ᐊᑐᕚ, ᐋᓐᑎᐅᕆᔪ - ᒥᓂᔅᑕ ᓕᐅᓇ ᐊᒡᓗᒃᑲᖅ, ᓄᓇᕗᒥᐅᓄᑦ ᑲᑎᒪᔨᕐᔪᐊᖑᖃᑕᐅᔪᖅ ᐊᑐᕚᒥ, ᓄᓇᕗᒥᐅᓄᑦ ᑭᒡᒐᖅᑐᐃᔨᐅᓪᓗᓂ, ᒥᓂᔅᑕ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ, ᒥᓂᔅᑕᐅᓪᓗᓂᓗ ᑲᒪᔨᐅᔪᖅ ᐅᑭᐅᖅᑕᖅᑐᒥᐅᓄᑦ, ᓄᓇᕗᒧᑦ ᐊᐅᔭᖅ ᐳᓚᕋᕇᓚᐅᖅᐳᖅ ᐅᓪᓗᒥ ᓇᒧᑐᐃᓐᓇᖅ ᐊᖅᑯᓵᖃᑦᑕᓚᐅᖅᖢᓂᓗ ᐅᑭᐅᖅᑕᖅᑐᒥ.

ᒥᓂᔅᑕᐅᑉ ᐅᑭᐅᖅᑕᖅᑐᒥ ᐃᖏᕐᕋᔭᖕᓂᕆᓚᐅᖅᑕᖓ ᐱᒋᐊᓚᐅᖅᐳᖅ ᐅᖅᓱᖅᑑᒥᑦ ᐱᓇᓱᐊᕈᓯᐅᓚᐅᖅᑐᒥ. ᑕᒃᓯᕋᓗᐊᖅᑎᓪᓗᒍ, ᒥᓂᔅᑕ ᐊᒡᓗᒃᑲᖅ ᑲᖏᖅᖠᓂᕐᒧᐊᓚᐅᖅᐳᖅ ᑲᑎᖃᑎᖃᓚᐅᖅᖢᓂᓗ ᒪᐃᔭ ᔮᓐ ᕼᐃᒃᒥᒃ ᐳᓚᕋᖅᑎᑕᐅᓪᓗᓂᓗ ᑲᖏᖅᖠᓂᕐᒥ ᑲᑎᒪᖃᑎᖃᖅᖢᓂᓗ ᕼᐊᒻᓚᒃᑯᑦ ᑲᑎᒪᔨᖏᓐᓂᒃ.

ᑲᖏᖅᖠᓂᕐᒦᓐᓂᕐᒥᓂ, ᒥᓂᔅᑕ ᐊᒡᓗᒃᑲᖅ ᐱᖁᑎᕐᔪᐊᓕᕆᓂᕐᒧᑦ ᒥᓂᔅᑕᒥᒃ ᑭᒡᒐᖅᑐᐃᓚᐅᖅᐳᖅ ᒥᓂᔅᑕᐅᔪᒥᒃ ᐱᖁᑎᕐᔪᐊᓕᕆᓂᕐᒧᑦ ᐱᓕᕆᐊᖃᖅᑐᒥᒃ ᔮᓐ ᐱᐅᑦ ᐊᒻᒪᓗ ᑲᑎᒪᖃᑎᖃᖅᖢᓂ ᒥᓂᔅᑕ ᓄᓇᕗᒥ ᓗᐊᓐ ᑯᓱᒐᖅ, ᒥᓂᔅᑕ ᓄᓇᓕᖕᓂ ᒐᕙᒪᓕᕆᓂᕐᒧᑦ ᐱᔨᑦᓯᕋᖅᑎᒃᑯᓐᓄᓪᓗ ᒪᓕᒐᓕᐅᖅᑎᓪᓗᓂᓗ ᑲᖏᖅᖠᓂᐅᑉ ᓂᒡᒋᐊᓄᑦ-ᑎᑭᕋᕐᔪᐊᒧᓪᓗ, ᑐᓴᖅᑎᑎᒍᑎᖃᓚᐅᖅᖢᑎᒡᓗ ᐃᑲᔪᕐᓂᐊᕐᓂᕐᒧᑦ ᒪᕐᕉᖕᓂᒃ ᐃᒪᖃᐅᑎᓕᕆᒍᑎᓂᒃ ᖁᕐᕕᒃᑕᕈᑎᓂᒡᓗ ᓴᓇᓂᐊᕐᓂᖏᓐᓄᑦ ᑲᖏᖅᖠᓂᕐᒥ - ᑲᑐᔾᔨᓗᑎᒃ ᑮᓇᐅᔭᖃᖅᑎᑎᓂᐊᖅᐳᑦ ᑲᓇᑕᐅᑉ ᒐᕙᒪᒃᑯᖏᑦ ᓄᓇᕗᑦ ᒐᕙᒪᒃᑯᖏᓪᓗ ᑲᖏᖅᖠᓂᕐᒥ. ᑮᓇᐅᔭᑦ $10.9-ᒥᓕᔭᓐᑖᓚᐃᑦ ᓴᓗᒪᖅᓴᐃᒍᑕᐅᓂᐊᖅᖢᑎᒃ, ᐃᒪᕐᒧᑦ ᖁᕐᕕᒃᑕᕐᕕᖕᓄᓪᓗ ᐃᓅᓯᖃᑦᓯᐊᒃᑲᓐᓂᕈᑎᒃᓴᐃᑦ ᑲᖏᖅᖠᓂᕐᒥᐅᓄᑦ ᐊᕐᕌᒎᓂᐊᖅᑐᓂ.

ᒥᓂᔅᑕ ᐊᒡᓗᒃᑲᖅ ᖁᕕᐊᓱᖃᑕᐅᔪᓐᓇᓚᐅᖅᐳᖅ ᓄᓇᕗᑦ ᓇᓪᓕᐅᕐᓂᖅᓯᐅᕐᕕᖓᓂ ᐃᖃᓗᖕᓂ ᓂᕈᐊᖅᑎᒥᓂᒃ ᐱᖃᑎᖃᖅᖢᓂ. ᓯᕗᓪᓕᖅᐹᒥ ᓄᓇᕗᒥ ᑕᐃᒪᖓᓂᑦ, ᒐᕙᒪᒃᑯᑦ, ᑲᑐᔾᔨᖃᑎᒌᓪᓗ ᐱᓕᕆᖃᑎᒌᓚᐅᖅᐳᑦ ᖁᕕᐊᓱᒍᑎᖃᖅᖢᑎᒃ ᑖᓂᓯᖅᑎᑎᓪᓗᑎᒡᓗ, ᑐᓴᕐᓈᖅᑎᑦᓯᓪᓗᑎᒡᓗ ᐱᓐᖑᐊᖅᑎᑎᓪᓗᑎᒡᓗ ᓂᕆᕕᒡᔪᐊᖅᑎᑎᓪᓗᑎᒡᓗ. ᑖᒃᑯᐊ ᐱᓕᕆᖃᑎᒌᓚᐅᖅᑐᑦ ᒐᕙᒪᒃᑯᑦ ᑲᓇᑕᒥ ᐊᒻᒪᓗ ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦ ᓄᓇᕗᒥ ᐳᓚᕋᖅᑐᓕᕆᔨᒃᑯᑦ. ᒥᓂᔅᑕ ᐊᒡᓗᒃᑲᖅ ᖁᕕᐊᓱᖃᑕᐅᓚᐅᖅᖢᓂ ᐅᓪᓗᓕᒫᖅ ᓂᕆᕕᒡᔪᐊᖃᑕᐅᓪᓗᓂᓗ ᑖᒃᑯᐊᓗ ᐱᖃᑎᒋᓪᓗᒋᑦ ᓯᕗᓕᖅᑎ ᓄᓇᕗᑦ ᒐᕙᒪᒃᑯᖏᓐᓄᑦ ᐄᕙ ᐋᕆᐊᒃ ᐊᒻᒪᓗ ᐅᑲᓕᖅ ᐃᔨᑦᓯᐊᒃ, ᐊᖓᔪᖃᕆᔭᐅᔪᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓄᑦ.

ᐸᖕᓂᖅᑑᒥ, ᒥᓂᔅᑕ ᐊᒡᓗᒃᑲᖅ ᐳᓚᕋᓚᐅᖅᐳᖅ ᓄᓇᓕᖕᒥᒃ, ᐋᓐᓂᐊᕐᕕᖓᓂᒡᓗ ᑲᑎᒪᖃᑎᖃᖅᖢᓂᓗ ᕼᐊᒻᓚᒃᑯᑦ ᑲᑎᒪᔨᖏᓐᓂᒃ. ᐊᒻᒪᓗ ᒥᓂᔅᑕ ᐊᒻᒪ ᒍᐊᑕᓐ ᒪᑲᐃ, ᐃᑲᔪᖅᑎᖓ ᒥᓂᔅᑕᐅᑉ ᐱᕙᓪᓕᐊᔪᓕᕆᓂᕐᒧᑦ ᐃᖏᕐᕋᖃᑦᑕᖅᑐᓕᕆᓂᕐᒧᓪᓗ ᓄᓇᕗᒥᓗ ᑐᓴᖅᑎᑎᒍᑎᖃᓚᐅᖅᐳᑦ ᑮᓇᐅᔭᓂᒃ ᐊᑐᖅᑕᐅᔪᒃᓴᐅᓂᐊᖅᑐᓂᒃ ᒥᕝᕕᒃ ᐋᖅᑭᒃᓱᐃᖅᑕᐅᒍᑎᒃᓴᖏᓐᓄᑦ. ᐊᑭᖃᖅᑎᒋᓂᐊᖅᖢᓂ $1.2-ᒥᓕᔭᓐᑖᓚᓂᒃ ᒥᕝᕕᖕᒧᑦ ᐊᑲᐅᓯᕚᓪᓕᕈᑕᐅᓂᐊᖅᑐᓂᒃ, ᐸᖕᓂᖅᑑᒥᐅᑦ ᐊᑲᐅᓯᕚᓪᓕᕈᑎᒃᓴᖏᓐᓄᑦ ᐃᖅᑲᓇᐃᔭᖅᑎᑎᓂᕐᒧᑦ ᐃᖏᕐᕋᔭᖕᓂᒡᓗ ᐊᔪᕐᓇᖏᓐᓂᖅᓴᐅᓕᖅᑎᑕᐅᔪᓐᓇᖁᓪᓗᒍ.

ᓯᓚ ᐱᐅᖏᓐᓂᖓᓄᑦ, ᒥᓂᔅᑕ ᑭᒻᒥᕈᒻᒧᐊᕈᓐᓇᓚᐅᖏᑉᐳᖅ ᓯᕗᓂᒃᓴᐅᓂᐊᖅᑐᒥ ᑕᐃᑯᖓᐅᓂᐊᕋᓗᐊᖅᖢᓂ.

ᒥᓂᔅᑕ ᐊᒡᓗᒃᑲᖅ ᐳᓚᕋᕇᓚᐅᖅᐳᖅ ᐃᖃᓗᖕᒧᐊᖅᖢᓂ ᑐᓴᖅᑎᑎᒍᑎᖃᓚᐅᕆᓪᓗᑎᒃ ᑭᒡᒐᖅᑐᐃᓪᓗᓂ ᒥᓂᔅᑕ ᓴᒃ ᓯᑖᓪᒥᒃ, ᒥᓂᔅᑲ ᑲᓇᑕᒥ ᐅᑭᐅᖅᑕᖅᑐᒥ ᐱᕙᓪᓕᐊᑎᑎᓂᕐᒧᑦ ᑎᒥᐅᔪᒥᒃ. ᖁᔭᓐᓇᒦᖅᐸᕗᑦ ᑖᒃᑯᐊ ᑲᓇᑕᒥ ᐅᑭᐅᖅᑕᖅᑐᒥ ᐱᕙᓪᓕᐊᔪᓕᕆᔨᒃᑯᑦ ᑮᓇᐅᔭᖃᖅᑎᑎᓚᐅᕐᓂᖏᑦ, ᒪᒃᑯᒃᑐᑦ ᓄᓇᕗᒥ, ᔪᑳᓐᒥ ᓄᓇᑦᓯᐊᒥᓗ ᐃᑲᔪᖅᑕᐅᒍᑎᖃᕈᓐᓇᕐᓂᐊᓕᕐᒪᑕ ᓱᓇᑐᐃᓐᓇᕐᓂᒃ ᖃᐅᔨᓴᕈᑎᓂᒃ ᐱᓕᕆᐊᓂᒡᓗ ᐊᔪᖏᓴᕐᓂᕐᒧᑦ ᐊᐅᔭᐅᓂᐊᖅᑐᒥ. ᑕᒪᓐᓇ ᐃᓕᓐᓂᐊᕈᑕᐅᓂᐊᖅᑐᖅ ᒪᒃᑯᒃᑐᓄᑦ ᐱᓕᕆᐊᕆᔭᐅᓂᐊᖅᐳᑦ Actua-ᑯᓐᓄᑦ, ᑖᒃᑯᐊ ᑲᑐᔾᔨᖃᑎᒌᑦ ᓱᕈᓯᓂᒃ ᒪᒃᑯᒃᑐᓂᒃ ᐃᖅᑲᓇᐃᔭᒐᒃᓴᒥᖕᓂᒃ ᐃᓕᓐᓂᐊᖅᑎᑎᖃᑦᑕᖅᖢᑎᒃ.

"ᐃᖏᕐᕋᔭᒃᖢᖓ ᓄᓇᒋᔭᒃᑯᑦ ᑕᒪᓐᓇ ᓂᕆᐅᒋᑦᓯᐊᖃᑦᑕᖅᐸᕋ," ᐅᖃᓚᐅᖅᐳᖅ ᒥᓂᔅᑕ ᐊᒡᓗᒃᑲᖅ. "ᑲᑎᖃᑎᒋᓪᓗᑎᒡᓗ ᑐᓴᕐᕕᒋᓪᓗᒋᓪᓗ ᓂᕈᐊᖅᑎᒃᑲ ᐱᔨᑦᓯᕋᑦᓯᐊᒃᑲᓐᓂᕈᒪᓪᓗᒋᓪᓗ ᓄᓇᕗᒥᐅᑦ ᑲᑎᒪᔨᐅᖃᑕᐅᓪᓗᖓ ᐊᑐᕚᒥ ᓄᓇᕗᒥᐅᓄᑦ. ᖁᕕᐊᓱᑦᓯᐊᓚᐅᖅᐳᖓ ᑐᓴᖅᑎᑎᒍᑎᖃᓚᐅᖅᖢᖓ ᐊᒥᓱᓂᒃ ᖃᓄᐃᓕᐅᕈᑕᐅᓂᐊᖅᑐᓂᒃ ᑮᓇᐅᔭᓂᒃ ᐊᑐᖅᑕᐅᓂᐊᖅᑐᓂᒡᓗ ᓄᓇᕗᒥᐅᓄᑦ ᐊᑲᐅᓯᕚᓪᓕᖅᐸᓪᓕᐊᖁᓪᓗᒋᑦ ᐃᓅᓯᖏᑦ. ᑲᔪᓯᑦᓯᐊᓚᐅᖅᐳᖓ ᐳᓚᕋᖅᖢᖓ ᓄᓇᕗᒥᐅᓄᑦ."

ᐊᐱᖁᑎᒃᓴᖃᖅᑐᑦ ᑐᑭᓯᒋᐊᒃᑲᓐᓂᕈᒪᔪᓪᓗ ᑐᓴᒐᒃᓴᐃᑦ ᒥᒃᓵᓄᑦ ᑖᒃᑯᐊ, ᖃᐅᔨᒋᐊᕈᓐᓇᖅᐳᑦ ᒥᓂᔅᑕᐅᑉ ᖃᕆᑕᐅᔭᒃᑯᑦ ᑎᑎᕋᕐᕕᒋᖃᑦᑕᖅᑕᖏᓐᓄᑦ ᐅᕗᖓ  www.leonaaglukkaq.ca ᐅᕙᓘᓐᓃᑦ ᐅᖃᓚᐅᑎᒃᑯᑦ  613-992-2848.