ᐃᖃᓗᐃᑦ, ᓄᓇᕗᑦ - ᑲᓇᑕᒥ ᒐᕙᒪᒃᑯᖏᑦᑕ ᐅᑭᐅᖅᑕᖅᑐᒥ ᐱᕙᓪᓕᐊᑎᑎᓂᕐᒧᑦ ᐱᓕᕆᔨᑦ (CanNor) ᑮᓇᐅᔭᓂᒃ ᐊᑐᕐᓂᐊᖅᐳᑦ ᐊᑯᓂ ᐱᕈᖅᐸᓪᓕᐊᒍᑎᒃᓴᖏᓐᓄᑦ ᐱᕙᓪᓕᐊᒍᑎᒃᓴᖏᓐᓄᓪᓗ ᓄᓇᕗᒥ ᑕᕐᕆᔭᐅᑎᓕᐅᖅᐸᒃᑐᑦ ᑕᑯᓐᓇᒐᒃᓴᓕᐅᖅᐸᒃᑐᓪᓗ.

CanNor ᐊᑐᕐᓂᐊᖅᐳᑦ ᑮᓇᐅᔭᓂᒃ  $230,000-ᓂᒃ ᐊᒻᒪᓗ ᑮᓇᐅᔭᑦ ᐃᓚᖏᑦ  $140,000 ᓄᓇᕗᒥ ᑕᕐᕆᔭᒐᒃᓴᓕᐅᖅᑎᑦ ᐱᕙᓪᓕᐊᑎᑎᓂᕐᒧᑦ ᑯᐊᐳᕇᓴᒃᑯᓐᓄᑦ  (NFDC) ᐊᒻᒪᓗᒃᑲᓐᓂᖅ  $90,000 ᐅᖅᑯᕐᒥᐅᑦ ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᖏᑦᑕ ᑲᑐᔾᔨᖃᑎᒌᒃᑯᖏᓐᓄᑦ UIAA). ᑕᒪᓐᓇ ᑐᓴᖅᑎᑎᒍᑕᐅᓚᐅᖅᐳᖅ ᐅᓪᓗᒥ ᒥᓂᔅᑕ ᓕᐅᓇ ᐊᒡᓗᒃᑲᕐᒧᑦ, ᐅᑭᐅᖅᑕᖅᑐᒥᐅᓂᒃ ᑲᒪᔨᐅᔪᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᒥᓂᔅᑕᐅᓪᓗᓂᓗ, ᑭᒡᒐᖅᑐᐃᓪᓗᓂ ᒥᓂᔅᑕ ᓴᒃ ᓯᑖᓪᒥᒃ, ᒥᓂᔅᑕ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐅᑭᐅᖅᑕᖅᑐᒥ ᐱᕙᓪᓕᐊᑎᑎᓂᕐᒧᑦ ᐱᓕᕆᔨᓄᑦ (CanNor).

"ᓴᖅᑭᔮᖅᑎᑎᓂᖅ ᖃᓄᐃᓕᐅᕈᑕᐅᕙᓪᓕᐊᔪᓂᒃ ᓄᓇᕗᒥ ᐱᕈᖅᐸᓪᓕᐊᒍᑕᐅᓂᐊᕐᒪᑦ ᑕᐃᒪᓐᓇᐃᓕᐅᖅᑎᑕᐅᓗᑎᒃ ᑕᑯᓐᓇᒐᒃᓴᓕᕆᓂᕐᒧᑦ ᑮᓇᐅᔭᓕᐅᕈᑕᐅᕙᓪᓕᐊᓂᖅᓴᐅᓗᓂᓗ ᐃᓄᖕᓄᑦ," ᐅᖃᓚᐅᖅᐳᖅ ᐊᒡᓗᒃᑲᖅ. "ᑮᓇᐅᔭᓂᒃ ᑕᐃᒪᓐᓇ ᐊᑐᒐᒃᓴᖃᖅᑎᑎᓂᖅ ᐊᔪᖏᓴᖅᑎᑕᐅᓗᑎᒃ ᐱᔪᓐᓇᖅᓯᓴᖅᑎᑕᐅᓗᑎᒡᓗ ᓄᓇᕗᒥᐅᑦ ᓯᕗᓂᒃᓴᖃᑦᓯᐊᖅᑎᑕᐅᓂᐊᖅᐳᑦ ᓯᕗᓂᒃᓴᑦᑎᓐᓂ ᖃᐃᕙᓪᓕᐊᓂᐊᖅᑐᓄᑦ ᐃᓄᖕᓄᑦ ᒪᒃᑯᒃᑐᓄᑦ."

"ᓄᓇᕗᒥ ᑕᕐᕆᔭᒐᒃᓴᓕᐅᖅᑎᑦ ᐱᕙᓪᓕᐊᑎᑎᓂᕐᒧᑦ ᑯᐊᐳᕇᓴᒃᑯᓐᓄᑦ NFDC ᖁᕕᐊᓱᑦᓯᐊᖅᐳᑦ ᑮᓇᐅᔭᑎᒍᑦ ᐃᑲᔪᖅᑕᐅᓂᐊᕐᓂᕐᒧᑦ ᐅᑭᐅᖅᑕᖅᑐᒥ ᐱᕙᓪᓕᐊᑎᑎᔨᒃᑯᓐᓂᑦ," ᐅᖃᓚᐅᖅᐳᖅ ᕼᐃᐊᓪ ᑎᒫ, ᐊᖓᔪᖃᕆᔭᐅᔪᖅ ᓄᓇᕗᒥ ᑕᕐᕆᔭᒐᒃᓴᓕᐅᖅᑎᑦ ᐱᕙᓪᓕᐊᑎᑎᓂᕐᒧᑦ ᑯᐊᐳᕇᓴᒃᑯᓐᓄᑦ. "ᑕᐃᒪᓐᓇ ᐱᓕᕆᖃᑎᒌᒡᓗᑕ ᑕᐃᒪᓐᓇᑎᑐᑦ ᓄᓇᕗᑦ ᓯᓚᕐᔪᐊᒥᐅᓂ ᑕᕐᕆᔭᒐᒃᓴᓕᐅᕈᑎᖃᖅᐸᓪᓕᐊᑦᓯᐊᕐᓂᐊᖅᐳᑦ."

"ᑖᒃᑯᐊ ᑮᓇᐅᔭᑦ $90,000 ᐃᑲᔪᕈᑕᐅᔪᓐᓇᕐᓂᐊᖅᐳᑦ ᖃᓄᐃᓕᐅᖅᑎᑎᔨᐅᕙᒃᑐᓂᒃ ᑕᐃᒪᓐᓇ ᐃᓕᓐᓂᐊᖅᑎᑎᖃᑦᑕᕐᓗᑎᒃ ᑲᑎᒪᑎᑎᖃᑦᑕᕈᓐᓇᕐᓂᐊᖅᐳᑦ ᐊᒻᒪᓗ ᐊᒥᓱᓕᐅᕈᑎᒃᓴᓂᒃ ᑎᑎᖅᑐᒐᓂᒃ. ᖁᔭᓐᓇᒦᕈᒪᕙᕗᑦ ᒐᕙᒪᒃᑯᑦ ᑮᓇᐅᔭᓂᒃ ᑕᐃᒪᓐᓇ ᑐᓂᕐᕈᑎᖃᕐᓂᖏᓐᓄᑦ ᐃᒡᓗᕐᔪᐊᒧᑦ," ᐅᖃᓚᐅᖅᐳᖅ ᒪᓇᓯ ᓄᐊ, ᐃᒃᓯᕙᐅᑕᕆᔭᐅᔪᖅ ᐅᖅᑯᕐᒥᐅᑦ ᑎᑎᖅᑐᒐᕐᕕᖓᓐᓂ.

ᑮᓇᐅᔭᖅᑖᖅᑎᑎᓂᖅ ᓄᓇᕗᒥ ᑕᕐᕆᔭᒐᒃᓴᓕᐅᖅᑎᑦ ᐱᕙᓪᓕᐊᑎᑎᓂᕐᒧᑦ ᑯᐊᐳᕇᓴᒃᑯᓐᓄᑦ  NFDC ᓂᐅᕕᐊᒃᓴᖃᕈᓐᓇᕐᓂᐊᖅᐳᑦ ᑲᑎᒪᔭᖅᑐᖅᑎᑕᐅᖃᑦᑕᕐᓗᑎᒡᓗ ᑕᑯᓐᓇᒐᒃᓴᖃᖅᑎᑎᖃᑦᑕᕐᓗᑎᒡᓗ ᑕᕐᕆᔭᐅᑎᓕᕆᓂᕐᒧᑦ, ᑕᓚᕕᓴᓕᕆᓂᕐᒧᑦ ᐊᒻᒪᓗ ᑕᑯᒃᓴᐅᑎᑕᐅᔪᒃᓴᐅᓂᐊᖅᑐᓂᒃ. ᑮᓇᐅᔭᑦ ᑐᓂᔭᐅᓂᐊᖅᑐᑦ ᐅᖅᑯᕐᒥᐅᑦ ᐃᓄᐃᑦ ᑕᑯᓐᓇᒐᒃᓴᓕᕆᔨᒃᑯᖏᑦᑕ ᑲᑐᔾᔨᖃᑎᒌᒃᑯᖏᓐᓄᑦ ᒪᕐᕉᖕᓂᒃ ᐱᓕᕆᐊᖃᕈᓐᓇᐅᑕᐅᓂᐊᖅᐳᑦ: ᑲᑎᒪᑎᑕᐅᖃᑦᑕᕐᓗᑎᒃ ᐃᓕᓐᓂᐊᖅᑎᑕᐅᓂᐊᖅᐳᑦ ᐊᒻᒪᓗ ᓴᓇᖑᐊᕐᕕᒃ ᐋᖅᑭᒃᓱᖅᑕᐅᓗᓂ ᓄᑖᖑᖅᑎᑕᐅᓗᓂ.

ᑕᒪᒃᑯᐊ ᑮᓇᐅᔭᑦ ᐱᑕᖃᕈᓐᓇᖅᑎᑕᐅᓯᒪᕗᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐅᑭᐅᖅᑕᖅᑐᒥ ᐱᕙᓪᓕᐊᑎᑎᓂᕐᒧᑦ ᐱᓕᕆᔨᓂᑦ ᐸᕐᓇᒃᓯᒪᒍᑎᓂᑦ ᐱᕙᓪᓕᐊᑎᑎᓂᕐᒧᑦ ᐅᑭᐅᖅᑕᖅᑐᒥ  (SINED) ᐊᒻᒪᓗ ᓄᓇᓕᖕᓂ ᐱᕙᓪᓕᐊᔪᓕᕆᓂᕐᒧᑦ ᐱᔪᓐᓇᖅᑎᑕᐅᒍᑎᓂᑦ  (CEOP). ᑕᒪᕐᒥᒃ ᐱᓕᕆᐊᕆᔭᐅᔪᑦ ᑖᒃᑯᐊ ᐱᒍᑕᐅᓂᐊᖅᐳᑦ ᐱᕙᓪᓕᐊᑎᑎᓂᕐᒧᑦ ᐱᓕᕆᐊᓂᒃ ᑲᒪᒋᔭᐅᓗᑎᒃ ᓴᖅᑭᑎᑕᐅᓗᑎᒡᓗ ᐅᑭᐅᖅᑕᖅᑐᒥ ᓄᓇᕗᒥ ᓄᓇᑦᓯᐊᒥ ᔪᑳᓐᒥᓗ ᑖᒃᑯᓇᖓᑦ ᑲᓇᑕᐅᑉ ᒐᕙᒪᒃᑯᖏᓐᓂᖔᕐᓗᑎᒃ.

ᖃᓄᐃᓕᐅᕈᑕᐅᓯᒪᓂᖏᑦ - ᐃᑲᔪᖅᑕᐅᓂᖏᑦ ᓄᓇᕗᒥ ᑎᑎᖅᑐᒐᕐᓂᕐᒧᑦ ᓴᓇᖑᐊᕐᓂᕐᒧᓪᓗ ᐃᓕᖁᓯᑐᖃᓕᕆᓂᕐᒧᓪᓗ ᐱᓕᕆᕕᐅᔪᑦ

ᖃᐅᔨᒋᐊᕐᓗᒋᑦ ᖃᕆᑕᐅᔭᒃᑯᑦ ᑐᑭᓯᕚᓪᓕᕈᑎᒃᓴᐃᑦ ᑲᓇᑕᒥ ᐱᕙᓪᓕᐊᔪᓕᕆᓂᕐᒧᑦ ᐸᕐᓇᒃᓯᒪᒍᑕᐅᔪᑦ ᐊᒻᒪᓗ ᑲᓇᑕᒥ ᐅᑭᐅᖅᑕᖅᑐᒥ ᐸᕐᓇᒃᓯᒪᒍᑕᐅᔪᑦ .