February 24, 2010

ᑲᓇᑕᒥ ᑮᓇᐅᔭᓕᐅᖅᑎᑎᓂᕐᒧᑦ ᐸᕐᓇᒃᓯᒪᒍᑎᑎᒍᑦ ᐊᖅᑯᓯᐅᖅᑕᐅᓂᐊᕐᓂᖏᑦ ᑰᒃᑯᑦ ᐃᑳᕈᑎᓕᐅᖅᑕᐅᓂᐊᕐᓂᖏᓪᓗ, ᐃᖅᑲᓇᐃᔭᒐᒃᓴᖅᑖᖅᑎᑕᐅᓗᑎᒡᓗ ᓄᓇᓕᖕᓂ

ᕿᑭᒃᑕᕐᔪᐊᖅ (ᓄᓇᕗᑦ) - ᒥᓂᔅᑕ ᓕᐅᓇ ᐊᒡᓗᑲᖅ, ᒥᓂᔅᑕ ᑲᒪᒋᔭᖃᖅᑐᖅ ᐅᑭᐅᖅᑕᖅᑐᒥᐅᓂᒃ ᒥᓂᔅᑕᐅᓪᓗᓂᓗ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ, ᑭᒡᒐᖅᑐᐃᓪᓗᓂ ᒥᓂᔅᑕ ᓴᒃ ᓯᑖᓪᒥᒃ, ᒥᓂᔅ ᑲᓇᑕᒥ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᓂᕐᒧᑦ ᑎᒥᖓᓐᓂᑦ (CanNor) ᑐᓴᖅᑎᑎᓚᐅᖅᐳᖅ ᐅᓪᓗ ᓄᓇᕗᒥ ᓄᓇᓕᖕᓂ ᐊᖅᑯᓯᐅᖅᑕᐅᓂᕐᒧᑦ ᐱᓕᕆᐊᕆᔭᐅᓂᐊᖅᑐᖅ ᐊᖏᒡᓕᒋᐊᖅᑕᐅᓂᐊᕐᓂᖓᓄᑦ ᐊᕐᕌᒍᒥ ᐊᑐᖅᑐᒥ. ᑕᒪᓐᓇ ᑮᓇᐅᔭᖅᑐᕈᑕᐅᓂᐊᖅᑐᖅ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓴᓇᔭᐅᓂᐊᖅᐳᖅ ᑮᓇᐅᔭᓂᒃ ᐊᑐᕐᓗᑎᒃ ᑲᓇᑕᐅᑉ ᒐᕙᒪᒃᑯᖏᑦᑕ ᐱᕙᓪᓕᐊᔪᓕᕆᓂᕐᒧᑦ ᑎᒥᖓᓐᓂᒃ ᐅᑯᓇᖓᑦ ᐊᑐᕐᓗᑎᒃ ᑲᓇᑕᐅᑉ ᒐᕙᒪᒃᑯᖏᑦᑕ ᐱᕙᓪᓕᐊᔪᓕᕆᓂᕐᒧᑦ ᐸᕐᓇᒍᑎᖏᓐᓂᑦ.

CanNor ᐊᑐᕐᓂᐊᖅᐳᑦ ᑮᓇᐅᔭᓂᒃ $1.3-ᒥᓕᔭᓐᑖᓚᐃᑦ ᐅᖓᑖᓄᑦ ᓄᓇᓕᖕᓂ ᐋᖅᑭᒋᐊᕈᑎᖃᕐᓂᕐᒧᑦ ᑮᓇᐅᔭᓂᑦ  (CAF) ᑐᓂᔭᐅᓗᑎᒃ ᓄᓇᕗᑦ ᒐᕙᒪᒃᑯᖏᑦ ᓄᓇᓕᖕᓂᖔᖅᑐᒥᑦ ᐊᖅᑯᓯᐅᕐᓂᕐᒧᑦ ᓄᑖᖑᖅᑎᑎᓂᕐᒧᓪᓗ ᐃᓇᖏᖅᑕᐅᓂᖓᓄᓪᓗ ᑰᒃᑯᑦ ᐃᑲᕈᑎᑦ.

"ᓄᓇᕗᒥᐅᑦ ᐃᖅᑲᓇᐃᔭᒐᒃᓴᖅᑖᖅᑎᑕᐅᓂᐊᖅᐳᑦ, 100 ᐅᖓᑖᓄᑦ ᐃᖅᑲᓇᐃᔭᓚᐅᐱᓪᓚᒃᑐᖃᕐᓂᐊᖅᐳᖅ ᐊᒥᓲᑎᒋᔪᓂᒃ ᓴᓇᔭᐅᓂᖏᓐᓄᑦ," ᐅᖃᓚᐅᖅᐳᖅ ᒥᓂᔅᑕ ᐊᒡᓗᒃᑲᖅ. "ᓄᓇᕗᑦ ᐃᑲᔪᖅᑕᐅᓂᐊᖅᖢᑎᒡᓗ ᐅᔭᕋᖕᓂᐊᕐᓂᕐᒧᑦ ᐱᓕᕆᐊᒃᓴᖃᕐᓂᐊᕐᒪᑕ ᐊᖅᑯᑎᖃᓕᕐᓂᖏᓐᓄᑦ ᓄᓇᓕᖕᒥᑦ ᓄᓇᓕᖕᓂᓗ ᓯᐅᕋᖅᑕᕐᕕᖕᒧᐊᖃᑦᑕᕈᓐᓇᕐᓗᑎᒃ, ᐊᑯᓂᐅᔪᒃᑯᑦ ᐱᕙᓪᓕᐊᒍᑎᖃᖅᑎᑕᐅᓂᐊᖅᖢᑎᒡᓗ."

"ᐊᖏᒡᓕᒋᐊᖅᑕᐅᑎᓪᓗᒋᑦ ᐊᖅᑯᑎᑦ ᑰᒃᑯᑦ ᐃᑲᕈᑎᓪᓗ ᓄᓇᓕᖕᓂᒥᐅᑦ ᓄᓇᒧᑦ ᐃᒪᕐᒧᓪᓗ ᐅᖓᓯᒃᑐᒧᑦ ᐊᐅᓪᓛᖃᑦᑕᕈᓐᓇᕐᓂᐊᖅᐳᑦ, ᐱᕙᓪᓕᐊᑎᑎᓗᑎᒡᓗ ᐃᖃᓗᒃᓯᐅᕐᓂᕐᒧᑦ, ᐊᖑᓇᓱᐊᕐᓂᕐᒧᑦ ᐳᓚᕋᖅᑐᓕᕆᓂᕐᒧᓪᓗ," ᐅᖃᓚᖅᐳᖅ ᓯᑖᓪ. "ᑕᒪᒃᑯᐊ ᑕᒪᕐᒥᒃ ᐱᒻᒪᕆᐅᔪᒥᒃ ᐃᑲᔪᕈᑎᖃᕐᒪᑕ ᓄᓇᕗᒥ ᑮᓇᐅᔭᓕᐅᕋᓱᐊᕐᓂᕐᒧᑦ, ᐊᒻᒪᓗ ᐱᕙᓪᓕᐊᔪᓕᕆᓂᕐᒧᑦ ᐸᕐᓇᒃᓯᒪᒍᑎᑦᑎᓐᓂᒃ, ᑕᐃᒪᓐᓇ ᐱᕈᖅᐸᓪᓕᐊᑎᑕᐅᒃᑲᓐᓂᕐᓂᐊᖅᖢᑎᒡᓗ."

"ᐱᐅᓂᖅᓴᐅᓕᖅᑎᑕᐅᓂᐊᕐᓂᖓ ᓄᓇᓕᖕᓂᑦ ᐊᖅᑯᑦ ᐱᓕᕆᐊᕆᔭᐅᒍᒪᕗᖅ ᓄᓇᕗᒥ ᐃᖏᕐᕋᖃᑦᑕᖅᑐᓕᕆᔨᒃᑯᑦ ᐸᕐᓇᒃᓯᒪᒍᑎᒋᔭᖓᒍᑦ," ᐅᖃᓚᐅᖅᐳᖅ ᐲᑕ ᑕᑉᑑᓇ, ᓄᓇᕗᒥ ᓯᕗᓕᖅᑎᐅᑉ ᑐᖏᓕᖓ ᐊᒻᒪᓗ ᒥᓂᔅᑕᐅᓪᓗᓂ ᐱᕙᓪᓕᐊᔪᓕᕆᓂᕐᒧᑦ ᐃᖏᕐᕋᖃᑦᑕᖅᑐᓕᕆᔨᓄᓪᓗ ᓄᓇᕗᑦ ᒐᕙᒪᒃᑯᖏᓐᓂ. "ᑕᒪᒃᑯᐊ ᐊᖅᑯᑎᑦ ᐊᖅᑯᑎᒋᒐᑦᑎᒍ ᓄᓇᓕᖕᒥᑦ ᓄᓇᒧᑦ ᐊᓯᖏᓐᓄᓪᓗ ᐊᐅᓪᓛᖃᑦᑕᕐᕕᖕᓄᑦ, ᐱᖅᑯᓯᑐᖃᕗᓪᓗ ᑕᐃᒪᓐᓇ ᐊᑐᐃᓐᓇᕈᓐᓇᕐᓂᐊᕋᑦᑎᒍ ᐊᖑᓇᓱᐊᕐᓂᖅ ᐸᐅᖓᖅᑕᕆᐊᖃᑦᑕᕐᓂᖅ, ᐊᒻᒪᓗ ᓄᓇᓕᖕᓂ ᐳᓚᕋᖅᑐᓕᕆᓂᖅ. ᒫᓐᓇ ᑮᓇᐅᔭᖅᑕᖃᓗᐊᖏᒻᒪᑦ ᐊᖅᑯᓯᐅᕈᑎᒃᓴᓄᑦ, ᑕᐃᒪᓐᓇ ᖁᕕᐊᓱᑦᓯᐊᖅᐳᒍᑦ  CanNor-ᐊᒃᑯᑦ ᐃᑲᔪᕈᖃᕈᓐᓇᕐᓂᐊᕐᒪᑕ ᐱᒻᒪᕆᐅᔪᒧᑦ ᐱᓕᕆᐊᕆᔭᐅᓂᐊᖅᑐᒧᑦ."

ᒪᕐᕈᐃᓕᖓᔪᖅ ᐃᑲᔪᖅᑕᐅᓂᐊᖅᐳᑦ ᐃᒪᓐᓇ:

ᑲᑎᓪᓗᒋᑦ $819,000 ᑮᓇᐅᔭᑦ ᐊᑐᖅᑕᐅᓂᐊᖅᐳᑦ ᓄᑖᖑᖅᑎᑕᐅᒍᑕᐅᓗᑎᒃ, ᐋᖅᑭᒃᓱᕈᑕᐅᓗᑎᒃ ᐃᓇᖏᖅᓯᒍᑕᐅᓗᑎᒡᓗ ᑰᒃᑯᑦ ᐃᑳᕈᑎᓂ ᐃᖃᓗᒃᑑᑦᑎᐊᒥ, ᐅᖅᓱᖅᑑᒥ, ᐊᕐᕕᐊᓂ, ᓴᓪᓕᕐᒥ ᐊᒻᒪ ᖃᐅᓱᐃᑦᑐᒥ. ᑰᒃᑯᑦ ᐃᑳᕈᑦ ᐸᖕᓂᖅᑑᒥ ᐲᔭᖅᑕᐅᓂᐊᖅᐳᖅ ᐃᖃᓗᒃᑑᑦᓯᐊᒧᐊᖅᑕᐅᓗᓂᓗ. ᐃᖅᑲᓇᐃᔭᖅᑎᑕᐅᓚᐅᐱᓪᓚᖕᓂᐊᖅᐳᑦ 46 ᐃᓄᐃᑦ, ᐃᖅᑲᓇᐃᔭᐃᓐᓇᕐᓂᐊᖏᒃᑲᓗᐊᕐᓗᑎᒃ.

CanNor ᑮᓇᐅᔭᖃᖅᑎᑎᓂᐊᖅᐳᑦ $50,000-ᓂᒃ ᐊᕐᕌᒍᓄᑦ ᒪᕐᕉᖕᓄᑦ ᐃᑲᔪᕈᑎᖃᕐᓂᐊᖅᖢᑎᒃ ᓴᓇᑎᓪᓗᒋᑦ ᐊᖅᑯᓯᐅᕐᓂᕐᒧᑦ ᓄᓇᓕᖕᓂ 15-ᓂᒃ 13-ᓂ ᓄᓇᓕᖕᓂ. ᑕᒪᒃᑯᐊ ᑮᓇᐅᔭᑦ ᐊᑐᖅᑕᐅᓗᐊᕐᓂᐊᖅᖢᑎᒃ ᐃᖅᑲᓇᐃᔭᖅᑎᓄᑦ ᑮᓇᐅᔭᓕᐅᕈᑕᐅᓗᑎᒃ, ᐃᖅᑲᓇᐃᔭᑎᑕᐅᓂᐊᖅᖢᑎᒡᓗ 400-ᓂᒃ ᐱᓇᓱᐊᕈᓯᓂ. ᑕᒡᕙᓂᑦᓴᐃᓐᓇᖅ ᓄᓇᕗᑦ ᒐᕙᒪᒃᑯᖏᑦ ᐃᑲᔪᕈᑎᖃᕐᓂᐊᖅᐳᑦ $1-ᒥᓕᔭᓐᑖᓚᓂᒃ ᐊᖅᑯᓯᐅᕐᓂᕐᒧᑦ ᓄᓇᓕᖕᓂ ᐊᖅᑯᓯᐅᕐᓂᕐᒧᑦ ᓄᓇᓕᖕᓄᑦ ᐱᓕᕆᐊᕆᔭᐅᔪᑎᒍᑦ.

ᐃᓚᒋᔭᐅᓪᓗᓂ ᑲᓇᑕᒥ ᐱᕙᓪᓕᐊᔪᓕᕆᓂᕐᒧᑦ ᐸᕐᓇᒍᑎᓄᑦ, ᑖᒃᑯᐊ  CAFCAF $1-ᐱᓕᔭᓐᑖᓚᓂᒃ ᑲᓇᑕᒥ ᑮᓇᐅᔭᖅᑕᖃᖅᐳᖅ ᐱᕙᓪᓕᐊᒍᑎᒃᓴᓂᒃ ᑮᓇᐅᔭᓕᐅᕈᑎᒃᓴᓂᒃ ᐱᕙᓪᓕᐊᑎᑕᐅᖁᓪᓗᒋᑦ ᓄᓇᓕᖕᓂᒥᐅᑦ ᓯᓚᕐᔪᐊᒥ ᑮᓇᐅᔭᑭᒃᓴᕐᓂᕐᒧᑦ ᐊᑲᐅᖏᓕᐅᕈᑎᖃᖅᑐᓄᑦ. ᑮᓇᐅᔭᖅᑕᖃᕐᓂᐊᖅᐳᑦ $32.8-ᒥᓕᔭᓐᑖᓚᓂᒃ ᓄᓇᕗᒧᑦ ᓄᓇᑦᓯᐊᒧᑦ ᔪᑳᓐᒧᓪᓗ ᐊᕐᕌᒍᓂ 2009-ᒥᑦ ᐊᒻᒪ 2011-ᒧᑦ.

ᑖᒃᑯᐊ  CAFCAF ᐱᕙᓪᓕᐊᑎᑎᒍᑎᖃᖅᐳᑦ ᐱᓕᕆᐊᑎᒍᑦ ᐱᓕᕆᒋᐊᖅᑎᑎᓯᒪᓪᓗᑎᒃ  CanNor-ᑯᑦ ᓄᓇᕗᒥ, ᓄᓇᑦᓯᐊᒥ ᔪᑳᓐᒥᓗ. ᐱᓕᕆᐊᒃᓴᖃᖅᖢᑎᒡᓗ ᑲᒪᒋᔭᖃᕐᓂᕐᒥᒃ ᐱᓕᕆᐊᖃᕐᓂᕐᒥᒡᓗ ᑲᓇᑕᐅᑉ ᒐᕙᒪᒃᑯᖏᑦᑕ ᐱᕙᓪᓕᐊᑎᑎᓂᕐᒧᑦ ᑮᓇᐅᔭᓕᐅᕈᑎᒃᓴᓂᒃ ᑕᒪᒃᑯᓄᖓ ᐅᑭᐅᖅᑕᖅᑐᒥᐅᓄᑦ, ᐊᒻᒪᓗ ᐊᑐᐊᒐᓕᕆᔨᐅᓪᓗᑎᒃ ᖃᐅᔨᓴᖅᑎᐅᓪᓗᑎᒃ ᓴᓇᔭᒃᓴᖃᖅᑎᑎᓂᐊᖅᖢᑎᒡᓗ.
Promoting social and economic development in the North is one of the four pillars of the Government of Canada's integrated Northern Strategy.



ᖃᓄᐃᓕᐅᕐᓂᐊᕐᓂᖏᑦ


ᑮᓇᐅᔭᓂᒃ ᐊᑐᕐᓂᖅ ᓄᓇᕗᒥ ᓄᓇᓕᖕᓂ ᑰᒃᑯᑦ ᐃᑳᕈᑎᓕᐅᕐᓂᕐᒧᑦ ᐊᖅᑯᓯᐅᕐᓂᕐᒧᓪᓗ

ᑲᓇᑕᐅᑉ ᒐᕙᒪᒃᑯᖏᑦᑕ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᓂᕐᒧᑦ ᑎᒥᖓᑦ (CanNor), ᑭᒡᒐᖅᑐᐃᓪᓗᑎᒃ ᑲᓇᑕᐅᑉ ᒐᕙᒪᒃᑯᖏᓐᓂᒃ, ᑮᓇᐅᔭᖃᖅᑎᑎᓂᐊᖅᐳᑦ ᓄᓇᕗᑦ ᒐᕙᒪᒃᑯᖏᓐᓂᒃ $1.3-ᒥᓕᔭᓐᑖᓚᐃᑦ ᐅᖓᑖᓄᑦ ᓴᓇᓂᐊᕐᓗᑎᒃ ᐊᖏᓕᒋᐊᖅᑎᑎᓂᐊᕐᓗᑎᒡᓗ ᓄᓇᓕᖕᓂᑦ ᐊᖅᑯᑎᓂᒃ ᑰᒃᑯᑦ ᐃᑳᕈᑎᓄᓪᓗ ᓄᑖᖑᖅᑎᑎᓂᕐᒧᑦ ᐃᓇᖏᖅᓯᓂᕐᒧᓪᓗ.

ᑕᒪᒃᑯᐊ ᓴᓇᔭᐅᓂᐊᖅᑐᑦ ᒪᕐᕈᑦ ᐃᖅᑲᓇᐃᔭᖅᑎᑎᓚᐅᐱᓪᓚᖕᓂᐊᖅᐳᑦ 100-ᓂᒃ ᓄᓇᕗᒥᐅᓂᒃ. ᑕᐃᒪᓐᓇ ᐱᕙᓪᓕᐊᑎᑕᐅᓗᑎᒃ ᐊᖅᑯᑎᑦ ᓄᓇᒧᑦ ᐃᒪᕐᓄᓪᓗ ᐊᑐᖅᑕᐅᔪᓐᓇᕐᓂᐊᕐᒪᑕ ᓄᓇᓕᖕᓂ ᐱᓕᕆᕕᖃᖅᑐᓄᑦ ᐳᓚᕋᖅᑐᓕᕆᓂᕐᒧᑦ ᑮᓇᐅᔭᓕᐅᕈᑎᖃᕐᓗᑎᒃ ᐊᖑᓇᓱᐊᕐᓂᕐᒧᑦ ᐃᖃᓗᒃᓯᐅᕐᓂᕐᒧᓪᓗ. ᐊᒻᒪᓗ ᐃᑲᔪᕈᑕᐅᔪᓐᓇᕐᓂᐊᕆᓪᓗᑎᒃ ᐅᔭᕋᖕᓂᐊᖅᑐᓕᕆᔨᓄᑦ ᓄᓇᓕᖕᓂᓗ ᐃᓗᕕᕐᓄᑦ.

ᓄᓇᕗᑦ ᒐᕙᒪᒃᑯᖏᑦᑕ ᐱᕙᓪᓕᐊᔪᓕᕆᔨᒃᑯᖏᑦ ᐃᖏᕐᕋᖃᑦᑕᖅᑐᓕᕆᔨᒃᑯᖏᓪᓗ ᑲᒪᒋᔭᖃᕐᓂᐊᖅᖢᑎᒃ ᐱᓕᕆᐊᕆᔭᐅᓂᐊᖅᑐᓂᒃ ᐊᒻᒪᓗ ᑮᓇᐅᔭᓂᒃ ᐊᑐᕐᓂᐊᖅᖢᑎᒃ ᒫᓐᓇ ᑮᓇᐅᔭᖁᑎᒋᔭᐅᔪᓂᒃ ᓄᓇᓕᖕᓂᑦ ᐊᖅᑯᓯᐅᕈᑎᓂᒃ.

ᓴᓇᒋᐊᕐᓂᐊᖅᐳᑦ ᐊᐅᔭᖅ 2010-ᒥ.

1.  ᓄᓇᓕᖕᓂ ᑰᒃᑯᑦ ᐃᑳᕈᑎᓄᑦ ᓴᓇᔭᐅᓂᐊᖅᑐᑦ

CanNor -ᑯᓐᓂᑦ ᑮᓇᐅᔭᖅᑖᕆᔭᐅᓂᐊᖅᑐᑦ: $819, 000
ᑲᑎᓪᓗᒋᑦ ᓴᓇᔭᐅᓂᖏᓐᓄᑦ ᐊᑭᖃᖅᑎᒋᓂᐊᖅᑐᑦ: $819, 000

ᑖᒃᑯᐊ ᑮᓇᐅᔭᑦ ᐊᑐᖅᑕᐅᓂᐊᖅᐳᑦ ᓄᑖᖑᖅᑎᑎᒍᑕᐅᓗᑎᒃ, ᐋᖅᑭᒃᓱᖅᑕᐅᒍᑕᐅᓗᑎᒃ ᐃᓇᖏᖅᑕᐅᓗᑎᒡᓗ ᓄᓇᓕᖕᓂ ᑰᒃᑯᑦ ᐃᑳᕈᑎᑦ ᐅᑯᓇᓂ ᓄᓇᓕᖕᓂ:

ᕿᑎᕐᒥᐅᓂ

• ᐃᖃᓗᒃᑑᑦᑎᐊᒥ: ᐃᓇᖏᖅᑕᐅᓗᓂ Military Bailey Bridge ᐅᕙᔪᕐᒧᖓᐅᔪᖅ 45.2-ᒦᑕᓂᒃ ᐊᖏᑎᒋᔪᖅ ᐸᖕᓂᖅᑑᒥᑦ. ᐃᑳᕈᑎᕕᓂᖓᑦ ᐊᑐᖅᑕᐅᖏᑦᑐᖅ ᐲᔭᖅᑕᐅᓗᓂ ᐊᐅᓪᓚᖅᑎᑕᐅᓂᐊᖅᐳᑦ ᐃᖃᓗᒃᑑᑦᓯᐊᒧᑦ 2010 ᐅᒥᐊᕐᔪᐊᒃᑯᑦ.
• ᐅᖅᓱᖅᑑᖅ: ᐃᑳᕈᑎᓕᐅᕐᓂᖏᑦ ᓄᑖᒥᒃ ᐊᖏᑎᒋᔪᒥᒃ 26-ᒦᑕ Swan Lake ᐃᑳᕈᑦ.

ᑭᕙᓪᓕᕐᒥ

• ᐊᕐᕕᐊᑦ: ᐃᓇᖏᖅᑕᐅᓗᓂ ᓄᑖᖑᖅᑎᑕᐅᓗᓂᓗ 18.27 ᒦᑕ ᑰᒃᑯᑦ ᐃᑳᕈᑦ.
• ᓴᓪᓕᖅ: ᓄᑖᖑᖅᑎᑕᐅᓗᓂ ᒪᕐᕉᒃ ᑰᒃᑯᑦ ᐃᑳᕈᑎᑦ. ᑕᒪᕐᒥᒃ ᐃᓇᖏᖅᑕᐅᓗᑎᒡᓗ ᐱᓱᕕᖓ ᐊᒻᒪᓗ ᓇᔪᒥᒍᑎᖏᑦ ᐊᕙᓗᒥᐅᑕᖏᑦ.

ᕿᑭᖅᑑᓗᖕᒥ

• ᖃᐅᓱᐃᑦᑐᖅ: ᓄᑖᖑᖅᑎᑕᐅᓗᓂ ᐊᖏᑎᒋᔪᖅ 10.8-ᒦᑕ ᐃᒃᓯᕐᕕᖕᒧᖓᐅᔪᖅ ᐃᑳᕈᑦ. ᐱᓱᕕᖓ ᐲᖅᑕᐅᓗᓂ ᓄᑖᒥᒃ ᐃᓪᓕᖅᑐᕐᕕᐅᓗᓂ.

ᓴᓇᔭᐅᓂᐊᖅᑐᖅ ᐃᖅᑲᓇᐃᔭᖅᑎᑎᓚᐅᐱᓪᓚᖕᓂᐊᖅᐳᖅ 46-ᓂᒃ ᐃᓄᖕᓂᒃ ᓄᓇᕗᒥᐅᑕᓂᒃ.

ᓄᑖᑦ ᓄᑖᖑᖅᑎᑕᐅᓯᒪᔪᓪᓗ ᐃᑳᕈᑎᑦ ᐋᖅᑭᒃᓱᖅᑕᐅᓯᒪᓂᖅᓴᐅᓂᐊᖅᐳᑦ ᐋᖅᑭᒃᓱᐃᔨᓄᑦ ᐊᕙᑎᒥᐅᑕᓄᓪᓗ ᒪᓕᖕᓂᖅᓴᐅᓗᑎᒃ ᐅᓗᕆᐊᓇᖏᓐᓂᖅᓴᐅᓕᕐᓗᑎᒡᓗ ᐃᓄᖕᓄᑦ ᐊᑐᖅᐸᒃᑐᓄᑦ ᑕᒪᒃᑯᓂᖓ.

2.  ᓄᓇᓕᖕᓂ ᐊᖅᑯᑎᑦ

CanNor-ᑯᑦ ᑮᓇᐅᔭᖃᖅᑎᑎᓂᐊᖅᑐᑦ:  $500,000
ᓄᓇᕗᑦ ᒐᕙᒪᒃᑯᖏᑦ ᑮᓇᐅᔭᖃᖅᑎᑎᓂᐊᖅᑐᑦ: $1,000,000
ᑲᑎᓪᓗᒋᑦ ᓴᓇᔭᐅᓂᖓ ᐊᑭᖃᖅᑎᒋᓂᐊᖅᑐᖅ: $1.5 million

ᓄᓇᕗᑦ ᒐᕙᒪᒃᑯᖏᑦ ᑮᓇᐅᔭᖃᖅᑎᑎᓂᐊᖅᐳᑦ  $500,000 ᐊᕐᕌᒍᑕᒫᑦ ᓄᓇᕗᓯ ᐊᖅᑯᑎᓕᐅᕈᑎᒃᓴᓂᒃ ᓄᓇᓕᖕᓂᑦ, ᐊᖅᑯᓯᐅᖁᓪᓗᒋᑦ ᓄᓇᕗᒥᐅᓂ. CanNor-ᑯᑦ ᑮᓇᐅᔭᖃᖅᑎᑎᓂᐊᖅᖢᑎᒃ $500,000 ᐊᕐᕌᒍᓄᑦ ᒪᕐᕉᖕᓄᑦ, 15-ᓂᒃ ᐊᖅᑯᓯᐅᖅᑐᖃᖅᑎᓪᓗᒍ ᓄᓇᓕᖕᓂ 13-ᓂ.

ᐅᑯᐊ ᓄᓇᓖ ᐊᖅᑯᓯᐅᕐᕕᐅᓂᐊᖅᐳᑦ:

ᕿᑎᕐᒥᐅᓂ
ᐃᖃᓗᒃᑑᑦᑎᐊᖅ: ᐊᖅᑯᑦ  Greiner Lake-ᒧᑦ
ᐅᖅᓱᖅᑑᖅ: Swan Lake River ᑰᒃᑯᑦ ᐃᑳᕕᖕᒧᑦ
ᖁᕐᓗᖅᑑᖅ:  Bloody Falls ᐱᓱᕕᖕᒧᑦ
ᑕᓗᕐᔪᐊᒃ: Red Fish Lake ᐊᒻᒪMiddle Lake

ᑭᕙᓪᓕᕐᒥ
ᖃᒪᓂᑦᑐᐊᖅ: ᑎᑭᓪᓗᒍ Prince River-ᒧᑦ
ᐃᒡᓗᓕᒑᕐᔪᒃ:  Josephine Lake ᐊᖅᑯᑦ
ᓴᓪᓕᖅ:  Duke of York Bay -ᒧᑦ
ᑲᖏᖅᖠᓂᖅ:  Diane River ᐊᒻᒪ Meliadine River
ᓇᐅᔮᑦ:  North Pole River Road
ᑎᑭᕋᕐᔪᐊᖅ:  White Rock Lake

ᕿᑭᖅᑖᓗᖕᒥ
ᓴᓂᕋᔭᒃ:  Fisherman’s Lake Road
ᕿᑭᖅᑕᕐᔪᐊᖅ: ᕿᑭᖅᑕᕐᔪᐊᕈᓗᖕᒧᑦ Road
ᖃᐅᓱᐃᑦᑐᖅ:  Prospect Point Road

ᓄᓇᓕᖕᓂ ᕼᐊᒻᓚᒃᑯᑦ ᐊᓪᓚᕕᖏᑦ ᐊᐅᓚᑦᓯᓂᐊᖅᐳᑦ ᐃᖅᑲᓇᐃᔭᖅᑎᑖᕐᓂᕐᒧᑦ ᓴᓇᔭᐅᓂᐊᖅᑐᓄᑦ, ᐃᖅᑲᓇᐃᔭᖅᑎᑎᓂᐊᖅᖢᑎᒡᓗ 60-ᓂᒃ ᐃᖅᑲᓇᐃᔭᓚᐅᐱᓪᓚᖃᑦᑕᕐᓂᐊᖅᑐᓂᒃ 400-ᓂ ᐱᓇᓱᐊᖁᓯᓂ ᐃᖅᑲᓇᐃᔭᕐᓂᐊᖅᖢᑎᒃ.



ᐊᑐᖅᑕᐅᔪᓐᓇᕐᓂᐊᖅᐳᑦ ᓄᓇᒧᖓᐅᒍᑕᐅᓗᑎᒃ, ᐊᖅᑯᑎᑦ ᐊᑐᖅᑕᐅᔪᓐᓇᕐᓂᐊᕆᓪᓗᑎᒃ ᖃᒡᓕᕚᓪᓕᕈᑕᐅᓗᑎᒃ ᐃᒪᕐᒧᑦ ᐊᒻᒪᓗ ᑕᒪᒃᑯᓄᖓ ᖃᖓᑕᔫᓄᑦ ᐃᒪᒃᑰᖃᑦᑕᖅᑐᓄᑦ.

ᐄᐳᕈ 1, 2010, ᓄᓇᕗᑦ ᐱᕙᓪᓕᐊᔪᓕᕆᔨᒃᑯᖏᑦ ᐃᖏᕐᕋᖃᑦᑕᖅᑐᓕᕆᔨᒃᑯᖏᓪᓗ ᑐᒃᓯᕋᕐᕕᐅᔪᓐᓇᕐᓂᐊᖅᐳᑦ ᐊᖅᑯᓯᐅᖅᑕᐅᒍᒪᔪᓂᑦ ᓄᓇᓕᖕᓂᑦ 2010-2011-ᒥᓗ.

ᓄᓇᓕᖕᓂ ᐋᖅᑭᐅᒪᑎᑕᐅᔪᑦ ᑮᓇᐅᔭᖁᑎᒋᔭᐅᔪᑦ
ᓄᓇᓕᖕᓂ ᐋᖅᑭᐅᒪᑎᑕᐅᔪᑦ ᑮᓇᐅᔭᑦ (CAF) ᑮᓇᐅᔭᑦ ᐊᕐᕌᒍᓄᑦ ᒪᕐᕉᖕᓄᑦ ᐊᑐᖅᑕᐅᓂᐊᖅᑐᑦ ᑲᓇᑕᒥ ᐋᖅᑭᒃᑕᐅᓯᒪᓪᓗᑎᒃ ᑮᓇᐅᔭᓕᕆᒍᑕᐅᓚᐅᖅᑐᓂ 2009-ᒥ, ᑲᓇᑕᒥ ᐱᕙᓪᓕᐊᔪᓕᕆᓂᕐᒧᑦ ᐸᕐᓇᐅᑕᐅᓯᒪᔪᓂ. CAF ᑮᓇᐅᔭᓕᐅᕈᑎᒋᔭᐅᕗᑦ ᐱᕙᓪᓕᐊᒍᑎᒋᔭᐅᕗᑦ ᐃᖅᑲᓴᐃᔭᖅᑎᑎᒍᑕᐅᓪᓗᑎᒃ ᓄᓇᓕᖕᓂ ᓯᓚᕐᔪᐊᒥ ᑮᓇᐅᔭᑭᒃᓴᕐᓇᐅᓕᖅᑎᓪᓗᒍ, ᐱᕙᓪᓕᐊᒍᑎᒃᓴᐅᓪᓗᑎᒡᓗ ᓄᓇᓕᖕᓂᒃ. ᐊᑯᓂᐅᓂᖅᓴᖅ ᐱᕙᓪᓕᐊᒍᑎᒃᓴᐃᑦ ᑕᒪᒃᑯᐊᓗ ᓄᓇᒧᑦ ᐊᒃᑐᐊᖓᔪᑦ ᓴᓇᔭᐅᖃᑕᐅᔪᓐᓇᖅᐳᑦ.


ᓄᓇᓕᖕᓂ ᐋᖅᑭᐅᒪᑎᑕᐅᔪᑦ ᑮᓇᐅᔭᑦ (CAF) ᐱᓕᕆᐊᕆᔭᐅᕗᑦ CanNor -ᑯᓐᓄᑦ ᓄᓇᕗᒥ ᓄᓇᑦᓯᐊᒥ ᔪᑳᓐᒥᓗ. CanNor ᑮᓇᐅᔭᖅᑖᖅᓯᒪᕗᑦ  $32.8 -ᒥᓕᔭᓐᑖᓚᓂᒃ ᐊᕐᕌᒍᓂ ᒪᕐᕉᖕᓂ ᐅᑭᐅᖅᑕᖅᑐᒥ.