ᐊᑐᕚ, ᐋᓐᑎᐅᕆᔪ - ᒥᓂᔅᑕ ᓕᐅᓇ ᐊᒡᓗᒃᑲᖅ, ᑲᑎᒪᔨᕐᔪᐊᖑᖃᑕᐅᔪᖅ ᐊᑐᕚᒥ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓄᓇᕗᒧᑦ, ᐋᓐᓂᐊᖃᕐᓇᖏᑦᑐᓕᕆᓂᕐᒧᓪᓗ ᒥᓂᔅᑕ, ᒥᓂᔅᑕ ᑲᒪᒋᔭᖃᖅᑐᖅ ᐅᑭᐅᖅᑕᖅᑐᒧᑦ ᐃᖏᕐᕋᔭᒃᐳᖅ ᓱᓕ ᐱᓇᓱᐊᕈᓯᒥ. ᐃᖃᓗᖕᓂ ᓯᓂᒃᑕᓚᐅᕐᓗᓂ ᒥᑦᑎᒪᑕᓕᖕᒧᐊᕐᓂᐊᖅᐳᖅ ᑲᖏᖅᓱᒑᐱᖕᒧᓪᓗ ᐅᓪᓗᒥ ᖃᐅᒃᐸᑦ ᑲᖏᖅᓱᒑᐱᖕᒥᑦ ᕿᑭᖅᑕᕐᔪᐊᒧᑦ ᐅᑎᓕᕐᓗᓂ ᐃᖃᓗᖕᓄᑦ. ᒥᔅ ᐊᒡᓗᒃᑲᖅ ᐃᖃᓗᖕᓂᑦ ᖃᐅᓱᐃᑦᑐᓕᐊᕐᓂᐊᓚᐅᕋᓗᐊᖅᖢᓂ ᐃᒃᐸᒃᓴᖅ ᓯᓚᒥᒃ ᐱᔾᔪᑎᖃᖅᖢᓂ ᑕᐃᑯᖓᐅᓂᐊᕈᓐᓃᖅᐳᖅ ᐅᕙᑦᓯᐊᕈ ᑭᓯᐊᓂ. ᒥᔅ ᐊᒡᓗᒃᑲᖅ ᓂᕆᐅᒋᔭᖃᖅᐳᖅ ᖃᐅᓱᐃᑦᑐᓕᐊᕐᓂᐊᕐᓂᕐᒧᑦ.
 ᒥᔅ ᐊᒡᓗᒃᑲᖅ ᐊᑐᓂ ᓄᓇᓕᖕᓂ ᑲᑎᒪᖃᑎᖃᖃᑦᑕᕐᓂᐊᖅᐳᖅ ᓂᕈᐊᖅᑎᒥᓂᒃ ᐅᖃᓪᓚᖃᑎᖃᕐᓗᓂᓗ. ᐊᒻᒪᓗ, ᐃᖏᕐᕋᔭᖕᓂᕐᒥᓂ ᓄᓇᓕᖕᓂ ᕼᐊᒻᓚᒃᑯᓐᓄᑦ ᐳᓚᕋᖃᑦᑕᕐᓂᐊᖅᐳᖅ, ᐋᓐᓂᐊᕐᕕᖕᓄᓪᓗ, ᐊᒻᒪᓗ ᓈᓚᐅᑎᒃᑰᖃᑦᑕᕐᓗᓂ ᓄᓇᓕᖕᓂ.

ᐱᓕᕆᔪᒻᒪᕆᐅᓂᐊᖅᖢᓂ ᑕᒡᕙᓂ ᑕᖅᑭᒥ ᒥᓂᔅᑕ ᐊᒡᓗᒃᑲᖅ ᐱᓕᕆᓪᓗᓂ ᑕᒪᐃᓐᓄᑦ ᓄᓇᕗᒥᐅᓄᑦ, ᐅᑭᐅᖅᑕᖅᑐᒥᓄᑦ, ᑲᓇᑕᒥᐅᑕᓄᓪᓗ. ᑕᒡᕙᓂ ᑕᖅᑭᒥ ᐊᑐᖅᑐᒥ ᒥᓂᔅᑕ ᒥᓂᔅᑕᐅᓂᕐᒧᑦ ᐱᓕᕆᐊᖏᑦᑕ ᓴᓂᐊᒍᑦ, ᐃᖃᓗᖕᓄᐊᖅᓯᒪᓕᖅᐳᖅ ᐱᒻᒪᕆᐅᔪᒥ G7 ᑮᓇᐅᔭᓕᕆᓂᕐᒧᑦ ᒥᓂᔅᑕᐃᑦ ᑮᓇᐅᔭᒃᑯᕕᕐᔪᐊᓕᕆᔨᒃᑯᓐᓄᓪᓗ ᑲᑎᒪᔨᖏᑦ ᑲᑎᒪᑎᓪᓗᒋᑦ, ᐃᖃᓗᒃᑐᑦᓯᐊᒧᐊᖅᓯᒪᓕᖅᖢᓂᓗ, ᔭᓗᓇᐃᒧᑦ, ᕚᓐᑰᕙᒧᑦ ᐅᑭᐅᖅᑕᖅᑐᒥᐅᑕᐃᑦ ᐅᓪᓗᖓᓂ ᐅᓕᑉᐱᒃᒥ, ᐊᒻᒪᓗ ᑐᕌᓐᑐ ᐊᒻᒪ ᑭᐊᒍᕆ ᑲᑎᒪᖃᑎᖃᖅᖢᓂ ᐋᓐᓂᐊᖅᑐᓕᕆᓂᕐᒧᑦ ᐃᓚᒋᔭᐅᔪᓂᒃ.

"ᖁᕕᐊᒋᔭᖃᐃᓐᓇᖅᐸᒃᐳᖓ ᑲᑎᖃᑎᒋᒋᐊᒃᓴᖅ ᑲᓇᑕᒥᐅᑕᐃᑦ ᓇᓂᑐᐃᓐᓇᖅ ᐊᒻᒪᓗ ᐱᓗᐊᖅᑐᒥᒃ ᓄᓇᕗᒥᐅᑕᐃᑦ," ᐊᒡᓗᒃᑲᖅ ᐅᖃᓚᐅᖅᐳᖅ. "ᑎᓕᐅᕆᕗᖓ ᓂᕈᐊᖅᑎᓐᓂᒃ ᑲᑎᖃᑕᐅᖃᑦᑕᕆᑦᓯ ᖃᓄᐃᓕᐅᖅᑎᓪᓗᒋᑦ ᓄᓇᓕᖕᓂ ᐅᕙᓘᓐᓃᑦ ᓈᓚᐅᑎᒃᑰᖅᑎᓪᓗᑕ ᐅᖃᓗᖃᑦᑕᕐᓗᓯ. ᑐᓴᕈᒪᒐᒪ ᐃᓕᑦᓯᖕᓂᑦ ᐊᒃᓱᕈᐃᓐᓇᕈᒪᓪᓗᖓᓗ ᑕᒪᐃᓐᓄᑦ ᓄᓇᕗᒥᐅᓄᑦ ᑲᑎᒪᔨᐅᖃᑕᐅᓪᓗᖓ ᑲᓇᑕᐅᑉ ᒐᕙᒪᒃᑯᖏᑦᑕ ᑲᑎᒪᕐᔪᐊᕐᕕᖓᓂ," ᐊᒡᓗᒃᑲᖅ ᐅᖃᓚᐅᖅᐳᖅ.

ᐊᐱᖁᑎᒃᓴᖃᕈᑦᓯ ᐱᕙᓪᓕᐊᔪᓂ ᑖᒃᑯᓇᓂ ᐱᔾᔪᑎᖃᖅᑐᓂᒃ ᐊᓯᖏᓐᓂᒡᓗ ᓕᐅᓇ ᖃᕆᑕᐅᔭᒃᑯᑦ ᑐᑭᓯᒋᐊᕈᑎᖏᑦ ᑕᑯᒋᐊᖃᑦᑕᕐᓗᒋᑦ ᑎᑎᕋᖅᓯᒪᔪᑦ ᐅᕙᓂ leonaaglukkaq.ca ᐅᕙᓘᓐᓃᑦ ᐊᓪᓚᕕᖓᓄᑦ ᐅᕙᓂ: