ᐃᖃᓗᒃᑑᑦᑎᐊᖅ, ᓄᓇᕗᑦ  - ᐃᖃᓗᒃᑑᑦᑎᐊᒥᐅᑦ ᐊᕐᓇᐃᑦ ᐃᖅᑲᓇᐃᔭᖅᑖᖅᑎᑕᐅᔪᓐᓇᖏᑦᑐᑦ ᐸᕐᓇᒃᑎᑕᐅᓂᐊᖅᐳᑦ ᐃᖅᑲᓇᐃᔭᒐᒃᓴᖅᑖᕐᓂᕐᒧᑦ ᐃᓕᓐᓂᐊᖅᑎᑕᐅᓗᑎᒃ ᐱᓕᕆᒋᐅᖅᓴᓂᕐᒧᓪᓗ ᑲᓇᑕᐅᑉ ᒐᕙᒪᒃᑯᖏᑦᑎᒍᑦ ᐃᑲᔪᖅᑕᐅᓗᑎᒃ ᐃᖅᑲᓇᐃᔭᒐᒃᓴᖅᑖᕋᓱᐊᕐᓂᕐᒧᑦ. ᒥᓂᔅᑕ ᓕᐅᓇ ᐊᒡᓗᒃᑲᖅ, ᒥᓂᔅᑕ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᑲᑎᒪᔨᐅᖃᑕᐅᓪᓗᓂᓗ ᓄᓇᕗᒥᐅᓄᑦ ᐊᑐᕚᒥ, ᐅᓪᓗᒥ ᑐᓴᖅᑎᑎᒍᑎᖃᓚᐅᖅᐳᖅ ᑭᒡᒐᖅᑐᐃᓪᓗᓂ ᒥᓂᔅᑕ ᑕᐃᐋᓐ ᕕᓐᓕᒥᒃ ᒥᓂᔅᑕ ᐃᖅᑲᓇᐃᔭᖅᑐᓕᕆᓂᕐᒧᑦ ᐊᔪᖏᓴᕐᓂᕐᒧᓪᓗ ᐱᕙᓪᓕᐊᓂᕐᒧᑦ.

"ᐅᓪᓗᒥᐅᓕᖅᑐᖅ, ᐱᒻᒪᕆᐅᓛᖑᓕᖅᐳᖅ ᒪᒃᑯᒃᑐᑦ ᐊᔪᖏᓴᕆᐊᖃᕐᒪᑕ ᐱᕙᓪᓕᐊᑎᑕᐅᒋᐊᖃᕐᒪᑕ ᐃᓚᐅᑎᑕᐅᓂᐊᕐᓗᑎᒃ ᑲᔪᓯᑎᑕᐅᓂᐊᕈᑎᒡᓗ ᐃᖅᑲᓇᐃᔭᒐᒃᓴᖅᑖᕐᓂᕐᒧᑦ," ᐅᖃᓚᐅᖅᐳᖅ ᒥᓂᔅᑕ ᐊᒡᓗᒃᑲᖅ. "ᑕᐃᒪᓐᓇ ᐃᑲᔪᖅᑕᐅᓗᑎᒃ, ᐃᑲᔪᖅᐳᒍᑦ ᓄᓇᖃᖅᑳᖅᓯᒪᔪᓂᒃ ᒪᒃᑯᒃᑐᓂᒃ ᐊᕐᓇᓂᒃ ᐃᖃᓗᒃᑑᑦᑎᐊᒥ ᐊᔪᖏᓴᕈᓐᓇᖁᓪᓗᒋᑦ, ᖃᐅᔨᒪᓕᖅᐸᓪᓕᐊᖁᓪᓗᒋᑦ ᐊᒻᒪᓗ ᐃᖅᑲᓇᐃᔭᒐᒃᓴᖃᕈᓐᓇᖁᓪᓗᒋᑦ ᐱᓕᕆᒋᐅᖅᓴᓂᕐᒧᑦ ᐊᔪᖏᓴᕐᓗᑎᒡᓗ ᑕᐃᒪᓐᓇ ᐱᓕᒻᒪᒃᓴᖅᓯᒪᖁᓪᓗᒋᓪᓗ."

ᐃᖃᓗᒃᑑᑦᓯᐊᒥ ᐋᓐᓂᐊᖃᕐᓇᖏᓐᓂᕐᒧᑦ ᐱᓕᕆᕕᖓᑦ ᑮᓇᐅᔭᖅᑖᖅᑎᑕᐅᓂᐊᖅᐳᑦ $311,881-ᓂᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐊᔪᖏᓴᕐᓂᕐᒧᑦ ᑮᓇᐅᔭᓂᒃ ᒪᒃᑯᒃᑐᓂᒃ ᐊᕐᓇᓂᒃ ᐊᔪᖏᓴᕈᑎᒃᓴᐅᓂᐊᖅᑐᓂᒃ, ᐃᑲᔪᖅᑕᐅᓂᐊᕐᓗᑎᒡᓗ ᖁᓕᑦ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᐃᖅᑲᓇᐃᔭᒐᒃᓴᖅᑖᕈᓐᓇᖏᑦᑐᑦ ᐱᓕᒻᒪᒃᓴᖁᓪᓗᒋᑦ ᐃᖅᑲᓇᐃᔭᒐᒃᓴᖅᑖᕐᓂᕐᒧᑦ ᐊᔪᖏᓴᕐᓂᕐᒧᓪᓗ ᐃᖅᑲᓇᐃᔭᒐᒃᓴᖅᑖᖅᐸᓪᓕᐊᖁᓪᓗᒋᑦ ᐅᕙᓘᓐᓃᑦ ᐃᓕᓐᓂᐊᕆᐊᒃᑲᓐᓂᕈᓐᓇᖁᓪᓗᒋᑦ.

ᐊᔪᖏᓴᕐᓂᕐᒧᑦ ᐱᓕᕆᐊᖑᔪᖅ ᐊᑐᖅᑕᐅᖃᑦᑕᖅᐳᖅ ᐃᑲᔪᖅᖢᒋᑦ ᒪᒃᑯᒃᑐᑦ ᐃᖅᑲᓇᐃᔭᒐᒃᓴᖅᑖᕐᓂᕐᒧᑦ ᐊᔪᕈᑎᖃᖅᑐᑦ, ᑕᒪᒃᑯᐊ ᓲᕐᓗ ᐊᓈᓇᐅᔪᑦ ᐊᐃᑉᐸᖃᖏᑦᑐᑦ ᐱᕈᖅᓴᐃᔪᑦ ᓱᕈᓯᒥᖕᓂᒃ ᓇᖕᒥᓂᖅ, ᓄᓇᖃᖅᑳᖅᓯᒪᔪᑦ ᒪᒃᑯᒃᑐᑦ, ᒪᒃᑯᒃᑐᑦ ᐊᔪᕈᑎᖃᖅᑐᑦ, ᑎᑭᓵᖅᓯᒪᔪᑦ ᑲᓇᑕᒧᑦ, ᒪᒃᑯᒃᑐᑦ ᓄᓇᖃᖅᑐᑦ ᓄᓇᓕᐊᓛᓂ ᐅᖓᓯᒃᑐᒥ, ᐊᒻᒪᓗ ᒪᒃᑯᒃᑐᑦ ᐃᓕᓐᓂᐊᕐᕕᖕᒥ ᓄᖅᑲᖅᓯᒪᔪᑦ.

"ᖁᔭᓐᓇᒦᕈᒪᕙᒃᑲ ᑲᓇᑕᐅᑉ ᒐᕙᒪᒃᑯᖏᑦ ᐃᑲᔪᕈᓐᓇᕐᒪᑕ ᒪᒃᑯᒃᑐᓂᒃ ᐊᕐᓇᓂᒃ ᐊᔪᖏᓴᕈᑎᒃᓴᖏᓐᓂᒃ," ᐅᖃᓚᐅᖅᐳᖅ ᒧᕇ ᐃᓐᒍᕋᒻ, ᑐᑭᒧᐊᒃᑎᑎᔨᐅᔪᖅ ᐃᖃᓗᒃᑑᑦᓯᐊᒥ ᓄᓇᓕᖕᓂ ᐋᓐᓂᐊᖃᕐᓇᖏᑦᑐᓕᕆᕕᖕᒥ. "ᑕᒪᓐᓇ ᐱᓕᕆᐊᕆᔭᐅᔪᖅ ᐱᔪᓐᓇᖅᑎᑎᕗᖅ ᐃᓕᓐᓂᐊᖅᑎᑕᑦᑎᓐᓂᒃ ᐃᓚᐅᔪᓂᒃ; ᐃᓕᓐᓂᐊᖅᑎᑕᐅᖃᑦᑕᖅᖢᑎᒃ ᐃᓕᓐᓂᐊᕈᑎᒋᒋᐊᖃᖅᑕᖏᓐᓂᒃ ᐃᑲᔪᖅᑕᐅᖃᑦᑕᖅᖢᑎᒡᓗ ᖃᓄᐃᓕᐅᕆᐊᖃᕐᓂᖏᓐᓄᑦ ᐃᓅᓯᖃᑦᓯᐊᓕᖅᐸᓪᓕᐊᖁᓪᓗᒋᑦ ᓂᕈᐊᑦᓯᐊᖁᓪᓗᒋᓪᓗ ᐱᒍᒪᔭᒥᖕᓂᒃ."

ᑲᓇᑕᐅᑉ ᒐᕙᒪᒃᑯᖏᑦ ᑲᓇᑕᒥ ᓄᓇᓖᑦ ᖃᓪᓗᓈᑦ ᓄᓇᖓᓐᓂ ᐊᕕᒃᑐᖅᓯᒪᐅᖅᑐᓂ ᐱᓕᕆᖃᑎᖃᖅᐳᑦ ᓄᓇᕗᒥᐅᓂᒡᓗ ᓄᓇᓕᕐᔪᐊᒥᐅᑕᓂᒡᓗ, ᓄᓇᓕᖕᓂ ᑲᑐᔾᔨᖃᑎᒌᓂᒡᓗ ᐊᓯᖏᓐᓂᒡᓗ ᑲᓇᑕᒥᐅᑕᐃᑦ ᐃᓕᓐᓂᐊᖅᑎᑕᐅᔪᓐᓇᖁᓪᓗᒋᑦ, ᐊᔪᖏᓴᖁᓪᓗᒋᑦ ᐱᔪᓐᓇᖁᓪᓗᒋᓪᓗ ᐃᖅᑲᓇᐃᔭᒐᒃᓴᖅᑖᕐᓂᕐᒧᑦ ᐃᓕᓐᓂᐊᖅᑎᑕᐅᓗᑎᒃ ᓄᓇᓕᖕᓂᓗ ᐃᑲᔪᖃᑕᐅᔪᓐᓇᖁᓪᓗᒋᑦ.

ᐊᔪᖏᓴᖅᑎᑎᓂᕐᒧᑦ ᐱᓕᕆᐊᑦ ᐃᓚᒋᔭᐅᕗᑦ ᑲᓇᑕᐅᑉ ᒐᕙᒪᒃᑯᖏᑦᑕ ᐸᕐᓇᒍᑎᖏᓐᓄᑦ ᐃᓕᓐᓂᐊᖅᑎᑎᒍᒪᓪᓗᑎᒃ, ᐊᔪᖏᓴᖅᑎᑎᒍᒪᓪᓗᑎᒃ, ᐃᖅᑲᓇᐃᔭᖅᑎᑎᒍᒪᓪᓗᑎᒡᓗ ᓯᓚᕐᔪᐊᒥᐅᓂᒃ. ᑲᓇᑕᐅᑉ ᒐᕙᒪᒃᑯᖏᑦ ᑕᐃᒪᓐᓇᐃᓕᐅᕆᐊᖅᓯᒪᕗᑦ ᐸᕐᓇᒃᓯᒪᒍᑎᖃᖅᖢᑎᒃ ᑲᓇᑕᒥ ᑮᓇᐅᔭᓕᐅᖃᑕᐅᓂᕐᒧᑦ ᐱᕙᓪᓕᐊᒍᑎᒃᓴᑎᒍᑦ ᐸᕐᓇᒃᑕᐅᓯᒪᔪᑎᒍᑦ. ᐸᕐᓇᒃᓯᒪᒍᑎᖏᑦᑕ ᐃᓚᖓ ᐱᒻᒪᕆᐅᔪᖅ ᐱᕙᓪᓕᐊᑎᑎᒍᑕᐅᕗᖅ ᐊᔪᖏᓴᖅᑎᑕᐅᖁᓪᓗᒋᑦ ᐃᖅᑲᓇᐃᔭᒐᒃᓴᖅᑖᕈᓐᓇᖁᓪᓗᒋᑦ ᐊᔪᖏᓴᖅᓯᒪᓗᑎᒃ. ᖃᐅᔨᒃᑲᓐᓂᕈᒪᔪᑦ ᑕᒪᑐᒪ ᒥᒃᓵᓄᑦ ᑲᓇᑕᒥ ᑮᓇᐅᔭᓕᐅᕐᓂᕐᒧᑦ ᐸᕐᓇᒍᑕᐅᓯᒪᔪᓂᒃ ᖃᐅᔨᒋᐊᕈᓐᓇᖅᐳᑦ ᖃᕆᑕᐅᔭᒃᑯᑦ ᐅᕙᓂ
 www.actionplan.gc.ca.

ᐊᔪᖏᓴᕐᓂᕐᒧᑦ ᐱᓕᕆᐊᖑᔪᑦ ᐱᓕᕆᐊᕆᔭᐅᖃᑦᑕᖅᐳᑦ ᐊᔪᖏᓴᕐᓂᖅ ᑲᓇᑕᒥ, ᐊᑕᐅᓯᕐᒥᑦ ᐱᔨᑦᓯᕋᖅᑕᐅᔪᓐᓇᖁᓪᓗᒋᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐱᓕᕆᐊᖑᔪᓂᑦ, ᐱᔨᑦᓯᕋᐅᑎᓂᑦ ᐃᑲᔪᕈᑎᓂᓪᓗ. ᑐᓯᒋᐊᒃᑲᓐᓂᕈᒪᔪᑦ ᑕᒪᓐᓇ ᐱᔾᔪᑎᒋᓪᓗᒍ ᖃᐅᔨᒋᐊᕈᓐᓇᖅᐳᑦ ᖃᕆᑕᐅᔭᒃᑯᑦ ᐅᕗᖓ www.servicecanada.gc.ca, ᐅᕙᓘᓐᓃᑦ ᐅᖃᓚᓗᑎᒃ 1 800 OCanada ᐅᕙᓘᓐᓃᑦ ᓄᓇᓕᖕᓂ ᑲᓇᑕᐅᑉ ᒐᕙᒪᒃᑯᖏᑦᑕ ᐱᔨᑦᓯᕋᕐᕕᖓᓄᐊᕐᓗᑎᒃ ᐅᕙᓂ  Service Canada Centre.



ᖃᓄᐃᑉᐸᓪᓕᐊᓯᒪᓂᖏᑦ

ᐃᖃᓗᒃᑑᑦᓯᐊᒥ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐱᓕᕆᕕᒃ ᐱᓕᕆᐊᒃᓴᖃᖅᐳᑦ ᐃᑲᔪᕆᐊᖃᕐᓂᕐᒧᑦ ᐃᓄᖕᓂᒃ ᖃᓄᑐᐃᓐᓇᖅ ᐱᕙᓪᓕᐊᓂᖃᖁᓪᓗᒋᑦ ᐱᓕᒻᒪᒃᓴᕐᓂᕐᒧᑦ. ᐱᓕᕆᕕᒃ ᐃᓕᓐᓂᐊᖅᑎᑎᖃᑦᑕᖅᐳᖅ ᐃᑲᔪᖃᑦᑕᖅᖢᓂᓗ ᐱᔨᑦᓯᕋᐅᑎᒃᑯᑦ ᐃᓱᒪᖅᓱᕈᓐᓇᖁᓪᓗᒋᑦ ᐅᐃᕆᓯᒪᔭᒥᖕᓂᒃ ᓄᖅᑲᐅᑎᖃᖁᓪᓗᒋᓪᓗ ᐋᓐᓂᖅᑎᕆᖃᑦᑕᖅᓯᒪᓂᖏᓐᓂᓪᓗ ᐋᓐᓂᖅᑎᑕᐅᖃᑦᑕᖅᓯᒪᓂᖏᓐᓂᓪᓗ ᐃᓅᓯᖃᑦᓯᐊᕐᓂᕐᒧᑦ ᓂᕈᐊᖅᓯᒪᖁᓪᓗᒋᓪᓗ.

ᑲᓇᑕᐅᑉ ᒐᕙᒪᒃᑯᖏᑦ ᒪᒃᑯᒃᑐᑦ ᐃᖅᑲᓇᐃᔭᒐᒃᓴᖃᖅᑎᑕᐅᓂᖏᓐᓄᑦ ᐸᕐᓇᒃᓯᒪᒍᑎᑦ, ᐊᔪᖏᓴᕐᓂᕐᒧᓪᓗ ᐱᓕᕆᐊᕆᔭᐅᔪᑦ ᒪᒃᑯᒃᑐᓂᒃ ᐃᑲᔪᖃᑦᑕᖅᐳᑦ, ᐱᓗᐊᖅᑐᒥᒃ ᑕᒪᒃᑯᐊ ᑐᓗᕈᑎᖃᖅᑐᑦ ᐃᖅᑲᓇᐃᔭᖅᑖᕐᓂᕐᒧᑦ, ᐱᓕᕆᐊᒃᓴᖃᖅᑎᑕᐅᓂᕐᒧᑦ ᑐᑭᓯᐅᒪᖁᓪᓗᒋᑦ, ᐱᕙᓪᓕᐊᑎᑕᐅᖁᓪᓗᒋᓪᓗ ᐊᔪᖏᓴᕐᓂᕐᒧᑦ, ᐃᖅᑲᓇᐃᔭᒐᒃᓴᖅᑖᖁᓪᓗᒋᓪᓗ, ᐃᖅᑲᓇᐃᔭᒐᒃᓴᑦᓯᐊᕙᒃᑖᕐᓂᖏᓐᓄᓪᓗ ᐃᖅᑲᓇᐃᔭᐃᓐᓇᕈᓐᓇᖁᓪᓗᒋᓪᓗ. ᐊᓯᖏᑦ ᒪᕐᕉᒃ ᐱᓕᕆᐊᕆᔭᐅᔪᑦ ᐊᐅᔭᒃᑯᑦ ᐃᖅᑲᓇᐃᔭᕆᐅᖅᓴᕐᓂᕐᒧᑦ ᐊᒻᒪᓗ ᐃᖅᑲᓇᐃᔭᕐᓂᕐᒧᑦ ᐱᕙᓪᓕᐊᑎᑕᐅᓂᖏᓐᓄᑦ.

ᐃᖅᑲᓇᐃᔭᕐᓂᕐᒧᑦ ᐊᔪᖏᓴᕈᑎᖃᕐᓂᕐᒥᒃ ᐱᔾᔪᑎᖃᖅᐳᖅ ᐃᑲᔪᖃᑦᑕᕐᓂᖅ ᒪᒃᑯᒃᑐᓂᒃ ᐃᖅᑲᓇᐃᔭᖅᑖᕈᓐᓇᖏᑦᑐᓂᒃ, ᑕᒪᒃᑯᐊ ᓱᕐᓗ ᐊᐃᑉᐸᖃᖏᑦᑐᑦ ᕿᑐᖓᖃᑦᑕᖅᑐᑦ, ᓄᓇᖃᖅᑳᖅᓯᒪᔪᑦ ᒪᒃᑯᒃᑐᑦ, ᒪᒃᑯᒃᑐᑦ ᐊᔪᕈᑎᖃᖅᑐᓪᓗ, ᑲᓇᑕᒧᐊᓵᖅᓯᒪᔪᑦ, ᒪᒃᑯᒃᑐᑦ ᐅᖓᓯᒃᑐᒥ ᓄᓇᖃᖅᑐᑦ, ᒪᒃᑯᒃᑐᓪᓗ ᐃᓕᓐᓂᐊᕐᕕᖕᒥᑦ ᓄᖅᑲᖅᓯᒪᔪᑦ. ᖃᐅᔨᓴᖅᑕᐅᓚᐅᖅᖢᑎᒃ ᖃᓄᖅ ᐃᑲᔪᖅᑕᐅᒋᐊᖃᕐᓂᖏᓐᓄᑦ ᐱᓕᕆᐊᕆᔭᐅᖃᑦᑕᖅᐳᖅ ᐃᑲᔪᖅᑕᐅᒍᑎᒋᒋᐊᖃᖅᑕᖏᑦᑎᒍᑦ. ᐱᓕᕆᐊᖅ ᐃᑲᔪᖃᑦᑕᖅᐳᖅ ᒪᒃᑯᒃᑐᓂᒃ ᐱᕙᓪᓕᐊᓂᖃᖁᓪᓗᒋᑦ ᐃᖅᑲᓇᐃᔭᕆᐅᖅᓴᓂᕐᒧᑦ. ᑕᒪᒃᑯᐊ ᑕᒪᑐᒧᖓ ᐃᓚᐅᔪᓐᓇᖅᑐᑦ ᐊᕐᕌᒍᓖᑦ 15-ᓂᑦ 30-ᓄᑦ -- ᐃᖅᑲᓇᐃᔭᖏᑦᑐᖅᓯᐅᑎᑖᖃᑦᑕᖏᑉᐸᑕ - ᐃᑲᔪᖅᑕᐅᖃᑦᑕᖅᐳᑦ ᑲᒪᒋᔭᐅᑦᓯᐊᖅᖢᑎᒃ, ᐊᑯᓂ ᐃᑲᔪᖅᑕᐅᒍᑎᖃᖃᑦᑕᖅᖢᑎᒃ ᐱᔨᑦᓯᕋᖅᑕᐅᖃᑦᑕᖅᖢᑎᒡᓗ ᐃᖅᑲᓇᐃᔭᒐᒃᓴᖅᓯᐅᕈᔾᔭᐅᓪᓗᑎᒃ ᐃᖅᑲᓇᐃᔭᐃᓐᓇᖁᔭᐅᓪᓗᑎᒡᓗ.