ᐃᖃᓗᐃᑦ, ᓄᓇᕗᑦ (ᒪᐃ 21, 2010) - ᓄᑖᖅ ᐅᑭᐅᖅᑕᖅᑐᒥ ᓂᕿᓂᒃ ᓂᐅᕕᖃᑦᑕᕐᓂᕐᒧᑦ ᐃᑲᔫᑎᑦ ᐊᑎᖃᖅᑐᑦ ᓂᕿᑦᓯᐊᕙᓕᕆᓂᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᑐᐃᓐᓇᐅᑎᑎᖃᑦᑕᕈᑕᐅᓂᐊᖅᐳᖅ ᓂᕿᑦᓯᐊᕙᖕᓂᒃ ᓂᐅᕕᕈᓐᓇᕐᓂᖅᓴᐅᑎᑕᐅᓗᑎᒃ ᑲᓇᑕᒥᐅᑦ ᓄᓇᖃᖅᑐᑦ ᐅᑭᐅᖅᑕᖅᑐᒥ, ᑲᓇᑕᐅᑉ ᒐᕙᒪᒃᑯᖏᑦ ᑕᐃᒪᓐᓇ ᑮᓇᐅᔭᖃᖅᑎᑎᓂᐊᖅᖢᑎᒃ ᑕᒪᒃᑯᓄᖓ

ᓂᕿᑦᓯᐊᕙᓕᕆᓂᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ , ᐃᓇᖏᕈᑕᐅᓪᓗᑎᒃ ᓂᕿᓂᒃ ᑎᑭᓴᐃᖃᑦᑕᕐᓂᕐᒥᒃ ᐅᑭᐅᖅᑕᖅᑐᒥ ᐱᓕᕆᐊᕆᔭᐅᔪᓂᒃ, ᑐᓴᖅᑎᑎᒍᑕᐅᓚᐅᖅᐳᖅ ᐅᓪᓗᒥ ᒥᓂᔅᑕ ᓴᒃ ᓯᑖᓪᒧᑦ, ᒥᓂᔅᑕ ᐃᓄᓕᕆᔨᑐᖃᒃᑯᓐᓄᑦ ᑲᓇᑕᐅᑉ ᒐᕙᒪᒃᑯᖏᓐᓂᓗ ᐱᓕᕆᐊᖃᖅᖢᓂ ᐊᓪᓚᖓᔪᓂᒃ ᐃᓕᑕᕆᔭᐅᓯᒪᒍᑎᖃᖏᑦᑐᓂᒡᓗ ᐊᓪᓚᓂᒃ ᐊᒻᒪᓗ ᒥᓂᔅᑕᓪᓗᓂ ᑲᓇᑕᒥ ᐅᑭᐅᖅᑕᖅᑐᒥ ᐱᕙᓪᓕᐊᑎᑎᓂᕐᒧᑦ ᐃᖅᑲᓇᐃᔭᕐᕕᐅᔪᒧᑦ ᐊᒻᒪᓗ ᒥᓂᔅᑕ ᓕᐅᓇ ᐊᒡᓗᒃᑲᖅ, ᒥᓂᔅᑕ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᑲᒪᒋᔭᖃᖅᖢᓂᓗ ᐅᑭᐅᖅᑕᖅᑐᒥ ᑐᓴᖅᑎᑎᒍᑎᖃᓚᐅᖅᐳᑦ ᑲᑐᔾᔨᓪᓗᑎᒃ.

ᑖᒃᑯᑎᒎᓇ ᓄᑖᒃᑯᑦ ᐱᓕᕆᐊᕆᔭᐅᓂᐊᖅᑐᒃᑯᒃ, ᑕᒪᒃᑯᐊ ᓱᕈᑲᐅᑎᒋᔪᓐᓇᖅᑐᑦ ᓂᕿᑦ ᐱᕈᖅᓯᒪᔪᑦ ᓰᕐᓇᖅᑐᑦ, ᐊᓯᖏᓪᓗ ᓂᐊᖂᔭᐃᑦ, ᓂᕿᓪᓚᕆᑦ, ᐃᒻᒧᐃᑦ ᐊᒻᒪᓗ ᒪᓐᓃᑦ ᐃᑲᔪᖅᑕᐅᒍᑎᖃᕐᓂᖏᓐᓄᑦ ᐊᑭᑐᓛᓂᒃ ᐱᑎᑦᓯᖃᑦᑕᕐᓂᐊᖅᖢᑎᒃ. ᑕᒪᒃᑯᐊ ᑎᑎᕋᖅᑕᐅᓯᒪᓂᖏᑦ ᐊᑭᓕᖅᑐᖅᑕᐅᒍᑕᐅᓛᖑᓂᐊᖅᑐᑦ ᒐᕙᒪᒃᑯᓐᓄᑦ ᐱᔾᔪᑎᖃᖃᑕᐅᓪᓗᑎᒃ ᓂᕿᑐᖃᖏᓐᓂᒃ ᐃᓄᐃᑦ.

ᓂᕿᑦᓯᐊᕙᓕᕆᓂᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ , ᐃᑲᔪᖅᑕᐅᒍᑕᐅᓂᐊᖅᑐᑦ ᐃᓄᖕᓄᑦ ᓄᓇᖃᖅᑐᓄᑦ ᐅᖓᓯᒃᑐᒥ ᑕᒪᒃᑯᐊ ᔪᑳᓐᒥᐅᑕᐃᑦ, ᐊᒻᒪ ᓄᓇᑦᓯᐊᖅ, ᓄᓇᕗᑦ, ᐃᐊᐴᑕ, ᓴᔅᑳᓐᓱᕙᓐ, ᒫᓂᑑᐸ, ᐋᓐᑎᐅᕆᔪ, ᑯᐸᒃ ᐊᒻᒪᓗ ᓕᐅᕙᐅᓛᓐ ᓚᕙᑐᐊᒥᐅᓪᓗ, ᑕᐃᒪᓐᓇ ᐱᕙᓪᓕᐊᑎᑕᐅᓂᐊᖅᐳᑦ ᓂᕿᓂᒃ ᑎᑭᓴᐃᔪᓐᓇᕐᓂᕐᒧᑦ ᓂᕿᑦᓯᐊᕙᖕᓂᒃ. ᑕᐃᒪᓐᓇ ᐱᒋᐊᕐᓂᐊᖅᐳᑦ ᐱᓕᕆᐊᕆᔭᐅᓂᐊᖅᑐᒥᒃ ᑐᓴᖅᑎᑎᒍᑎᖃᕐᓗᑎᒃ ᐱᕙᓪᓕᐊᔪᓂᒃ ᐅᓪᓗᒥ ᐋᖅᑭᒋᐊᖅᑕᐅᓯᒪᒍᑎᒋᓕᖅᑕᖏᓐᓂᒃ ᑎᑎᕋᖅᓯᒪᔪᓂᒃ, ᐊᑐᓕᖅᑕᐅᓂᐊᖅᖢᑎᒃ ᐊᒃᑐᕆ 3, 2010. ᐊᑐᓕᓪᓚᕆᒃᑕᐅᓯᒪᓂᐊᖅᖢᓂᓗ ᐄᐳᕈ 1, 2011-ᒥ.

"ᒐᕙᒪᕗᑦ ᓈᓚᑦᓯᒪᕗᖅ ᐅᑭᐅᖅᑕᖅᑐᒥᐅᓂᒃ ᑕᐃᒪᓐᓇ ᓂᕿᑖᖃᑦᑕᖅᑐᓂᒃ ᐊᑐᐃᓐᓇᖃᑦᑕᖅᑐᓂᒃ ᑕᐃᒪᓐᓇ. ᐅᒃᐱᕈᓱᒃᐳᒍᑦ ᑲᓇᑕᒥ ᓂᕿᑦᓯᐊᕙᐃᑦ ᒪᓕᒃᖢᒋᑦ ᐊᑭᑭᓐᓂᖅᓴᐅᖃᑦᑕᕐᓂᐊᓕᕐᒪᑕ, ᓂᕿᑦᓯᐊᕙᐅᓗᑎᒡᓗ ᑲᓇᑕᒥᐅᓄᑦ ᑎᑭᓴᖅᑕᐅᔪᓐᓇᖃᑦᑕᕐᓂᐊᖅᑐᑦ ᓄᓇᖃᖅᑐᓄᑦ ᐅᑭᐅᖅᑕᖅᑐᒥ," ᐅᖃᓚᐅᖅᐳᖅ ᒥᓂᔅᑕ ᓯᑖᓪ.

ᓄᑖᓂᒃ ᑮᓇᐅᔭᖃᖅᑎᑕᐅᓂᐊᓕᖅᐳᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᑲᓇᑕᒥ ᐱᓕᕆᖃᑎᖃᕐᓂᐊᕐᒪᑕ ᓄᓇᓕᖕᓂᒃ ᐃᓄᐃᑦ ᐃᓕᖁᓯᑐᖃᕆᔭᖏᑦ ᐊᑐᖅᑕᐅᓗᑎᒃ ᓂᕿᑦᓯᐊᕙᖃᖅᑎᑕᐅᓗᑎᒃ ᓴᖅᑭᔮᖅᑎᑎᓗᑎᒡᓗ ᓂᕿᑦᓯᐊᕙᖕᓂᒃ. ᑕᒪᒃᑯᐊ ᓂᕿᑦᓯᐊᕙᐃᑦ ᓴᖅᑭᔮᖅᑎᑕᐅᓗᑎᒃ ᓂᐅᕕᖅᑕᐅᔪᓐᓇᕐᓗᑎᒡᓗ ᐃᓕᓐᓂᐊᕈᑎᒃᓴᖃᖁᓪᓗᒋᑦ ᑐᑭᓯᒋᐊᕈᑎᖃᕐᓗᑎᒃ ᐱᒻᒪᕆᐅᔪᓂᒃ ᖃᓄᖅ ᐊᑐᖅᑕᐅᔪᓐᓇᕐᓂᖏᓐᓄᑦ, ᓂᐅᕕᖅᑕᐅᔪᓐᓇᕐᓂᖏᓐᓄᓪᓗ, ᓂᐅᕕᐊᒃᓴᕆᔭᐅᔪᓐᓇᕐᓂᖏᓐᓄᓪᓗ ᖃᓄᖅ ᐱᓕᕆᐊᕆᔭᐅᔪᓐᓇᕐᓂᖏᓐᓄᓪᓗ ᓂᕆᑦᓯᐊᖃᑦᑕᖁᓪᓗᒋᑦ. ᑕᒪᒃᑯᐊ ᓄᑖᑦ ᓇᓪᓕᐊᖏᑦ ᑎᑎᕋᖅᓯᒪᓂᐊᖅᐳᑦ ᓂᕿᑦ ᐊᑐᐊᒐᕆᔭᐅᓕᕐᓗᑎᒃ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᑲᓇᑕᒥ ᐊᑐᐊᒐᖏᓐᓄᑦ, ᑕᒪᒃᑯᐊ ᓂᕆᑦᓯᐊᖃᑦᑕᕐᓂᖅ ᑲᓇᑕᒥ ᓂᕿᑦᓯᐊᕙᐃᑦ ᑎᑎᕋᖅᓯᒪᓂᖏᓐᓄᐊᖅᑕᐅᓗᑎᒃ, ᑕᒪᒃᑯᐊ ᐅᖃᐅᓯᖃᖅᑐᑦ ᓱᓇᐃᑦ ᓂᕿᑦᓯᐊᕙᐅᓂᖏᓐᓄᑦ ᐊᑯᓂ ᐊᑐᖃᑦᑕᕐᓗᒋᑦ.

"ᓴᓐᖏᔪᒥᒃ ᐅᑭᐅᖅᑕᖅᑐᖃᕈᑦᑕ ᐋᓐᓂᐊᖏᑦᑐᓂᒃ ᓄᓇᓕᖃᕈᔭᕋᑦᑕ," ᐅᖃᓚᐅᖅᐳᖅ ᒥᓂᔅᑕ ᐊᒡᓗᒃᑲᖅ. "ᒐᕙᒪᕗᑦ ᐱᓕᕆᖃᑎᖃᕐᓂᖅᓴᐅᒍᒪᕗᑦ ᓄᓇᓕᖕᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂᒥᐅᓂᒃ ᖃᐅᔨᕚᓪᓕᖅᑎᑕᐅᓗᑎᒃ ᐃᑲᔪᕐᓂᖃᕐᓂᖏᓐᓄᑦ ᐋᓐᓂᐊᕐᓇᖏᑦᑐᑦ ᓂᕿᑦ ᑲᓇᑕᒥᐅᑕᐃᑦ ᐃᓚᒌᑦ ᐃᓱᒪᓕᐅᑦᓯᐊᖃᑦᑕᖁᓪᓗᒋᑦ ᓂᕿᑦᓯᐊᕙᓂᒃ ᓂᕆᓂᕐᒧᑦ ᒪᓕᒡᓗᒋᑦ ᓂᕆᖁᔭᐅᕙᒃᑐᑦ ᒪᓕᒐᖏᓐᓃᑦᑐᑦ ᐅᕙᓂ Canada's Food Guide .”

ᑕᒪᓐᓇ ᓄᑖᖅ ᐱᓕᕆᐊᕆᔭᐅᓂᐊᖅᑐᖅ ᑮᓇᐅᔭᑐᓗᐊᕐᓂᐊᖏᑉᐳᖅ, ᓂᐅᕕᐊᒃᓴᖃᖅᑎᑎᒍᓐᓇᐅᑕᐅᓂᐊᖅᖢᓂᓗ, ᑕᐃᒪᓐᓇ ᐊᐅᓪᓛᑦᓯᐊᕈᓐᓇᖁᓪᓗᒍ ᑕᑯᒃᓴᐅᑦᓯᐊᕐᓗᓂᓗ. ᑲᓇᑕᐅᑉ ᒐᕙᒪᒃᑯᖏᑦ ᓂᐅᕕᕐᕕᐅᔪᑦ ᐃᑲᔪᖅᑕᐅᖃᑦᑕᕐᓂᐊᕐᓗᑎᒃ ᑮᓇᐅᔭᑎᒍᑦ ᐊᒻᒪᓗ ᐊᑭᑭᒡᓕᒋᐊᖅᓯᒪᔪᓂᒃ ᓂᐅᕕᕌᖓᑕ ᓂᐅᕕᕐᕕᖏᑦ ᑮᓇᐅᔭᓕᐅᖅᑎᑕᐅᖃᑦᑕᕐᓗᑎᒃ ᐅᑭᐅᖅᑕᖅᑐᒥᐅᓄᑦ ᐊᐅᓪᓚᖅᑎᑎᓂᖏᓐᓄᑦ ᐊᖏᔪᓂᒃ. ᑭᒃᑯᑐᐃᓐᓇᐃᑦ ᑎᒥᐅᔪᓪᓗ ᓇᖕᒥᓂᖅ ᑎᑭᓴᐃᔪᓐᓇᖃᑦᑕᕐᓂᐊᖅᐳᑦ ᐃᑲᔪᖅᑕᐅᓗᑎᒡᓗ ᑮᓇᐅᔭᑎᒍᑦ ᐃᑲᔫᑎᑎᒍᑦ. ᑕᒪᒃᑯᐊ ᐱᓗᐊᖅᑐᒥᒃ ᐱᒻᒪᕆᐅᑎᑕᐅᓂᐊᖅᐳᑦ ᐊᐅᒥᒍᑦ ᐱᑕᑦᓯᖅᓯᒪᒍᑎᖃᖅᑐᑦ ᓂᕿᓂᒃ ᐊᔾᔨᐅᖏᑦᑐᓂᒃ ᓂᕆᒋᐊᖃᖃᑦᑕᕐᓂᖏᓐᓄᑦ, ᓂᐅᕕᕐᕕᒋᔭᐅᔪᓪᓗ ᐅᑭᐅᖅᑕᖅᑐᒥ ᑎᑭᑎᑦᓯᔪᓐᓇᖃᑦᑕᓕᕐᓗᑎᒃ ᓂᐅᕕᐊᒃᓴᐅᖃᑦᑕᓚᐅᖏᑦᑐᓂᒃ.

ᖃᐅᔨᒪᑎᒋᔭᐅᓗᑎᒃ ᑲᑎᒪᔨᒋᔭᐅᓂᐊᖅᑐᑦ ᐋᖅᑭᒃᑕᐅᓯᒪᓕᖅᐳᑦ ᐅᑭᐅᖅᑕᖅᑐᒥᐅᑦ ᖃᓄᐃᓕᐅᕆᐊᖃᕐᓂᖏᓐᓄᑦ ᑲᑎᒪᔨᐅᓂᐊᖅᑐᑦ ᖃᐅᔨᒪᑎᒋᔭᐅᓗᑎᒃ ᐊᐅᓚᑕᐅᓂᖏᓐᓄᑦ ᐊᑐᕐᓂᖃᑦᓯᐊᕐᓂᖏᓐᓄᓪᓗ ᑕᒪᒃᑯᐊ.

"ᖁᕕᐊᓱᒃᐳᖓ ᑐᓴᖅᑎᑎᓂᐊᕋᒪ ᐃᓕᓴᐱᑦ ᑰᑉᓚᓐ ᐃᒃᓯᕙᐅᑕᕆᔭᐅᓂᐊᕐᒪᑦ ᑖᒃᑯᓄᖓ ᓄᑖᓄᑦ ᑲᑎᒪᔨᐅᓂᐊᖅᑐᓄᑦ, ᓴᖅᑭᑕᐅᓯᒪᓪᓗᑎᒃ ᐅᑭᐅᖅᑕᖅᑐᒥᐅᑦ ᓂᐱᖃᐃᓐᓇᕈᓐᓇᖁᓪᓗᒋᑦ ᐊᐅᓚᑕᐅᓂᖏᓐᓄᑦ ᑕᒪᒃᑯᐊ," ᐅᖃᓚᐅᖅᐳᖅ ᒥᓂᔅᑕ ᓯᑖᓪ. ᐊᔪᖏᑦᓯᐊᖅᓯᒪᓂᖓᓄᑦ ᐊᒻᒪᓗ ᐊᑭᓕᖅᑐᒐᐅᖏᑦᖢᓂ ᐃᑲᔪᖅᓯᒪᓂᖓᓂ ᐊᑯᓂ ᐊᕐᕌᒍᓂ 25-ᖑᓯᒪᓕᖅᑐᓂ, ᒥᔅ ᑯᑉᓚᓐ ᐅᑭᐅᖅᑕᖅᑐᒥᐅᓂᒃ ᖃᐅᔨᒪᑦᓯᐊᕐᒪᑦ ᐃᑲᔪᕈᑕᐅᓂᐊᖅᖢᓂᓗ ᓄᑖᓄᑦ ᑲᑎᒪᔨᐅᓂᐊᖅᑐᓄᑦ. ᐊᒻᒪᓗ ᑲᑎᒪᔨᖏᑦ ᑐᓴᖅᑎᑕᐅᒍᑕᐅᓂᐊᖅᐳᑦ ᑕᖅᑭᓂ ᖃᐃᔪᓂ.

ᑖᒃᑯᑎᒎᓇᖅ 2010-ᒥ ᐃᖅᑲᓇᐃᔭᒐᒃᓴᐃᑦ ᐱᕈᖅᐸᓪᓕᐊᒍᑎᒃᓴᐃᓪᓗ ᑮᓇᐅᔭᑎᒍᑦ, ᑲᓇᑕᐅᑉ ᒐᕙᒪᒃᑯᖏᑦ ᑮᓇᐅᔭᖃᖅᑎᑎᓂᐊᖅᐳᑦ $45-ᒥᓕᔭᓐᑖᓚᓂᒃ ᐊᕐᕌᒍᓄᑦ ᒪᕐᕉᖕᓄᑦ ᑮᓇᐅᔭᖃᖅᑎᑕᐅᖁᓪᓗᒋᑦ ᑕᒪᓐᓇ ᐱᒋᐊᖅᑎᑕᐅᓂᖓᓄᑦ. ᓄᑖᑦ ᑮᓇᐅᔭᑦ ᐊᑐᖅᑕᐅᓂᐊᖅᑐᑦ ᑮᓇᐅᔭᖃᕈᑕᐅᔪᓐᓇᕐᓂᐊᖅᐳᑦ ᐊᖏᔪᒃᑯᑦ ᑎᒥᒧᑦ ᐱᐅᔪᓂᒃ ᓂᕿᖃᖅᑎᑕᐅᓂᖏᓐᓄᑦ ᐅᑭᐅᖅᑕᖅᑐᒥᐅᑦ. ᑕᒪᒃᑯᐊᓗ ᑮᓇᐅᔭᕆᔭᐅᔪᑦ ᒫᓐᓇ ᐊᑐᖅᑕᐅᖃᓯᐅᑎᓗᑎᒃ, ᐊᕐᕌᒍᑕᒫᑦ ᑮᓇᐅᔭᖃᖅᑎᑕᐅᒍᑎᖃᕐᓂᐊᖅᐳᑦ $60-ᒥᓕᔭᓐᑖᓚᓂᒃ. ᑖᒃᑯᐊ ᑮᓇᐅᔭᑦ ᐱᑕᖃᑦᓯᐊᖏᓐᓇᕐᓂᐊᖅᖢᑎᒃ ᐱᓕᕆᐊᕆᔭᐅᔪᑦ ᐊᐅᓚᑦᓯᐊᕈᓐᓇᖁᓪᓗᒍ.

ᐅᓪᓗᒥ ᑐᓴᖅᑎᑕᐅᒍᑕᐅᔪᖅ ᖃᐅᔨᓐᓇᕈᑕᐅᕗᖅ ᑲᓇᑕᐅᑉ ᒐᕙᒪᒃᑯᖏᑦ ᐱᓕᕆᐊᖃᕈᒪᓂᖏᓐᓄᑦ ᐅᑭᐅᖅᑕᖅᑐᒥ ᐸᕐᓇᒃᓯᒪᒍᑎᖃᕐᓗᑎᒃ, ᓴᓐᖏᓕᖅᑎᑕᐅᔪᓐᓇᖁᓪᓗᒍ ᐅᑭᐅᖅᑕᖅᑐᒥᒃ ᐸᐸᑦᓯᓂᖅ, ᓴᐳᔾᔭᐅᓂᖏᓪᓗ ᐅᑭᐅᖅᑕᖅᑐᒥ ᐊᕙᑎᒥᐅᑕᐃᑦ, ᓴᖅᑭᔮᖅᑎᑎᓗᑎᒡᓗ ᐃᓅᓯᕐᓂᒃ ᐱᕙᓪᓕᐊᓂᕐᒥᒡᓗ, ᐊᒻᒪᓗ ᐊᑲᐅᓯᕚᓪᓕᖅᑎᑎᓗᓂ ᐅᑭᐅᖅᑕᖅᑐᒥᐅᑦ ᓇᖕᒥᓂᖅᓱᖅᐸᓪᓕᐊᒍᓐᓇᕐᓂᖏᓐᓄᑦ.

ᖃᓄᐃᒍᑕᐅᓯᒪᔪᑦ
ᐊᐱᖁᑕᐅᒐᔪᒃᑐᑦ
ᓂᕿᑦᓯᐊᕙᐃᑦ ᐅᑭᐅᖅᑕᖅᑐᒥ ᑲᓇᑕᒥ
ᓂᕿᑦᓯᐊᕙᐃᑦ ᐅᑭᐅᖅᑕᖅᑐᒥ ᑲᓇᑕᒥ ᐱᓕᕆᐊᕆᔭᐅᔪᖅ
ᓂᕿᓂᒃ ᑎᑭᓴᐃᖃᑦᑕᕐᓂᖅ
ᓂᕿᓂᒃ ᑎᑭᓴᐃᖃᑦᑕᕐᓂᖅ ᐱᓕᕆᐊᖑᓂᖓ (ᑎᑭᓪᓗᒍ ᒫᑦᓯ 31, 2011)


ᖃᓄᐃᒍᑕᐅᓯᒪᔪᑦ

ᑲᓇᑕᐅᑉ ᒐᕙᒪᒃᑯᖏᑦ ᐱᓕᕆᐊᖃᖅᓯᒪᓕᖅᐳᑦ ᓂᕿᓂᒃ ᑎᑭᓴᐃᖃᑦᑕᖅᑎᑎᓪᓗᑎᒃ ᑕᐃᒪᖓᓂ 1960-ᓂᑦ ᐅᑭᐅᖅᑕᖅᑐᒥᐅᑦ ᐅᖓᓯᒃᑐᒥᐅᑕᐃᑦ ᓄᓇᓕᖕᓂ ᐊᑐᐃᓐᓇᖃᖁᔭᐅᓪᓗᑎᒃ ᓂᕿᓂᒃ ᑎᒥᒧᑦ ᐱᐅᔪᓂᒃ. ᓂᕿᓂᒃ ᑎᑭᓴᐃᖃᑦᑕᕐᓂᖅ ᐱᓕᕆᐊᕆᔭᐅᓂᕆᓚᐅᖅᑕᖓ ᐱᔾᔪᑎᖃᓚᐅᖅᐳᖅ ᑎᑭᑎᑕᐅᓂᖏᓐᓄᑦ ᖃᖓᑕᔫᒃᑯᑦ ᐃᑲᔪᕈᑎᖃᖃᑦᑕᖅᖢᑎᒃ ᑮᓇᐅᔭᑎᒍᑦ ᑲᓇᑕᒥ ᑎᑎᖃᕐᓂᐊᕐᕕᓕᕆᔨᒃᑯᑦ ᐊᑭᑐᓗᐊᕐᓂᖓᓄᑦ ᑎᑭᑎᑦᓯᓂᖅ ᓂᕿᑦᓯᐊᕙᖕᓂᒃ ᐊᓯᖏᓐᓂᒡᓗ ᐊᑐᖅᑕᐅᒋᐊᖃᖅᑐᓂᒃ ᐅᑭᐅᖅᑕᖅᑐᒥᐅᓄᑦ ᓄᓇᓕᖕᓂ ᐊᕐᕌᒍᑕᒫᑦ ᑕᐃᒪᓐᓇ ᓂᕿᑦᓯᐊᕙᖃᕈᓐᓇᖏᑉᐸᑕ. ᓄᓇᓖᑦ ᔪᑳᓐᒥᐅᑦ, ᓄᓇᑦᓯᐊᒥᐅᑦ, ᓄᓇᕗᒥᐅᑦ, ᐃᐊᐴᑕᒥᐅᑦ, ᓴᔅᑳᓐᓱᕙᓐᒥᐅᑦ, ᐋᓐᑎᐅᕆᔪᒥᐅᑦ, ᒫᓂᑑᐸ, ᑯᐸᒃ ᐊᒻᒪᓗ ᓂᐅᕙᐅᓛᒥ ᓚᕙᑐᐊᒥᓗ ᑕᐃᒪᓐᓇ ᐃᑲᔪᖅᑕᐅᒍᑎᖃᖃᑦᑕᖅᓗᑎᒃ.

ᒐᕙᒪᕗᑦ ᑐᓴᖅᑎᑎᒍᑎᖃᓚᐅᕐᒪᑕ ᖃᐅᔨᓴᖅᑕᐅᒋᐊᖃᕐᓂᖓᓄᑦ ᕿᒥᕐᕈᔭᐅᒋᐊᕐᓂᖓᓄᑦ ᑎᑎᖃᕐᓂᐊᕐᕕᒃᑯᑦ ᓂᕿᓂᒃ ᑎᑭᓴᐃᖃᑦᑕᕐᓂᖅ ᑕᐃᒪᖓᓂ ᓄᕕᐱᕆ 2006-ᒥ. ᐱᔾᔪᑎᖃᓚᐅᖅᐳᑦ ᖃᓄᖅ ᐊᑲᐅᓛᒃᑯᑦ ᐊᐅᓪᓛᑦᓯᐊᓛᒃᑯᑦ ᐊᑭᑭᓐᓂᖅᓴᒃᑯᓪᓗ, ᓂᕿᑦᓯᐊᕙᖕᓂᒡᓗ, ᑎᒥᒧᑦ ᐱᐅᔪᓂᒃ ᐃᓄᐃᑦ ᐅᑭᐅᖅᑕᖅᑐᒥ ᐅᖓᓯᒃᑐᒥᐅᑕᐃᑦ ᐱᑎᑕᐅᖃᑦᑕᕈᓐᓇᕋᔭᕐᓂᖏᓐᓄᑦ. ᒥᓂᔅᑕ ᑭᒡᒐᖅᑐᖅᑎᖓ, ᒍᕌᒻ ᑖᒍ, ᐊᐅᓪᓛᕋᓚᐅᖅᐳᖅ ᐅᑭᐅᖅᑕᖅᑐᒥ ᖃᐅᔨᓇᓱᐊᖅᖢᓂ ᖃᓄᐃᓕᐅᖁᔨᖕᒪᖔᑕ ᑕᒪᒃᑯᐊ ᐃᓄᐃᑦ ᑕᒪᑐᒥᖓ. ᐊᒻᒪᓗ, ᐃᓄᓕᕆᔨᑐᖃᒃᑯᑦ ᑲᑎᒪᑎᑎᖃᑦᑕᓚᐅᖅᖢᑎᒃ 70-ᖏᖅᑕᖅᖢᑎᒃ ᓄᓇᓕᖕᓂ ᑲᑎᖅᓱᐃᓪᓗᑎᒃ ᑐᓴᖅᑎᑕᐅᓇᓱᐊᖅᖢᑎᒡᓗ ᑭᒃᑯᑐᐃᓐᓇᕐᓂᒃ ᖃᓄᖅᑑᕈᑎᒃᓴᐅᒐᔭᕐᓂᖓᓄᑦ ᑕᒪᓐᓇ ᐱᖓᓱᓂ ᑕᐃᒪᓐᓇ ᖃᓄᖅᑑᕈᑎᖃᓚᐅᖅᐳᑦ. ᐃᓄᓕᕆᔨᑐᖃᒃᑯᑦ ᐱᓕᕆᓚᐅᖅᖢᑎᒡᓗ ᖃᐅᔨᒪᔪᓂᒃ ᐋᖅᑭᒃᓱᐃᒍᑕᐅᔪᓐᓇᖅᑐᓂᒃ ᐃᑲᔫᓯᐊᓄᑦ ᐱᔾᔪᑎᖃᖅᖢᑎᒃ.

ᑲᓇᑕᐅᑉ ᒐᕙᒪᒃᑯᖏᑦ ᓂᐅᕕᕐᕕᐅᖃᑦᑕᖅᑐᓂᒃ ᐊᑐᕈᒪᕗᑦ ᐊᒡᔭᖅᑐᖅᑕᐅᓂᖏᓐᓄᑦ ᑲᒪᒋᔭᐅᓂᐊᕐᓂᖓ ᐃᑲᔫᓯᐊᖃᑦᑕᕐᓂᖅ. ᓄᑖᖅ ᐱᓕᕆᐊᕆᔭᐅᓂᐊᖅᑐᖅ, ᓂᕿᑦᓯᐊᕙᖃᖅᑎᑎᓂᖅ ᐅᑭᐅᖅᑕᖅᑐᒥ ᑲᓇᑕᒥ, ᐱᔭᕆᐊᑐᖏᓐᓂᖅᓴᐅᑎᑎᓂᐊᖅᐳᑦ ᑎᒍᖅᓴᓗᐊᖅᑕᐅᖏᓐᓂᖅᓴᐅᓗᑎᒡᓗ ᓂᕿᑦ ᕿᓚᒥᐅᓂᖅᓴᕐᓗ ᑎᑭᑎᑕᐅᔪᓐᓇᖁᓪᓗᒋᑦ ᐅᑭᐅᖅᑕᖅᑐᒥᐅᓄᑦ. ᑲᓇᑕᐅᑉ ᒐᕙᒪᒃᑯᖏᑦ ᓂᐅᕕᕐᕕᖕᓄᐊᖅᑎᑎᓂᖅᓴᐅᓂᐊᖅᐳᑦ ᓂᕿᓂᒃ ᑕᐃᒪᓐᓇ ᑎᑭᑎᑦᓯᖃᑦᑕᕐᒪᑕ ᐊᒥᓱᓂᒃ ᓂᕿᓂᒃ ᐊᑕᐅᑦᓯᒃᑯᑦ ᐅᑭᐅᖅᑕᖅᑐᒧᑦ. ᑕᐃᒪᓐᓇ ᐋᔨᖃᑎᒌᒍᑎᖃᕐᓂᖅᓴᐅᓂᐊᕐᒪᑕ ᐊᑭᖏᓐᓂᒃ ᓂᐅᕕᖅᐸᒃᑐᓄᑦ. ᑕᐃᒪᓐᓇ ᐋᖅᑭᐅᒪᖃᑎᖃᕐᓂᐊᖅᐳᑦ ᓂᐅᕕᖅᑎᐅᕙᒃᑐᓂᒃ ᐊᑭᑭᓛᒃᑯᑦ ᓂᐅᕕᖅᑎᑎᖃᑦᑕᖁᓪᓗᒋᑦ ᑲᒪᑦᓯᐊᕐᓗᑎᒃ. ᑕᒪᓐᓇ ᐊᑲᐅᓂᖅᓴᐅᒍᑕᐅᓂᐊᖅᑐᖅ ᓂᐅᕕᖅᑎᑎᕙᒃᑐᑦ ᖃᐅᔨᑎᑎᓂᐊᕐᓗᑎᒃ ᑮᓇᐅᔭᑦ ᐃᑲᔫᓯᐊᑦ ᐊᑐᖅᑕᐅᑦᓯᐊᕐᓂᖏᓐᓄᑦ. ᓂᕿᑖᖅᑎᑎᔨᑦ ᑮᓇᐅᔭᖅᑖᖅᑎᑕᐅᖃᑦᑕᕐᓂᐊᖅᐳᑦ ᐅᖁᒪᐃᓐᓂᖏᑦ ᒪᓕᒡᓗᒋᑦ ᐊᑐᓂ ᑕᒪᒃᑯᓄᖓ ᓄᓇᓕᖕᓄᖓᐅᔪᓂᒃ.

ᐊᑐᕐᓗᓂ ᑖᒃᑯᓂᖓ 2010 ᐃᖅᑲᓇᐃᔭᖅᑎᑎᓂᖅ ᑮᓇᐅᔭᓂᒃ ᐱᕈᖅᑎᑎᕙᓪᓕᐊᓂᕐᓗ, ᒐᕙᒪᒃᑯᑦ ᑮᓇᐅᔭᖃᖅᑎᑎᓂᐊᖅᐳᑦ $45-ᒥᓕᔭᓐᑖᓚᓂᒃ ᐊᕐᕌᒍᓄᑦ ᒪᕐᕉᖕᓄᑦ ᑕᒪᓐᓇ ᐱᔾᔪᑎᒋᓪᓗᒍ. ᓄᑖᑦ ᑮᓇᐅᔭᑦ ᑮᓇᐅᔭᖃᕈᑕᐅᓂᐊᖅᐳᑦ ᐃᑲᔪᖅᑕᐅᔪᓐᓇᖁᓪᓗᒋᑦ ᐊᔾᔨᒌᖏᑦᑐᓂᒃ ᓂᕿᑖᖃᑦᑕᖁᓪᓗᒋᑦ ᑎᒥᒧᑦ ᐱᐅᔪᓂᒃ ᐅᑭᐅᖅᑕᖅᑐᒥᐅᑦ. ᑕᒪᒃᑯᐊ ᑮᓇᐅᔭᑐᖃᐃᑦ ᐃᓚᓕᐅᑎᓗᒋᑦ ᑲᑎᑦᓗᒋᑦ ᑮᓇᐅᔭᖃᕐᓂᐊᖅᖢᑎᒃ $60-ᒥᓕᔭᓐᑖᓚᓂᒃ.

ᐃᓄᓕᕆᔨᑐᖃᒃᑯᑦ ᐊᑐᓕᖅᑎᑎᓂᐊᖅᐳᑦ ᖃᓄᖅ ᐅᑎᖅᑎᑎᓇᓱᐊᕈᑎᓂᒃ ᑮᓇᐅᔭᓂᒃ ᑕᐃᒪᓐᓇ ᓇᓪᓕᖃᖃᑐᐊᖅᐸᑕ ᓂᐅᕕᕈᑕᐅᓚᐅᖅᑐᓂᒃ ᑎᑎᖃᖁᑎᖃᕐᓗᑎᒃ, ᐊᒻᒪᓗ ᐅᑎᕐᕕᐅᔪᓐᓇᖁᓪᓗᒋᑦ ᓂᐅᕕᕐᕕᐅᕙᒃᑐᑦ ᑕᐃᒪᓐᓇ ᑎᑎᖃᖁᑎᖃᕐᓗᑎᒃ ᓂᐅᕕᕐᕕᒋᓚᐅᖅᑕᒥᖕᓂᒃ ᐊᑭᓕᐅᑎᒋᓚᐅᖅᑕᒥᖕᓂᒡᓗ. ᑮᓇᐅᔭᑦ ᐊᑐᖅᑕᐅᓂᖏᓐᓄᑦ ᑲᒪᒋᔭᐅᑦᓯᐊᕐᓂᐊᖅᐳᑦ ᐃᑲᔫᓯᐊᖅᐸᓪᓕᐊᔪᓄᑦ ᑕᒪᒃᑯᐊ ᑭᓯᐊᓂ ᓂᕿᑦᓯᐊᕙᐃᑦ ᓂᐅᕕᖅᑕᐅᓂᖏᓐᓄᑦ ᓇᓗᓇᐃᔭᖅᑕᐅᓯᒪᓂᐊᖅᑐᓂᒃ. ᐊᖏᓛᖑᓂᐊᖅᑐᖅ ᐃᑲᔫᓯᐊᑎᒍᑦ ᖃᖓᑕᔫᒃᑯᑦ ᑎᑭᑎᑕᐅᓚᐅᕐᓂᖏᓐᓄᑦ ᐊᑭᓕᐅᑎᑦ ᐅᑭᐅᖅᑕᖅᑐᒥ ᓄᓇᓕᖕᓄᑦ. ᑕᒪᒃᑯᐊᓗ ᓄᑖᒃᑯᑦ ᓂᕿᓂᒃ ᑎᑭᓴᐃᖃᑦᑕᕐᓂᕐᒧᑦ ᐱᔾᔪᑎᖃᖅᑐᑦ ᐅᑯᐊᖑᓂᐊᖅᐳᑦ: ᐋᖅᑭᒃᑕᐅᓂᖏᑦ ᖃᐅᔨᒪᑎᒋᔭᐅᓗᑎᒃ ᑲᑎᒪᔨᐅᓂᐊᖅᑐᑦ ᐱᓕᕆᐊᖃᕐᓂᐊᕐᒪᑕ ᑕᒪᒃᑯᓂᖓ; ᐋᖅᑭᒃᑕᐅᒋᐊᕐᓗᑎᒡᓗ ᓇᓪᓕᐊᑦ ᓂᕿᑦ ᑎᑭᓴᖅᑕᐅᔪᓐᓇᕐᓂᖏᑦ ᐅᑎᕐᕕᐅᓂᐊᕐᓗᓂ ᑮᓇᐅᔭᓂᒃ ᐃᑲᔫᑎᐅᓚᐅᖅᑐᓂᒃ; ᐃᓚᐅᓂᖅᓴᐅᓕᕐᓂᖏᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᑲᓇᑕᒥ ᓄᓇᓕᖕᓂ ᓂᕿᑦᓯᐊᕙᓕᕆᓂᕐᒧᑦ ᓴᖅᑭᔮᖅᑎᑎᓗᑎᒃ; ᐊᒻᒪᓗ ᓇᖕᒥᓂᖅ ᑎᑭᓴᐃᕙᒃᑐᑦ.

ᓇᓪᓕᐊᖏᑦ ᓂᕿᑦ ᑎᑭᓴᖅᑕᐅᔪᓐᓇᕐᓂᖏᑦ

ᑕᒪᒃᑯᐊ ᒪᓕᒐᒃᓴᐃᑦ ᓂᕿᑦᓯᐊᕙᒋᐊᖃᕐᓂᕐᒧᑦ ᖃᓄᐃᑦᑐᓂᒡᓗ ᐃᓗᓕᖃᕐᓂᖏᓐᓄᑦ ᓂᕿᑦ ᓂᕿᑦᓯᐊᕙᐃᑦ ᑕᐃᒪᓐᓇ ᓇᓗᓇᐃᖅᓯᓚᐅᖅᐳᑦ ᐊᑐᖅᑕᐅᒋᐊᖃᕐᓂᖏᓐᓄᑦ ᑎᑎᕋᖅᓯᔪᓂᒃ. ᓄᑖᑦ ᑎᑎᕋᖅᓯᒪᔪᖁᑎᒋᔭᐅᔪᑦ ᐱᔾᔪᑎᖃᖅᐳᑦ ᐃᑲᔫᓯᐊᖅᑖᕈᑕᐅᖃᑦᑕᕐᓂᐊᕐᓂᖏᓐᓄᑦ ᑎᑭᑎᑕᐅᓂᖏᓐᓄᑦ ᑕᒪᒃᑯᐊ ᓂᕿᑦ ᓱᕈᑲᐅᑎᒋᔪᓐᓇᖅᑐᑦ ᒪᓕᒡᓗᑎᒃ ᓂᕆᑦᓯᐊᕐᓂᖅ ᑕᒪᒃᑯᐊ ᒪᓕᒡᓗᒋᑦ ᑲᓇᑕᒥ ᓂᕿᑦᓯᐊᕙᐃᑦ ᑎᑎᕋᖅᓯᒪᓂᖏᑦ. .

ᑕᒪᒃᑯᐊ ᑎᑎᕋᖅᓯᒪᔪᑦ ᐃᑲᔫᓯᐊᖅᑖᖅᑎᑎᖃᕐᓂᐊᕐᓗᓂᓗ ᑮᓇᐅᔭᓂᒃ ᐊᑐᓕᖅᑕᐅᓂᐊᖅᐳᑦ ᒪᕐᕈᐃᓕᖓᔪᒃᑯᑦ: ᓂᕿᐅᖏᑦᑐᑦ ᓱᕈᑲᐅᑎᒋᔪᓐᓇᖅᑐᓪᓗ ᓂᕿᑦ ᐲᖅᑕᐅᓂᐊᖅᐳᑦ ᐊᒃᑐᐱᕆ 3, 2010-ᖑᓕᖅᐸᑦ. ᓄᑖᑦ ᐃᑲᔫᓯᐊᖅᑖᕈᑕᐅᔪᓐᓇᖅᑐᑦ ᐊᑐᓕᖅᑕᐅᓗᑎᒃ ᐄᐳᕈ 1, 2011-ᒥ. ᑕᒪᒃᑯᐊ ᐊᒥᓲᓛᑦ ᓱᕈᑲᐅᑎᒋᔪᓐᓇᖅᑐᑦ ᓂᕿᑦ ᓂᕿᐅᖏᑦᑐᓪᓗ ᐲᖅᑕᐅᓂᐊᖅᐳᑦ ᐊᑭᑭᓐᓂᖅᓴᒃᑯᑦ ᑎᑭᑎᑕᐅᓂᖏᓐᓄᑦ ᐱᔾᔪᑎᒋᓪᓗᒍ, ᑕᒪᒃᑯᐊ ᑎᑭᓴᖅᑕᐅᔪᓐᓇᕐᓂᖏᓐᓄᑦ ᐅᒥᐊᕐᔪᐊᒃᑯᑦ ᐅᑭᐅᒃᑯᓪᓗ ᐊᖅᑯᑎᑎᒍᑦ.

ᒪᓕᒡᓗᒋᑦ ᓄᑖᑦ ᓂᕿᓂᒃ ᑎᑭᓴᐃᓂᕐᒧᑦ ᐃᑲᔫᓯᐊᖅᑖᕈᑕᐅᖃᑦᑕᕐᓂᐊᖅᑐᑦ, ᐊᔪᕐᓇᖏᒃᑰᖓ, ᓱᕋᑲᐅᑎᒋᔪᓐᓇᖏᑦᑐᑦ ᓂᕿᐅᖏᑦᑐᓪᓗ ᑎᑭᑎᑕᐅᖃᑦᑕᕐᓂᐊᖅᐳᑦ ᐅᒥᐊᕐᔪᐊᒃᑯᑦ ᐅᑭᐅᒃᑯᓪᓗ ᐊᖅᑯᑎᒃᑯᑦ. ᑕᒪᕐᒥᒃ ᐊᑭᓕᖅᑐᖅᑕᐅᔪᓐᓇᕐᓂᐊᕐᓗᑎᒃ ᐃᑲᔫᓯᐊᒃᑯᑦ ᑕᒪᒃᑯᐊ ᐅᒥᐊᕐᔪᐊᑦ ᐊᖅᑯᑎᓪᓗ ᐅᑭᐅᒃᑯᑦ ᐊᑭᑭᓐᓂᖅᓴᐅᖕᒪᑕ ᐃᑲᔫᓯᐊᖅᑖᕈᑕᐅᖃᑦᑕᖅᑐᑦ ᓴᓂᐊᒍᑦ ᒐᕙᒪᒃᑯᓐᓂᑦ ᑎᖕᒥᓲᒃᑰᕈᑕᐅᓂᖏᓐᓄᑦ.

ᐅᒥᐊᕐᔪᐊᒃᑯᑦ ᑎᑭᑎᑦᓯᖃᑦᑕᕐᓂᖅ ᐊᑐᖅᑕᐅᖃᑦᑕᕐᒪᑦ ᔫᓂ ᓄᖑᓕᖅᑎᓪᓗᒍ ᐊᒃᑐᐱᕆ ᓄᖑᓕᖅᑎᓪᓗᒍ, ᐊᒻᒪᓗ ᐅᒥᐊᕐᔪᐊᑦ ᐊᖏᔪᓂᒃ ᐅᓯᔪᓐᓇᖅᖢᑎᒃ ᐱᖁᑎᓂᒃ. ᐅᑭᐅᒃᑯᑦ ᐊᖅᑯᑎᑦ, ᐊᑐᖅᑕᐅᖃᑦᑕᓚᐅᐱᓪᓚᖃᑦᑕᕐᒪᑕ ᐱᓇᓱᐊᕈᓯᓄᑦ ᖃᑦᓰᓐᓇᕐᓄᑦ ᐊᑯᓂᐅᓂᖅᓴᕐᓗ ᐅᑭᐅᖅᑕᖅᑐᒥ ᓄᓇᓖᑦ ᐊᑭᑭᓐᓂᖅᓴᒃᑯᐊᖅᑎᑎᔪᓐᓇᖅᑐᑦ.

ᐋᓐᓂᐊᖃᕐᓇᖏᑦᑐᓕᕆᔨᒃ ᑲᓇᑕᒥ

ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᑲᓇᑕᒥ ᖃᐅᔨᒪᑎᒋᔭᐅᖏᓐᓇᕐᓂᐊᖅᐳᑦ ᓂᕿᑦᓯᐊᕙᐃᑦ ᐱᔾᔪᑎᒋᓪᓗᒋᑦ ᐊᒻᒪ, ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ ᑭᒡᒐᖅᑐᖅᑎᒋᔭᐅᔪᑦ ᐱᓕᕆᖃᑎᖃᖃᑦᑕᕐᓂᐊᕐᓗᑎᒃ ᐅᑭᐅᖅᑕᖅᑐᒥ ᓄᓇᓕᖕᓂᒥᐅᓂᒃ ᓄᓇᓕᖕᓂ, ᐃᓕᖁᓯᑐᖃᒃᑯᑦ ᐱᐅᓂᖅᓴᓂᒃ ᓂᕿᓂᒃ ᐱᔾᔪᑎᖃᕐᓗᑎᒃ ᖃᓄᑦᑑᓂᖏᓐᓄᓪᓗ ᓄᓇᓕᖕᓂ ᓂᕿᑦᓯᐊᕙᐃᑦ ᓂᐅᕕᐊᒃᓴᐃᑦ ᐃᓕᓐᓂᐊᖅᑎᑎᒍᑕᐅᖃᑦᑕᕐᓗᑎᒃ. ᐱᓕᕆᐊᖃᕐᓂᐊᖅᐳᑦ ᓂᕿᑦᓯᐊᕙᐅᓂᖅᓴᑐᖃᑦᑕᖁᓪᓗᒋᑦ. ᑕᒪᒃᑯᐊ ᓂᕿᑦ ᖃᓄᖅ ᑲᒪᒋᔭᐅᒋᐊᖃᕐᓂᖏᑦ ᐊᒻᒪᓗ ᓂᕿᑐᖃᐃᑦ ᖃᓄᖅ ᐱᔭᐅᖃᑦᑕᕐᓂᖏᓐᓄᑦ. ᐋᓐᓂᐊᖃᕐᓇᖏᑦᑐᓕᕆᔨᑦ ᐃᑲᔪᕐᓂᐊᖅᐳᑦ ᑮᓇᐅᔭᑎᒍᑦ, ᐃᓕᓐᓂᐊᖅᑎᑎᒍᑎᑎᒍᓪᓗ ᐊᒻᒪᓗ ᐱᖁᔨᒍᑎᒃᑯᑦ. ᐱᓕᕆᖃᑎᒌᖕᓂᐊᖅᐳᓪᓗ ᓂᐅᕕᕐᕕᖃᖅᑐᓂᒃ ᓴᖅᑭᔮᖅᑎᑕᐅᔪᓐᓇᖁᓪᓗᒋᑦ ᑕᒪᒃᑯᐊ ᓂᕿᑦ.

ᓇᖕᒥᓂᖅ ᑎᑭᓴᖅᑕᐅᖃᑦᑕᖅᑐᑦ

ᓇᖕᒥᓂᖅ ᑎᑭᓴᐃᓂᖅ ᑭᒃᑯᑐᐃᓐᓇᐃᑦ ᑎᒥᐅᔪᓪᓗ ᖃᓪᓗᓈᑦ ᓄᓇᖓᓐᓂᑦ ᐱᔪᓐᓇᖃᑦᑕᕐᓂᐊᖅᐳᑦ ᐃᑲᔫᓯᐊᖅᑖᖅᑎᑕᐅᕙᒡᓗᑎᒃ. ᑎᑭᑎᑦᓯᔪᓐᓇᕐᓗᑎᒃ ᑎᑎᖃᕐᓂᐊᕐᕕᒃᑯᑦ, ᐅᖃᓚᓗᑎᒡᓗ ᖃᕆᑕᐅᔭᒃᑯᓪᓗ ᑎᑭᓴᐃᓗᑎᒃ.

ᓇᖕᒥᓂᖅ ᑎᑭᓴᖅᑕᐅᔪᑦ ᐊᔾᔨᒌᖏᑦᑑᖃᑦᑕᕐᓂᐊᖅᐳᑦ, ᐊᑭᑦᑐᕋᐅᑎᒍᑕᐅᓗᓂᓗ ᒥᑭᓂᖅᓴᓂ ᓄᓇᓕᖕᓂ ᓂᐅᕕᕐᕕᖕᓄᑦ ᐊᔾᔨᐅᖏᑦᑐᓂᒡᓗ ᑎᑭᓴᐃᔪᓐᓇᕐᓂᐊᖅᖢᑎᒃ ᓂᕿᓂᒃ ᐊᔾᔨᐅᖏᑦᑐᓂᒃ ᓂᕆᒋᐊᖃᖅᑐᑦ. ᐋᖅᑭᒃᓱᖅᑕᐅᒃᑲᓐᓂᕐᓂᐊᖅᖢᓂᓗ ᑎᑭᓴᐃᖃᑦᑕᕐᓂᖅ ᖃᓪᓗᓈᑦ ᓄᓇᖓᓐᓂ ᐊᑭᑭᓐᓂᖅᓴᓂᓪᓗ ᓂᕿᑖᕕᖕᓂᑦ ᐃᓱᒪᒋᔭᐅᓗᑎᒃ, ᖃᐅᔨᒪᑦᓯᐊᖅᑐᓪᓗ ᓂᕿᓂᒃ ᐅᑭᐅᖅᑕᖅᑐᒥ ᓂᕆᔭᐅᒋᐊᖃᖅᑐᓂᒃ.

ᐋᖅᑭᐅᒪᖃᑎᒌᖕᓂᐊᖅᐳᑦ ᐃᓄᓕᕆᔨᑐᖃᒃᑯᑦ ᓂᐅᕕᕐᕕᐅᖃᑦᑕᖅᑐᓪᓗ ᓇᖕᒥᓂᖅ ᑎᑭᓴᖅᑕᐅᔪᓂᒃ ᐃᑲᔫᓯᐊᖅᑖᑲᐅᑎᒋᔪᓐᓇᖁᓪᓗᒋᑦ ᐱᓕᕆᓂᖏᓐᓄᑦ ᑎᑭᓴᐃᔪᓄᑦ ᐊᐅᓪᓚᖅᑎᑎᓂᖏᓐᓄᑦ ᓄᓇᓕᖕᓂ. ᑕᐃᒪᓐᓇ ᐃᑲᔫᓯᐊᖅᑖᖅᑎᑕᐅᑲᐅᑎᒋᖃᑦᑕᕐᓗᑎᒃ ᓇᖕᒥᓂᖅ ᑎᑭᓴᖅᑕᐅᔪᓂᒃ ᓵᑕᐅᔪᓐᓇᐅᑎᖃᕐᓂᖅᓴᐅᓂᐊᕐᒪᑕ ᑲᑎᑎᑦᓯᓗᑎᒡᓗ ᑎᑎᖃᓂᒃ, ᐊᒻᒪᓗ ᐱᐅᓯᕚᓪᓕᕐᓂᖅᓴᐅᓗᓂ ᐊᐅᓚᑕᐅᓂᖓᑦ ᑕᒪᓐᓇ.

ᖃᐅᔨᒪᑎᑦ ᑲᑎᒪᔨᖏᑦ

ᑕᐃᒪᓐᓇ ᑲᑎᒪᔨᑖᖅᑎᑎᓯᒪᓕᖅᑎᓪᓗᑕ ᐱᓕᕆᐊᕆᔭᐅᓂᖓ ᐊᐅᓪᓛᑦᓯᐊᕐᓂᖅᓴᐅᓂᐊᖅᐳᖅ ᓂᓪᓕᐊᓂᖃᕈᓐᓇᑦᓯᐊᖁᓪᓗᒋᑦ ᐅᑭᐅᖅᑕᖅᑐᒥᐅᑦ ᐊᑲᐅᓈᖅᓴᖏᑦᑐᑦ. ᑲᑎᒪᔨᖏᑦ ᐃᒃᓯᕙᐅᑕᖅ, ᑐᖏᓕᖓ ᐃᒃᓯᕙᐅᑕᐅᑉ ᑕᓪᓕᒪᓂᑦ 7-ᓄᑦ ᑲᑎᒪᔨᖃᕐᓗᑎᒃ ᓇᑭᑐᐃᓐᓇᖅ ᓄᓇᓕᖕᓂᑦ ᐅᑭᐅᖅᑕᖅᑐᒥᐅᓂᓪᓗ ᐱᔾᔪᑎᖃᕐᓗᑎᒃ ᐃᓱᒪᓕᐅᕈᑎᖃᕈᓐᓇᖃᑦᑕᕐᓂᐊᕐᓗᑎᒃ. ᑲᑎᒪᔨᖏᑦ ᓇᖕᒥᓂᖅ ᐱᔪᓐᓇᐅᑎᒥᖕᓂᒃ ᐊᑐᕐᓗᑎᒃ ᑲᑎᒪᔨᐅᓂᐊᖅᐳᑦ ᑭᒡᒐᖅᑐᖅᑎᐅᖏᓪᓗᑎᒃ ᑎᒥᐅᔪᓂᒃ, ᓄᓇᒥᖕᓂᒃ ᐱᒍᒪᔭᒥᖕᓂᒡᓗ.

ᖃᐅᔨᒪᑎᐅᓂᕐᒧᑦ ᑲᑎᒪᔨᖏᑦ ᐱᓕᕆᐊᖃᕐᓂᐊᖅᐳᑦ ᑭᒡᒐᖅᑐᐃᓂᕐᒥᒃ ᐅᑭᐅᖅᑕᖅᑐᒥᐅᑦ ᑕᒪᕐᒥᒃ ᓄᓇᓖᓪᓗ ᑕᒪᕐᒥᒃ ᐊᐅᓚᑕᐅᒍᑎᖏᓐᓄᑦ ᖃᓄᐃᓕᖓᓂᖏᓐᓄᓪᓗ ᐱᓕᕆᐊᑉ ᐱᔾᔪᑎᖃᕐᓗᑎᒃ, ᖃᐅᔨᒃᑲᐃᖃᑦᑕᕐᓗᑎᒡᓗ ᒥᓂᔅᑕᒧᑦ ᐋᖅᑭᒃᑕᐅᒋᐊᖃᕈᑕᐅᔪᓂᒃ ᐊᒻᒪᓗ ᓇᓪᓕᐊᖏᑦ ᓯᕗᓪᓕᖅᐸᑎᑕᐅᒋᐊᖃᕐᓂᖏᓐᓄᑦ ᐱᔾᔪᑎᖃᖅᑐᓂᒃ. ᑕᐃᒪᓐᓇ ᑮᓇᐅᔭᖅᑐᕈᑎᒃᓴᖏᓪᓗ ᓈᒻᒪᑦᓯᐊᖏᓐᓇᖁᓪᓗᒋᑦ.

ᐊᑐᓕᖅᑕᐅᓂᖓ
ᐊᑐᓕᖅᑕᐅᕙᓪᓕᐊᑎᑕᐅᓂᖓ ᓂᕿᑦᓯᐊᕙᓕᕆᓂᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐅᓪᓗᒥ ᐱᒋᐊᖅᐳᖅ ᑐᓴᖅᑎᑎᒍᑎᖃᖅᑎᓪᓗᒋᓪᓗ ᐊᓯᔾᔨᕈᑕᐅᓂᐊᖅᑐᒥᒃ ᑕᒪᒃᑯᓂᖓ ᓂᕿᑦᓯᐊᕙᐃᑦ ᑎᑎᖅᓯᒪᒍᑎᖏᓐᓂᒃ. ᑭᒃᑰᓂᖏᓐᓄᑦ ᑲᑎᒪᔨᐅᔪᑦ ᑕᖅᑭᐅᓂᐊᖅᑐᓂ ᑎᑎᕋᖅᑕᐅᓯᒪᓂᐊᖅᐳᑦ. ᐊᑐᓕᖅᑕᐅᓂᖓ ᑕᒪᐃᑎᒍᑦ ᐱᓕᕆᐊᕆᔭᐅᔫᑉ ᐱᒋᐊᖅᑕᐅᓂᐊᖅᖢᓂ ᐄᐳᕈ 1, 2011-ᒥ.