ᐃᖃᓗᐃᑦ (ᓄᓇᕗᑦ) – ᓄᓇᕗᒻᒥ ᑮᓇᐅᔭᓕᐅᕋᓱᐊᕐᓂᕐᒧᑦ ᑯᐊᐳᕇᓴᐃᑦ ᑮᓇᐅᔭᖅᑖᖅᑎᑕᐅᓂᐊᖅᐳᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐋᖅᑭᒃᓱᐃᕙᓪᓕᐊᔪᓐᓇᕐᓂᐊᕐᒪᑕ ᑐᒡᓕᕆᓕᖅᑕᖏᓐᓂᒃ ᑐᑭᒧᐊᒃᑎᑦᑎᓂᕐᒧᑦ ᐸᕐᓇᐅᑎᖏᓐᓂᒃ, ᓇᓗᓇᐃᔭᐃᔾᔪᑕᐅᓂᐊᖅᑐᓂᒃ ᑭᓱᓂᒃ ᐱᑕᖃᐅᕆᐊᖃᕐᓂᐊᕐᒪᖔᖓ ᐃᓄᖕᓄᑦ ᓄᓇᕗᒻᒥᐅᓄᑦ ᐃᑲᔫᓯᐊᕈᑕᐅᒃᑲᓐᓂᕈᓐᓇᕐᓂᐊᖅᑐᓂᒃ.
ᑕᓐᑲᓐ, ᒥᓂᔅᑕᕆᔭᐅᔪᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ, ᐅᓪᓗᒥ ᓇᓗᓇᐃᖅᓯᖅᑲᐅᕗᖅ ᑲᓇᑕᐅᑉ ᒐᕙᒪᒃᑯᖏᑦ ᓴᒡᕙᐃᓂᐊᕐᓂᖏᓐᓂᒃ $979,000-ᓂᒃ ᑕᒪᑐᒧᖓ, ᑲᑎᓕᒫᖅᖢᒋᓪᓗ $1.2 ᒥᓕᐊᖑᓂᐊᖅᖢᑎᒃ ᑕᕝᕗᖓ ᐃᓕᔭᕕᓃᑦ.  ᐊᒥᐊᒃᑯᑦ ᑮᓇᐅᔭᑦ ᓴᒡᕙᖅᑕᐅᓂᐊᖅᑐᑦ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ.
“ᒐᕙᒪᕗᑦ ᐊᖏᖅᓯᒪᕗᑦ ᐅᑭᐅᖅᑕᖅᑐᒥ ᑮᓇᐅᔭᓕᐅᕋᓱᐊᕐᓂᖅ ᓴᖅᑭᔮᖅᑎᑕᐅᔭᕆᐊᖃᕐᓂᖓ ᑕᐃᒃᑯᐊ ᐅᑭᐅᖅᑕᖅᑐᒥ ᓄᓇᓖᑦ ᐊᒻᒪᓗ ᐃᖅᑲᓇᐃᔭᖅᑐᑦ ᐃᑲᔫᓯᐊᓪᓚᕆᖃᑦᑕᕈᓐᓇᕐᓂᐊᕐᒪᑕ,” ᑕᐃᒪᓐᓇ ᐅᖃᓚᐅᖅᑐᖅ ᒥᓂᔅᑕ ᑕᓐᑭᓐ, ᒥᓂᔅᑕᕆᔭᐅᓯᓐᓈᖅᑐᖅ ᐃᓄᓕᕆᔨᑐᖃᒃᑯᓐᓄᑦ ᐊᒻᒪᓗ ᑭᒡᒐᖅᑐᐃᔨᐅᓪᓗᓂ ᐃᖅᑭᓕᒡᓚᖕᓂᒃ ᐊᒻᒪᓗ ᓇᓗᓇᐃᒃᑯᑦᑎᖅᓯᒪᓐᖏᑦᑐᓂᒃ ᐃᖅᑭᓕᖕᓂᒃ.  “ᑖᓐᓇ ᐱᓕᕆᐊᖅ ᓄᓇᕗᒻᒥᐅᑦ ᐃᓄᖏᓐᓂᒃ ᐃᓚᐅᑎᑦᑎᔪᓐᓇᕐᓂᐊᖅᑐᖅ ᑮᓇᐅᔭᓕᐅᕋᓱᐊᕈᑎᓂᒃ ᐱᓕᕆᐊᖃᖅᑎᓪᓗᒋᑦ ᓄᓇᖏᓐᓂ, ᐃᓄᐃᓪᓗ ᐱᓯᓂᓯᖁᑎᖏᑦ ᓄᓇᓕᖕᓂ ᓄᓇᕗᒻᒥᓗ ᐱᕕᑖᖅᑎᑕᐅᒃᑲᓐᓂᕐᓗᑎᒃ.”

“ᑖᒃᑯᐊ ᑮᓇᐅᔭᑦ ᐃᓕᓴᖅᓯᔾᔪᑕᐅᕗᑦ ᓄᓇᕗᒻᒥ ᑮᓇᐅᔭᓕᐅᕋᓱᐊᕐᓂᐅᑉ ᓴᓇᕐᕈᑎᖃᐅᖅᑎᑕᐅᑦᑎᐊᕆᐊᖃᕐᓂᖓᑕ ᐱᒻᒪᕆᐅᓂᖓᓂᒃ, ᐊᒻᒪᓗ ᐅᐱᑦᑐᒍᑦ ᐃᓄᐃᑦ ᐱᕕᖃᖅᑎᑕᐅᒃᑲᓐᓂᕈᓐᓇᖅᓯᖕᒪᑕ ᑮᓇᐅᔭᓕᐅᕋᓱᐊᕐᓂᒃᑯᑦ ᐃᖅᑲᓇᐃᔮᖅᑖᖅᑐᕐᓂᒃᑯᓪᓗ ᓄᓇᒥᐅᑕᓂ ᐱᓕᕆᐊᖑᔪᑎᒍᑦ,” ᑕᐃᒪᓐᓇ ᐅᖃᓚᐅᖅᑐᖅ ᒥᓂᔅᑕ ᓕᐅᓇ ᐊᒡᓘᒃᑲᖅ, ᒥᓂᔅᑕ ᐅᑭᐅᖅᑕᖅᑐᒥ ᑲᒪᔨᐅᔪᖅ ᐊᒻᒪᓗ ᐋᓐᓂᐊᖃᕐᓇᓐᖏᑦᑐᓕᕆᓂᕐᒧᑦ ᒥᓂᔅᑕ.

ᓄᓇᕗᒻᒥ ᑮᓇᐅᔭᓕᐅᕋᓱᐊᕐᓂᕐᒧᑦ ᑯᐊᐳᕇᓴᐃᑦ/ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᑦᑕ ᐅᖃᐅᓯᖏᑦ

ᓄᓇᕗᒻᒥ ᑮᓇᐅᔭᓕᐅᕋᓱᐊᕐᓂᕐᒧᑦ ᑯᐊᐳᕇᓴᐃᑦ ᓴᖅᑭᑕᐅᓚᐅᖅᓯᒪᔪᑦ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ 2009-ᒥ, ᐱᔭᒃᓴᖅᑖᖅᑎᑕᐅᓯᒪᓪᓗᑎᒃ ᐃᓄᐃᑦ ᐃᑲᔫᓯᐊᖃᑦᑕᕆᐊᖃᕐᓂᖏᓐᓂᒃ ᓄᓇᒥᐅᑕᓂᑦ ᐱᕈᒃᑲᓐᓂᕈᓐᓇᖅᑐᓂᒃ ᐱᓕᕆᔪᓂᑦ ᓄᓇᕗᑦ ᐃᓗᐊᓂ.  ᑲᑎᒪᔨᖏᑦ ᐊᒻᒪᓗ ᖃᐅᔨᒪᔨᑕᑦ ᑲᑎᒪᔨᕋᓛᖏᑦ ᐃᒃᓯᕚᖅᑎᖃᐅᖅᐳᑦ ᑭᒡᒐᖅᑐᐃᔪᓂᒃ ᐊᕕᒃᑐᖅᓯᒪᔪᑦ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐊᒻᒪᓗ ᓄᓇᕗᑦ ᑐᓐᖓᕕᒃᑯᓐᓂᒃ.  ᓄᓇᕗᒻᒥ ᑮᓇᐅᔭᓕᐅᕋᓱᐊᕐᓂᕐᒧᑦ ᑯᐊᐳᕇᓴᐃᑦ ᐃᓄᖕᓂᒃ ᐱᕕᖃᖅᑎᑦᑎᒃᑲᓐᓂᕈᒪᕗᑦ ᑎᒥᓐᖑᖅᑎᑕᐅᓯᒪᔪᑦ ᐃᓱᒪᓕᐊᖏᓐᓂ ᐃᓚᐅᓂᖅᓴᐅᖁᓪᓗᒋᑦ ᐊᒻᒪᓗ ᑮᓇᐅᔭᖅᑎᒍᑦ ᐃᖅᑲᓇᐃᔮᑎᒍᓪᓗ ᐃᑲᔫᓯᐊᖃᑦᑕᕐᓗᑎᒃ ᓄᓇᒥᐅᑕᓂᒃ ᐱᓕᕆᐊᖑᔪᑎᒍᑦ.  ᑯᐊᐳᕇᓴᐃᑦ ᑐᒡᓕᐊᓂ ᐱᓕᕆᐊᖓᑦ ᓴᖅᑭᑦᑎᔾᔪᑕᐅᓂᐊᖅᑐᖅ ᑲᑐᔾᔨᖃᑎᒌᖕᓂᒃᑰᖃᑎᒋᔭᐅᔪᓐᓇᖅᑐᓂᒃ ᐊᒻᒪᓗ ᐋᔩᖅᑎᐅᓂᐊᖅᑐᓂᒃ ᐃᓄᐃᑦ ᐃᓚᐅᒃᑲᓐᓂᕈᓐᓇᕐᓂᐊᕐᒪᑕ ᑮᓇᐅᔭᓕᐅᕋᓱᐊᕐᓂᒃᑯᑦ.

ᐃᓄᓕᕆᔨᑐᖃᒃᑯᑦ ᑮᓇᐅᔭᖁᑎᖏᑦ ᐊᖏᔫᑎᓂᒃ ᓄᓇᒥᐅᑕᓕᕆᔨᓂᑦ ᐆᒻᒪᖅᑯᓯᐅᖅᑎᓪᓗ ᐱᓕᕆᕝᕕᖏᓐᓂᓐᖔᖅᑐᑦ, ᑖᒃᑯᐊᓗ ᓴᖅᑭᑕᐅᓚᐅᖅᓯᒪᓪᓗᑎᒃ ᓄᓇᖃᖅᑳᖅᓯᒪᔪᑦ ᐱᓯᓂᓯᐅᔪᑦ ᐃᑲᔪᖅᑕᐅᒃᑲᓐᓂᕈᓐᓇᕐᓂᐊᕐᒪᑕ ᐃᓚᖏᓐᓂ ᐱᒻᒪᕆᐅᔪᓂ ᑮᓇᐅᔭᓕᐅᕋᓱᐊᕈᑎᐅᔪᓂ ᐊᒻᒪᓗ ᐆᒻᒪᖅᑯᑎᓕᕆᔨᔪᓂ ᑲᓇᑕᒥ.  ᑕᒪᓐᓇ ᐱᒋᐊᖅᑎᑕᐅᓂᖓ ᐃᑲᔪᖅᓱᖅᑕᐅᔪᖅ ᑲᓇᑕᐅᑉ ᒐᕙᒪᒃᑯᖏᑦᑕ ᓄᓇᖃᖅᑳᖅᓯᒪᔪᑦ ᑮᓇᐅᔭᓕᐅᕋᓱᐊᖅᑎᖏᓐᓄᑦ, ᒐᕙᒪᐃᑦ ᐊᑐᐊᒐᓕᐊᖏᓐᓂᒃ ᓇᓗᓇᐃᔭᐃᓯᒪᔪᓂᒃ ᑕᑯᓐᓇᖅᑕᖏᓐᓂᒃ, ᓯᕗᓪᓕᐅᑎᓯᒪᔭᖏᓐᓂᒃ ᐊᒻᒪᓗ ᑐᑭᒧᐊᕈᑎᓂᒃ ᓄᓇᖃᖅᑳᖅᓯᒪᔪᑦ ᐃᓚᐅᓂᖅᓴᐅᓕᕈᓐᓇᕐᓂᐊᕐᒪᑕ ᑲᓇᑕᒥ ᑮᓇᐅᔭᓕᐅᕋᓱᐊᕈᑎᓂ.

ᑕᐃᒪᐃᑦᑐᓂᒃ ᑮᓇᐅᔭᖃᖅᑎᑦᑎᓂᖅ ᓴᖅᑭᑕᐅᔪᓐᓇᖅᓯᓚᐅᖅᑐᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᓂᕐᒧᑦ ᑎᑭᖁᑖᑕ ᑮᓇᐅᔭᓕᐅᕋᓱᐊᕈᑎᓕᕆᔨᖏᑦᑎᒍᑦ, ᐃᓚᒋᔭᐅᖃᑕᐅᔪᖅ ᓄᓇᖃᖅᑳᖅᓯᒪᔪᑦ ᑮᓇᐅᔭᓕᐅᕋᓱᐊᖅᑎᖏᓐᓄᑦ.  ᓄᓇᖃᖅᑳᖅᓯᒪᔪᑦ ᑮᓇᐅᔭᓕᐅᕋᓱᐊᖅᑎᖏᓐᓄᑦ ᑎᒥᖁᑖ ᐃᓚᒋᔭᐅᖃᑕᐅᕗᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᑐᑭᒧᐊᒃᑎᓯᒪᔭᖏᑦᑎᒍᑦ ᓴᖅᑭᖃᑦᑕᖅᑕᖏᑦᑎᒍᓪᓗ ᐅᑭᐅᖅᑕᖅᑐᒥ, ᐱᔭᒃᓴᖅᑖᕆᓯᒪᓪᓗᓂᔾᔪᒡᓗ ᐊᑐᐊᒐᓕᕆᓂᖅ, ᖃᐅᔨᓴᐃᓂᖅ ᐊᒻᒪᓗ ᐊᔭᐅᖅᑐᐃᔨᐅᓂᖅ.