ᐊᑐᕚ, ᐋᓐᑎᐅᕆᔪ  - ᒥᓂᔅᑕ ᓴᒃ ᓯᑖᓪ, ᒥᓂᔅᑕ ᐃᓄᓕᕆᔨᑐᖃᒃᑯᓐᓄᑦ ᐊᒻᒪ ᐱᓕᕆᐊᖃᖅᖢᓂ ᐊᓪᓚᖓᔪᓂᒃ ᐃᓕᑕᕆᔭᐅᓯᒪᔪᑎᖃᖏᑦᑐᓄᓪᓗ ᐊᓪᓚᓄᑦ, ᐅᓪᓗᒥ ᑐᓴᖅᑎᑎᓚᐅᖅᐳᖅ ᑲᑎᒪᕕᒡᔪᐊᖅᑐᓂ ᐊᑐᕚᒥ ᐱᖁᔭᕐᔪᐊᒥᒃ Bill C-25, ᓄᓇᕗᒥ ᐸᕐᓇᒍᑎᖃᕐᓂᕐᒧᑦ ᐱᓕᕆᐊᖑᓂᐊᖅᑐᓂᒃ ᐱᖁᔭᕐᔪᐊᖅ.

"ᐊᑐᓕᖅᑎᑕᐅᓚᐅᖅᑎᓪᓗᒋᑦ ᓄᓇᑖᕈᑎᒃᓴᑦ ᓯᕗᓪᓕᖅᐸᐅᑎᑕᐅᕗᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ," ᐅᖃᓚᐅᖅᐳᖅ ᒥᓂᔅᑕ ᓯᑖᓪ.

"ᑖᓐᓇ ᐱᖁᔭᕐᔪᐊᖅ ᖃᐅᔨᓐᓇᕈᑕᐅᕗᖅ ᒐᕙᒪᒃᑯᑦ ᐱᓕᕆᖃᑎᖃᕈᒪᖕᒪᑕ ᐱᓕᕆᖃᑎᒋᓂᐊᖅᑕᒥᖕᓂᒃ, ᓄᓇᕗᑦ ᒐᕙᒪᒃᑯᖏᓐᓂᒃ, ᓄᓇᕗᑦ ᑐᓐᖓᕕᒃᑯᑦ ᑎᒥᖓᓐᓂᒃ ᐊᒻᒪᓗ ᐃᓄᖕᓂᒃ ᐱᓕᕆᐊᕆᔭᐅᓂᐊᕐᓂᕋᓚᐅᖅᑐᖅ ᐱᓕᕆᐊᕆᔭᐅᔪᓐᓇᖁᓪᓗᒍ ᒪᓕᒡᓗᒋᑦ ᓄᓇᕗᒥ ᓄᓇᑖᕈᑕᐅᓯᒪᔪᑦ ᐊᖏᕈᑎᑦ. ᖁᔭᓐᓇᒦᕈᒪᕙᒃᑲ ᐱᓕᕆᖃᑎᒋᔭᖅᐳᑦ ᐱᓕᕆᓂᕐᒧᑦ ᑲᑎᒪᔨᓂᑦ ᐃᑲᔪᓚᐅᕐᒪᑕ ᐱᕙᓪᓕᐊᑎᑕᐅᓂᖏᓐᓄᑦ ᐱᖁᔭᕐᔪᐊᑦ, ᐱᒻᒪᕆᐅᓪᓗᓂᓗ ᓄᓇᕗᑦ ᓯᕗᓂᒃᓴᖓᓄᑦ.

ᐱᖁᔭᕐᔪᐊᖅ ᐱᔾᔪᑎᖃᖅᐳᖅ ᓇᓗᓇᐃᔭᑦᓯᐊᖅᓯᒪᖁᓪᓗᒍ, ᒪᓕᒍᑎᑦᓯᐊᖁᓪᓗᒍᓗ ᒪᓕᒐᑎᒍᑦ ᐋᖅᑭᐅᒪᑦᓯᐊᖁᓪᓗᒍᓗ ᓄᓇᓂᒃ ᐸᕐᓇᐅᑎᖃᖃᑦᑕᕐᓂᖅ ᐊᕙᑎᒥᐅᑕᓂᒡᓗ ᖃᐅᔨᓴᖃᑦᑕᕐᓂᖅ ᓄᓇᕗᒥ. ᑖᓐᓇ ᐱᖁᔭᕐᔪᐊᖅ ᑭᒡᒐᖅᑐᐃᒍᑕᐅᕗᖅ ᐱᓕᕆᒍᑎᖃᕐᓂᐊᕐᓂᑦᑎᓐᓄᑦ ᐸᕐᓇᐅᑕᐅᓯᒪᔪᓂᒃ ᐅᑭᐅᖅᑕᖅᑐᒥ ᐱᖁᔭᓕᐅᖅᐸᓪᓕᐊᓗᓂ ᐅᖃᖅᓯᒪᔪᑦ ᒪᓕᒡᓗᒋᑦ  Action Plan to Improve the North's Regulatory Regimes. ᑕᒪᕐᒥᒃ ᐱᖁᔭᕐᔪᐊᑦ ᐊᒻᒪᓗ ᐸᕐᓇᒍᑕᐅᓂᐊᖅᑐᑦ ᐱᔾᔪᑎᖃᕐᓂᐊᖅᐳᑦ ᓴᓐᖏᔪᒥᒃ, ᐱᓕᕆᒍᑕᐅᓂᐊᖅᑐᒥᒃ ᓇᓗᓇᐃᔭᑦᓯᐊᖅᓯᒪᓗᓂ, ᒪᓕᒍᑎᑦᓯᐊᕐᓗᓂ ᐊᒻᒪᓗ ᐸᕐᓇᒃᓯᒪᐅᑕᐅᑦᓯᐊᕐᓗᓂ ᖃᐅᔨᓴᕈᑕᐅᑦᓯᐊᕐᓗᓂᓗ ᐱᕙᓪᓕᐊᓂᖃᕐᓂᐊᖅᐳᒍᑦ.

ᐱᖁᔭᕐᔪᐊᖅ ᐱᒋᐊᕈᑕᐅᕗᑦ ᒐᕙᒪᒃᑯᑦ ᑲᓇᑕᒥ  ᐱᖁᔭᕐᔪᐊᓕᐅᕐᓂᐊᕐᓂᕋᓚᐅᖅᓯᒪᖕᒪᑕ ᓄᓇᕗᒥ ᓄᓇᑖᕈᑕᐅᓯᒪᔪᑦ ᐊᖏᕈᑎᖏᑦ ᒪᓕᒡᓗᒋᑦ 1993-ᒥ.

"ᐊᑐᓕᖅᑎᑕᐅᒃᐸᑦ ᐱᖁᔭᕐᔪᐊᖅ ᑐᓐᖓᕕᖃᑦᓯᐊᕐᓂᐊᖅᐳᑦ ᓯᕗᓂᒃᓴᐅᓂᐊᖅᑐᒥ ᓄᒃᑎᕆᓂᕐᒧᑦ ᐱᓕᕆᐊᒃᓴᓂᒃ ᓄᓇᑖᕈᑎᒧᑦ ᐱᔾᔪᑎᖃᖅᑐᓂᒃ ᐊᐅᓚᑦᓯᓂᕐᒥᒡᓗ ᓄᓇᒥᐅᑕᓂᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐸᕐᓇᒃᑎᑕᐅᓗᑎᒡᓗ ᓄᓇᕗᒥ ᐱᓕᕆᐊᒃᓴᖃᖅᑎᑕᐅᓂᖅᓴᐅᖁᓪᓗᒋᑦ ᑕᒪᒃᑯᓂᖓᑮᓇᐅᔭᓕᐅᕈᑎᓂᒃ, ᓄᓇᒥᖕᓂᒃ ᓯᕗᓂᒃᓴᒧᑦ ᐱᕙᓪᓕᐊᒍᑕᐅᓂᐊᖅᑐᓂᒡᓗ," ᐅᖃᓚᐅᖅᐳᖅ ᒥᓂᔅᑕ ᓕᐅᓇ ᐊᒡᓗᒃᑲᖅ ᑲᑎᒪᔨᐅᔪᖅ ᐊᑐᕚᒥ ᓄᓇᕗᒥᐅᓂᒃ ᑭᒡᒐᖅᑐᐃᓪᓗᓂ."

"ᑖᓐᓇ ᐱᖁᔭᕐᔪᐊᖅ ᐱᒻᒪᕆᐅᔪᒃᑯᑦ ᐊᓪᓗᕆᐊᕈᑕᐅᕗᖅ ᐊᑲᐅᓯᕚᓪᓕᖅᓯᒪᔪᒃᑯᑦ ᐊᐅᓚᑦᓯᔪᓐᓇᖁᓪᓗᒋᑦ ᓄᓇᕗᒥᐅᑦ ᓄᓇᒥᖕᓂᒃ ᓄᓇᒥᐅᑕᓂᒡᓗ ᐱᕙᓪᓕᐊᑎᑦᑎᓗᑎᒃ. ᑲᑎᒪᖃᑎᒌᖃᑦᑕᖅᓯᒪᕗᒍᑦ ᐱᕙᓪᓕᐊᑦᓯᐊᖅᑎᓪᓗᒋᑦ ᓄᓇᕗᒥᐅᑦ ᑕᑯᕙᓪᓕᐊᒍᒪᓪᓗᑕᓗ."

ᑕᐃᒪᓐᓇ ᐱᕙᓪᓕᐊᑎᑎᓂᖅ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑎᒃᓴᓂᒃ ᑕᐃᒪᓐᓇ ᐊᑐᓕᖅᑎᑕᐅᓯᒪᓗᓂ ᐊᐅᓪᓛᑦᓯᐊᕐᓂᖅ, ᐃᖏᕐᕋᑦᓯᐊᕐᓗᓂ ᐊᑲᐅᓗᑎᒡᓗ ᐱᖁᔭᖏᑦ ᐱᒋᐊᕈᑕᐅᑦᓯᐊᒃᑲᓐᓂᕐᓂᐊᖅᐳᖅ ᐱᕙᓪᓕᐊᑎᑕᐅᒍᑎᒃᓴᖏᓐᓄᑦ. ᑖᒃᑯᐊ ᐱᖁᔭᕐᔪᐊᑦ ᐱᑕᖃᖅᐳᑦ ᑎᑎᕋᖅᓯᒪᔪᒃᑯᑦ ᖃᖓ ᖃᓄᐃᓕᐅᕐᓂᐊᕐᓂᖏᑦ ᐱᖁᔭᑎᒍᑦ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎᖃᕐᓂᕐᒧᓪᓗ ᐊᕙᑎᒥᐅᑕᓂᒃ ᖃᐅᔨᓴᕐᓂᕐᒧᓪᓗ ᐱᔾᔪᑎᖃᖅᑎᑕᐅᓂᐊᖅᐳᑦ.

ᐱᕙᓪᓕᐊᒍᑕᐅᒃᑲᓐᓂᕐᓂᐊᖅᖢᓂᓗ ᖃᓄᐃᓕᐅᕈᒪᓯᒪᖏᓐᓄᑦ ᒪᓕᒡᓗᑎᒃ ᐅᑭᐅᖅᑕᖅᑐᒥ ᐸᕐᓇᒃᓯᒪᒍᑎᓂᒃ  Northern Strategy, ᐱᓗᐊᖅᑐᒥᒃ ᓴᖅᑭᔮᖅᑎᑎᓂᖅ ᐱᕙᓪᓕᐊᒍᑎᒃᓴᓂᒃ ᐊᒻᒪᓗ ᓴᐳᔾᔭᐅᒍᑎᒃᓴᖏᓐᓂᒃ ᐊᕙᑎᒥᐅᑕᐃᑦ ᐅᑭᐅᖅᑕᖅᑐᒥ ᓇᓗᓇᐃᔭᑦᓯᐊᖅᓯᒪᔪᒃᑯᑦ ᐅᑭᐅᖅᑕᖅᑐᒥ ᒐᕙᒪᒃᑯᑦ ᓇᖕᒥᓂᖅ ᐱᓕᕆᕕᒡᔪᐊᖃᖅᑐᓪᓗ ᖃᓄᐃᓕᐅᕆᐊᖃᕐᓂᖏᓐᓄᑦ.

ᖃᓄᐃᓕᐅᕈᑕᐅᓯᒪᓂᖓ - ᓄᓇᕗᒥ ᐸᕐᓇᒃᓯᒪᒍᑎᑦ ᐊᒻᒪ ᐱᓕᕆᐊᒃᓴᓄᑦ ᐸᕐᓇᒃᓯᒪᒍᑎᖏᓐᓄᑦ ᐱᖁᔭᕐᔪᐊᖅ

ᐊᐱᖁᑎᒋᔭᐅᒐᔪᒃᑯᑦ - ᓄᓇᕗᒥ ᐸᕐᓇᒃᓯᒪᒍᑎᑦ ᐊᒻᒪ ᐱᓕᕆᐊᒃᓴᓄᑦ ᐸᕐᓇᒃᓯᒪᒍᑎᖏᓐᓄᑦ ᐱᖁᔭᕐᔪᐊᖅ



ᖃᓄᐃᓕᐅᕈᑕᐅᓯᒪᓂᖓ - ᓄᓇᕗᒥ ᐸᕐᓇᒃᓯᒪᒍᑎᑦ ᐊᒻᒪᓗ ᐱᓕᕆᐊᒃᓴᓄᑦ ᐸᕐᓇᒃᓯᒪᒍᑎᑦ ᐱᖁᔭᕐᔪᖅ

ᓄᓇᕗᒥ ᓄᓇᑖᕈᑕᐅᓯᒪᔪᓄᑦ ᐊᖏᕈᑦ ᐱᖁᔭᕐᔪᐊᖅᑕᖃᕆᐊᖃᕐᒪᑦ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎᖃᕐᓂᕐᒧᓪᓗ ᐊᕙᑎᒥᐅᑕᓂᒃ ᖃᐅᔨᓴᕐᓂᕐᒧᓪᓗ. ᑕᒪᓐᓇ ᐋᖅᑭᒃᓯᒍᑎᖃᕐᓂᐊᖅᐳᒍᑦ ᐊᑲᐅᓈᖅᑐᒃᑯᑦ, ᐊᐅᓪᓛᑦᓯᐊᖅᑐᒥᒡᓗ "ᐊᑕᐅᓯᐅᓈᖅᓯᒪᔪᒥᒃ"
ᐱᓕᕆᒍᑎᖃᕈᓐᓇᖁᓪᓗᑕ ᓴᖅᑭᔮᖅᑎᑎᓂᕐᒧᑦ "ᐊᑕᐅᓯᕐᒥᒃ ᐱᓕᕆᐊᒥᒃ" - ᐊᑕᐅᓯᐊᕐᓗᓂ ᖃᐅᔨᓴᕈᑕᐅᓯᒪᔪᒥᒃ" ᑕᐃᒪᓐᓇ ᐱᕙᓪᓕᐊᑎᑕᐅᓂᐊᖅᑐᒥᒃ ᓄᓇᒥᖔᖅᑐᓂᒃ ᐱᓕᕆᐊᖃᕐᓗᑕ ᓄᓇᒥᒃ ᐊᑐᕐᓂᕐᒧᑦ ᐸᕐᓇᒃᓯᒪᒍᑎᒥᒡᓗ ᐊᖏᕈᑕᐅᓯᒪᔪᒃᑯᑦ.

ᑖᓐᓇ ᐱᖁᔭᕐᔪᐊᓕᐅᕈᑕᐅᓯᒪᖏᑦᑐᑐᐊᖑᓕᖅᐳᖅ ᐊᖏᓪᓗᓂ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐱᔭᐅᒋᐊᖃᖅᑐᖅ ᐱᔾᔪᑎᖃᖅᖢᓂ ᑐᕌᖅᖢᓂ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓄᑦ. ᐱᖁᔭᕐᔪᐊᖅ ᐱᒋᐊᕈᑕᐅᓯᒪᕗᖅ ᑲᑎᒪᖃᑎᒋᔭᐅᖃᑦᑕᖅᓯᒪᓪᓗᑎᒃ ᓄᓇᕗᑦ
ᒐᕙᒪᒃᑯᖏᑦ, ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦ, ᓄᓇᕗᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᐊᒻᒪᓗ ᓄᓇᕗᒥ ᐸᕐᓇᐃᔨᑦ ᑲᑎᒪᔨᖏᑦ.

ᓇᓗᓇᐃᖅᓯᒍᑕᐅᓂᐊᖅᖢᑎᒡᓗ, ᖃᓄᐃᓕᐅᕈᑕᐅᓂᐊᖅᑐᓂᒃ ᐱᓕᕆᐊᒃᓴᓂᒃ ᒪᓕᒍᑎᑦᓯᐊᕐᓗᑎᒡᓗ ᒪᓕᒐᑎᒍᑦ ᐋᖅᑭᐅᒪᑦᓯᐊᕐᓗᑎᒡᓗ ᐸᕐᓇᒍᓯᐅᔪᖅ ᖃᐅᔨᓴᕈᓯᐅᔪᕐᓗ ᓄᓇᕗᒥ ᑮᓇᐅᔭᑎᒍᑦ ᐱᕙᓪᓕᐊᓂᖃᑦᓯᐊᖁᓪᓗᒋᑦ
ᐃᑲᔪᕈᑎᖃᑦᓯᐊᖁᓪᓗᒋᓪᓗ ᐃᓄᐃᑦ, ᐅᑭᐅᖅᑕᖅᑐᒥᐅᑦ ᓇᖕᒥᓂᖅ ᐱᓕᕆᕕᒡᔪᐊᖃᖅᑐᓪᓗ.

ᑲᓇᑕᐅᑉ ᒐᕙᒪᒃᑯᖏᑦ ᑐᓴᖅᑎᑎᓵᓚᐅᖅᐳᑦ ᐸᕐᓇᒍᑕᐅᓯᒪᔪᒥᒃ ᐊᑲᐅᓯᕚᓪᓕᖅᑎᑕᐅᖁᓪᓗᒋᑦ ᐱᖁᔭᐃᑦ ᐅᑭᐅᖅᑕᖅᑐᒥ, ᑕᒪᓐᓇ ᐱᐊᓂᒍᑕᐅᓂᐊᖅᖢᓂ ᓴᓐᖏᓕᖅᑎᕈᑕᐅᓂᐊᖅᖢᓂᓗ ᒫᓐᓇ ᐱᖁᔭᓄᑦ. ᐱᖁᔭᕐᔪᐊᖅ ᐸᕐᓇᒃᑕᐅᓂᐊᕐᓂᕋᖅᑕᐅᓯᒪᔪᒥᒃ ᒪᓕᒃᐳᖅ ᓴᓐᖏᔪᒃᑯᑦ, ᐊᑲᐅᔪᒃᑯᓪᓗ ᓇᓗᓇᐃᔭᑦᓯᐊᖅᓯᒪᔪᒃᑯᓪᓗ ᒪᓕᒍᑎᑦᓯᐊᖅᑐᒃᑯᓪᓗ ᐸᕐᓇᒃᓯᒪᒍᑎᖃᖁᓪᓗᒋᑦ ᖃᐅᔨᓴᖅᑕᐅᒍᑎᓂᒡᓗ ᐱᕙᓪᓕᐊᑎᑎᓂᐊᕐᓗᑎᒃ.


ᖃᓄᐃᓕᐅᕈᑕᐅᓯᒪᓂᖓ

1993-ᒥ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓕᐅᖅᑕᐅᓯᒪᔪᑦ ᐱᖁᔭᕐᔪᐊᖓᑦ ᐱᑕᖃᕆᐊᖃᕐᒪᑦ ᐃᓄᐃᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᑦ ᐋᖅᑭᒃᓯᓯᒪᖃᑎᒌᒋᐊᖃᕐᓂᖏᓐᓄᑦ ᓄᓇᒥᐅᑕᓂᒃ ᐊᐅᓚᑦᓯᒍᑎᒃᓴᓂᒃ ᐱᖁᔭᖃᕐᓗᑎᒃ ᓄᓇᒥᒃ ᐊᑐᕐᓂᕐᒧᑦ ᐸᕐᓇᒃᓯᒪᒍᑎᒃᓴᓂᒃ ᐊᕙᑎᒥᐅᑕᓂᒡᓗ ᖃᐅᔨᓴᕈᑎᒃᓴᓂᒃ ᓄᓇᕗᒥ ᓄᓇᑖᕐᕕᐅᓯᒪᔪᒥ ᑕᒪᒃᑯᓇᓂᓗ ᓄᓇᓂ ᐊᓯᖏᓐᓂ ᓯᑯᖃᖅᑐᓂ. ᓄᓇᕗᒥ ᐃᒪᐃᑦ ᓄᓇᕗᒥᓗ ᓄᓇᐃᑦ ᖃᖏᓐᓂ ᐋᖅᑭᒋᐊᒃᑲᐃᔩᑦ ᐱᖁᔭᕐᔪᐊᖓᑦ ᐊᖏᖅᑕᐅᒍᑕᐅᓚᐅᖅᓯᒪᕗᖅ ᒪᓕᒐᖑᖅᑎᑕᐅᓪᓗᓂ 2002-ᒥ ᐃᓚᖓᒍᑦ ᓯᕗᓪᓕᑦ ᐱᖁᔭᐃᑦ ᐊᑐᓕᖅᑕᐅᑎᑕᐅᓪᓗᑎᒃ.

ᐱᓕᕆᐊᕆᔭᐅᓯᒪᔪᑦ ᓄᓇᕗᒥ ᐸᕐᓇᒃᓯᒪᒍᑎᖃᕐᓂᕐᒧᑦ ᐱᓕᕆᐊᒃᓴᐅᓂᐊᖅᑐᒥᒡᓗ ᖃᐅᔨᓴᕈᑎᖃᕐᓂᕐᒧᑦ ᐱᖁᔭᕐᔪᐊᖅ ᐱᒋᐊᖅᑕᐅᓚᐅᖅᓯᒪᓪᓗᓂ 2002-ᒥ. ᑕᒪᒃᑯᐊ ᐃᓄᐃᑦ ᑲᑎᒪᖃᑎᒋᔭᐅᕙᒡᓗᑎᒃ ᑲᓇᑕᐅᑉ ᒐᕙᒪᒃᑯᖏᓪᓗ ᓄᓇᕗᒥᓗ ᐱᖁᔭᓕᐅᕐᓂᕐᒧᑦ ᑲᑎᒪᔨᖏᑦ (ᑭᒡᒐᖅᑐᖅᑎᖃᖢᑎᒃᐃᓄᓕᕆᔨᑐᖃᒃᑲᓐᓂᖔᖅᑐᓯᒪᔪᒥᒃ), ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦ, ᐊᒻᒪᓗ ᓄᓇᕗᑦ ᒐᕙᒪᒃᑯᖏᑦ, ᐃᑲᔪᖅᑕᐅᓪᓗᑎᒡᓗ ᓄᓇᕗᒥ ᐸᕐᓇᖕᓂᕐᒧᑦ ᑲᑎᒪᔨᖏᓐᓄᑦ.

ᑖᒃᑯᐊ ᑲᑎᒪᖃᑎᒌᒃᖢᑎᒃ ᐱᓕᕆᖃᑎᒌᖃᑦᑕᖅᑐᑦ ᑲᑎᒪᖃᑦᑕᓚᐅᖅᐳᑦ ᑎᑭᓪᓗᒍ 2007 ᐅᖃᐅᓯᖃᖅᖢᑎᒃ ᐋᖅᑭᒃᓱᐃᓪᓗᑎᒡᓗ ᐊᑐᐊᒐᒃᓴᓂᒃ, ᖃᓄᐃᑦᑐᓂᒡᓗ ᐃᓕᔭᐅᓯᒪᖏᑦᑐᓂᒃ ᒪᓕᒐᕐᓂ, ᐊᐱᖁᑎᒋᔭᐅᓯᒪᔪᑦ ᑭᐅᔭᐅᖁᓪᓗᒋᑦ ᒪᓕᒐᑎᒍᓪᓗ ᑐᑭᑖᖅᑎᑕᐅᔪᓐᓇᖁᓪᓗᒋᑦ ᐊᖏᕈᑦ ᖃᓄᖅ ᑐᑭᖃᕐᓂᖓᓄᑦ ᑕᒪᒃᑯᐊᓗ ᒪᓕᒍᑎᒋᐊᖃᕐᓂᖏᓐᓄᑦ ᐱᖁᔭᓄᑦ. ᑕᒪᒃᑯᐊ ᑭᓯᐊᓂ

ᓈᒻᒪᒃᓯᖕᒪᑕ ᐱᒋᐊᕈᑕᐅᓕᓚᐅᖅᐳᖅ 2007-ᒥ, ᐱᖁᔭᐃᑦ ᑎᑎᕋᖅᑕᐅᕙᓪᓕᐊᓕᖅᖢᑎᒃ ᑖᒃᑯᓄᖓ ᐋᖅᑭᒃᓱᖅᑕᐅᓪᓗᑎᒃ ᐸᕐᓇᖕᓂᕐᒧᑦ ᑲᑎᒪᔨᒋᔭᐅᔪᓄᑦ.

ᓄᓇᕗᒥ ᐸᕐᓇᒃᓯᒪᓂᕐᒧᑦ ᐊᒻᒪᓗ ᐱᓕᕆᐊᕆᔭᐅᓂᐊᖅᑐᓂᒃ ᐱᖁᔭᕐᔪᐊᑦ ᒪᓕᒐᑎᒍᑦ ᑲᓇᑕᐅᑉ ᒐᕙᒪᒃᑯᖏᑦᑕ ᐱᓕᕆᐊᕆᓂᐊᕐᓂᕋᓚᐅᖅᑕᖏᑦ ᐱᕙᓪᓕᐊᔭᐅᕗᑦ ᒪᓕᒐᖑᖅᑎᑎᓪᓗᑎᒃ ᑲᓇᑕᐅᑉ ᒐᕙᒪᒃᑯᖏᑦ ᐅᓂᒃᑳᕈᑎᖃᖅᑐᓂᒃ ᓄᓇᒥᒃ ᐊᑐᕐᓂᕐᒧᑦ ᐸᕐᓇᐅᑎᓂᒃ ᖃᐅᔨᓴᖅᑕᐅᓯᒪᒋᐊᖃᖅᑐᓂᒡᓗ. ᑖᒃᑯᐊ ᐊᑖᒍᑦ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᑦ, ᓄᓇᕗᒥ ᐸᕐᓇᒃᑎᑦ ᑲᑎᒪᔨᖏᑦ ᖃᐅᔨᓴᕈᑎᒃᓴᓂᒡᓗ ᐸᕐᓇᒃᑎᑦ ᑲᑎᒪᔨᖏᑦ ᐋᖅᑭᒃᑕᐅᓚᐅᖅᓯᒪᓪᓗᑎᒃ 1997-ᒥ ᑎᒥᐅᓪᓗᑎᒃ ᒐᕙᒪᒃᑯᓐᓄᑦ.

ᐱᖁᔭᕐᔪᐊᖅ ᐋᖅᑭᒃᓯᒍᑕᐅᓂᐊᖅᐳᖅ ᑖᒃᑯᓂᖓ ᑲᑎᒪᔨᐅᔪᓂᒃ ᐅᓂᒃᑳᖅᑕᐅᓯᒪᓪᓗᑎᒃ ᖃᓄᐃᓕᐅᖃᑦᑕᕆᐊᖃᕐᓂᖏᓐᓄᑦ ᐊᐅᓚᓂᕆᓂᐊᖅᑕᖏᑦ.

ᖃᓄᐃᓕᖓᓂᖏᑦ ᐱᖁᔭᕐᔪᐊᒥ Bill C-25:

ᐱᖁᔭᕐᔪᐊᖑᓂᐊᖅᑐᖅ ᐊᖏᒡᓕᒋᐊᖅᑕᐅᕗᖅ ᐃᓄᐃᑦ, ᐃᓚᐅᑎᑕᐅᓂᖅᓴᐅᔪᓐᓇᖁᓪᓗᒋᑦ, ᐋᖅᑭᒃᑕᐅᓚᐅᖅᓯᒪᒐᓗᐊᖅᖢᓂ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᑎᒍᑦ, ᐃᓚᐅᑎᑕᐅᓂᕐᒧᑦ ᐊᐅᓚᑦᓯᓗᑎᒃ ᐱᕙᓪᓕᐊᔪᓂᒃ ᓄᓇᕗᒥ. ᐃᒪᓐᓇ ᐋᖅᑭᒃᓯᒪᓂᐊᕐᓗᓂ:

• ᓄᓇᕗᒥ ᐸᕐᓇᒃᑎᑦ ᑲᑎᒪᔨᖏᑦ ᐊᐅᓚᐃᓐᓇᕈᓐᓇᖁᓪᓗᒋᑦ ᐊᒻᒪᓗ ᓄᓇᕗᒥ ᖃᐅᔨᓴᕐᓂᕐᒧᑦ ᑲᑎᒪᔨᖏᑦ ᓴᓐᖏᓂᖏᓪᓗ ᐅᖃᖅᓯᒪᑦᓯᐊᕐᓗᑎᒃ, ᐱᓕᕆᐊᒃᓴᖏᓪᓗ ᖃᓄᐃᓕᐅᕈᑎᖏᓪᓗ, ᐊᒻᒪᓗ ᐅᖃᖅᓯᒪᓗᓂ ᑎᒃᑯᐊᖅᑕᐅᔪᓐᓇᕐᓂᖏᑦ ᑲᑎᒪᔨᒃᓴᖏᓐᓄᑦ. ᐅᖃᖅᓯᒪᑦᓯᐊᕐᓗᑎᒡᓗ ᖃᓄᐃᓕᐅᕆᐊᖃᖃᑦᑕᕐᓂᖏᓐᓄᑦ ᐊᒻᒪᓗ ᖃᓄᖅ ᐱᔪᓐᓇᕐᓂᖃᕐᓂᖏᓐᓄᑦ ᐃᓄᐃᑦ ᐊᒻᒪᓗ ᒐᕙᒪᒃᑯᑦ;
• ᐋᖅᑭᒃᓯᓯᒪᓗᑎᒃ ᖃᖓ ᐱᐊᓂᒃᑕᐅᒋᐊᖃᕐᓂᖏᓐᓄᑦ ᐊᔾᔨᒌᖏᑦᑐᑦ ᐃᓱᒪᓕᐅᕈᑕᐅᔪᑦ ᓄᓇᒥᒃ ᐊᑐᕐᓂᕐᒧᑦ ᖃᐅᔨᓴᖃᑦᑕᕐᓂᕐᒧᓪᓗ ᐱᓕᕆᒍᑎᑦ ᐊᐅᓪᓛᑦᓯᐊᕐᓗᑎᒃ ᐱᖁᔭᑎᒍᑦ ᐅᖃᐅᓯᕆᔭᐅᓯᒪᓗᑎᒃ.
• ᓇᓗᓇᐃᖅᓯᓯᒪᓗᑎᒃ ᓄᖃᖅ, ᑭᒃᑯᓪᓗ, ᓄᓇᒥᒃ ᐊᑐᕐᓂᕐᒧᑦ ᐸᕐᓇᒃᓯᒪᒍᑎᓕᐅᖃᑦᑕᕐᓂᐊᕐᓂᖏᓐᓄᑦ, ᐋᖅᑭᒋᐊᖅᓯᖃᑦᑕᕐᓂᐊᕐᓂᖏᓐᓄᓪᓗ, ᕿᒥᕐᕈᒋᐊᖃᕐᓂᖏᓐᓄᓪᓗ ᐊᑐᓕᖅᑕᐅᓂᐊᖅᑐᓂᒃ ᓄᓇᕗᒥ;
• ᐅᓂᒃᑳᖅᓯᒪᓗᑎᒃ ᖃᓄᖅ ᓄᓇᕗᒥ ᐸᕐᓇᒃᑎᖏᑦᑕ ᑲᑎᒪᔨᖏᑦ ᐊᒻᒪᓗ ᓄᓇᕗᒥ ᖃᐅᔨᓴᖅᑎᑦ ᐸᕐᓇᒃᑎᖏᑦ ᖃᓄᖅ ᕿᒥᕐᕈᖃᑦᑕᕐᓂᐊᕐᓂᖏᓐᓄᑦ ᐱᕙᓪᓕᐊᑎᑎᒍᒪᓂᕐᒧᑦ ᑐᒃᓯᕋᐅᑕᐅᔪᑦ ᖃᓄᕐᓗ ᓄᓇᐃᑦ ᐊᑐᖅᑕᐅᖃᑦᑕᕈᓐᓇᕐᓂᐊᕐᓂᖏᓐᓄᑦ ᐱᕙᓪᓕᐊᔪᓕᕆᔨᐅᔪᓂᑦ ᓄᓇᒥᒃ ᓄᓇᒥ ᐱᕙᓪᓕᐊᕕᐅᓂᐊᖅᑐᓂ ᐊᓯᖏᓐᓂᓗ ᓄᓇᓂ ᓯᑯᖃᖅᑐᓂ;
• ᐋᖅᑭᒋᐊᖅᑕᐅᓯᒪᓗᓂ ᓄᓇᐃᑦ ᐊᔾᔨᒌᖏᑦᑐᑦ ᖃᓄᖅ ᖃᐅᔨᓴᕐᕕᐅᖃᑦᑕᕐᓂᐊᕐᓂᖏᓐᓄᑦ ᕿᒥᕐᕈᔨᓄᑦ, ᐱᔪᓐᓇᕐᓂᖃᖅᑎᑕᐅᑦᓯᐊᕐᓗᑎᒃ ᓄᓇᕗᒥ ᑲᓇᑕᐅᓪᓗ ᒐᕙᒪᒃᑯᖏᑦ ᕿᒥᕐᕈᓂᕐᒧᑦ ᖃᐅᔨᓴᕐᓂᕐᒧᓪᓗ ᐱᓕᕆᐊᖑᓂᐊᖅᑐᓂᒃ ᓄᓇᐃᑦ ᓯᓚᑎᖏᓐᓂ ᐊᑲᐅᖏᓕᐅᕈᑕᐅᕕᐅᑐᐃᓐᓇᕆᐊᖃᖅᑐᓂ ᓄᓇᑖᕈᑕᐅᓯᒪᔪᓄᑦ;
• ᐱᑕᖃᕐᓗᓂ ᐱᕙᓪᓕᐊᑎᑎᒍᑎᒃᓴᓂᒃ ᖃᓄᕐᓗ ᖃᐅᔨᓴᖅᑕᐅᓂᐊᕐᓂᖏᓐᓄᑦ ᐸᕐᓇᒃᓯᒪᒍᑎᖃᕈᓐᓇᖁᓪᓗᒋᑦ ᑕᒪᒃᑯᐊ ᒐᕙᒪᒃᑯᑦ ᖃᐅᔨᓴᕈᓐᓇᖃᑦᑕᖁᓪᓗᒋᑦ ᑲᒪᒋᔭᖃᖃᑦᑕᖁᓪᓗᒋᓪᓗ ᐊᕙᑎᒥᐅᑕᓂᒃ, ᐃᓅᓯᓕᕆᓂᕐᒥᒃ ᐱᕙᓪᓕᐊᔪᓕᕆᒍᑕᐅᔪᒃᓴᓂᒡᓗ ᐱᓕᕆᐊᕆᔭᐅᔪᓄᑦ;
• ᐋᖅᑭᒃᓯᓯᒪᒍᑕᐅᓗᑎᒃ ᒪᓕᒐᑦ ᒪᓕᒃᑕᐅᑦᓯᐊᕈᑎᒃᓴᖏᑦ ᑕᒪᒃᑯᐊ ᖃᓄᐃᓕᐅᖁᔭᐅᒍᑕᐅᔪᑦ ᐸᕐᓇᒍᑎᓂ ᖃᐅᔨᓴᖅᑕᐅᒍᑎᒃᓴᓂᓗ ᒪᓕᒃᑕᐅᑦᓯᐊᖃᑦᑕᖁᓪᓗᒋᑦ; ᐊᒻᒪ
• ᐋᖅᑭᒋᐊᖅᑕᐅᓗᓂ ᖃᐅᔨᓴᕐᓂᕐᒧᑦ ᐊᑐᖅᑕᐅᖃᑦᑕᖅᑐᑦ, ᐱᓗᐊᖅᑐᒥᒃ ᒥᑭᓂᖅᓴᓄᑦ ᐱᓕᕆᐊᖑᓂᐊᖅᑐᓄᑦ, ᐱᓕᕆᔨᐅᓂᐊᖅᑐᑦ ᓇᓗᓇᐃᔭᕐᕕᐅᓯᒪᑦᓯᐊᕐᓗᑎᒃ ᒪᓕᒍᑎᑦᓯᐊᖅᑐᓂᒡᓗ ᑕᑯᒃᓴᐅᑦᓯᐊᖅᑐᓂᒡᓗ ᒪᓕᒐᒃᓴᖃᖁᓪᓗᒋᑦ, ᑮᓇᐅᔭᓕᐅᖅᐸᓪᓕᐊᓂᖅ ᓄᓇᕗᒥ ᐱᕙᓪᓕᐊᒍᑎᒋᔭᐅᑦᓯᐊᖁᓪᓗᒍ ᓄᓇᕗᒥ ᑮᓇᐅᔭᓕᐅᕈᑎᒋᔭᐅᑦᓯᐊᕈᓐᓇᖁᓪᓗᒍᓗ.