ᕚᓐᑰᕙ, ᐳᕆᑎᔅᑲᓚᑉᐱᐊ  - ᒥᓂᔅᑕ ᓴᒃ ᓯᑖᓪ ᐃᓄᓕᕆᔨᑐᖃᒃᑯᓐᓄᑦ ᒥᓂᔅᑕ ᑲᓇᑕᒥᓗ ᐊᓪᓚᖓᔪᓂᒃ ᐃᓕᑕᕆᔭᐅᓯᒪᖏᑦᑐᓂᒡᓗ ᐊᓪᓚᓂᒃ ᑲᒪᔨᐅᖃᑕᐅᓪᓗᓂ, ᐅᓪᓗᒥ ᐊᑎᓕᐅᕈᑎᖃᓚᐅᖅᐳᖅ ᓄᑖᒥᒃ ᐸᕐᓇᒃᓯᒪᒍᑕᐅᓂᐊᖅᑐᒥᒃ ᐊᑎᓕᐅᖃᑎᖃᖅᖢᓂ ᒥᓂᔅᑕ ᕕᒃᑐ-ᕙᐃᔪᑐᕈᕕᔾ ᐸᓴᔨᓐ ᒥᓂᔅᑕ ᕋᔭᒥᐅᑦ ᒐᕙᒪᒃᑯᓐᓄᑦ ᐱᕙᓪᓕᐊᔪᓕᕆᓂᕐᒧᑦ ᖃᓄᐃᓕᐅᕈᑎᒋᓂᐊᖅᑕᒥᖕᓂᒃ 2007-ᒥ ᐊᖏᕈᑕᐅᓚᐅᖅᑐᖅ ᕋᓴᐅᑉ ᒐᕙᒪᒃᑯᖏᓐᓄᑦ ᐅᑭᐅᖅᑕᖅᑐᒥ ᐱᕙᓪᓕᐊᑎᑎᓂᐊᕐᓂᕐᒧᑦ ᓄᓇᖃᖅᑳᖅᓯᒪᔪᓪᓗ ᑲᒪᒋᔭᐅᒍᑎᒃᓴᖏᓐᓄᑦ.
                                                                                                                                  
 
"ᑕᒪᓐᓇ ᓯᓚᕐᔪᐊᒥ ᐱᓕᕆᖃᑎᒌᒍᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᕋᓴᒥᐅᑦ ᒐᕙᒪᒃᑯᖏᓐᓄᓪᓗ, ᐅᑭᐅᖅᑕᖅᑐᒥᐅᑕᐅᓪᓗᑕ ᐅᑭᐅᖅᑕᖅᑐᒥᐅᑕᓂᒃ ᑲᒪᒋᔭᖃᕐᓂᐊᕋᑦᑕ ᐃᓕᑕᕆᔭᐅᓗᓂᓗ ᐊᔾᔨᐅᖏᑦᑐᑦ ᐃᓕᖁᓯᕗᑦ ᐃᓕᖁᓯᖃᑎᒌᖕᓂᖏᓪᓗ ᓄᓇᖃᖅᑳᖅᓯᒪᔪᑦ ᐅᑭᐅᖅᑕᖅᑐᒥᐅᑕᐃᑦ," ᐅᖃᓚᐅᖅᐳᖅ ᒥᓂᔅᑕ ᓯᑖᓪ.
 
ᐊᖏᕈᑎᓕᐅᕈᑦ ᐊᑐᖅᑕᐅᖏᓐᓇᕐᓂᐊᖅᐳᖅ ᑕᐃᒪᖓᓂᑦ ᐊᑎᓕᐅᕈᑕᐅᓚᐅᖅᓯᒪᓪᓗᓂ ᐱᕙᓪᓕᐊᒍᑕᐅᓯᒪᓪᓗᓂᓗ ᐊᑐᓕᖅᑕᐅᓂᐊᖅᖢᓂᓗ ᑕᒪᐃᓐᓄᑦ ᐊᑎᓕᐅᖃᑎᒌᒃᑐᓄᑦ. ᖃᓄᓕᐅᖃᑦᑕᐅᑎᖏᓐᓇᖁᓪᓗᒋᑦ ᐊᑐᖅᑕᐅᒍᒪᔪᑦ ᐸᐸᑕᐅᒍᒪᔪᓪᓗ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ; ᓄᓇᓕᖕᓂᓗ ᒐᕙᒪᖃᑦᓯᐊᖁᓪᓗᒋᑦ ᐊᐅᓚᑦᓯᐊᖅᑐᒥᒃ; ᓄᓇᖃᖅᑳᖅᓯᒪᔪᑦ ᐊᑐᐊᒐᖏᑦ ᒪᓕᒡᓗᒋᑦ ᖃᐅᔨᓴᕈᑎᓂᒃ ᐊᑐᖃᑦᑕᐅᑎᓂᖅ ᖃᐅᔨᒪᔭᐅᓕᖅᑐᓂᒃ ᐊᒻᒪᓗ ᓴᖅᑭᔮᖅᑎᑎᓂᖅ ᓴᓇᑎᑎᓂᕐᒧᑦ ᒐᕙᒪᓂᒃ ᓇᖕᒥᓂᖅ ᐱᓕᕆᕕᖃᖅᑐᓂᒡᓗ ᑮᓇᐅᔭᑎᒍᑦ ᑲᑐᔾᔨᒍᑎᖃᕐᓗᑎᒃ ᐊᑭᓕᐅᑎᖃᕐᓗᑎᒃ, ᐱᓗᐊᖅᑐᒥᒃ ᑕᒪᒃᑯᓇᓂ ᓄᓇᓕᖕᓂ ᐱᕙᓪᓕᐊᔪᓕᕆᕕᐅᔪᓂ ᐅᑭᐅᖅᑕᖅᑐᒥ.
 
"ᑲᔪᓯᑦᓯᐊᖅᓯᒪᒍᑕᐅᓯᒪᕗᖅ ᐱᓕᕆᖃᑎᒌᖕᓂᕐᒧᑦ ᐸᕐᓇᒃᓯᒪᒍᑕᐅᔪᖅ ᐊᖏᕈᑕᐅᓯᒪᔫᑉ ᐃᓗᐊᓂ ᐊᐅᓪᓛᑦᓯᐊᕈᑎᖃᖅᖢᓂ. ᖃᐅᔨᒪᕗᖓᓗ ᑕᐃᒪᓐᓇ ᑲᔪᓯᑦᓯᐊᖏᓐᓇᕐᓂᐊᕐᒪᑦ ᑕᒪᓐᓇ ᐱᒻᒪᕆᐅᓪᓗᓂ. ᖃᐅᔨᒪᑎᒋᔭᖅᐳᑦ ᒥᓂᔅᑕᐅᖃᑎᕗᑦ ᒐᕙᒪᑦᑎᓐᓂ ᐊᑐᓂ ᓄᑖᓂᒃ ᖃᓄᐃᓕᐅᕈᑕᐅᒍᒪᔪᓂᒃ ᐱᒋᐊᖅᓯᒪᓕᖅᐳᑦ ᐊᑐᓕᖅᑕᐅᓂᐊᖅᓗᑎᒃ 2010-2011, ᑕᒡᕙᓂ ᑎᑎᕋᖅᓯᒪᔪᖅᑕᖃᖅᖢᓂ ᐊᑐᖅᑕᐅᓪᓚᕆᖕᓂᐊᖅᑐᓂᒃ/ᓴᓇᔭᐅᔪᒃᓴᐅᓂᐊᖅᑐᓂᒃ, ᐊᖏᕈᑎᒋᓪᓗᒋᓪᓗ," ᐅᖃᓚᐅᖅᐳᖅ ᒥᓂᔅᑕ ᐸᓴᔨᓐ. "ᐸᕐᓇᒃᓯᒪᒍᑕᐅᔪᖅ ᐊᑐᓕᖁᔨᒍᑎᖃᖅᐳᖅ ᐱᒻᒪᕆᐅᔪᓂᒃ ᐱᒋᐊᕈᑕᐅᓂᐊᖅᑐᓂᒃ ᐃᓄᓕᕆᓂᐅᑉ ᒥᒃᓵᓄᑦ, ᐃᓕᓐᓂᐊᖅᑎᑎᓂᖅ ᖃᐅᔨᕚᓪᓕᖅᑎᑎᓂᕐᓗ ᓄᓇᖃᖅᑳᖅᓯᒪᔪᓂᒃ, ᐳᓚᕋᖃᑦᑕᐅᑎᓂᖏᓪᓗ ᕋᓴᒥᐅᑦ ᑲᓇᑕᒥᐅᓪᓗ ᖃᐅᔨᕙᓪᓕᐊᓇᓱᐊᕐᓗᑎᒃ ᓄᓇᖃᖅᑳᖅᓯᒪᔪᑦ ᐱᔾᔪᑎᖏᓐᓂᒃ, ᑕᒪᓐᓇ
 
ᐱᒻᒪᕆᐅᔪᒃᑯᑦ ᑲᔪᓯᑦᓯᐊᕐᓂᐊᕋᓱᒋᓪᓗᒍᓗ - ᑕᒪᒃᑯᐊᓗ ᖃᐅᔨᒪᔭᐅᔪᑐᖃᐃᑦ ᐃᓕᖁᓯᑐᖃᐃᓪᓗ ᐸᐸᑕᐅᑦᓯᐊᖁᓪᓗᒋᑦ."
 
ᐅᑭᐅᖅᑕᖅᑐᒥᐅᑕᐅᓪᓗᖓ, ᖃᐅᔨᒪᑦᓯᐊᖅᐳᖓ ᖃᓄᐃᓕᐅᖃᑦᑕᕐᓂᖏᓐᓄᑦ ᐅᑭᐅᖅᑕᖅᑐᒥᐅᑕᐃᑦ, ᐅᖃᓚᐅᖅᐳᖅ ᒥᓂᔅᑕ ᐊᒡᓗᒃᑲᖅ. "ᖁᕕᐊᓱᒃᐳᖓᓗ ᑲᓇᑕᒥᐅᑦ ᕋᓴᒥᐅᓪᓗ ᒐᕙᒪᒃᑯᖏᑦ - ᑕᒪᕐᒥᒃ ᐅᑭᐅᖅᑕᖅᑐᒥᐅᑕᐅᓪᓗᑎᒡᓗ - ᐱᓕᕆᖃᑎᒌᖕᓂᐊᕐᒪᑕ ᐊᑲᐅᓯᕚᓪᓕᖁᓪᓗᒋᑦ ᖃᓄᐃᑕᐅᓂᖏᑦ ᐅᑭᐅᖅᑕᖅᑐᒥ."
 
ᐊᖏᕈᑕᐅᔪᖅ ᐱᔾᔪᑎᒋᓪᓗᒍ, ᐊᑎᓕᐅᖃᑎᒌᓚᐅᖅᑐᑦ ᐱᕙᓪᓕᐊᑎᑎᓂᐊᖅᐳᑦ ᐅᖃᓪᓚᖃᑦᑕᐅᑎᒋᐊᒃᓴᖏᑦ ᑕᒪᕐᒥᒃ ᐅᑭᐅᖅᑕᖅᑐᒥᐅᑦ ᓄᓇᓕᖕᓂᒥᐅᓪᓗ ᒐᕙᒪᒃᑯᖏᑦ ᑕᒪᒃᑭᖕᓂ ᑕᒪᒃᑯᐊᓗ ᐃᓕᓐᓂᐊᖅᓯᒪᔪᑦ ᖃᐅᔨᓴᖅᑎᓪᓗ ᑲᑎᑎᑕᐅᖃᑦᑕᕐᓗᑎᒃ, ᐊᒻᒪᓗ ᓇᖕᒥᓂᖅ ᐱᓕᕆᕕᖃᖅᑐᑦ.