ᑲᓐᓱᕕᑎᒃᑯᑦ ᒐᕙᒪᒃᑯᖏᑦ ᑮᓇᐅᔭᓂᒃ ᐊᑐᖅᑕᐅᓂᐊᖅᑐᓂᒃ ᐅᖃᐅᓯᖃᖅᑲᐅᕗᑦ ᐃᖅᑲᓇᐃᔭᖅᑎᑎᓂᕐᒧᑦ ᐱᕈᖅᐸᓪᓕᐊᓂᕐᒧᓪᓗ ᑲᓇᑕᒥ ᐱᔾᔪᑎᖃᕐᓂᐊᖅᑐᓂᒃ ᒪᑭᑉᐸᓪᓕᐊᒍᑎᒃᓴᖏᓐᓂᒃ. ᑮᓇᐅᔭᑦ ᐊᑐᖅᑕᐅᓂᐊᖅᑐᑦ ᐅᖃᐅᓯᕆᔭᐅᓚᐅᖅᑎᓪᓗᒋᑦ ᐊᑭᓕᒃᓴᐃᔭᕈᒪᓪᓗᑎᒃ ᐱᔾᔪᑎᖃᖅᐳᑦ.

"ᒐᕙᒪᕗᑦ ᐅᑭᐅᖅᑕᖅᑐᒥᐅᓂᒃ ᐃᖅᑲᓇᐃᔭᖅᑎᑎᒋᐊᕈᒪᕗᑦ ᐱᕈᖅᐸᓪᓕᐊᖁᓪᓗᒋᓪᓗ," ᐅᖃᓚᐅᖅᐳᖅ ᒥᓂᔅᑕ ᓕᐅᓇ ᐊᒡᓗᒃᑲᖅ, ᒥᓂᔅᑕ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᒻᒪ ᒥᓂᔅᑕ ᑲᒪᒋᔭᖃᖅᖢᓂ ᐅᑭᐅᒃᑕᖅᑐᒥ, ᓄᓇᕗᒥᐅᓄᑦ ᑭᒡᒐᖅᑐᖅᑎᐅᓪᓗᓂᓗ ᐊᑐᕚᒥ ᑲᑎᒪᔨᕐᔪᐊᓄᑦ. "ᐊᕐᕌᒍᒥ ᑐᖏᓕᐊᓃᓕᖅᐳᒍᑦ ᑮᓇᐅᔭᓕᐅᕈᑎᒃᓴᓂᒃ ᐸᕐᓇᒃᓯᒪᒍᑎᖃᖅᖢᑕ ᐃᖅᑲᓇᐃᔭᒐᒃᓴᓂᒃ ᓴᖅᑭᑎᑎᕙᓪᓕᐊᖏᓐᓇᕐᓂᐊᖅᐳᒍᑦ ᓯᕗᓂᒃᓴᐅᓂᐊᖅᑐᒧᑦ. ᒐᕙᒪᕗᑦ ᐅᑭᐅᖅᑕᖅᑐᒥᐅᓂᒃ ᐃᑲᔪᐃᓐᓇᕐᓂᐊᖅᐳᑦ ᐊᑐᖅᓯᒪᓕᖅᖢᑎᒡᓗ ᑮᓇᐅᔭᓂᒃ ᐅᑭᐅᖅᑕᖅᑐᒥ ᐱᕙᓪᓕᐊᒍᑎᒃᓴᖏᓐᓂᒃ."

ᓂᕿᓂᒃ ᑎᑭᓴᐃᖃᑦᑕᕐᓂᖅ ᓯᕗᓪᓕᖅᐸᐅᑎᑕᐅᖏᓐᓇᕐᓂᐊᖅᐳᖅ ᓄᑖᓂᒃ ᑮᓇᐅᔭᓂᒃ ᐊᑐᒃᑲᓐᓂᕐᓂᐊᕐᓗᑎᒃ $45-ᒥᓕᔭᓐᑖᓚᓂᒃ ᐊᕐᕌᒍᓄᑦ ᒪᕐᕉᖕᓄᑦ ᐊᒻᒪᓗ ᑲᑎᓪᓗᒋᑦ $60-ᒥᓕᔭᓐᑖᓚᓂᒃ ᐊᕐᕌᒍᓄᑦ ᑕᓪᓕᒪᓄᑦ ᐃᓄᓕᕆᔨᑐᖃᒃᑯᑦ ᑲᓇᑕᒥ ᓴᓇᕙᓪᓕᐊᓂᐊᕐᓗᑎᒃ ᑎᑎᕋᐅᔭᖅᑕᐅᓯᒪᓂᖓᓄᑦ ᓄᑖᖅ ᑲᓇᑕᒥ ᖁᑦᑎᒃᑐᒥ ᖃᐅᔨᓴᕐᕕᐅᓂᐊᖅᑐᒥᒃ.

ᑮᓇᐅᔭᑦ ᐊᑐᖅᑕᐅᓂᐊᖅᑐᑦ 2010-ᒥ ᐊᑐᖅᑕᐅᓂᐊᖅᐳᑦ ᑭᒡᓕᖃᖅᑐᓄᑦ ᓄᑖᓄᑦ, ᐃᖅᑲᓇᐃᔭᒐᒃᓴᖅᑖᖅᑎᑎᓇᓱᐊᕐᓂᕐᒧᑦ ᐱᕈᖅᐸᓪᓕᐊᓂᕐᒧᓪᓗ ᓯᕗᓂᒃᓴᐅᓂᐊᖅᑐᒧᑦ, ᐊᑐᕐᓗᑎᒃ ᓄᑖᓂᒃ ᐃᓱᒪᓕᐅᕈᑎᓂᒃ, ᑲᓇᑕ ᐱᓕᕆᕕᐅᒋᐊᕈᓐᓇᖁᓪᓗᒍ ᐱᔅᓂᔅᖃᖅᑐᓄᑦ ᓇᖕᒥᓂᖃᖅᑐᓄᑦ. ᑮᓇᐅᔭᖅᑕᖃᕐᓂᐊᖅᐳᖅ ᐃᖅᑲᓇᐃᔭᒐᒃᓴᓂᒃ ᐊᔪᖏᓴᖅᓯᒪᔪᓄᑦ ᓄᓇᕗᒥ, ᓄᓇᑦᓯᐊᒥ ᔪᑳᓐᒥᓗ ᑮᓇᐅᔭᖃᖅᑎᑎᓂᐊᕐᒪᑕ ᒐᕙᒪᒃᑯᑦ $8-ᒥᓕᔭᓐᑖᓚᓂᒃ ᐊᕐᕌᒍᓄᑦ ᒪᕐᕉᖕᓄᑦ ᐃᓄᓕᕆᔨᑐᖃᒃᑯᓐᓄᑦ ᐃᑲᔪᖅᑕᐅᔪᓐᓇᖁᓪᓗᒋᑦ ᓄᓇᓕᖕᓂ ᐊᕙᑎᒥᐅᑕᓂᒃ ᖃᐅᔨᓴᖃᑦᑕᕐᓂᕐᒧᑦ, ᐅᓂᒃᑳᕈᑎᖃᖃᑦᑕᕐᓂᕐᒧᑦ ᐊᒻᒪᓗ ᑲᑎᖅᓱᐃᓂᕐᒧᑦ ᖃᐅᔨᓴᕈᑎᓂᒃ ᓄᓇᑦᓯᐊᒥ ᖃᐅᔨᓴᖅᑎᓄᑦ ᐅᑯᓄᖓ Northwest Territories Cumulative Impact Monitoring Program ᐊᒻᒪ ᓄᓇᕗᒥ ᓱᓇᑐᐃᓐᓇᕐᓂᒃ ᖃᐅᔨᓴᕐᓂᕐᒧᑦ ᖃᐅᔨᓴᑎᓄᑦ Nunavut General Monitoring Program.  ᐊᑯᓂᐅᓂᐊᖅᑐᒥ ᐃᖅᑲᓇᐃᔭᒐᒃᓴᓂᒃ ᓴᖅᑭᑎᑎᓂᕐᒧᑦ, ᒐᕙᒪᒃᑯᑦ ᐊᑐᕐᓂᐊᖅᐳᑦ $11-ᒥᓕᔭᓐᑖᓚᓂᒃ ᐊᕐᕌᒍᓄᑦ ᒪᕐᕉᖕᓄᑦ ᐃᓄᓕᕆᔨᑐᖃᒃᑯᓐᓄᑦ ᐊᑐᖅᑕᐅᓂᐊᖅᑐᑦ ᓄᓇᒥᐅᑕᐃᑦ ᖃᐅᔨᓴᖅᑕᐅᓗᑎᒃ ᐅᑭᐅᖅᑕᖅᑐᒥ, ᐊᒻᒪᓗ $9.2-ᒥᓕᔭᓐᑖᓚᐃᑦ ᐊᕐᕌᒍᓄᑦ ᒪᕐᕉᖕᓄᑦ ᐊᕙᑎᒥᐅᑕᓕᕆᔨᒃᑯᑦ ᑲᓇᑕᒥ ᐊᑐᕐᓂᐊᖅᐳᑦ ᐊᒻᒪᓗ $2.2-ᒥᓕᔭᓐᑖᓚᓂᒃ ᐊᕐᕌᒍᓄᑦ ᒪᕐᕉᖕᓄᑦ ᐃᖃᓗᓕᕆᔨᒃᑯᑦ ᑕᕆᐅᕐᒥᑕᓕᕆᔨᒃᑯᓪᓗ ᓯᓚᓕᕆᓂᕐᒧᑦ ᓄᓇᖑᐊᓕᕆᓂᕐᒧᑦ ᐊᖅᑯᑎᒃᓴᓕᐅᕐᓂᕐᒧᑦ ᐅᒥᐊᕐᔪᐊᒃᑯᑦ ᐊᑐᖅᑕᐅᔪᒃᓴᓂᒃ ᐅᑭᐅᖅᑕᖅᑐᒥ. ᑮᓇᐅᔭᑦ ᐊᑐᖅᑕᐅᓂᐊᖅᐳᑦ ᑲᓇᑕᐅᑉ ᒐᕙᒪᒃᑯᖏᑦ ᐱᓕᕆᓂᐊᖅᓯᒪᔭᖏᑦ ᓯᓚᕐᔪᐊᒥ ᐅᒥᐊᕐᔪᐊᓕᕆᓂᕐᒧᑦ ᑲᑐᔾᔨᖃᑎᒌᑦ ᐱᖃᑎᒋᓪᓗᒋᑦ ᐅᒥᐊᕐᔪᐊᒃᑯᑦ ᐊᖅᑯᑎᖃᑦᓯᐊᕆᐊᖃᕐᓂᕐᒧᑦ ᐅᑭᐅᖅᑕᖅᑐᒥ ᑲᓇᑕᒥ. ᑮᓇᐅᔭᑦ ᐊᑐᖅᑕᐅᓂᐊᖅᑐᑦ 2010-ᒥ ᐊᑐᖅᑕᐅᒃᑲᓐᓂᕐᓂᐊᖅᐳᑦ ᐊᓐᓂᐊᖅᑐᓕᕆᓂᕐᒧᑦ $60-ᒥᓕᔭᓐᑖᓚᐃᑦ ᐊᕐᕌᒍᓄᑦ ᒪᕐᕉᖕᓄᑦ ᑕᐃᒪᓐᓇ ᖃᓪᓗᓈᑦ ᓄᓇᖓᓐᓄᐊᖏᓐᓂᖅᓴᐅᖃᑦᑕᖁᓪᓗᒋᑦ ᐅᑭᐅᖅᑕᖅᑐᒥᐅᑦ ᐋᓐᓂᐊᖅᑐᓕᕆᔭᐅᔭᖅᑐᕐᓗᑎᒃ.


ᐱᖓᔪᖓᓂ, ᐱᖓᓱᓕᖅᓯᒪᔪᒥᒃ ᐸᕐᓇᐅᑎᖃᖅᐳᑦ ᑮᓇᐅᔭᑦ ᐊᑭᓕᒃᓴᖅᑖᕆᔭᐅᓯᒪᔪᑦ ᐊᑭᓕᖅᑕᐅᕙᓪᓕᐊᖃᑦᑕᕆᐊᖃᕐᓂᖏᓐᓄᑦ ᒪᑭᑉᐸᓪᓕᐊᓯᒪᓕᖅᐸᑕ ᑲᓇᑕᒥᐅᑦ. ᑕᐃᒪᓐᓇ ᓄᖑᑎᖅᐸᓪᓕᐊᓂᐊᖅᐳᑦ ᒪᑭᑉᐸᓪᓕᐊᒍᑕᐅᓪᓗᑎᒃ ᓴᓇᔭᐅᖃᑦᑕᓚᐅᖅᑐᑦ ᐊᓯᖏᓐᓂᒡᓗ ᐊᑐᓗᐊᖅᑕᐃᓕᒪᓂᐊᕐᓗᑎᒃ ᖃᐅᔨᓴᖅᑕᐅᓯᒪᔪᒃᑯᑦ ᒐᕙᒪᒃᑯᓐᓂ ᑕᒪᒃᑯᐊ ᐊᑭᓕᖅᑕᐅᒋᐊᒃᑲᓐᓂᕆᐊᖃᖅᐸᒃᑐᑦ ᓄᖑᑎᖅᑕᐅᕙᓪᓕᐊᓗᑎᒃ.

ᑕᐃᒪᓐᓇᐅᖏᑦᑐᖅ ᐊᓯᖏᑦ ᒐᕙᒪᓕᕆᔨᐅᔪᑎᑐᑦ ᐊᑐᕚᒥ, ᒐᕙᒪᕗᑦ ᐅᖃᖅᓯᒪᕗᑦ ᑖᒃᓰᔭᐃᔭᕈᑎᓂᒃ ᐊᑭᑦᑐᕆᐊᖅᓯᓂᐊᖏᓐᓂᕐᒧᑦ ᐅᕙᓘᓐᓃᑦ ᑮᓇᐅᔭᖅᑖᕈᑎᒋᔭᐅᕙᒃᑐᓪᓗ ᓄᓇᕗᒥᐅᓄᑦ, ᓄᓇᑦᓯᐊᒧᑦ ᔪᑳᓐᒧᓪᓗ ᐃᓐᓇᑐᖃᓄᑦ ᓯᕗᓂᒃᓴᐅᓂᐊᖅᑐᒥ.

ᑕᐃᒪᓘᓐᓃᑦ, ᑮᓇᐅᔭᑦ ᐊᑐᖅᑕᐅᓂᐊᖅᑐᑦ 2010-ᒥ ᖃᐅᔨᒪᓇᖅᐳᖅ ᑲᓐᓱᕕᑎᒃᑯᑦ ᒐᕙᒪᒃᑯᖏᑦ ᓴᓐᖏᓂᖏᓐᓄᑦ ᐃᑲᔪᖅᑐᐃᓪᓗᑎᒃ ᐅᑭᐅᖅᑕᖅᑐᒥᐅᓂᒃ.

ᐅᑭᐅᖅᑕᖅᑐᒥᐅᑦ ᑮᓇᐅᔭᖅᑖᖅᑎᑕᐅᖏᓐᓇᕐᓂᐊᖅᐳᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐅᓄᖅᓯᒋᐊᖅᑕᐅᓯᒪᔪᓂᒃ 2010-ᖑᓂᖓᓂ. ᑲᑎᑦᓗᖏᑦ ᑮᓇᐅᔭᖅᑖᕆᔭᐅᔪᑦ ᐅᑭᐅᖅᑕᖅᑐᒥᐅᓄᑦ $3-ᐱᓕᔭᐅᓂᐊᖅᐳᑦ 2010-2011-ᒥᓗ, ᐊᑭᑦᑐᕆᐊᖅᑕᐅᓯᒪᓪᓗᑎᒃ ᐅᓄᖅᓯᒋᐊᖅᑕᐅᓯᒪᓪᓗᑎᒃ $776-ᒥᓕᔭᓐᑖᓚᓄᑦ ᑕᐃᒪᖓᓂᑦ 2005-06-ᖑᓚᐅᖅᑐᒥᑦ.

ᓕᐳᕈᒃᑯᑦ ᒐᕙᒪᒃᑯᖏᑦ ᑮᓇᐅᔭᖅᑖᖅᑎᑎᖃᑦᑕᓚᐅᖏᒻᒪᑕ ᓄᓇᓖᑦ ᐊᕕᒃᑐᖅᓯᒪᓂᖏᓐᓄᑦ ᓄᓇᓕᖕᓄᑦ ᖃᓪᓗᓈᑦ ᓄᓇᖓᓐᓂ ᓄᓇᓕᖕᓄᓪᓗ ᐃᑲᔪᕆᐊᖃᕋᓗᐊᖅᖢᑎᒃ, ᑲᓐᓱᕕᑎᒃᑯᑦ ᒐᕙᒪᒃᑯᖏᑦ ᑮᓇᐅᔭᖅᑖᖅᑎᑎᓯᒪᕗᑦ ᐊᑭᑦᑐᕆᐊᖅᓯᒪᔪᓂᒃ: $80-ᒥᓕᔭᓐᑖᓚᐃᑦ ᐋᓐᓂᐊᖅᑐᓕᕆᓂᕐᒧᑦ ᓄᒃᑎᖅᑕᐅᓯᒪᓪᓗᑎᒃ; ᐊᒻᒪᓗ $36-ᒥᓕᔭᓐ ᐃᓄᓕᕆᓂᕐᒧᑦ ᐊᑐᒐᒃᓴᐃᑦ.

ᐊᑯᓂᐅᔪᒃᑯᑦ ᐃᑲᔪᕈᑕᐅᓂᐅᖅᑐᑦ ᐱᑕᖃᖅᑎᑕᐅᓗᑎᒃ ᐅᑭᐅᖅᑕᖅᑐᒥᐅᑦ ᑮᓇᐅᔭᓂᒃ ᐃᖅᑲᓇᐃᔭᖅᑎᖃᑦᓯᐊᖁᓪᓗᒋᑦ ᐱᔨᑦᓯᕋᖅᑎᐅᕙᒃᑐᓂᒃ ᐋᓐᓂᐊᖅᑐᓕᕆᓂᕐᒧᑦ, ᐃᓕᓐᓂᐊᕐᕕᒡᔪᐊᒥ ᐃᓕᓐᓂᐊᕆᐊᕐᓂᕐᒧᑦ, ᐊᓯᖏᓐᓄᓪᓗ ᐃᓄᓕᕆᓂᕐᒧᑦ ᐱᔾᔪᑎᖃᖅᑐᓄᑦ ᐊᑐᒐᒃᓴᐅᓪᓗᑎᒃ.

ᑐᑭᓯᒋᐊᕈᒪᔪᑦ ᑕᒪᑐᒪ ᒥᒃᓵᓄᑦ ᖃᓄᕐᓗ ᑲᓇᑕᒥ ᒪᑭᑉᐸᓪᓕᐊᒍᑎᒃᓴᐃᑦ ᐸᕐᓇᐅᑕᐅᓯᒪᔪᑦ ᐃᑲᔪᕈᑕᐅᓂᐊᕐᓂᖏᓐᓄᑦ, ᖃᐅᔨᒋᐊᕈᓐᓇᖅᐳᑦ ᐅᕗᖓ ᖃᕆᑕᐅᔭᒃᑯᑦ   www.budget.gc.ca.