March 03, 2010

ᐊᑐᕚ - ᐅᓪᓗᒥ, ᒐᕙᓄ ᔭᓄᕈ ᑲᓇᑕᒥ ᒥᑭᐊ ᔮᓐ, ᐅᖃᓪᓚᒃᑎᑕᐅᓚᐅᖅᐳᖅ ᑲᓇᑕᒥ ᒐᕙᒪᒃᑯᑦ ᖃᓄᐃᓕᐅᕈᑎᒋᓂᐊᖅᑕᖏᓐᓂᒃ ᐅᖃᐅᓯᖓᐅᑎᓂᒃ ᐱᖓᔪᖓᓂ ᑲᓇᑕᒥ ᒐᕙᒪᒃᑯᑦ 40-ᒋᔭᖓᓂ ᑲᑎᒪᕐᔪᐊᕐᓂᐊᓕᖅᑎᓪᓗᒋᑦ.

ᑲᓇᑕᒥᐅᑦ ᑮᓇᐅᔭᑭᒃᓴᓚᐅᕐᓂᖏᓐᓄᑦ ᓴᓐᖏᔪᒻᒪᕆᐅᓗᓂ ᒪᑭᑉᐸᓪᓕᐊᒍᑎᖃᕐᓂᐊᖅᐳᑦ ᓇᓂᑐᐃᓐᓇᖅ ᓯᓚᕐᔪᐊᒥ ᐊᑐᖅᑕᐅᓚᐅᖅᓯᒪᖏᑦᑐᓂᒃ ᐊᑐᕐᓗᑎᒃ. ᓯᕗᓕᖅᑎᒋᔭᐅᓪᓗᓂ ᓯᑎᕙᓐ ᕼᐋᐳ, ᐃᖅᑲᓇᐃᔭᒐᒃᓴᐃᑦ ᐱᕈᖅᐸᓪᓕᐊᒍᑎᒃᓴᐃᓪᓗ ᓯᕗᓪᓕᖅᐸᐅᑎᑕᐅᖏᓐᓇᕐᓂᐊᖅᐳᑦ ᒐᕙᒪᒃᑯᓐᓄᑦ. ᒐᕙᒪᒃᑯᑦ ᐅᑯᓂᖓ ᐱᓕᕆᐊᖃᓪᓗᐊᑕᕐᓂᐊᖅᐳᑦ:

• ᐱᐊᓂᒍᑎᖃᕐᓗᑎᒃ ᑲᓇᑕᒥ ᒪᑭᑉᐸᓪᓕᐊᒍᑕᐅᔪᓂᒃ ᐸᕐᓇᐅᑕᐅᓯᒪᔪᓂᒃ ᓴᓇᓗᑎᒃ ᓴᐳᔾᔭᐅᖁᓪᓗᒋᑦ ᐃᖅᑲᓇᐃᔭᖅᑐᓄᑦ ᑮᓇᐅᔭᓕᐅᕈᑕᐅᔪᑦ, ᐃᖅᑲᓇᐃᔭᖅᑎᑎᕙᓪᓕᐊᒍᒪᓪᓗᑎᒃ, ᓂᐅᕐᕈᑎᒃᓴᓪᓗ ᐱᕙᓪᓕᐊᑎᑕᐅᖁᓪᓗᒋᑦ, ᐃᑲᔪᖅᑕᐅᖁᓪᓗᒋᓪᓗ ᐃᖅᑲᓇᐃᔭᖅᐸᒃᑐᑦ ᓄᓇᓖᓪᓗ ᒪᑭᑉᐸᓪᓕᐊᒃᑲᓐᓂᖁᓪᓗᒋᑦ.
• ᑮᓇᐅᔭᓂᒃ ᒪᑭᑉᐸᓪᓕᐊᒍᑎᖃᕐᓂᖅ ᐊᑭᓕᒃᓴᐃᔭᕐᓂᖅ ᑕᒪᒃᑯᐊ ᒪᑭᑉᐸᓪᓕᐊᒍᑕᐅᔪᑦ ᐱᐊᓂᒃᐸᓪᓕᐊᓗᒋᑦ ᑲᓇᑕᐅᑉ ᒐᕙᒪᒃᑯᖏᓪᓗ ᑮᓇᐅᔭᓂᒃ ᐊᑐᖏᓐᓂᖅᓴᐅᕙᓪᓕᐊᓂᐊᕐᓗᑎᒃ ᓴᐳᔾᔨᓗᑎᒡᓗ ᐱᕈᖅᐸᓪᓕᐊᒍᑕᐅᔪᓂᒃ ᐃᑲᔪᕈᑕᐅᓂᐊᖅᑐᓂᒃ ᑲᓇᑕᒥᐅᓄᑦ, ᑕᒪᒃᑯᓄᖓ ᐃᑦᑐᖅᓯᐅᑎᑖᖅᐸᒃᑐᓄᑦ, ᐋᓐᓂᐊᖅᑐᓕᕆᓂᕐᒧᓪᓗ ᐃᓕᓐᓂᐊᕐᓂᕐᒧᓪᓗ ᐊᑐᖅᑕᐅᖏᓐᓇᕐᓂᐊᕐᓗᑎᒃ ᑮᓇᐅᔭᑦ.
• ᐱᓕᕆᐊᖃᐃᓐᓇᕐᓂᖅ ᐃᖅᑲᓇᐃᔭᒐᒃᓴᖅᑖᖅᑎᑎᓂᕐᒧᑦ ᐃᖅᑲᓇᐃᔭᒐᒃᓴᖃᖅᑐᓪᓗ ᓴᐳᔾᔭᐅᓗᑎᒃ, ᐃᓕᑕᖅᓯᓯᒪᓗᑎᒃ ᖃᐅᔨᒪᐃᓐᓇᕐᓗᑎᒃ ᑲᓇᑕᒥᐅᑦ ᓱᓕ ᐃᖅᑲᓇᐃᔭᒐᒃᓴᖅᓯᐅᕐᒪᑕ, ᐃᑲᔪᕐᓗᑎᒡᓗ ᒐᕙᒪᒃᑯᑦ ᒪᒃᑯᒃᑐᓂᒃ ᑲᓇᑕᒥᐅᓂᒃ ᐃᖅᑲᓇᐃᔭᒐᒃᓴᖅᓯᐅᕐᓂᖏᓐᓄᑦ ᐅᓪᓗᒥ ᓯᕗᓪᓕᖅᐹᒥ ᑕᐃᒪᓐᓇᐃᓕᐅᖅᑐᓂᒃ.
• ᓴᓇᕙᓪᓕᐊᓂᖅ ᐃᖅᑲᓇᐃᔭᒐᒃᓴᓂᒃ ᐱᓕᕆᕕᖕᓂᒡᓗ ᓯᕗᓂᒃᓴᐅᓂᐊᖅᑐᒥ ᐃᖅᑲᓇᐃᔭᖅᑎᑎᕙᓪᓕᐊᓗᑎᒃ ᐊᔪᖏᓴᖅᓯᒪᔪᓂᒃ ᐃᓕᓐᓂᐊᖅᓯᒪᔪᓂᒃ, ᑖᒃᓰᔭᐃᔭᕈᑎᖃᓗᐊᖅᑕᐃᓕᒪᑎᑎᓗᓂᓗ, ᒪᑐᐃᖅᓯᕙᓪᓕᐊᓗᑎᒃ ᑲᓇᑕᒥᖔᖅᑐᓂᒃ ᓂᐅᕐᕈᑎᒃᓴᓂᒃ ᐱᔨᑦᓯᕋᐅᑎᓂᒡᓗ, ᐊᒻᒪᓗ ᐱᓕᕆᕕᒡᔪᐊᖃᖅᑐᑦ ᑲᔪᓯᑎᑕᐅᑦᓯᐊᖁᓪᓗᒋᑦ ᐱᕙᓪᓕᐊᑎᑎᓯᒪᓂᖏᓐᓄᑦ ᑲᓇᑕᒥᐅᓂᒃ.

ᐊᒻᒪ, ᒐᕙᓄ ᔭᓄᕈ ᐅᖃᐅᓯᕆᖅᑲᐅᔭᖏᑦ ᐅᖃᐅᓯᖓᐅᑎᑦ ᑲᑎᒪᕐᔪᐊᕐᓂᐊᖅᑎᓪᓗᒋᑦ ᐱᓕᕆᐊᖃᖅᐳᑦ ᑲᓇᑕᐅᑉ ᒐᕙᒪᒃᑯᖏᑦ ᐱᓕᕆᐊᒃᓴᖃᒃᑲᓐᓂᕈᒪᓂᖏᓐᓄᑦ, ᑲᓇᑕᒥᐅᑦ ᐃᑉᓕᕆᔭᖏᑦ ᐱᒍᒪᔭᖏᓪᓗ ᒪᓕᒡᓗᒋᑦ:

• ᑲᓇᑕ ᐃᓚᒌᓄᑦ ᓄᓇᑦᓯᐊᕙᖑᖅᑎᑕᐅᕙᓪᓕᐊᓂᖓ ᓴᓐᖏᓕᖅᑎᕆᓗᑎᒃ ᓯᓚᕐᔪᐊᒥ ᓱᓗᓯᖃᖅᑐᓄᑦ ᐃᑲᔪᕈᑎᒃᓴᓂᒃ, ᓴᐳᔾᔨᓂᖅ ᓂᐅᕕᖃᑦᑕᖅᑐᓂᒃ, ᒪᓕᒐᐃᑦ ᓴᐳᔾᔭᐅᑦᓯᐊᖁᓪᓗᒋᑦ ᑕᒪᒃᑯᐊ ᐱᕋᔭᒃᐸᒃᑐᑦ ᐊᓄᓪᓚᒃᓯᐊᕆᔭᐅᕙᒡᓗᑎᒃ ᐊᑭᓖᑎᑕᐅᖃᑦᑕᖁᓪᓗᒋᓪᓗ.
• ᐃᑲᔪᖅᑐᐃᓂᖅ ᑲᓇᑕᒥᒃ ᓴᓇᖃᑕᐅᓚᐅᖅᓯᒪᔪᓂᒃ ᓴᓐᖏᓕᖅᑎᖅᑕᐅᓗᓂ ᑲᓇᑕᐅᑉ ᓄᖅᑲᖅᓯᒪᓕᖅᑐᓂᒃ ᐃᖅᑲᓇᐃᔮᒥᖕᓂᒃ ᑮᓇᐅᔭᓕᐊᕆᔭᐅᔪᑦ ᐊᒻᒪᓗ ᐃᑲᔪᖅᑐᐃᓂᖅ ᒪᓕᒐᕐᓂᒃ ᐃᓐᓇᑐᖃᐃᑦ ᐃᓕᑕᕆᔭᐅᓯᒪᒋᐊᖃᕐᓂᖏᓐᓄᑦ ᐅᓪᓗᒥᒃ ᓴᖅᑭᑎᑎᓗᑎᒃ, ᐃᑲᔪᖅᑐᐃᓂᖅ ᐅᓇᑕᖅᑐᒃᓴᓂᒃ ᑲᓇᑕᒥ ᐅᓇᑕᖅᑐᒃᓴᐅᖃᑕᐅᓯᒪᔪᓂᒡᓗ, ᐃᓕᑕᕆᔭᐅᖏᓐᓇᐅᔭᕐᓗᒋᓪᓗ ᓄᓇᖃᖅᑳᖅᓯᒪᔪᑦ ᐃᑲᔪᕈᑎᒋᓯᒪᔭᖏᑦ ᑲᓇᑕᒥ.
• ᓴᓐᖏᓕᖅᑎᑕᐅᓂᖓ ᑲᓇᑕᒥᐅᑦ ᓯᓚᕐᔪᐊᖅ ᐊᓯᔾᔨᖅᐸᓪᓕᐊᓕᕋᓗᐊᖅᑎᓪᓗᒍ ᐃᓱᒪᖅᓱᒃᑲᓐᓂᕐᓂᕐᒧᓪᓗ ᐱᓕᕆᐊᖃᕐᓗᑎᒃ ᐱᔪᓐᓇᐅᑕᐅᓇᔭᖅᑐᓂᒃ ᑭᒃᑯᑐᐃᓐᓇᕐᓄᑦ, ᓴᓐᖏᓕᖅᑎᕆᓂᖅ ᐅᐃᕖᑦ ᐃᓕᑕᕆᔭᐅᓯᒪᒋᐊᖃᕐᓂᖏᓐᓄᑦ, ᐊᑲᐅᓯᕚᓪᓕᖅᑎᑎᓂᖅ ᑲᓇᑕᐅᑉ ᐊᓯᐊᓃᖔᖅᓯᒪᔪᓂᒃ, ᐃᑲᔪᕐᓂᖅ ᐅᑭᐅᖅᑕᖅᑐᒥᒃ ᖃᓄᐃᓕᐅᕐᕕᐅᔪᓐᓇᕐᓂᖓᓄᑦ ᓴᐳᔾᔨᓂᖅ ᐸᐸᑦᓯᓂᕐᓗ ᐊᕙᑎᒥᐅᑕᑐᖃᑦᑎᓐᓂᒃ.

ᑲᓇᑕᐅᑉ ᒐᕙᒪᒃᑯᖏᑦ ᑲᔪᓯᒍᑎᖃᕐᓂᐊᖅᐳᓪᓗ ᓂᑯᕕᖓᒍᑎᖃᕐᓗᑎᒃ ᐱᑦᓯᐊᕈᑕᐅᔪᓂᒃ ᓯᓚᕐᔪᐊᒥ ᓯᓚᕐᔪᐊᒥ ᐸᐸᑕᐅᑦᓯᐊᕐᓗᑎᒃ ᒥᐊᓂᕆᔭᐅᑦᓯᐊᕐᓗᑎᒃ, ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖃᖅᑎᑕᐅᑦᓯᐊᕐᓗᑎᒃ, ᐊᓈᓇᐅᔪᑦ ᓱᕈᓯᓪᓗ ᐋᓐᓂᐊᖅᑐᓕᕆᔭᐅᑦᓯᐊᕐᓂᖏᑦ, ᓂᐅᕕᕐᕕᖃᖅᑐᑦ ᑮᓇᐅᔭᓕᐅᕈᑎᖃᖅᑐᑎᓪᓗ ᐱᖁᔭᖃᖅᑎᑕᐅᑦᓯᐊᖁᓪᓗᒋᑦ ᓯᓚᕐᔪᐊᒥᓗ ᓯᓚᐅᑉ ᐊᓯᔾᔨᖅᐸᓪᓕᐊᓂᕆᔭᖓ ᐱᔾᔪᑎᒋᓪᓗᒍ ᖃᓄᐃᓕᐅᕈᑎᖃᑦᓯᐊᕐᓗᑎᒃ. ᐊᕐᕌᒍᒥ ᐊᑐᖅᑐᒥ, ᑲᑎᒪᑎᑎᓚᐅᖅᐳᒍᑦ ᑮᓇᐅᔭᓕᕆᓂᕐᒧᑦ ᑮᓇᐅᔭᒃᑯᕕᓕᕆᔨᒃᑯᓪᓗ ᑲᑎᒪᔨᕐᔪᐊᖏᓐᓂᒃ G8 ᐊᒻᒪᓗ G20, ᑕᒪᒃᑯᐊ ᑲᑎᒪᒍᑕᐅᓚᐅᖅᑐᑦ ᑕᒪᒃᑯᓇᓂ ᐊᑐᖅᑕᐅᓂᐊᖅᖢᑎᒃ ᓯᓚᕐᔪᐊᒥ ᓯᕗᓕᖅᑎᐅᖃᑕᐅᓂᕐᒧᑦ ᐱᒍᒪᔭᐅᓚᐅᖅᑐᑦ ᐱᕙᓪᓕᐊᑎᑕᐅᖁᓪᓗᒋᑦ.


ᓂᕆᐅᒋᔭᖏᑦ ᑲᓇᑕᒥᐅᑦ ᐃᓚᒌᓪᓗ ᓂᕆᐅᒋᔭᖏᑦ, ᒪᑭᑉᐸᓪᓕᐊᑎᑎᓂᖅ ᒐᕙᒪᒃᑯᓐᓄᑦ ᐱᓕᕆᐊᕆᔭᐅᖏᓐᓇᐅᔭᕐᓂᐊᖅᐳᖅ ᓯᕗᓪᓕᖅᐸᐅᑎᑕᐅᖏᓐᓇᕐᓗᓂᓗ. ᑕᐃᒪᓐᓇ ᒐᕙᒪᒃᑯᑦ ᑮᓴᐅᔭᖁᑎᓂᒃ ᐊᑐᖅᑕᐅᓂᐊᖅᑐᓂᒃ ᐃᖅᑲᓇᐃᔭᖅᑎᑎᓂᕐᒧᑦ ᐱᕈᖅᐸᓪᓕᐊᓂᕐᒧᓪᓗ ᐱᔾᔪᑎᖃᕐᓗᑎᒃ ᑐᓴᖅᑎᑎᒍᑎᖃᕐᓂᐊᖅᐳᑦ ᑮᓇᐅᔭᓕᕆᓐᓇᐅᓕᖅᐸᑦ ᖃᐅᒃᐸᑦ.