ᐊᑐᕚ, ᔫᓐ 8, 2010 - ᐃᓕᑕᖅᓯᓯᒪᒍᒪᓪᓗᑎᒃ ᓯᓚᕐᔪᐊᒥ ᑕᕆᐅᖅ ᐃᒪᐃᑦ ᐅᓪᓗᖓᓂ, ᒥᓂᔅᑕ ᒋᐊᓪ ᓰ, ᒥᓂᔅᑕ ᐃᖃᓗᓕᕆᓂᕐᒧᑦ ᑕᕆᐅᕐᒥᐅᑕᓕᕆᓂᕐᒧᓪᓗ, ᐅᓪᓗᒥ ᑐᓴᖅᑎᑎᓚᐅᖅᐳᖅ ᒪᕐᕉᖕᓂᒃ ᑲᒪᓇᖅᑐᓂᒃ ᑎᒃᑯᐊᖅᑕᐅᑐᐃᓐᓇᕆᐊᖃᖅᖢᑎᒃ ᐃᒪᕐᒥᐅᑕᐃᑦ ᓴᐳᔾᔭᐅᕕᒃᓴᕆᓂᐊᕐᓗᒋᑦ ᒪᓕᒡᓗᒋᑦ ᐱᖁᔭᕐᔪᐊᖏᑦ ᑕᕆᐅᒥ ᐃᒪᕐᓂᒃ ᐱᔾᔪᑎᖃᖅᖢᑎᒃ ᐱᖁᔭᕐᔪᐊᑦ. ᑭᒡᒐᖅᑐᐃᓪᓗᓂ ᒥᓂᔅᑕ ᐳᕆᓐᑕᔅᒥᒃ, ᒥᓂᔅᑕ ᐊᕙᑎᕐᒥᐅᑕᓕᕆᓂᕐᒧᑦ, ᒥᓂᔅᑕ ᓰ ᑐᓴᖅᑎᑎᓚᐅᕆᓪᓗᓂ ᐱᖓᓱᓂᒃ ᓄᑖᓂᒃ ᑲᓇᑕᒥ ᐆᒪᔪᖃᕐᕕᐅᓂᐊᖅᑐᓂᒃ.
ᑕᐃᑲᓂ ᐅᖃᓪᓚᒃᑎᓪᓗᒍ ᓄᓇᒥᐅᑕᐃᑦ ᑕᑯᔭᒐᖃᕐᕕᖓᓂ, ᒥᓂᔅᑕ ᓰ ᑐᓴᖅᑎᑎᓚᐅᖅᐳᖅ ᑕᒪᒃᑯᐊ ᐊᑎᖃᖅᑐᑦ  Hecate Strait/Queen Charlotte Sound ᐊᓕᒎᔮᖅᑐᓂᒃ ᐃᒪᕐᒥ ᐱᕈᖅᑐᖃᕐᕕᐅᖃᑦᑕᖅᑐᖅ ᑲᒪᓇᖅᑑᓂᖏᓐᓄᑦ ᑕᐃᑲᓂ ᑕᕆᐅᖓᓂ Pacific North Coast, ᐊᒻᒪ ᐊᔾᔨᒌᖏᑦᑐᓂᒃ ᐆᒪᔪᖃᕐᕕᐅᔪᖅ ᑕᐃᑲᓂ  Laurentian Channel ᐃᒪᖓᓂ ᓂᐅᕙᐅᓛᒥ ᐊᒻᒪᓗ ᓚᐸᑐᐊᒥ. ᑕᐃᒫᒡᓗ ᐱᒋᐊᕈᑕᐅᓪᓗᓂ ᑲᓇᑕᐅᑉ ᒐᕙᒪᒃᑯᖏᑦ ᐋᖅᑭᒃᓯᕙᓪᓕᐊᒋᐊᖃᕐᓂᖏᓐᓄᑦ ᑲᓇᑕᒥ ᐃᒪᕐᒥᐅᑕᓂᒃ ᐆᒪᔪᓂᒃ ᓴᐳᔾᔨᕕᐅᓂᐊᖅᑐᓂᒃ 2012-ᖑᓕᖅᐸᑦ.
"ᓯᓚᕐᔪᐊᒥ ᑕᕆᐅᖅ ᐃᒪᐃᑦ ᐅᓪᓗᖓ ᖃᐅᔨᓐᓇᕈᑕᐅᕗᖅ ᑲᓇᑕᒥᐅᓕᒫᑦ ᖃᐅᔨᒪᒋᐊᖃᕐᓂᖏᓐᓄᑦ ᑲᒪᒋᐊᖃᕐᒪᑕ ᐋᓐᓂᐊᕐᓇᖏᑦᑐᒦᖁᓪᓗᒍ ᑕᕆᐅᕗᑦ," ᐅᖃᓚᐅᖅᐳᖅ ᒥᓂᔅᑕ ᓰ. "ᓇᓗᓇᐃᔭᖅᑕᐅᓂᖏᑦ ᒪᕐᕉᒃ ᑲᒪᓇᖅᑑᒃ - ᐅᐊᖕᓇᖓᓂ ᐊᒻᒪᓗ ᑲᓇᖕᓇᒥᐅᓂ ᑕᕆᐅᑦ - ᖃᐅᔨᓐᓇᕈᑕᐅᕗᑦ ᓴᐳᔾᔨᓇᓱᐊᕈᒪᓂᑦᑎᓐᓄᑦ ᓄᖒᓯᑦᑕᐃᓕᒪᓂᕐᒧᓪᓗ, ᐊᒻᒪᓗ ᑕᕆᐅᕐᒥᐅᑕᐃᑦ ᓄᓇᑉᑎᓐᓄᑦ ᐊᑐᖅᑕᐅᖁᓪᓗᒋᑦ ᐃᑲᔪᖅᑕᐅᒍᑎᒃᓴᐅᖁᓪᓗᒋᑦ."

ᑕᕆᐅᑦ ᓴᐳᔾᔭᐅᓂᐊᖅᑐᑦ  (MPA) ᓴᐳᔾᔭᐅᕕᐅᕗᑦ ᑕᒪᒃᑯᐊ ᑕᕆᐅᕐᒥᐅᑕᐃᑦ ᐱᕈᖅᐸᓪᓕᐊᔪᓐᓇᖁᓪᓗᒋᑦ ᓄᓇᒥᐅᑕᐃᓪᓗ. ᐃᓚᒋᔭᐅᓪᓗᓂ ᐋᓐᓂᐊᖅᑖᖅᑕᐃᓕᒪᒋᐊᖃᕐᓂᖏᓐᓄᑦ ᑕᕆᐅᕗᑦ, ᑲᓇᑕᐅᑉ ᒐᕙᒪᒃᑯᖏᑦ ᑕᐃᒪᓐᓇᐃᑦᑐᓂᒃ ᑎᒃᑯᐊᖅᓯᓯᒪᓕᐊᓂᒃᐳᑦ, ᐊᒻᒪᓗ ᓴᖅᑭᑎᑎᕙᓪᓕᐊᒃᑲᓐᓂᕈᒪᑉᓗᑎᒃ ᑕᐃᒪᓐᓇᐃᑦᑐᓂᒃ 2012-ᖑᓕᖅᐸᑦ. ᓯᕗᓪᓕᖅᐹᒥ ᑕᒪᓐᓇ ᐱᓕᕆᐊᕆᔭᐅᓂᐊᖅᖢᓂ ᓇᓗᓇᐃᖅᓯᓂᖅ ᑕᒪᒃᑯᓂᖓ ᑲᒪᓇᖅᑐᓂᒃ. ᖃᐅᔨᓴᖅᑕᐅᓕᕐᓗᓂ, ᑭᒃᑯᑐᐃᓐᓇᐃᓪᓗ ᑲᑎᒪᑎᑕᐅᖃᑦᑕᓚᐅᕐᓗᑎᒃ ᐃᓱᒪᓕᐅᓕᑕᐃᓐᓇᕐᓗᑎᒃ ᑎᒃᑯᐊᖅᓯᒍᒪᓪᓗᑎᒃ ᑕᒪᒃᑯᓂᖓ ᓴᐳᔨᕕᒃᓴᐅᓂᐊᖅᑐᓂᒃ ᑕᕆᐅᕐᒥᐅᑕᓂᒃ ᐱᕈᖅᑐᖏᓐᓂᒡᓗ. 

ᑭᒡᒐᖅᑐᐃᓪᓗᓂ ᒥᓂᔅᑕ ᔨᒻ ᐳᕆᓐᑕᔅᒥᒃ, ᒥᓂᔅᑕ ᐊᕙᑎᒥᐅᑕᓕᕆᓂᕐᒧᑦ, ᒥᓂᔅᑕ ᓰ ᑐᓴᖅᑎᑎᓚᐅᕆᓪᓗᓂ ᐱᖓᓱᓂᒃ ᓄᑖᓂᒃ ᑲᓇᑕᒥ ᐆᒪᔪᖃᕐᕕᒃᓴᓂᒃ ᓄᓇᕗᒥ: ᓂᖏᓐᓇᕐᓂᖅ ᐆᒪᔪᖃᕐᕕᖓ (ᐃᓴᐱᓚ ᐲᒥ), ᐊᒃᐸᐃᑦ ᐆᒪᔪᖃᕐᕕᒃ, ᐊᒻᒪᓗ ᖃᖁᓪᓗᐃᑦ ᐆᒪᔪᖃᕐᕕᒃ

"ᓄᓇᓕᖕᓂᒥᐅᓂᒃ ᐱᓕᕆᖃᑎᖃᕐᓗᑕ, ᒐᕙᒪᕗᑦ ᐱᓕᕆᐊᒃᓴᖃᒻᒪᕆᖕᓂᐊᖅᐳᑦ ᓴᐳᔾᔭᐅᖁᓪᓗᒍ ᑲᓇᑕᐅᑉ ᐅᑭᐅᖅᑕᖅᑐᖓ," ᐅᖃᓚᐅᖅᐳᖅ ᒥᓂᔅᑕ ᐳᕆᓐᑎᔅ. "ᑕᐃᒪᓐᓇ ᓴᐳᔾᔨᓗᑕ ᑲᔾᔮᖅᓇᖅᑐᓂᒃ ᐊᕐᕕᖕᓂᒃ, ᒐᕙᒪᒃᑯᑦ ᐃᓚᐅᖃᑕᐅᕗᑦ ᐃᑉᓕᕐᓇᖅᑐᓂᒃ ᓴᐳᔾᔨᓂᕐᒧᑦ ᐃᓂᕆᔭᐅᖃᑦᑕᖅᑐᓂᒃ ᓄᓇᒥ ᐃᒪᕐᒥᓗ, ᐊᒻᒪᓗ ᐱᓕᕆᐊᖃᖅᖢᑕ ᓴᐳᔾᔨᔨᐅᓂᕐᒧᑦ ᐱᖃᕐᓂᑦᑎᓐᓄᑦ ᖁᑦᓯᒃᑐᒥ."
"ᐅᓪᓗᒥ ᐅᓪᓗᑦᓯᐊᕙᐅᓛᖑᕗᖅ, ᓯᓚᕐᔪᐊᒥ ᑕᕆᐅᑦ ᐃᒪᐃᑦ ᐅᓪᓗᖓᓂ. ᐊᒻᒪᓗ ᐊᕐᕌᒍᖃᕐᓂᑦᑎᓐᓂ, ᓯᓚᕐᔪᐊᒥ ᓱᓇᑐᐃᓐᓇᐃᑦ ᐆᒪᔪᑦ ᐱᔾᔪᑎᒋᓪᓗᒋᑦ, ᑐᓴᖅᑎᑎᓂᖅ ᖁᕕᐊᓇᖅᐳᖅ ᓴᐳᔾᔭᐅᓂᕆᓂᐊᖅᑕᖏᓐᓂᒃ ᐃᒃᐱᕆᔭᕋᐃᑦᑑᑉ ᓄᓇᐅᑉ, ᐃᒪᐅᑉ, ᑕᕆᐅᓪᓗ ᐆᒪᔪᖏᓪᓗ ᐃᑉᓕᕐᓇᖅᑐᑦ," ᐅᖃᓚᐅᖅᐳᖅ ᒥᓂᔅᑕ ᓰ. "ᓇᓗᓇᐃᖅᑕᐅᓯᒪᓂᖏᓐᓄᑦ ᑖᒃᑯᐊ ᒪᕐᕉᒃ ᑲᒪᓇᖅᑐᑦ ᓴᖅᑭᑎᑎᓂᕐᓗ ᑲᓇᑕᒥ ᐆᒪᔪᖃᕐᕕᒃᓴᓂᒃ ᐱᖓᓱᓂᒃ ᓄᑖᓂᒃ ᖃᐅᔨᓐᓇᕈᑕᐅᕗᖅ ᑲᓇᑕᐅᑉ ᒐᕙᒪᒃᑯᖏᑦ ᐸᐸᑦᓯᒍᒪᓂᖏᓐᓄᑦ ᓴᐳᔾᔨᒍᒪᓂᖏᓐᓄᓪᓗ ᑲᔾᔮᕐᓇᖅᑐᖃᕐᕕᖕᓂᒃ."
ᓯᓚᕐᔪᐊᒥ ᑕᕆᐅᑦ ᐃᒪᐃᑦ ᐅᓪᓗᖓᓂ ᖁᕕᐊᓱᒍᑎᖃᕐᓂᐊᖅᐳᒍᑦ ᓯᓚᕐᔪᐊᒥ ᔫᓐ 8-ᖑᓕᖅᐸᑦ. ᒪᓕᒃᑕᐅᓂᐊᖅᖢᑕ ᑲᓇᑕᒥ ᐊᕙᑎᒥᐅᑕᓕᕆᓂᕐᒧᑦ ᐱᓇᓱᐊᕈᓯᖃᕐᓗᑕ (ᒪᐃ 31-ᔫᓐ 5-ᒧᑦ) ᐊᒻᒪᓗ ᑰᓪᓗ ᑕᕆᐅᓪᓗ ᐱᓇᓱᐊᕈᓯᖃᓕᕐᒥᓗᑎᒃ (ᔫᓐ 8-14-ᒧᑦ).i



ᖃᓄᐃᓕᐅᕈᑕᐅᓯᒪᔪᑦ
ᐱᖓᓱᑦ ᓄᑖᑦ ᑲᓇᑕᒥ ᐆᒪᔪᖃᕐᕕᒃᓴᐃᑦ ᓴᐳᔾᔭᐅᕕᒃᓴᐃᑦ  ᓴᐳᔾᔨᕕᐅᓂᐊᖅᐳᑦ ᐆᒪᔪᓂᒃ ᓄᓇᒥᐅᑕᓂᒡᓗ ᓄᓇᕗᒥ
ᐱᖓᓱᑦ ᓄᑖᑦ ᑲᓇᑕᒥ ᐆᒪᔪᖃᕐᕕᒃᓴᐃᑦ ᕿᑭᖅᑖᓗᖕᒥ, ᑐᓴᖅᑎᑕᐅᒍᑕᐅᓚᐅᖅᐳᑦ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᕈᓐᓇᐅᑎᖏᓐᓄᓪᓗ ᐊᖏᕈᑎᒥ ᐊᑐᖅᖢᑎᒃ, ᓴᐳᔾᔭᐅᓂᖃᕐᓂᐊᖅᖢᓂ  4,534 km2   ᑭᓛᒥᑕᓂᒃ ᐊᖏᓂᖃᖅᑐᑦ ᐃᒻᒪᖃ 80ᐳᓴᓐ ᐊᖏᓂᖃᑎᑐᑦ ᐳᕆᔅ ᐃᑦᕗᑦ ᐊᐃᓚᓐ. ᑲᓇᑕᐅᑉ ᒐᕙᒪᒃᑯᖏᑦ ᐱᓕᕆᖃᑎᖃᕐᓂᐊᖅᐳᑦ ᓄᓇᓕᖕᓂᒥᐅᓂᑦ ᓄᓇᕗᒥᐅᓂᒡᓗ ᑕᒪᒃᑯᐊ ᓄᓇᓖᑦ ᑕᒪᕐᒥᒃ ᐊᕙᑎᒥᐅᑕᕐᓗ ᐃᑲᔪᖅᑕᐅᓂᖃᖁᓪᓗᒍ ᑕᒪᒃᑯᓄᖓ ᑲᓇᑕᒥ ᐆᒪᔪᖃᕐᕕᐅᓂᐊᖅᑐᓂ
ᐊᑐᓂ ᓄᑖᑦ ᑎᒃᑯᐊᖅᑕᐅᔪᒃᓴᐃᑦ ᕿᑭᖅᑖᓗᖕᒥ ᐸᐸᑦᓯᒍᑕᐅᓂᐊᖅᐳᑦ ᐊᔾᔨᐅᖏᑦᑐᓂᒃ ᐱᒻᒪᕆᐅᔪᓂᒡᓗ ᐃᓂᒃᓴᕆᔭᐅᓂᐊᖅᑐᓂᒃ.

ᓂᖏᓐᓇᕐᓂᖅ ᐆᒪᔪᖃᕐᕕᖓ (ᐃᓴᐱᓚ ᐲᒥ) - 336,200 ᕼᐃᒃᑐᓂᒃ ᐊᖏᓂᖃᖅᖢᓂ
ᑕᒪᓐᓇ ᓄᓇ, ᐱᖁᔭᐅᓯᒪᓪᓗᓂ ᑲᖏᖅᓱᒑᐱᖕᒥᐅᓄᑦ, ᐊᐅᔭᒃᑯᑦ ᐃᓂᕆᔭᐅᕙᒃᖢᓂ ᐊᕐᕕᖕᓄᑦ. ᐊᕐᕕᒃ ᐊᖏᔪᒻᒪᕆᐅᓪᓗᓂ ᑕᕆᐅᕐᒥᐅᑕᖅ ᓯᑯᒥᑦ ᓯᖁᑦᑎᕆᔪᓐᓇᖅᖢᓂᓗ ᐃᔾᔪᑎᒋᔪᒥᒃ 20 ᓯᓐᑕᒦᑕᓂᒃ ᓯᐊᖁᒥᓂᒃ ᐊᑐᖅᖢᓂ. ᓇᒧᖓᐅᓂᕐᒥᓄᑦ ᖃᐅᔨᒪᒍᑎᖃᖅᖢᓂ ᖃᕆᑕᒥᓂ ᑐᓵᓪᓗᓂᓗ ᓂᓪᓕᐊᒍᓐᓇᖅᖢᓂᓗ ᐊᕐᕕᐅᖃᑎᒥᓄᑦ ᓯᑯᑉ ᐊᑖᓂᑦ. ᑕᒪᒃᑯᐊ ᐃᓚᖏᑦ ᐊᓈᓇᐅᔪᑦ ᕿᑐᖓᖏᓪᓗ, ᐅᐊᖕᓇᖅᐸᓯᒧᖓᐅᓪᓗᑎᒃ ᑕᓪᓗᕈᑎᐅᑉ ᐃᒪᖓᒍᑦ ᑕᒫᓂ ᔫᓐᓂ ᓄᖑᓕᖅᑎᓪᓗᒍ ᐱᒋᐊᕐᓂᖓᓂᓗ ᔪᓚᐃ, ᐊᓯᖏᑦ ᐃᓐᓇᐃᑦ ᐊᖏᓂᖅᓴᐃᓪᓗ ᕿᑐᖓᖏᑦ, ᑲᓇᖕᓇᒦᖏᓐᓇᖅᐸᒃᖢᑎᒃ ᕿᑭᖅᑖᓗᖕᒥ ᓯᒡᔭᖅᐸᓯᖓᓂ ᐊᐅᔭᓕᒫᖅ ᐅᑭᐊᒃᓵᒃᑯᓪᓗ.
ᐊᒃᐸᐃᑦ ᐆᒪᔪᖃᕐᕕᒃ - 77,400 ᕼᐃᒃᑐ ᐊᖏᓂᖃᖅᖢᓂ
ᐊᒃᐸᐃᑦ ᐱᒻᒪᕆᐅᕗᖅ ᓄᓇ ᑕᒪᒃᑯᓄᖓ ᐊᔾᔨᒌᑦᑐᓄᑦ ᑎᖕᒥᐊᓄᑦ ᐃᖏᕐᕋᔭᐃᓐᓇᖅᐸᒃᑐᓄᑦ ᐅᑎᖅᑕᕋᖅᐸᒃᑐᓄᑦ ᑖᒃᑯᐊ ᓲᕐᓗ ᐊᒃᐸᓄᑦ ᐃᓂᒋᔭᐅᓪᓗᓂ. ᐃᕙᕕᐅᕙᒃᖢᓂᓗ ᑕᒪᒃᑯᓄᖓ ᑎᕋᑎᕋᓪᓗ  ᓇᐅᔭᕐᔪᐊᓄᑦ ᐊᒻᒪᓗ ᐱᑦᓯᐊᓛᓄᓪᓗ. ᐊᐃᕕᖅᑕᖃᐅᖅᖢᓂᓗ, ᐊᔾᔨᒌᖏᑦᑐᓂᒡᓗ ᓇᑦᓯᕐᓂᒃ ᐊᒻᒪᓗ ᓇᓄᕐᓂᒃ. ᓄᓇ ᐊᒡᕕᖅᓯᒪᓪᓗᓂ ᐃᓚᖓ ᐃᓐᓈᕉᓪᓗᓂ ᐳᖅᑐᓂᖃᖅᖢᓂ 915 ᒦᑕᓂᒃ ᑕᕆᐅᒥᑦ ᐃᓐᓈᕈᖃᐅᖅᖢᓂᓗ ᓇᐅᒃᑯᑐᐃᓐᓇᖅ ᓯᒡᔭᖃᖅᖢᓂᓗ.

ᖃᖁᓪᓗᐃᑦ ᐆᒪᔪᖃᕐᕕᒃ - 39,800 ᕼᐃᒃᑐᑦᔅ
ᖃᖁᓪᓗᐃᑦ ᒪᕐᕉᖕᓂᒃ ᐅᔭᕋᖃᖅᐳᑦ ᐳᖅᑐᔪᓂᒃ, ᐊᐅᐸᕈᔪᒃᑐᓂᒃ ᑎᖓᐅᔭᖅᑕᖃᖅᖢᓂᓗ ᖁᓛᓂ ᐱᕈᖅᑐᖃᐅᖅᖢᑎᒃ, ᐳᖅᑐᓂᖃᖅᖢᑎᒡᓗ 430 ᒦᑕᓂᒃ ᑕᕆᐅᒥᑦ. ᖃᖁᓪᓗᐃᓪᓗ ᐃᕙᕕᖃᖅᖢᑎᒃ, 22-ᐳᓴᓐ ᑲᑎᓪᓗᒋᑦ ᑲᓇᑕᒥᑦ ᐊᒥᓲᓂᖃᖅᖢᑎᒃ. ᑕᕆᐅᕐᒥᐅᑕᓂᒡᓗ ᑕᒪᒃᑯᐊ ᐊᐃᕖᑦ ᖃᐃᕈᓕᑦ ᑕᕆᐅᕐᒥᐅᑕᐅᓪᓗᑎᒃ ᑕᐃᑲᓂ.

ᑲᓇᑕᒥ ᐆᒪᔪᖃᕐᕖᑦ ᐋᖅᑭᒃᑕᐅᖃᑦᑕᖅᐳᑦ ᓴᐳᔾᔭᐅᖃᑦᑕᖅᖢᑎᒡᓗ ᑲᓇᑕᒥ ᐆᒪᔪᓕᕆᓂᕐᒧᑦ ᐱᖁᔭᕐᔪᐊᖅ ᒪᓕᒃᖢᒍ. ᑕᐃᒪᓐᓇ ᑎᒃᑯᐊᖅᑕᐅᓂᐊᖅᑐᑦ, ᐃᓂᒋᔭᐅᒋᐊᖃᖅᐳᖅ ᑎᖕᒥᐊᓄᑦ ᐊᐅᓪᓛᖃᑦᑕᖅᑐᓄᑦ ᐅᑎᖅᑕᕋᖅᐸᒃᑐᓄᑦ, ᐆᒪᔪᖅᑕᖃᕆᐊᖃᖅᖢᓂᓗ ᓄᓇᒥᐅᑕᖃᕐᓗᓂ ᐅᓗᕆᐊᓇᕐᓂᕋᖅᑕᐅᔪᓂᒃ ᓄᖑᑉᐸᓪᓕᐊᓴᕋᐃᓐᓂᖏᓐᓄᑦ, ᐅᕙᓘᓐᓃᑦ ᐊᔾᔨᐅᓗᐊᖏᑦᑐᓂᒃ ᐱᑕᖃᓗᐊᖏᑦᑐᓂᒃ ᐊᔾᔨᐅᖏᑦᑐᓂᒡᓗ ᐆᒪᔪᖃᕐᕕᐅᓗᓂ ᓄᓇᒥ ᐆᒪᔪᖃᐅᕐᓗᓂ ᐊᔾᔨᒌᖏᑦᑐᓂᒃ.
ᑎᒃᑯᐊᖅᑕᐅᓯᒪᓕᖅᐸᑕ ᑲᓇᑕᒥ ᐆᒪᔪᖃᕐᕕᐅᓂᖏᓐᓄᑦ, ᑕᒪᒃᑯᐊ ᓄᓇᒥᐅᑕᐃᓪᓗ ᓴᐳᔾᔭᐅᓕᕋᔭᖅᐳᑦ ᐊᐅᓚᑕᐅᑦᑕᐃᓕᒪᓗᑎᒃ ᐅᓗᕆᐊᓇᖅᑐᑦ ᑲᒪᒋᔭᐅᑦᑕᐃᓕᓗᑎᒃ ᑭᒃᑯᑐᐃᓐᓇᕐᓄᑦ ᐱᐅᖏᓕᕈᑕᐅᔪᓐᓇᖅᐸᑕ ᐆᒪᔪᓄᑦ ᓄᓇᒧᓪᓗ. ᐊᐅᓚᑦᓯᓂᖅ ᐱᓕᕆᐊᖃᖃᑦᑕᕐᓂᐊᖅᖢᑎᒃ ᖃᐅᔨᓴᕐᓗᑎᒃ ᐆᒪᔪᖏᓐᓂᒃ, ᖃᐅᔨᓴᓚᐅᐱᓪᓚᒃᐸᒡᓗᑎᒡᓗ ᖃᓄᐃᓕᖓᓕᕐᓂᖏᓐᓄᑦ, ᐱᖁᑎᓂᒡᓗ ᑲᒪᒋᔭᖃᕐᓗᑎᒃ, ᐊᒻᒪᓗ ᐱᕙᓪᓕᐊᑎᑎᓗᑎᒃ ᐊᐅᓚᑦᓯᒍᑎᒃᓴᓂᒃ ᐸᕐᓇᒃᓯᒪᒍᑎᒃᓴᓂᒃ. ᐆᒪᔪᐃᑦ ᖃᐅᔨᓴᖅᑕᐅᓂᖏᑦ ᐊᒻᒪᓗ ᑐᑭᑖᕈᑎᖏᑦ ᐃᓂᒋᔭᖏᓐᓂ, ᑭᓯᐊᓂ ᐱᔪᓐᓇᐅᑎᑖᕐᓗᑎᒃ ᑭᒃᑯᑐᐃᓐᓇᐃᑦ ᐱᖁᔭᓂᒡᓗ ᒪᓕᑦᓯᐊᕐᓗᑎᒃ ᖃᐅᔨᓴᕈᓐᓇᖅᑎᑕᐅᓪᓗᑎᒃ.