ᐊᑐᕚ, ᐋᓐᑎᐅᕆᔪ - ᒥᓂᔅᑕ ᓕᐅᓇ ᐊᒡᓗᒃᑲᖅ, ᑲᑎᒪᔨᕐᔪᐊᖑᖃᑕᐅᔪᖅ ᐊᑐᕚᒥ ᓄᓇᕗᒥᐅᓄᑦ, ᒥᓂᔅᑕᐅᓪᓗᓂᓗ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ, ᑲᒪᒋᔭᖃᖅᖢᓂᓗ ᒥᓂᔅᑕᐅᓪᓗᓂ ᐅᑭᐅᖅᑕᖅᑐᒥᐅᓄᑦ, ᐅᓪᓗᒥ ᖁᕕᐊᓱᒍᓐᓃᓚᐅᖅᐳᖅ ᑐᓴᕋᒥ ᓕᐳᕈᒃᑯᑦ ᑲᓇᑕᒥ ᒪᓕᒐᓕᐅᖅᑕᐅᕙᓪᓕᐊᔪᑦ ᖃᐅᔨᓴᖅᑕᐅᓂᖏᓐᓄᑦ ᑲᑎᒪᔨᐅᖃᑕᐅᔪᖅ  Mac Harb ᓴᖅᑭᑎᑎᒃᑲᓐᓂᓚᐅᕐᒪᑦ ᐱᖁᔭᕐᔪᐊᓕᐅᖅᑕᐅᒍᑎᒋᖁᓪᓗᒍ ᓇᑦᓯᖅᓯᐅᖃᑦᑕᕈᓐᓃᕈᑎᒃᓴᖅ ᓂᐅᕐᕈᑎᒃᓴᐅᓂᐊᕐᓗᑎᒃ ᑲᓇᑕᒥ.

"ᓴᖅᑭᑎᑎᒃᑲᓐᓂᓚᐅᕐᓂᖓᓄᑦ ᓕᐳᕈᒃᑯᓐᓄᑦ ᑲᑎᒪᔨᐅᖃᑕᐅᔪᖅ  Mac Harb’s ᐱᖁᔭᕐᔪᐊᖑᖁᔭᖓᓂᒃ ᓇᑦᓯᖅᓯᐅᖃᑦᑕᕈᓐᓃᕆᐊᖃᕐᓂᕐᒧᑦ ᐃᓱᒫᓗᒍᑎᒋᓪᓚᕆᒃᐸᕋ," ᐅᖃᓚᐅᖅᐳᖅ ᐊᒡᓗᒃᑲᖅ. "ᓇᓂᑐᐃᓐᓇᖅ ᑲᓇᑕᒥ ᐱᓗᐊᖅᑐᒥᒃ ᓄᓇᕗᒥ, ᓇᑦᓯᕐᓂᒃ ᓂᐅᕐᕕᑎᖃᖃᑦᑕᕐᓂᖅ ᐃᓕᖁᓯᑐᖃᕆᒐᑦᑎᒍ - ᐱᒻᒪᕆᐅᓪᓗᓂ ᐃᓚᒋᔭᐅᓪᓗᓂ ᐱᖅᑯᓯᑐᖃᑦᑎᓐᓄᑦ ᐃᓕᖁᓯᑐᖃᑦᑎᓐᓄᓪᓗ."

ᓇᑦᓯᖅᓯᐅᖃᑦᑕᕐᓂᖅ ᐃᓅᓯᑐᐊᕆᑲᓴᒃᑲᑦᑎᒍ ᑕᐃᒪᓐᓇ ᐋᖅᑭᒃᑕᐅᓯᒪᓪᓗᓂ ᐱᓗᐊᖅᑕᐃᓕᒪᒋᐊᖃᕐᓂᕐᒧᑦ ᑕᒪᐅᖓᑐᐃᓐᓈᖅᑐᒃᓴᐅᖏᓪᓗᑎᒃ. ᑲᓇᑕᒥ, ᓇᑦᓯᖅᓯᐅᖃᑦᑕᕐᓂᖅ ᐱᔾᔪᑎᖃᖅᐳᑦ ᓯᕿᖃᒃᑲᓐᓂᕈᑕᐅᓂᐊᕐᓂᕐᒧᑦ. ᑕᒪᒃᑯᐊᓗ ᐅᖅᓱᖏᑦ ᓂᕿᖏᑦ ᐱᕈᖅᐸᓪᓕᐊᑐᐃᓐᓇᖅᖢᓂᓗ ᒥᓕᔭᓂᒃ ᐊᒥᓱᓂᒃ ᑮᓇᐅᔭᓕᐅᕈᑕᐅᖃᑦᑕᖅᖢᓂ.

"ᓇᑦᓯᖅᓯᐅᖃᑦᑕᕐᓂᐅᑉ ᓴᓂᐊᓂ, ᑲᓐᓱᕕᑎᒃᑯᑦ ᒐᕙᒪᒃᑯᖏᑦ ᐊᓯᖏᓪᓗ ᒐᕙᒪᒋᔭᐅᔪᑦ ᐊᒻᒪᓗ ᑲᑐᔾᔨᖃᑎᒌᑦ ᒐᕙᒪᒃᑯᖏᓐᓂ ᐊᓯᖏᓐᓂᓗ ᓂᑯᕕᒐᒍᑎᖃᖅᐳᑦᑕᐅᖅ ᓇᑦᓯᖅᓯᐅᖃᑦᑕᕐᓂᖅ ᐱᒻᒪᕆᐅᓂᖓᓄᑦ ᓯᓚᕐᔪᐊᒥ," ᐅᖃᓚᐅᖅᐳᖅ ᐊᒡᓗᒃᑲᖅ. "ᑕᒪᓐᓇ ᐱᔾᔪᑎᒋᓪᓗᒍ, ᐊᐃᑦᑖᖑᒐᓗᐊᖅᐳᖅ ᓴᖅᑭᑎᑎᒃᑲᓐᓂᕐᓂᖏᓐᓄᑦ ᐱᖁᔭᕐᔪᐊᒃᓴᒥᒃ ᑕᐃᒪᓐᓇᐃᑦᑐᒥᒃ ᓄᖅᑲᖅᑎᑎᖁᔨᔪᓂᒃ."

ᑲᓐᓱᕕᑎᒃᑯᑦ ᒐᕙᒪᒃᑯᖏᑦ ᐃᑲᔪᖅᑎᒌᖏᓐᓇᖅᐳᑦ ᐃᑲᔪᖅᑐᐃᓪᓗᑎᒃ ᓇᑦᓯᖅᓯᐅᖃᑦᑕᖅᑐᓂᒃ ᐃᓅᓯᑐᐊᕆᓪᓗᒋᑦ.

ᐊᐱᖁᑎᒃᓴᖃᖅᑐᑦ ᑕᒪᑐᒪ ᒥᒃᓵᓄᑦ ᐊᓯᖏᓐᓂᒡᓗ ᖃᐅᔨᒋᐊᕈᓐᓇᖅᐳᑦ ᓕᐅᓇᐅᑉ ᐊᓕᓚᕕᖓᓄᑦ ᖃᕆᐅᔭᒃᑯᓪᓘᓐᓃᑦ ᐅᕗᖓ leonaaglukkaq.ca.