ᔭᓗᓇᐃᕝ, ᓄᓇᑦᓯᐊᖅ - ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᒥᓂᔅᑕ ᓕᐅᓇ ᐊᒡᓗᒃᑲᖅ ᐅᓪᓗᒥ ᒪᑐᐃᖅᓯᓚᐅᖅᐳᖅ ᕿᑎᕐᒥᐅᑦ ᐋᓐᓂᐊᕐᕕᓕᐊᖅᐸᒃᑐᑦ ᑐᔪᒥᕕᖓᓂᒃ ᔭᓗᓇᐃᒥ, ᓄᓇᑦᓯᐊᒥ. ᑖᓐᓇ ᓄᑖᖅ ᐃᓂᒃᓴᕆᔭᐅᓪᓗᓂ ᐃᓄᖕᓄᑦ ᓄᓇᕗᒥᐅᓄᑦ ᕿᑎᕐᒥᐅᓂ ᐊᐅᓪᓚᕆᐊᖃᕌᖓᑕ ᔭᓗᓇᐃᒧᑦ ᐊᓐᓂᐊᖅᑐᓕᕆᔭᐅᒋᐊᖅᑐᕐᓗᑎᒃ.
 
"ᐊᐅᓪᓚᕆᐊᖃᖃᑦᑕᕐᒪᑕ ᐋᓐᓂᐊᖅᑐᓕᕆᔭᐅᓂᐊᕐᓗᑎᒃ ᐃᓄᐃᑦ ᓄᓇᕗᒥᐅᑦ." ᐅᖃᓚᐅᖅᐳᖅ ᒥᓂᔅᑕ ᐊᒡᓗᒃᑲᖅ. "ᑕᒪᑦᑕ - ᒐᕙᒪᒃᑯᑦ, ᐋᓐᓂᐊᖅᑐᓕᕆᔨᑦ, ᐃᑲᔪᖅᑎᑦ ᖃᓄᑐᐃᓐᓇᖅ, ᐃᓚᒋᔭᐅᔪᓪᓗ ᐱᖃᓐᓇᕆᔭᐅᔪᓪᓗ ᓄᓇᓕᖕᓂ - ᐱᓕᕆᖃᑎᒋᔭᐅᒋᐊᖃᕐᒪᑕ ᐃᖢᐊᖅᓴᖅᑕᐅᓂᖅ ᐱᔭᕆᐊᑐᖏᓐᓂᖅᓴᐅᖁᓪᓗᒍ ᐊᒃᓱᕈᕐᓇᖁᖏᓪᓗᒍᓗ ᐃᓱᒪᒧᑦ."
 
ᓇᓪᓕᐅᒃᑯᒫᖃᐅᑕᐅᖏᑦᑐᒃᑯᑦ ᐋᓐᓂᐊᖅᑐᓕᕆᒍᑎᒃᑯᑦ (NIHB), ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᑲᓇᑕᒥ ᑕᐃᒪᓐᓇ ᑐᔪᕐᒥᓂᖏᓐᓄᑦ ᐊᑭᓕᖅᑐᐃᖃᑦᑕᕐᒪᑕ ᑕᐃᑲᓂ ᕿᑎᕐᒥᐅᑦ ᑐᔪᒥᕕᖓᓃᑦᑐᓂᒃ ᑕᒪᒃᑯᐊ ᐃᖅᑭᓕᑦ ᐊᒻᒪᓗ ᐃᓄᐃᑦ ᐃᖏᕐᕋᔭᒋᐊᖃᖃᑦᑕᕐᒪᑕ ᐊᖏᕐᕋᒥᖕᓂᑦ ᐋᓐᓂᐊᕐᕕᖕᓄᑦ. ᑖᒃᑯᐊ ᓇᓪᓕᐅᒃᑯᒫᖃᐅᑕᐅᖏᑦᑐᒃᑯᑦ ᐋᓐᓂᐊᖅᑐᓕᕆᒍᑎᒃᑯᑦ (NIHB)-ᑯᑦ ᑮᓇᐅᔭᖃᕐᕕᐅᖃᑦᑕᖅᐳᑦ ᑐᔪᒥᕕᖕᒦᒍᑎᒃᓴᓄᑦ, ᓂᕆᒍᑎᒃᓴᓄᑦ, ᐊᐅᓪᓚᕐᕕᒋᔭᒥᓂ ᐊᒡᔭᖅᑐᖅᑕᐅᓂᕐᒧᑦ, ᐊᒻᒪ ᑐᓵᔨᖃᕆᐊᖃᕐᓂᖏᓐᓄᑦ.
 
ᑕᒪᒃᑯᐊ ᐱᓕᕆᐊᕆᔭᐅᔪᑦ ᐱᔾᔪᑎᒋᓪᓗᒋᑦ ᐱᓕᕆᖃᑎᒌᖃᑦᑕᖅᑦ ᓄᓇᕗᑦ ᒐᕙᒃᑯᖏᑦ, ᑲᒪᒋᔭᖃᖃᑦᑕᖅᖢᑎᒃ ᑕᒪᒃᑯᓂᖓ ᑭᒡᒐᖅᑐᐃᓪᓗᑎᒃ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓂᒃ ᑲᓇᑕᒥ.
 
"ᑕᐃᒪᓐᓇ ᐱᓕᕆᖃᑎᒌᒃᖢᑕ, ᐊᒃᓱᕈᖏᓐᓂᖅᓴᐅᑎᖃᑦᑕᖅᐸᕗᑦ ᐃᓄᐃᑦ ᐃᖏᕐᕋᔭᒃᑎᑕᐅᑦᓯᐊᕈᓐᓇᖅᖢᑎᒡᓗ," ᐅᖃᓚᐅᖅᐳᖅ ᒥᓂᔅᑕ ᐊᒡᓗᒃᑲᖅ.  
 
ᓇᖕᒥᓂᕆᔭᐅᓪᓗᓂ ᐊᐅᓚᑕᐅᓪᓗᓂᓗ ᓄᓇᓯ ᑯᐊᐳᕇᓴᒃᑯᓐᓄᑦ ᐊᒻᒪᓗ ᕿᑎᕐᒥᐅᑦ ᑯᐊᐳᕇᓴᒃᑯᖏᓐᓄᑦ, ᓄᑖᖅ ᐃᓂᒃᓴᐅᓂᐊᓕᖅᑐᖅ ᑐᔪᒥᕕᒃ ᐊᑎᖃᖅᑐᖅ  Larga Kitikmeot ᐊᖏᓂᖅᓴᐅᓪᓗᓂ ᑐᔪᒥᕕᒋᔭᐅᓚᐅᖅᑐᒥᑦ ᔭᓗᓇᐃᒥ.