ᐅᑭᐅᖅᑕᖅᑐᒥ, (ᔫᑳᓐ),ᐊᐅᒡᒍᓯ - ᒥ ᓄᓇᖃᖅᑳᖅᓯᒪᔪᑦ ᐊᒻᒪᓗ ᐃᓄᐃᑦ ᑎᒥᖁᑎᖏᑦ ᔫᑳᓐᒥ, ᓄᓇᑦᓯᐊᕐᒥ ᐊᒻᒪᓗ ᓄᓇᕗᒻᒥ ᓯᕗᒧᐊᒃᑎᑦᑎᕙᓪᓕᐊᓕᓚᐅᖅᐳᑦ ᐱᓕᕆᐊᓐᖑᖅᑎᓯᒪᔭᕐᒥᓂᒃ ᐃᓚᐅᓂᖅᓴᐅᓕᕈᓐᓇᕐᓂᐊᕋᒥᒃ ᓄᓇᓕᖕᓂ ᐊᒻᒪᓗ ᐅᑭᐅᖅᑕᖅᑐᒥ ᑮᓇᐅᔭᓕᐅᕋᓱᐊᕈᑎᓂ, ᐊᖅᑯᑎᒋᔭᐅᓪᓗᓂ ᑮᓇᐅᔭᖃᖅᑎᑕᐅᓂᓂ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ.

ᐅᓪᓗᒥ ᔮᓐ ᑕᓐᑕᓐ, ᒥᓂᔅᑕᕆᔭᐅᔪᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ,  ᓇᓗᓇᐃᖅᓯᖅᑲᐅᕗᖅ ᑮᓇᐅᔭᖃᖅᑎᑕᐅᓂᐊᕐᓂᖏᓐᓂᒃ ᓄᓇᖃᖅᑳᖅᓯᒪᔪᑦ ᑮᓇᐅᔭᓕᐅᕋᓱᐊᕈᑎᓂᓐᖔᖅᑐᓂᒃ ᓴᖅᑭᑕᐅᓂᐊᖅᑐᓂᒃ ᓄᓇᓕᖕᓂ ᐊᒻᒪᓗ ᑎᒥᓐᖑᖅᑎᑕᐅᓯᒪᔪᓂ ᐅᑭᐅᖅᑕᖅᑐᓕᒫᒥ. “ᒐᕙᒪᕗᑦ ᐃᓕᓴᖅᓯᓯᒪᕗᑦ ᑮᓇᐅᔭᓕᐅᕋᓱᐊᕐᓂᕐᒥ ᐃᓚᒋᔭᐅᖃᑕᐅᑦᑎᐊᕆᐊᖃᕐᓂᖏᓐᓂᒃ ᒐᕙᒪᐃᑦ, ᐱᓯᓂᓯᖃᖅᑐᑦ ᐊᒻᒪᓗ ᓄᓇᓖᑦ ᑲᓇᑕᒥ ᐱᖓᓱᑦ ᒐᕙᒪᖃᕐᕕᖕᓃᑦᑐᑦ, ᐊᒻᒪᓗ ᐃᓚᒋᔭᐅᖃᑕᐅᔭᕆᐊᖃᓪᓚᕆᒃᖢᑎᒃ ᐊᔾᔨᒌᓐᖏᑦᑐᓂᒃ ᒪᑭᒪᑦᑎᐊᕈᓐᓇᖅᑐᓂᒡᓗ ᑮᓇᐅᔭᓕᐅᕈᑎᒃᓴᓕᐅᕐᓂᐊᕐᒪᑕ ᐅᑭᐅᖅᑕᖅᑐᒥ,” ᑕᐃᒪᓐᓇ ᐅᖃᓚᐅᖅᑐᖅ ᒥᓂᔅᑕ ᑕᓐᑲᓐ, ᒥᓂᔅᑕᕆᔭᐅᖃᑕᐅᓯᓐᓈᖅᑐᖅ ᐃᓄᓕᕆᔨᑐᖃᒃᑯᓐᓄᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓂᐱᒋᔭᐅᓪᓗᓂ ᐱᔾᔪᑕᐅᑎᓪᓗᒋᑦ ᐊᓪᓚᖓᔪᐃᑦ ᐊᒻᒪᓗ ᐃᓕᓴᕆᔭᐅᓯᒪᓐᖏᑦᑐᑦ ᐃᖅᑭᓖᑦ. “ᑕᒪᒃᑯᐊ ᑮᓇᐅᔭᓕᐅᕋᓱᐊᕈᑎᓄᑦ ᐱᒋᐊᕈᑏᑦ ᓴᖅᑭᑎᑦᑎᕚᓪᓕᕐᓂᐊᖅᑐᑦ ᐊᕗᖓᐅᔨᓯᒪᔪᓂᒃ ᑮᓇᐅᔭᓕᐅᕋᓱᐊᕈᑎᒃᓴᓂᒃ ᐊᒻᒪᓗ ᓇᖕᒥᓂᖅ ᒪᑭᒪᔪᓐᓇᕈᑎᓂᒃ ᐃᖅᑭᓕᖕᓄᑦ ᐃᓄᖕᓄᓪᓗ ᐅᑭᐅᖅᑕᖅᑐᓕᒫᒥ.”

“ᓄᓇᖃᖅᑳᖅᓯᒪᔪᑦ ᐃᓚᐅᑎᑕᐅᒃᑲᓐᓂᕐᓂᖏᑦ ᑮᓇᐅᔭᓕᐅᕋᓱᐊᕐᓂᕐᒥ ᐊᑑᑎᖃᓪᓚᕆᖕᓂᐊᖅᑐᖅ ᓯᕗᓂᒃᓴᑦᑎᓐᓂ ᓄᓇᖃᖅᑳᖅᓯᒪᔪᑦ ᑲᓇᑕᒥᐅᑦ ᐃᓅᓯᖃᑦᑎᐊᕐᓂᖅᓴᐅᕙᓪᓕᐊᓂᐊᕐᓂᖏᓐᓄᑦ ᒪᑭᒪᑦᑎᐊᕈᓐᓇᕐᓂᖏᓐᓄᓪᓗ ᐃᓅᓯᒃᑯᑦ ᑮᓇᐅᔭᓕᐅᕋᓱᐊᕐᓂᒃᑯᓪᓗ,” ᑕᐃᒪᓐᓇ ᐅᖃᓚᐅᖅᑐᖅ ᓕᐅᓇ ᐊᒡᓘᒃᑲᖅ, ᒥᓂᔅᑕᕆᔭᐅᔪᖅ ᐱᔭᒃᓴᖅᑖᖅᑎᑕᐅᓯᒪᓪᓗᓂ ᐅᑭᐅᖅᑕᖅᑐᒥᐅᓂᒃ ᐊᒻᒪᓗ ᒥᓂᔅᑕᕆᔭᐅᓪᓗᓂ ᐋᓐᓂᐊᖃᕐᓇᓐᖏᑦᑐᓕᕆᓂᕐᒧᑦ.

ᑲᓇᑕᐅᑉ ᒐᕙᒪᒃᑯᖏᓐᓂᓐᖔᖅᑐᑦ ᑮᓇᐅᔭᑦ ᐊᔾᔨᒌᓐᖏᑦᑐᓄᑦ ᑮᓇᐅᔭᓕᐅᕋᓱᐊᕈᑎᒃᓴᓄᑦ ᐊᑐᖅᑕᐅᔪᓐᓇᖅᑐᑦ, ᐃᓚᓕᐅᓪᓗᒋᑦ ᐱᓯᓂᓯᓕᕆᓂᕐᒧᑦ ᐸᕐᓇᐅᑎᓄᑦ, ᐱᖅᑯᓯᑐᖃᕐᓂᒃ ᐊᑐᕐᓗᑎᒃ ᐳᓚᕋᖅᑐᓕᕆᓂᕐᒧᑦ ᑐᕌᖓᔪᑦ ᐱᒋᐊᖅᑎᑕᐅᓂᖏᓐᓄᑦ, ᐃᖅᑲᓇᐃᔭᖅᑎᓄᑦ ᐱᔨᑦᑎᕐᕕᐅᖃᑦᑕᖅᑐᓪᓗ ᐃᓕᓐᓂᐊᖅᑎᑕᐅᓂᖏᓐᓄᑦ, ᐊᔪᕈᓐᓃᖅᓴᐃᓂᕐᒧᑦ, ᑲᑎᒪᕐᔪᐊᕐᓂᕐᓄᑦ ᐊᒻᒪᓗ ᐃᓕᓐᓂᐊᓯᓐᓈ ᑲᑎᒪᓂᐅᓂᐊᖅᑐᑦ ᐸᕐᓇᐅᑎᖏᓐᓄᑦ, ᐃᑲᔪᖅᓲᑏᑦ ᐱᔨᑦᑎᕈᑏᑦ, ᐱᑐᐃᓐᓇᐅᓐᖏᑦᑐᓂᒃ ᓴᓇᓂᖅ, ᐊᕕᒃᑐᖅᓯᒪᔪᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᐸᕐᓇᐅᑏᑦ, ᑐᒃᓯᕋᐅᓂᐅᕐᓂᖅ, ᐱᓯᓂᓯᓕᕆᓂᕐᒧᑦ ᖃᐅᔨᒪᔨᑕᑦ ᐱᔨᑦᑎᕈᑎᖏᓐᓂᒃ ᐊᑐᕐᓂᖅ, ᐊᒻᒪᓗ ᑮᓇᐅᔾᔭᒃᓵᓄᑦ ᑮᓇᐅᔭᖅᑐᕈᑏᑦ ᐊᑐᖅᑐᑦ ᐱᕙᓪᓕᐊᔪᓕᕆᔨᓄ. ᑕᒪᒃᑯᓄᖓ ᑮᓇᐅᔭᖃᖅᑎᑦᑎᓂᖅ ᓴᖅᑭᑕᐅᔪᓐᓇᖅᐳᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᓄᓇᖃᖅᑳᖅᓯᒪᔪᑦ ᑮᓇᐅᔭᓕᐅᕋᓱᐊᕈᑎᖏᑦᑎᒍᑦ, ᐃᓚᒋᔭᐅᖃᑕᐅᓪᓗᑎᒃ ᓄᓇᖃᖅᑳᖅᓯᒪᔪᑦ ᐱᓯᓂᓯᓕᕆᓂᕐᒧᑦ ᐱᕙᓪᓕᐊᔾᔪᑎᖏᑦ, ᓄᓇᓕᖕᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑐᕌᖓᔪᑦ, ᓄᓇᓕᖕᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑐᕌᖓᔪᑦ, ᐊᒻᒪᓗ ᓄᓇᓕᖕᓂ ᐃᑲᔪᖅᓲᑎᓄᑦ ᐱᔨᑦᑎᕈᑏᑦ.

ᓄᓇᖃᖅᑳᖅᓯᒪᔪᑦ ᑮᓇᐅᔭᓕᐅᕋᓱᐊᕈᑎᖏᑦ ᐃᓚᒋᔭᐅᖃᑕᐅᕗᑦ ᑮᓇᐅᔭᓕᐅᕋᓱᐊᕈᑎᓕᐊᕆᔭᐅᓯᒪᔪᓄᑦ ᓴᖅᑭᑕᐅᓯᒪᔪᓄᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ ᐅᑭᐅᖅᑕᖅᑐᒥ ᒐᕙᒪᖃᕐᕕᓕᖕᓄᑦ.  ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᐱᔭᒃᓴᖅᑖᖅᑎᑕᐅᓯᒪᕗᑦ ᑐᑭᒧᐊᒃᑎᑦᑎᓂᕐᒥᒃ ᐊᒻᒪᓗ ᓴᖅᑭᑦᑎᓂᕐᒥᒃ ᑲᓇᑕᒥ ᑮᓇᐅᔭᓕᐅᕋᓱᐊᕐᓂᕐᒧᑦ ᐱᕙᓪᓕᐊᑎᑕᐅᔪᓂᒃ ᐅᑭᐅᖅᑕᖅᑐᓕᒫᒥ, ᐊᒻᒪᓗ ᑕᒪᒃᑯᓄᖓ ᐊᒃᑐᐃᓂᓕᖕᓂᒃ ᐊᑐᐊᒐᓕᐅᖅᐸᓪᓕᐊᓂᕐᓂᒃ, ᖃᐅᔨᓴᐃᔾᔪᓯᕐᓂᒃ ᐊᒻᒪᓗ ᐊᔭᐅᖅᑐᐃᓂᕐᒥᒃ.