May 03, 2010

ᔭᓗᓇᐃᕝ, ᓄᓇᑦᓯᐊᖅ - ᒥᓂᔅᑕ ᓴᒃ ᓯᑖᓪ, ᒥᓂᔅᑕ ᐃᓄᓕᕆᔨᑐᖃᒃᑯᓐᓄᑦ ᑲᒪᔨᐅᓪᓗᓂᓗ ᐃᖅᑭᓕᕐᓚᖕᓄᑦ, ᐃᓕᑕᕆᔭᐅᓯᒪᖏᑦᑐᓄᓪᓗ ᐃᖅᑭᓕᕐᓄᑦ ᐊᒻᒪᓗ ᒥᓂᔅᑕᐅᓪᓗᓂ ᑲᓇᑕᒥ ᐱᕙᓪᓕᐊᔪᓕᕆᓂᕐᒧᑦ ᑎᒥᐅᔪᒧᑦ, ᐅᓪᓗᒥ ᑐᓴᖅᑎᑎᓚᐅᖅᐳᖅ ᐸᕐᓇᒃᓯᒪᒍᑎᒃᓴᒥᒃ ᐅᑭᐅᖅᑕᖅᑐᒥ ᐱᖁᔭᐃᑦ ᐊᑲᐅᓯᕚᓪᓕᕈᑎᒃᓴᖏᓐᓂᒃ.
ᐸᕐᓇᒃᓯᒪᒍᑎᒋᔭᐅᔪᑦ ᐱᓕᕆᐊᖃᕈᑕᐅᓂᐊᖅᖢᑎᒃ ᐅᑭᐅᖅᑕᖅᑐᒥ ᐱᖁᔭᐃᑦ ᐊᑲᐅᓂᖅᓴᐅᓕᖁᓪᓗᒋᑦ, ᖃᓄᐃᓕᖓᑦᓯᐊᖁᓪᓗᒋᓪᓗ ᑕᒪᒃᑯᐊᓗ ᓇᓗᓇᐃᖅᑕᐅᓯᒪᑦᓯᐊᖁᓪᓗᒋᑦ ᖃᓄᐃᓕᐅᕈᓐᓇᕐᓂᖏᑦ ᐱᓕᕆᕕᒡᔪᐊᖃᖅᑐᑦ, ᐅᑭᐅᖅᑕᖅᑐᒥᐅᑦ ᑲᓇᑕᒥᐅᓕᒫᓪᓗ.

ᐱᖓᓱᓂᒃ ᐃᓗᓕᖃᖅᐳᑦ: ᐱᖁᔭᕐᔪᐊᓄᑦ ᐋᖅᑭᒋᐊᕈᑎᑦ ᐊᑲᐅᓯᕚᓪᓕᖅᓯᒪᖁᓪᓗᒋᑦ ᐅᑭᐅᖅᑕᖅᑐᒥ ᐱᖁᔭᓕᐅᖃᑦᑕᕐᓂᖅ ᒪᕐᕉᓕᖓᑎᑕᐅᖁᖏᑦᖢᒋᑦ ᐊᔾᔨᒌᒃᑎᑕᐅᖁᖏᑦᖢᒋᓪᓗ ᐱᖁᔭᐃᑦ; ᑲᒪᒋᔭᖃᕐᓂᖅᓴᐅᑦᓯᐊᖁᓪᓗᒋᓪᓗ ᐊᕙᑎᒥᐅᑕᓕᕆᓂᕐᒧᑦ ᐸᐸᑦᓯᔨᐅᕙᒃᑐᑦ; ᓴᓐᖏᔪᒥᒃ ᓂᓪᓕᐊᓂᖃᖁᓪᓗᒋᓪᓗ ᓄᓇᖃᖅᑳᖅᓯᒪᔪᑦ. ᐋᖅᑭᒋᐊᖅᑕᐅᓂᐊᖅᐳᑦ ᐱᖁᔭᐃᑦ ᑕᒪᒃᑯᐊ ᐅᔾᔨᕆᔭᐅᑦᓯᐊᕐᓗᑎᒃ ᓄᓇᑖᕈᑕᐅᓯᒪᔪᓄᑦ ᐊᖏᕈᑎᑦ.

"ᑕᒪᒃᑯᐊ ᑮᓇᐅᔭᑎᒍᑦ ᐱᕙᓪᓕᐊᑎᑎᓗᑎᒃ ᐊᑐᕐᓂᐊᖅᑐᑦ ᐅᑭᐅᖅᑕᖅᑐᒥ ᐱᔭᕆᐊᑐᓗᐊᑐᓂᒃ ᒪᕐᕉᓕᖓᓗᐊᖅᑐᓂᒡᓗ ᐱᖁᔭᓂᒃ ᐊᑐᖅᑕᐅᖃᑦᑕᖅᖢᓂᓗ, ᖃᓄᐃᓕᖓᓂᖓᓂᖏᓐᓄ ᓇᓗᓇᖅᖢᓂ, ᐊᑭᑐᓪᓗᓂᓗ ᐱᔭᕆᐊᑐᓪᓗᓂᓗ ᐃᓚᖏᓐᓂ ᓄᓇᓕᖕᓂ ᐱᖁᔭᕆᔭᐅᔪᓂ," ᐅᖃᓚᐅᖅᐳᖅ ᒥᓂᔅᑕ ᓯᑖᓪ. "ᒐᕙᒪᕗᑦ ᐋᖅᑭᒃᓱᐃᓂᐊᖅᐳᑦ ᑕᒪᒃᑯᓂᖓ ᐱᖁᔭᓂᒃ ᐅᑭᐅᖅᑕᖅᑐᒥ ᐅᓪᓗᒥᐅᓕᖅᑐᖅ ᐱᕙᓪᓕᐊᓂᖃᑦᓯᐊᕈᓐᓇᖁᓪᓗᒋᑦ ᐅᑭᐅᖅᑕᖅᑐᒥᐅᑦ ᓄᓇᖃᖅᑳᓯᒪᔪᓪᓗ."

"ᑕᒪᓐᓇ ᐸᕐᓇᒃᓯᒪᒍᑕᐅᓂᐊᖅᑐᖅ ᒪᓕᒃᓴᕈᑕᐅᓂᐊᖅᐳᖅ ᑲᓇᑕᐅᑉ ᒐᕙᒪᒃᑯᖏᑦ ᓴᓐᖏᔪᒥᒃ ᐱᕙᓪᓕᐊᓂᖃᑦᓯᐊᖅᑐᒥᒡᓗ ᐅᑭᐅᖅᑕᖅᑐᒥᐅᑦ ᐱᕙᓪᓕᐊᑎᑕᐅᖁᓪᓗᒋᑦ ᓄᓇᒥᐅᑕᓂᒃ ᐊᕙᑎᒥᐅᑕᖅ ᑲᒪᒋᔭᐅᑦᓯᐊᖁᓪᓗᒍᓗ ᐃᓕᖁᓯᑐᖃᖏᓪᓗ ᐅᑭᐅᖅᑕᖅᑐᒥᐅᑦ," ᐅᖃᓚᐅᖅᐳᖅ ᒥᓂᔅᑕ ᓕᐅᓇ ᐊᒡᓗᒃᑲᖅ, ᒥᓂᔅᑕ ᑲᒪᒋᔭᖃᖅᑐᖅ ᐅᑭᐅᖅᑕᖅᑐᒥᐅᓂᒃ ᒥᓂᔅᑕᐅᓪᓗᓂᓗ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ.
ᐸᕐᓇᐅᑕᐅᓯᒪᔪᑦ ᐃᑲᔪᕈᑕᐅᓂᐊᖅᐳᑦ ᐱᕙᓪᓕᐊᑎᑎᒍᓐᓇᕐᓂᖏᓐᓄᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ, ᓯᓚᕐᔪᐊᒥᐅᓄᑦ ᖃᐅᔨᒪᔭᐅᑦᓯᐊᕐᓗᑎᒃ ᖃᓄᐃᓕᐅᕋᓱᐊᕐᓂᖏᓐᓄᑦ. ᐃᑲᔪᖅᑕᐅᓂᖃᒃᑲᓐᓂᖁᓪᓗᒍ ᐸᕐᓇᐅᑕᐅᓯᒪᔪᑦ, ᑮᓇᐅᔭᕗᑦ ᐱᓕᕆᐊᒃᓴᓄᑦ ᐱᕈᖅᐸᓪᓕᐊᑎᑎᓂᕐᒧᓪᓗ ᐊᑐᕐᓂᐊᖅᐳᑦ $11-ᒥᓕᔭᓐᑖᓚᒃᑲᓐᓂᕐᓂᒃ ᐱᖁᔭᐃᑦ ᐋᖅᑭᒃᓱᖅᑕᐅᓂᖏᓐᓄᑦ ᐊᑐᕐᓂᐊᖅᑐᓂᒃ ᐅᑭᐅᖅᑕᖅᑐᒥ ᐊᒻᒪᓗᒃᑲᓐᓂᖅ $8-ᒥᓕᔭᓐᑖᓚᓂᒃ ᐃᑲᔪᕈᑕᐅᓂᐊᖅᑐᓂᒃ ᓄᓇᓕᖕᓂ ᐊᕙᑎᒥᐅᑕᓕᕆᓂᕐᒧᑦ ᖃᐅᔨᓴᖅᑎᓄᑦ.

ᐸᕐᓇᐅᑕᐅᓯᒪᔪᑦ ᐱᐊᓂᒃᑕᐅᓯᒪᓂᐊᖅᐳᑦ ᓴᓐᖏᓕᖅᑎᑕᐅᓯᒪᓂᐊᖅᐳᓪᓗ ᒫᓐᓇ ᐱᖁᔭᕆᔭᐅᔪᑦ ᓴᓂᐊᒍᑦ ᐅᑭᐅᖅᑕᖅᑐᒥ ᐱᖓᓱᓂᒃ ᐱᔾᔪᑎᖃᓗᐊᕐᓂᐊᖅᖢᑎᒃ ᐅᑯᓂᖓ:

• § ᐱᔭᕆᐊᑐᖏᓐᓂᖅᓴᓂᒃ ᐊᐅᓪᓛᑦᓯᐊᖅᑐᒥᒡᓗ ᐱᓕᕆᒍᑎᖃᕐᓂᕐᒧᑦ;
• § ᐊᕙᑎᒥᐅᑕᓕᕆᓂᕐᒧᑦ ᐱᓕᕆᐊᖃᖅᑐᑦ ᐱᓕᕆᒍᑎᖃᑦᓯᐊᕐᓂᖅᓴᐅᖁᓪᓗᒋᑦ; ᐊᒻᒪ
• § ᓴᓐᖏᔪᒃᑯᑦ ᓂᐱᖃᖅᑎᑕᐅᔪᓐᓇᖁᓪᓗᒋᑦ ᓄᓇᖃᖅᑳᖅᓯᒪᔪᑦ.

ᒥᓂᔅᑕ ᓯᑖᓪ ᑐᓴᖅᑎᑎᓚᐅᕆᓪᓗᓂ ᑎᒃᑯᐊᖅᑕᐅᓂᖓᓄᑦ ᔮᓐ ᐹᓗᑦ ᑐᑭᒧᐊᒃᑎᑎᔨᐅᓂᐊᕐᓗᓂ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐋᔩᖃᑎᒌᒃᑎᐅᓂᕐᒧᑦ. ᒥᔅᑕ ᐹᓗᑦ ᐅᖃᓪᓚᒃᑎᒋᔭᐅᓂᐊᕐᓗᓂ ᐋᔩᖃᑎᒌᒃᑎᐅᓂᐊᕐᓗᓂᓗ ᓄᓇᑦᓯᐊᑉ ᒐᕙᒪᒃᑯᖏᓐᓄᑦ ᓄᓇᖃᖅᑳᖅᓯᒪᔪᑦ ᓯᕗᓪᓕᖅᑎᖏᓐᓄᓪᓗ ᑕᒪᒃᑯᐊ ᐋᖅᑭᒃᓱᖅᑕᐅᓂᐊᕐᓂᖏᓐᓄᑦ ᖃᓄᐃᓕᖓᒍᑎᖏᑦ ᓄᓇᒥᒃ ᐃᒪᕐᒥᓪᓗ ᐱᔾᔪᑎᖃᖅᖢᑎᒃ ᑲᑎᒪᔨᖏᑦ ᐱᓕᕆᐊᕆᔭᐅᓂᐊᖅᑐᑦ ᐋᖅᑭᒋᐊᖅᑕᐅᓗᑎᒃ ᒪᑲᓐᓯᕚᓕᒥ ᓄᓇᒥᐅᑕᓂᒃ ᐊᐅᓚᑦᓯᓂᖅ ᐱᖁᔭᖏᓐᓂᒃ ᐊᒻᒪᓗ ᓄᓇᑦᓯᐊᒥ ᐃᒪᓕᕆᓂᕐᒧᑦ ᐱᖁᔭᖏᑦ ᐊᒻᒪᓗ ᓄᓇᑦᓯᐊᒥ ᓄᓇᐃᑦ ᐱᔾᔪᑎᒋᓪᓗᒋᑦ ᐱᖁᔭᐃᑦ. Mackenzie Valley Resource Management Act and Northwest Territories Waters Act and the Territorial Lands Act.
"ᒥᔅᑕ ᐹᓗᑦ ᐅᐱᒋᔭᖃᑦᓯᐊᖅᖢᓂ ᐅᑭᐅᖅᑕᖅᑐᒥᐅᑕᐅᕗᖅ ᖁᕕᐊᓱᒃᐳᖓᓗ ᐱᒻᒪᕆᐅᔪᒥᒃ ᐱᓕᕆᓂᐊᕐᓂᕋᖅᓯᒪᖕᒪᑦ," ᐅᖃᓚᐅᖅᐳᖅ ᒥᓂᔅᑕ ᓯᑖᓪ.
ᒥᓂᔅᑕ ᑐᓴᖅᑎᑎᓚᐅᕆᕗᖅ ᐅᑭᐅᖅᑕᖅᑐᒥ ᓴᓇᔭᐅᔪᒧᑦ ᐊᐅᓚᑦᓯᕕᐅᓂᐊᖅᑐᒥᒃ ᐊᓪᓚᕕᖕᒥᒃ ᐅᓪᓗᒥ ᐱᓕᕆᕕᐅᓂᐊᖅᖢᓂ ᒪᑐᐃᖅᑕᐅᓂᖓᓄᑦ. ᐊᓪᓚᕕᒃ ᑎᑎᕋᕐᕕᒃ ᒐᕙᒪᒃᑯᑦ ᐱᓕᕆᐊᕆᔭᖏᓐᓂᒃ ᑲᒪᒋᔭᖃᖅᐸᓪᓕᐊᓂᐊᓕᖅᖢᓂ ᑲᓇᑕᐅᑉ ᒐᕙᒪᒃᑯᖏᑦᑕ ᐱᖁᔭᓕᐊᖏᓐᓂᒃ ᓄᓇᑦᓯᐊᒥ ᐊᑲᐅᓂᖅᓴᐅᓕᖅᐸᓪᓕᐊᖁᓪᓗᒋᑦ ᑕᑯᒃᓴᐅᑦᓯᐊᕐᓂᖅᓴᐅᖁᓪᓗᒋᓪᓗ ᐱᖁᔭᓕᐊᕆᔭᐅᕙᒃᑐᑦ ᑕᒪᒃᑯᐊ ᐊᕙᑎᒥᐅᑕᓕᕆᓂᕐᒧᑦ ᐱᓕᕆᐊᕆᔭᐅᖃᑦᑕᖅᑐᑦ ᐱᔪᓐᓇᐅᑎᓪᓗ ᐊᐅᓪᓛᑦᓯᐊᕐᓂᖅᓴᐅᖁᓪᓗᒋᑦ ᐅᑭᐅᖅᑕᖅᑐᒥ ᓄᓇᒥᐅᑕᓂᒃ ᐱᓕᕆᒍᑎᑦ. ᐅᑭᐅᖅᑕᖅᑐᒥ ᑕᒪᒃᑯᓂᖓ ᐱᓕᕆᐊᕆᔭᐅᓂᐊᖅᑐᓂᒃ ᐊᐅᓚᑦᓯᔨᑦ ᑎᑎᕋᕐᕕᖓ ᐃᓚᒋᔭᐅᓂᐊᕐᓗᓂ ᑲᓇᑕᒥ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᓂᕐᒧᑦ ᑎᒥᐅᔪᓄᑦ (CanNor).
ᐅᓪᓗᒥ ᑐᓴᖅᑎᑎᒍᑕᐅᔪᑦ ᖃᐅᔨᓐᓇᕈᑕᐅᒃᑲᓐᓂᖅᐳᑦ ᒐᕙᒪᒃᑯᑦ ᐃᑲᔪᕈᑎᖃᕐᓂᐊᕐᓂᖏᓐᓄᑦ ᐅᑭᐅᖅᑕᖅᑐᒥ ᐸᕐᓇᒃᓯᒪᒍᑕᐅᓂᐊᖅᑐᓂᒃ ᓴᓐᖏᓕᖅᑎᑕᐅᓯᒪᖁᓪᓗᒍ ᐅᑭᐅᖅᑕᖅᑐᒥ ᐸᐸᑦᓯᓂᖅ
ᐱᖁᑎᖃᕐᓂᖅ, ᓴᐳᔾᔭᐅᖁᓪᓗᒍ ᐅᑭᐅᖅᑕᖅᑐᒥ ᐊᕙᑎᒥᐅᑕᖅ ᐃᓕᖁᓯᑐᖃᐃᓪᓗ, ᓴᖅᑭᔮᖅᑎᑎᓂᕐᓗ ᐃᓅᓯᕐᒥᒃ ᐱᕙᓪᓕᐊᑎᑎᓂᕐᒥᒡᓗ, ᐊᑲᐅᓯᕚᓪᓕᖁᓪᓗᒍᓗ ᐅᑭᐅᖅᑕᖅᑐᒥᐅᑦ ᑲᒪᒋᔭᖃᕈᓐᓇᖁᓪᓗᒋᑦ ᓄᓇᒥᖕᓂ ᖃᓄᐃᓕᐅᕈᑕᐅᔪᓂᒃ.

ᖃᓄᐃᓕᖓᓂᖏᑦ
ᐸᕐᓇᐅᑕᐅᓯᒪᔪᑦ ᐊᑲᐅᓯᕚᓪᓕᖅᑎᑕᐅᖁᓪᓗᒋᑦ ᐅᑭᐅᖅᑕᖅᑐᒥ ᐱᖁᔭᐃᑦ ᐊᑐᖅᑕᐅᕙᒃᑐᑦ
ᑲᓇᑕᐅᑉ ᐅᑭᐅᖅᑕᖅᑐᖓᓂ 3 ᐱᕙᓪᓕᐊᔪᓂᒃ ᐱᑕᖃᖅᐸᓪᓕᐊᑐᐃᓐᓇᖅᐳᖅ ᐊᕐᕌᒎᓯᒪᓕᖅᑐᓂ ᓯᓚᕐᔪᐊᒥᐅᑦ ᖃᐅᔨᕙᓪᓕᐊᓕᕐᓂᖏᓐᓄᑦ ᓄᓇᒥᐅᑕᓂᒃ ᐱᑕᖃᕐᓂᖓᓄᑦ ᐊᑐᖅᑕᐅᔪᓐᓇᖅᑐᓂᒃ ᐅᔭᕋᖕᓂᐊᒐᒃᓴᐃᑦ, ᓴᕕᕋᔭᐃᑦ, ᐅᖅᓱᐊᓗᐃᑦ ᒑᓯᓪᓗ. ᑕᒪᓐᓇ ᐊᑐᖅᑕᐅᓚᐅᖅᓯᒪᖏᑦᑐᓂᒃ ᐱᕙᓪᓕᐊᒍᑕᐅᔪᓐᓇᖅᖢᓂᓗ ᑮᓇᐅᔭᓕᐅᖅᐸᓪᓕᐊᔪᓄᑦ ᐅᑭᐅᖅᑕᖅᑐᒥᐅᓪᓗ ᐃᓅᓯᖏᑦ ᐊᒃᑐᖅᑕᐅᔪᓐᓇᖅᓗᑎᒃ, ᓄᓇᖃᖅᑳᖅᓯᒪᔪᓪᓗ ᑕᒪᕐᒥᒡᓗ ᑲᓇᑕᒥᐅᑕᐃᑦ. ᐊᑕᐅᑦᓯᒃᑯᑦ, ᐱᕙᓪᓕᐊᑎᑎᔪᖃᖅᐸᓪᓕᐊᓂᖓᓂᒃ ᐊᒃᓱᕈᖅᐸᓪᓕᐊᒍᑕᐅᓂᐊᖅᐳᑦ ᓄᓇᒋᔭᐅᔪᓂ ᐃᓕᖁᓯᑐᖃᓕᕆᓂᕐᒧᓪᓗ ᐃᓅᓇᓱᐊᕈᑎᖃᖅᑐᑦ.
ᐃᓚᖏᓐᓂ ᓄᓇᑦᓯᐊᒥ, ᐃᓚᖏᑦ ᐱᖁᔭᐃᑦ ᐊᑕᖏᖅᓯᒪᖏᑦᖢᑎᒃ ᐋᖅᑭᒋᐊᖅᑕᐅᒋᐊᖃᖅᖢᑎᒡᓗ. ᐊᔾᔨᒌᖃᑦᑕᖏᑦᖢᑎᒡᓗ ᐅᑭᐅᖅᑕᖅᑐᒥ ᓇᓂ ᓄᓇᖃᕐᓂᐅᔪᑦ ᒪᓕᒃᖢᒍ ᑕᒪᒃᑯᐊ ᐱᖁᔭᐃᑦ ᐅᐃᒪᔮᕈᑕᐅᕙᒃᖢᑎᒡᓗ ᐊᑐᕐᓂᖃᑦᓯᐊᖏᑦᖢᑎᒡᓗ ᓄᑕᐅᖏᓐᓂᖏᓐᓄᑦ ᐊᔾᔨᒌᖏᓐᓂᖏᓐᓄᓪᓗ. ᒫᓐᓇ, ᐱᖁᔭᓕᕆᓂᖅ ᐱᔭᕆᐊᑐᒻᒪᕆᒃᖢᓂ, ᐊᑭᑐᓪᓗᓂᓗ ᐊᔾᔨᒌᖏᑦᖢᑎᒡᓗ ᐱᔭᕆᐊᑐᓪᓗᑎᒡᓗ ᐱᓕᕆᐊᕆᓪᓗᒋᑦ.
ᑕᒪᓐᓇ ᑐᓗᕈᑕᐅᓯᒪᖃᑦᑕᖅᖢᓂᓗ ᐱᕙᓪᓕᐊᑎᑎᓂᐊᕐᓂᕐᒧᑦ ᑮᓇᐅᔭᓕᐅᕈᑕᐅᓂᐊᖅᑐᓄᑦ ᐅᑭᐅᖅᑕᖅᑐᒥ ᐱᕈᖅᐸᓪᓕᐊᒐᔭᖅᑎᓪᓗᒍ ᐅᑭᐅᖅᑕᖅᑐᒥᐅᑦ ᑲᓇᑕᒥᐅᓪᓗ. ᑲᓇᑕᐅᑉ ᒐᕙᒪᒃᑯᖏᑦ
ᐅᔾᔨᕈᓱᒃᐳᑦ ᐅᑭᐅᖅᑕᖅᑐᒥᑦ ᐱᖁᔭᖏᑦ ᐊᐅᓪᓛᑦᓯᐊᖅᑎᑎᒋᐊᖃᕐᓂᖏᓐᓄᑦ, ᓇᓗᓇᖏᑦᓯᐊᕐᓗᑎᒡᓗ ᑐᑭᓯᓇᕐᓂᖅᓴᐅᓗᑎᒡᓗ.
ᑲᓇᑕᒥᐅᑦ - ᐱᓗᐊᖅᑐᒥᒃ ᐅᑭᐅᖅᑕᖅᑐᒥᐅᑦ ᓄᓇᖃᖅᑳᖅᓯᒪᔪᓪᓗ - ᓇᓗᓇᐃᖅᓯᓚᐅᕐᒪᑕ ᓄᓇᑖᕈᑎᒋᓯᒪᔭᖏᑦ ᒪᓕᒃᑕᐅᑦᓯᐊᕆᐊᖃᕐᓂᖏᓐᓄᑦ, ᐊᑲᐅᓈᕆᐊᖃᕐᓂᖏᓐᓄᓪᓗ ᐊᖏᓛᒃᑯᑦ ᐱᕙᓪᓕᐊᓂᖃᖁᓪᓗᒋᑦ ᐱᕙᓪᓕᐊᑎᑎᓂᕐᒧᑦ ᑮᓇᐅᔭᓕᐅᕈᑎᖃᕐᓂᕐᒧᑦ ᓴᐳᔾᔭᐅᓗᑎᒡᓗ ᐊᕙᑎᒥᐅᑕᖏᑦ ᓄᓇᒥ.
ᖃᓄᐃᓕᐅᕈᑎᒋᔭᐅᓂᐊᖅᑐᑦ ᐸᕐᓇᒃᓯᒪᒍᑎᓂ
ᐸᕐᓇᒃᓯᒪᒍᑎᑎᒍᑦ ᐱᐊᓂᖕᓂᐊᖅᐳᑦ ᓴᓐᖏᓕᖅᑎᑕᐅᓗᑎᒡᓗ ᒫᓐᓇ ᐱᖁᔭᐅᔪᑦ ᐅᑭᐅᖅᑕᖅᑐᒥ ᐱᖓᓱᓂᒡᓗ ᐱᔾᔪᑎᖃᕐᓂᐊᖅᖢᑎᒃ ᐃᒪᓐᓇ:

• ᐊᑲᐅᓂᖅᓴᓂᒃ ᐱᑕᖃᕐᓗᑎᒃ ᐊᐅᓪᓛᑦᓯᐊᕈᑕᐅᔪᓐᓇᖅᑐᓂᒡᓗ ᐱᖁᔭᖃᕐᓂᕐᒧᑦ;
• ᐊᑲᐅᓂᖅᓴᒃᑯᑦ ᐊᕙᑎᒥᐅᑕᓂᒃ ᑲᒪᒋᔭᖃᕈᓐᓇᖁᓪᓗᒋᓪᓗ; ᐊᒻᒪ
• ᓴᓐᖏᓂᖅᓴᒃᑯᑦ ᓄᓇᖃᖅᑳᖅᓯᒪᔪᑦ ᓂᐱᖃᕈᓐᓇᖁᓪᓗᒋᑦ.

 
ᐸᕐᓇᒃᓯᒪᒍᑕᐅᓂᐊᖅᑐᑦ ᐱᕙᓪᓕᐊᒍᑕᐅᓂᐊᖅᐳᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓴᓐᖏᔪᒥᒃ ᐱᕙᓪᓕᐊᑎᑕᐅᕕᐅᑦᓯᐊᖅᑐᒥᒃ ᐅᑭᐅᖅᑕᖅᑐᒥᐅᑦ ᐃᑲᔪᖅᑕᐅᓂᖃᖁᓪᓗᒋᑦ ᑕᐃᒪᓐᓇ ᐱᕙᓪᓕᐊᓂᖃᑦᓯᐊᕐᓗᑎᒃ ᑮᓇᐅᔭᓕᐅᕈᑎᒃᓴᓂᒃ ᓄᓇᒥᐅᑕᓂᒃ ᐅᔾᔨᖅᑐᑦᓯᐊᕐᓗᑎᒡᓗ ᐊᕙᑎᒥᐅᑕᓂᒃ ᐊᒻᒪᓗ ᐃᓕᖁᓯᑐᖃᒥᖕᓂᒃ ᓄᓇᒥᖕᓂ. ᑕᒪᓐᓇ ᐊᑐᖅᑕᐅᑦᓯᐊᕈᓐᓇᕐᓂᐊᖅᐳᖅ ᐊᑐᓕᖅᑎᑎᓂᕐᒧᑦ ᐅᑭᐅᖅᑕᖅᑐᒥ ᐸᕐᓇᒃᓯᒪᒋᐊᖃᕈᑎᓄᑦ ᑐᓴᖅᑎᑕᐅᒍᑕᐅᓚᐅᖅᑐᓄᑦ 2009-ᒥ.
ᐊᕐᕌᒍᒥ ᐊᑐᖅᑐᒥ ᐱᓕᕆᐊᒃᓴᓂᒃ ᑮᓇᐅᔭᓂᒡᓗ ᐱᕈᖅᐸᓪᓕᐊᑎᑎᓂᕐᒧᑦ ᐱᓕᕆᐊᕗᑦ ᒪᓕᒡᓗᒋᑦ, ᑲᓇᑕᐅᑉ ᒐᕙᒪᒃᑯᖏᑦ ᐊᑐᕐᓂᐊᖅᐳᑦ ᑮᓇᐅᔭᓂᒃ $11-ᒥᓕᔭᓐᑖᓚᓂᒃ ᐊᕐᕌᒍᓄᑦ ᒪᕐᕉᖕᓄᑦ ᐱᖁᔭᐃᑦ ᐋᖅᑭᒃᓱᖅᑕᐅᓂᖏᓐᓄᑦ ᐅᑭᐅᖅᑕᖅᑐᒥ ᐊᒻᒪᓗ $8-ᒥᓕᔭᓐᑖᓚᓂᒃ ᐊᕐᕌᒍᓄᑦ ᒪᕐᕉᖕᓄᑦ ᑲᔪᖅᑕᐅᖁᓪᓗᒋᑦ ᓄᓇᓕᖕᓂ ᐊᕙᑎᒥᐅᑕᓂᒃ ᖃᐅᔨᓴᕈᑕᐅᕙᒃᑐᑦ.
ᐊᑐᖅᑕᐅᑦᓯᐊᕈᓐᓇᖅᑐᑦ ᐊᐅᓪᓛᑦᓯᐊᕈᑕᐅᔪᓐᓇᖅᑐᓪᓗ ᐱᓕᕆᒍᑕᐅᓂᖏᑦ
ᐋᖅᑭᒃᓱᖅᑕᐅᓗᑎᒃ ᐱᖁᔭᓕᕆᒍᑎᑦ ᑐᓗᕈᑎᒃᓴᐃᓪᓗ ᐲᔭᖅᑕᐅᓗᑎᒃ ᑮᓇᐅᔭᓕᐅᕈᑎᒃᓴᓄᑦ ᑕᐃᒪᓐᓇ ᐱᕈᖅᐸᓪᓕᐊᒍᑕᐅᓂᐊᖅᐳᑦ ᐅᑭᐅᖅᑕᖅᑐᒥᐅᓪᓗ ᐱᒍᓐᓇᖅᓯᑎᑕᐅᓂᖅᓴᐅᓗᑎᒃ. ᑕᒪᒃᑯᐊ ᐱᖁᔭᑦ ᐋᖅᑭᒋᐊᖅᑕᐅᓂᐊᖅᖢᑎᒡᓗ ᐱᖃᑎᒋᔭᐅᓗᑎᒃ ᐃᓚᐅᑎᑕᐅᑦᓯᐊᓗᑎᒃ ᐅᑭᐅᖅᑕᖅᑐᒥ ᓯᕗᓕᖅᑎᒋᔭᐅᔪᑦ ᖃᓄᖅ ᓄᑖᖑᖅᑎᑕᐅᑦᓯᐊᕈᓐᓇᕐᓂᖏᓐᓄᑦ ᐱᖁᔭᐃᑦ, ᐊᑕᐅᑦᓯᒃᑯᑦ, ᒪᓕᒃᑕᐅᑦᓯᐊᕐᓗᑎᒃ ᓄᓇᑖᕈᑕᐅᓯᒪᔪᑦ ᓄᓇᖃᖅᑳᖅᓯᒪᔪᓄᑦ. ᓄᓇᑦᓯᐊᒥ, ᒥᓂᔅᑕ ᑎᒃᑯᐊᖅᓯᓚᐅᖅᐳᖅ ᑐᑭᒧᐊᒃᑎᑎᔨᐅᓂᐊᖅᑐᒥᒃ ᐊᖓᔪᖃᕆᔭᐅᓂᐊᖅᑐᒥᒃ ᐋᔩᖃᑎᒌᒃᑎᑎᓂᕐᒧᑦ ᑭᒡᒐᖅᑐᐃᓗᓂ ᑲᓇᑕᐅᑉ ᒐᕙᒃᑯᖏᓐᓄᑦ ᐅᖃᓪᓚᒃᑎᐅᓂᐊᕐᓗᓂ ᐋᔩᖃᑎᒋᒃᑎᑎᔨᐅᓂᐊᖅᖢᓂᓗ ᐋᖅᑭᒃᓱᖅᑕᐅᓂᐊᕐᓂᖏᓐᓄᑦ ᓄᓇᓕᕆᓂᕐᒧᑦ ᐃᒪᓕᕆᓂᕐᒧᓪᓗ ᑲᑎᒪᔨᖏᑦ ᐋᖅᑭᒋᐊᖅᑕᐅᓂᖏᓐᓄᑦ ᒪᑲᓐᓯᕚᓕᒥ ᓄᓇᒥᐅᑕᓂᒃ
ᐊᐅᓚᑦᓯᓂᖅ ᐱᖁᔭᖏᓐᓂᒃ ᐊᒻᒪᓗ ᓄᓇᑦᓯᐊᒥ ᐃᒪᓕᕆᓂᕐᒧᑦ ᐱᖁᔭᖏᑦ ᐊᒻᒪᓗ ᓄᓇᑦᓯᐊᒥ ᓄᓇᐃᑦ ᐱᔾᔪᑎᒋᓪᓗᒋᑦ ᐱᖁᔭᐃᑦ. ᐱᖁᔭᓕᐅᖅᑕᐅᓂᐊᖅᑐᑦ ᐃᒪᓐᓇᐃᓐᓂᐊᖅᐳᑦ:
ᓄᓇᑦᓯᐊᒥ

• ᐋᖅᑭᒋᐊᖅᑕᐅᓗᑎᒃ ᒪᑲᓐᓯᕚᓕᒥ ᓄᓇᒥᐅᑕᓂᒃ ᐊᐅᓚᑦᓯᓂᖅ ᐱᖁᔭᑦ ᐊᒻᒪᓗ ᓄᓇᑦᓯᐊᒥ ᓄᓇᐃᑦ ᐱᔾᔪᑎᒋᓪᓗᒋᑦ ᐱᖁᔭᐃᑦ. ᐋᖅᑭᒋᐊᕐᓗᒋᓪᓗ ᒪᑲᓐᓯᕚᓕᒥ ᓄᓇᒥᐅᑕᓂᒃ ᐱᓕᕆᐊᖃᕐᓂᕐᒧᑦ ᐊᐅᓚᑦᓯᓂᕐᒧᑦ ᐱᖁᔭᐃᑦ
• ᓄᑖᖑᖅᑎᑕᐅᓗᑎᒃ ᓄᓇᑦᓯᐊᒥ ᐃᒪᓕᕆᓂᕐᒧᑦ ᐱᖁᔭᖅ ᐊᒻᒪᓗ ᓄᓇᓕᕆᓂᕐᒧᑦ ᐱᖁᔭᑦ ᓄᓇᑦᓯᐊᒥ
• ᐋᖅᑭᒃᓱᐃᓗᑎᒃ ᓄᓇᐅᑉ ᖃᖓᓂ ᐱᔪᓐᓇᕐᓂᖃᕐᓂᕐᒧᑦ ᐱᖁᔭᐃᑦ ᓄᓇᑦᓯᐊᒥ

ᓄᓇᕗᒥ

• ᐱᐊᓂᒃᑕᐅᓗᓂ ᐱᖁᔭᖑᖅᑎᑕᐅᓂᐊᖅᑐᖅ ᓄᓇᕗᒥ ᐸᕐᓇᕐᓂᕐᒧᑦ ᐱᓕᕆᐊᒃᓴᓂᒃ ᖃᐅᔨᓴᕐᓂᕐᒧᓪᓗ ᐱᖁᔭᐃᑦ

 
ᔪᑳᓐᒥ

• ᖃᐅᔨᓴᕐᓗᑎᒃ ᐱᖓᓲᓕᖓᔪᑦ ᒐᕙᒪᒃᑯᑦ ᕿᒥᕐᕈᓗᑎᒃ ᔪᑳᓐᒥ ᐅᕙᑎᒥᐅᑕᓕᕆᓂᕐᒧᑦ ᐊᒻᒪ ᐃᓅᓯᓕᕆᓂᕐᒧᑦ ᐱᕙᓪᓕᐊᔪᓕᕆᓂᕐᒧᑦ ᖃᐅᔨᓴᕈᑎᑦ ᐱᖁᔭᖏᑦ. ᐱᖁᔭᐃᑦ ᐋᖅᑭᒃᓱᖅᑕᐅᑐᐃᓐᓇᕆᐊᖃᕐᓂᐊᖅᐳᑦ, ᕿᒥᕐᕈᔭᐅᓚᐅᕐᓗᑎᒃ.

 
ᐊᑲᐅᓯᕚᓪᓕᖅᑎᑕᐅᓂᖏᑦ ᐊᕙᑎᒥᐅᑕᓕᕆᓂᕐᒧᑦ ᑲᒪᒋᔭᖃᑦᑕᖅᑐᑦ
ᓴᓐᖏᓕᖅᑎᑕᐅᖁᓪᓗᒋᑦ ᑲᓇᑕᒥᐅᑦ ᑲᒪᒋᔭᖃᕐᓂᖏᑦ ᐊᕙᑎᒥᐅᑕᓂᒃ, ᐸᕐᓇᒃᓯᒪᒍᑎᖃᖅᐳᑦ ᐊᑲᐅᓯᕚᓪᓕᕈᑕᐅᓇᔭᖅᑐᓂᒃ ᓄᓇᓕᖕᓂ ᐊᕙᑎᒥᐅᑕᓂᒃ ᖃᐅᔨᓴᖃᑦᑕᕐᓂᖏᓐᓄᑦ ᒫᓐᓇ ᐅᑭᐅᖅᑕᖅᑐᓕᒫᒥᐅᓂ. ᑕᐃᒪᓐᓇ ᖃᐅᔨᓴᖅᑕᐅᑦᓯᐊᕐᓂᖅᓴᐅᓕᖅᐸᑕ ᐊᕙᑎᒥᐅᑕᐃᑦ ᐊᐅᓪᓛᑦᓯᐊᖅᑐᓂᒃ ᐱᕙᓪᓕᐊᑎᑎᔪᓐᓇᕐᓂᐊᕐᒪᑕ ᐃᑲᔪᖅᑕᐅᒍᑎᒃᓴᖏᓐᓂᒃ ᐅᑭᐅᖅᑕᖅᑐᒥᐅᑦ, ᐱᓕᕆᓂᐊᖅᑐᓪᓗ ᐱᖁᔭᓕᐅᖅᑎᓪᓗ ᑕᒪᕐᒥᒃ. ᑕᒪᓐᓇ ᐊᑐᖅᑕᐅᓂᐊᕐᓗᓂ, ᑲᓇᑕᐅᑉ ᒐᕙᒪᒃᑯᖏᑦ ᑮᓇᐅᔭᓂᒃ ᐊᑐᕐᓂᐊᖅᐳᑦ ᓄᓇᑦᓯᐊᒥ ᖃᐅᔨᓴᖃᑎᒌᒍᑎᒃᓴᒃᑯᑦ ᐊᒻᒪᓗ ᓄᓇᕗᒥ ᐊᕙᑎᒥᐅᑕᓂᒃ ᖃᐅᔨᓴᕈᑕᐅᕙᒃᑐᓄᑦ.


ᓴᓐᖏᔪᒃᑯᑦ ᓂᐱᖃᖁᓪᓗᒋᑦ ᓄᓇᖃᖅᑳᖅᓯᒪᔪᑦ ᐅᑭᐅᖅᑕᖅᑐᒥᐅᑦ
ᑲᓇᑕᐅᑉ ᒐᕙᒪᒃᑯᖏᑦ ᐱᓕᕆᖃᑎᖃᑦᓯᐊᖅᐳᑦ ᓄᓇᖃᖅᑳᖅᓯᒪᔪᓂᒃ ᐅᑭᐅᖅᑕᖅᑐᒥ, ᐋᔩᖃᑎᖃᖅᓯᒪᓪᓗᑎᒃ ᐊᑐᓕᖅᑎᑎᓯᒪᓪᓗᑎᒡᓗ ᓄᓇᑖᕈᑕᐅᔪᒃᓴᓂᒃ. ᒐᕙᒪᒃᑯᑦ ᑕᐃᒪᓐᓇ ᐱᓕᕆᖃᑎᖃᐃᓐᓇᕐᓂᐊᖅᐳᑦ ᓄᓇᖃᖅᑳᖅᓯᒪᔪᖤᒃ ᐅᑭᐅᖅᑕᖅᑐᒥᐅᓂᒡᓗ ᐊᑲᐅᓯᕚᓪᓕᖅᑎᑎᕙᓪᓕᐊᓂᕐᒥᖕᓄᑦ ᐱᖁᔭᓂᒃ ᐱᕙᓪᓕᐊᔪᑎᒍᑦ ᐃᑲᔪᖅᑕᐅᑦᓯᐊᖁᓪᓗᒋᑦ ᓄᓇᖃᖅᑳᖅᓯᒪᔪᑦ ᐅᑭᐅᖅᑕᖅᑐᒥᐅᓪᓗ.
ᓄᓇᑖᕐᓂᕐᒧᑦ ᐊᖏᕈᑕᐅᓯᒪᔪᑦ ᐅᑭᐅᖅᑕᖅᑐᒥ ᓄᑖᒃᑯᑦ ᐱᓕᕆᒍᑕᐅᖕᒪᑕ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓄᓇᖃᖅᑳᖅᓯᒪᔪᓄᓪᓗ.

ᑕᐃᒪᓐᓇ ᐱᓕᕆᖃᑎᒌᒃᖢᑎᒃ ᐊᐅᓚᑦᓯᖃᑎᒌᒃᓯᒪᕗᑦ ᓄᓇᒥᐅᑕᓂᒃ ᑐᓴᐅᒪᖃᑦᑕᐅᑎᑦᓯᐊᖅᖢᑎᒡᓗ ᐱᓕᕆᖃᑎᖃᖅᖢᑎᒃ ᓄᓇᖃᖅᑳᖅᓯᒪᔪᓂᒃ ᓄᓇᐃᑦ ᐊᑐᖅᑕᐅᓂᕆᓂᐊᖅᑕᖏᓐᓄᑦ ᐸᕐᓇᒃᓯᒪᖃᑎᒌᒃᖢᑎᒃ, ᐱᖁᔭᓕᐅᖅᑕᐅᓂᐊᖅᑐᓂᒃ ᐱᓕᕆᖃᑎᒌᒃᖢᑎᒃ, ᐊᕙᑎᒥᐅᑕᓕᕆᓂᕐᒧᑦ ᖃᐅᔨᓴᕈᑕᐅᓂᐊᖅᑐᓂᒡᓗ ᐱᓕᕆᖃᑎᒌᒃᖢᑎᒃ.

ᐋᖅᑭᒋᐊᕈᑕᐅᓂᐊᖅᑐᑦ ᒫᓐᓇ ᐱᖁᔭᐅᔪᓄᑦ ᖃᓄᕐᓗ ᐱᖁᔭᐃᑦ ᑲᒪᒋᔭᐅᓂᐊᕐᓂᖏᓐᓄᑦ, ᑖᒃᑯᐊ ᐃᓚᐅᑎᑕᐅᓗᑎᒃ ᓄᓇᓕᕆᓂᕐᒧᑦ ᐃᒪᓕᕆᓂᕐᒧᓪᓗ ᑲᑎᒪᔨᑦ ᖃᓄᐃᓐᓂᕆᓂᐊᖅᑕᖏᓐᓄᑦ ᓄᓇᑦᓯᐊᒥ, ᐱᓕᕆᐊᕆᔭᐅᓂᐊᖅᐳᑦ ᑲᒪᒋᔭᐅᑦᓯᐊᕐᓗᑎᒃ ᓄᓇᑖᕐᓂᕐᒧᑦ ᐊᖏᕈᑕᐅᓯᒪᔪᑦ ᑲᓇᑕᐅᑉ ᒐᕙᒪᒃᑯᖏᓪᓗ ᐱᓕᕆᐊᖃᕆᐊᖃᕐᓂᖏᓐᓄᑦ ᓄᓇᖃᖅᑳᖅᓯᒪᔪᓂᒃ.