᓱᕈᕈᑕᐅᖏᓐᓂᖅᓴᐅᓂᐊᖅᐳᑦ," ᐅᖃᓚᐅᖅᐳᖅ ᒥᓂᔅᑕ ᓵᓪ, ᒥᓂᔅᑕᐅᓪᓗᓂᓗ ᐃᓄᓕᕆᔨᑐᖃᒃᑯᓐᓄᑦ ᐊᒻᒪᓗ ᐊᓪᓚᖓᔪᓄᑦ ᐃᓕᑕᕆᔭᐅᓯᒪᖏᑦᑐᓄᓪᓗ ᐊᓪᓚᓄᑦ. "ᑕᐃᒪᓐᓇ ᐊᒃᑐᐃᕐᓗᖏᓐᓂᖅᓴᐅᒍᑎᖃᕐᓂᐊᖅᐳᑦ ᐊᕙᑎᒥᐅᑕᐃᑦ ᑕᒪᓐᓇ ᐅᑭᐅᖅᑕᖅᑐᒥᐅᓄᑦ ᐱᒍᒪᔭᐅᓯᒪᖕᒪᑦ ᑕᐃᒪᓐᓇ."

"ᑮᓇᐅᔭᑎᒍᑦ ᐃᑲᔪᖅᑕᐅᓯᒪᓪᓗᑕ ᑲᓇᑕᒥ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᓂᕐᒧᑦ ᑎᒥᖏᓐᓂᑦ, ᑭᒡᒐᖅᑐᐃᓪᓗᑎᒃ ᑲᓇᑕᐅᑉ ᒐᕙᒪᒃᑯᖏᓐᓂᒃ, ᑕᐃᒪᓐᓇ ᖁᓪᓕᖅ ᐆᒻᒪᖁᑎᓕᕆᔨᒃᑯᑦ ᑯᐊᐳᕇᓴᒃᑯᖏᑦ ᑮᓇᐅᔭᖃᖅᑎᑕᐅᓂᐊᖅᐳᑦ ᐊᑭᑐᔪᓂᒃ ᑮᓇᐅᔭᑭᒃᓴᕐᓇᐅᓕᕋᓗᐊᖅᑎᓪᓗᒍ. ᖁᓪᓕᖅ ᐆᒻᒪᖁᑎᓕᕆᔨᒃᑯᑦ ᑯᐊᐳᕇᓴᒃᑯᖏᑦ ᓂᐅᕕᕈᓐᓇᕐᓂᐊᖅᐳᑦ ᓄᑖᓂᒃ, ᐅᖅᓱᐊᓗᒃᑐᖏᓐᓂᖅᓴᓂᒃ ᖃᐅᒻᒪᖁᑎᓕᐅᕈᑎᓂᒃ ᓄᓇᓕᖕᓄᑦ ᓄᑖᖑᖅᑎᑕᐅᒍᑎᒃᓴᓂᒃ," ᐅᖃᓚᐅᖅᐳᖅ ᐲᑕ ᒪᑮ.

ᑲᑎᑦᓗᒋᑦ ᑲᓇᑕᐅᑉ ᒐᕙᒪᒃᑯᖏᓐᓄᓪᓗ ᖁᓪᓕᖅ ᑯᐊᐳᕇᓴᒃᑯᖏᓐᓄᓪᓗ ᐊᑐᕐᓂᐊᖅᐳᑦ ᑮᓇᐅᔭᓂᒃ $14 ᒥᓕᔭᑲᓴᓂᒃ.

ᑲᓇᑕᒥ ᐱᕙᓪᓕᐊᔪᓕᕆᓂᕐᒧᑦ ᐸᕐᓇᐅᑎᒃᑯᑦ, ᑖᒃᑯᐊ CAF-ᑯᑦ $1-ᐱᓕᔭᓐᑖᓚᓂᒃ ᑲᓇᑕᓕᒫᒥ ᐊᑐᕐᓂᐊᖅᐳᑦ ᐱᕙᓪᓕᐊᑎᑎᓇᓱᐊᕐᓗᑎᒃ ᓄᓇᓕᖕᓂᒃ ᑮᓇᐅᔭᑭᒃᓴᕐᓂᕐᒧᑦ ᐃᒃᐱᒍᓱᒃᑎᑕᐅᔪᓂ. ᑮᓇᐅᔭᑦ ᐊᑐᖅᑕᐅᓂᐊᖅᐳᑦ ᐱᖓᓱᓄᑦ ᐅᑭᐅᖅᑕᖅᑐᒥᐅᓄᑦ ᓄᓇᓕᕐᔪᐊᑦ ᐊᖓᔪᖃᖃᕐᕕᖏᓐᓄᑦ $32.8 ᒥᓕᔭᓐᑖᓚᓂᒃ 2009-ᒥ ᐊᒻᒪ 2011-ᒧᑦ.
ᑖᒃᑯᐊ CAF-ᑯᑦ ᐱᕙᓪᓕᐊᔪᓕᕆᔨᐅᖃᑕᐅᕗᑦ ᐱᓕᕆᐊᒃᓴᖏᑦᑎᒍᑦ ᑲᓇᑕᒥ ᐅᑭᐅᖅᑕᖅᑐᒥ ᐱᕙᓪᓕᐊᑎᑎᓂᕐᒧᑦ ᑎᒥᐅᔪᑦ ᓄᓇᕗᒥ, ᓄᓇᑦᓯᐊᒥ ᐊᒻᒪᓗ ᔪᑳᓐᒥᐅᓂ. ᑖᒃᑯᐊ ᐱᓕᕆᐊᖃᖅᖢᑎᒃ ᑲᒪᓂᕐᒧᑦ ᐋᖅᑭᐅᒪᑎᑎᓂᕐᒧᑦ ᐱᕙᓪᓕᐊᑎᑎᓂᕐᒧᓪᓗ ᑕᒪᒃᑯᓇᓂ ᓄᓇᓕᖕᓂ, ᐊᑐᐊᒐᓕᐅᖅᑎᐅᓪᓗᑎᒃ, ᖃᐅᔨᓴᖅᑎᐅᓪᓗᑎᒃ ᐱᒋᐊᖅᑎᑎᔨᐅᓪᓗᑎᒡᓗ.