ᑲᖏᖅᖠᓂᖅ, ᓄᓇᕗᑦ – ᓕᐅᓇ ᐊᒡᓘᒃᑲᖅ, ᒥᓂᔅᑕᒋᔭᐅᔪᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪ ᐊᕕᒃᑐᖅᓯᒪᔪᓄᑦ ᒥᓂᔅᑕᒋᔭᐅᓪᓗᓂ ᔫᑳᓐᒧᑦ, ᓄᓇᑦᑎᐊᕐᒧᑦ, ᓄᓇᕗᒻᒧᓪᓗ, ᐅᓪᓗᒥ ᐅᖃᐅᓯᖃᖅᑲᐅᕗᖅ ᐱᐊᓂᒃᑕᐅᓂᖏᓐᓂᒃ ᐱᒻᒪᕆᐅᔪᓂᒃ ᓄᓇᓖᑦ ᐊᑐᖅᐸᒃᑕᖏᓐᓄᑦ ᐊᐅᓚᔪᓐᓇᖁᓪᓗᒋᑦ ᓄᑖᕈᕆᐊᖅᑎᑕᐅᔪᓂᒃ ᐱᐅᓯᕚᓪᓕᕈᑕᐅᓂᐊᖅᖢᑎᒃ ᑲᖏᖅᖠᓂᐅᑉ ᒥᑦᑕᕐᕕᖓᓄᑦ.  ᑲᓇᑕᐅᑉ ᒐᕙᒪᑐᖃᖓ ᑮᓇᐅᔭᖅᑖᖅᑎᑦᑎᓯᒪᕗᑦ $7.6 ᒥᓕᐊᓐ ᑖᓚᑦ ᐅᖓᑖᓂ ᐋᖅᑭᒃᓯᓂᕐᒧᑦ ᐱᓕᕆᐊᒃᓴᕐᒧᑦ.
 
“ᑲᓇᑕᐅᑉ ᒐᕙᒪᑐᖃᖓ ᑐᓐᓂᖅᑯᑎᖃᖅᐳᑦ ᐱᕙᓪᓕᐊᓂᖃᖁᔨᓂᕐᒥᓂᒃ ᐅᑭᐅᖅᑕᖅᑐᕐᒥ ᓄᓇᓖᑦ ᓄᑖᓂᒃ ᐱᕙᓪᓕᐊᑎᑕᐅᖏᓐᓇᕈᓐᓇᖅᑐᓂᒡᓗ ᓄᓇᓖᑦ ᐊᑐᖅᐸᒃᑕᖏᓐᓄᑦ ᐊᐅᓚᔪᓐᓇᖁᓪᓗᒋᑦ − ᑐᙵᕕᒋᔭᐅᓪᓗᑎᒃ ᑮᓇᐅᔭᓕᐅᕈᓐᓇᑦᑎᐊᔅᓲᔭᕐᓂᕐᒧᑦ ᐃᓅᖃᑎᒌᑦᑎᐊᕈᓐᓇᕐᓂᕐᒧᓪᓗ,” ᐅᖃᓚᐅᖅᐳᖅ ᒥᓂᔅᑕ ᐊᒡᓘᒃᑲᖅ. “ᒐᕙᒪᑐᖃᖅᐳᑦ ᑮᓇᐅᔭᖅᑖᖅᑎᑦᑎᓂᖏᑦ ᑲᔪᓯᔪᓐᓇᖅᑎᑦᑎᓂᐊᖅᐳᖅ ᑲᖏᖅᖠᓂᐅᑉ ᒥᑦᑕᕐᕕᖓᑕ ᐊᑑᑎᖏᓐᓄᑦ
ᐱᒻᒪᕆᐅᔪᒥᒃ ᐃᖏᕐᕋᓂᕐᒧᑦ ᒥᕝᕕᐅᓂᖓᓄᑦ ᐅᑭᐅᖅᑕᖅᑐᕐᒥ, ᐊᒻᒪ ᐊᑦᑕᕐᓇᙱᑦᑐᖅᓯᐅᖅᑎᑦᑎᓐᓇᕐᓂᐊᖅᖢᓂ ᑕᐃᒪᐃᓐᓄᑦ ᑲᖏᖅᓕᓂᐅᑉ ᒥᑦᑕᕐᕕᖓᒎᖅᐸᒃᑐᓗᒃᑖᓄᑦ.”
 
“ᒥᑦᑕᕐᕖᑦ ᓄᓇᕗᒻᒧᑦ ᐆᒪᔪᓐᓇᐅᑎᐅᕗᑦ, ᓄᓇᓕᖕᒥᐅᓄᑦ ᑲᑎᖃᑎᒌᒍᓐᓇᕈᑕᐅᓪᓗᑎᒃ ᑲᓇᑕᓕᒫᒧᓪᓗ,” ᐅᖃᓚᐅᖅᐳᖅ ᐲᑕ ᑕᑉᑑᓇ, ᒥᓂᔅᑕᒋᔭᖅ ᐱᕙᓪᓕᐊᔪᓕᕆᔨᒃᑯᓐᓄᑦ ᐃᖏᕐᕋᔪᓕᕆᔨᒃᑯᓐᓄᓪᓗ ᓄᓇᕗᑦ
ᒐᕙᒪᖓᓄᑦ. “ᐊᑦᑕᕐᓇᖅᑐᖃᙱᓐᓂᖅ ᒥᑦᑕᕐᕕᑦᑎᓐᓂ ᓲᖃᐃᒻᒪ ᓯᕗᓪᓕᐅᑎᑕᐅᕗᖅ ᓄᓇᕗᑦ ᒐᕙᒪᖓᓄᑦ. ᑖᓐᓇ ᐱᓕᕆᐊᒃᓴᖅ ᐱᐅᓯᕚᓪᓕᖅᑎᑦᑎᓂᐊᖅᐳᖅ ᐊᑦᑕᕐᓇᖅᑐᖃᙱᓐᓂᕐᒥᒃ ᓄᓇᕘᑉ ᒥᑦᑕᕐᕕᖓᓂᒃ ᐊᑐᖅᑕᐅᓛᖑᖃᑦᑕᖃᑕᐅᔪᒥᒃ.”  
 
ᑮᓇᐅᔭᑎᖅᑖᖅᑎᑕᐅᓂᖅ ᑖᔅᓱᒧᖓ ᓴᓇᓂᕐᒧᑦ ᐱᓕᕆᐊᒃᓴᕐᒧᑦ ᐃᓚᒋᔭᐅᕗᖅ ᒐᕙᒪᑐᖃᒃᑯᑦ ᑲᓇᑕᐅᑉ ᒥᑦᑕᕐᕕᖏᑕ ᐊᑭᑐᔫᑎᖏᓐᓄᑦ ᐃᑲᔫᓯᐊᕐᒧᑦ, ᑮᓇᐅᔭᖅᑖᖅᑎᑦᑎᕙᒃᖢᓂ ᐊᑭᑐᔫᑎᓄᑦ ᐱᓕᕆᐊᒃᓴᕐᓄᑦ ᐊᒃᑐᐊᔪᓂᒃ
ᐊᑦᑕᕐᓇᖅᑐᖃᙱᓐᓂᕐᒧᑦ, ᐱᒋᔭᕐᓂᒃ ᓴᐳᒻᒥᓂᕐᒧᑦ ᐊᒻᒪ ᐊᐅᓚᑎᑕᐅᓂᖓᓄᑦ ᐊᑭᑭᓐᓂᖅᓴᐅᔪᓐᓇᖅᑎᑦᑎᓂᕐᒧᑦ. 
 
ᑲᓇᑕᐅᑉ ᒥᑦᑕᕐᕕᖏᑕ ᐊᑭᑐᔫᑎᖏᓐᓄᑦ ᐃᑲᔫᓯᐊᖅᑎᒍᑦ, ᑲᓇᑕᐅᑉ ᒐᕙᒪᑐᖃᖓ ᐱᐅᓯᕚᓪᓕᖅᑎᑦᑎᕗᑦ ᒥᑦᑕᕐᕖᑦ ᐊᑦᑕᕐᓇᖅᑐᖃᙱᓐᓂᖏᓐᓂᒃ, ᐊᒻᒪ ᐃᑲᔪᖅᓯᓂᖃᕆᓪᓗᓂ ᒪᑭᒪᔾᔪᑎᖃᕈᓐᓇᕐᓂᕆᔭᖓᓂᒃ ᑖᔅᓱᒪ ᐱᕐᔪᐊᒻᒪᕆᔫᑉ ᑲᓇᑕᒥ ᐃᖏᕐᕋᔭᖃᕐᓂᖓᓄᑦ ᐱᒋᔭᕆᐊᖃᖅᑑᑉ. ᑲᓇᑕᐅᑉ ᒥᑦᑕᕐᕕᖏᑕ ᐊᑭᑐᔫᑎᖏᓐᓄᑦ ᐃᑲᔫᓯᐊᖅ ᓇᓗᓇᐃᖅᓯᔾᔪᑎᒋᔭᒃᓴᐅᕗᖅ ᒐᕙᒪᑐᖃᒃᑯᑦ ᐱᑕᖃᕆᐊᓕᖕᓄᑦ ᑮᓇᐅᔭᖅᑕᖃᖅᑎᑦᑎᓂᖏᓐᓄᑦ 
ᐱᒋᔭᐅᔭᕆᐊᖃᓪᓚᕆᒃᑐᒥ ᐊᒻᒪ ᐊᑦᑕᕐᓇᙱᓐᓂᖅᓯᐅᕐᓇᕋᔭᖅᑐᒥ.