ᐃᖃᓗᐃᑦ, ᓄᓇᕗᑦ, ᐊᐅᒡᒍᓯ 30, 2010 –ᓕᐅᓇ ᐊᒡᓘᒃᑲᖅ ᖁᕕᐊᑉᐳᖅ ᒋᐅᕆ ᒍᑦᔨᐊ, ᐱᑐᐃᓐᓇᐅᓐᖏᑦᑐᓕᕆᓂᕐᒧᑦ ᒥᓂᔅᑕᕆᔭᐅᔪᖅ ᓇᓗᓇᐃᖅᓯᖕᒪᑦ ᑲᓇᑕᐅᑉ ᒐᕙᒪᒃᑯᖏᑦᑕ ᐃᑲᔪᖅᓱᐃᓂᖏᓐᓂᒃ ᐊᕐᕌᒍᓄᑦ ᐱᖓᓲᔪᖅᑐᓄᑦ ᖃᐅᔨᓴᐃᓂᐅᓂᐊᖅᑐᒥᒃ ᐊᒻᒪᓗ ᑐᕌᖓᓪᓗᐊᑕᕐᓂᐊᖅᑐᓂᒃ ᑎᑎᕋᐅᓯᖃᕐᓂᕐᒥᒃ ᐃᓄᖕᓂᒡᓗ ᑎᑎᕋᐅᓯᖃᕐᓂᖅ ᓯᕗᒃᑲᖅᑕᖅᑎᓪᓚᕆᐅᓚᐅᖅᓯᒪᔪᓂᒃ ᐃᓄᐃᑦ ᓄᓇᕐᔪᐊᕐᒥ ᐃᓚᐅᕙᓪᓕᐊᓕᓚᐅᕐᓂᖏᓐᓂ.
ᑖᓐᓇ ᐊᔾᔨᐅᓐᖏᑦᑐᖅ ᐱᓕᕆᐊᖅ ᑕᐃᒎᓯᓕᒃ, ᐅᑭᐅᖅᑕᖅᑐᒥᐅᑦ ᓄᓇᓕᖏᑦ: ᑐᕌᒐᖃᕐᓂᖅ ᐃᓅᓯᓕᕆᓂᕐᒧᑦ ᑮᓇᐅᔭᓕᐅᕋᓱᐊᕐᓂᒃᑯᓪᓗ ᒪᑭᒪᑦᑎᐊᕐᓂᕐᒧᑦ, ᑎᒥᓐᖑᖅᑎᑦᑎᔪᒪᔪᑦ ᖃᐅᔨᒪᔮᖃᑦᑎᐊᖅᑐᓂᒃ ᑲᓇᑕᒥ ᐃᓄᐃᑦ ᓯᕗᒃᑲᖅᑕᖅᑎᖏᓐᓂᒃ ᐊᔭᐅᖅᑑᑕᐅᔪᓐᓇᕐᓂᐊᕐᒪᑦ, ᐃᓕᓐᓂᐊᕈᑕᐅᓗᑎᒃ ᐊᒻᒪᓗ ᐱᔪᒥᒃᓱᓕᖅᑎᑦᑎᓗᑎᒃ ᒪᒃᑯᒃᑐᓂᒃ ᐃᓄᖕᓂᒃ ᐅᑭᐅᖅᑕᖅᑐᒥ, ᑖᒃᑯᐊ ᓯᕗᒃᑲᖅᑕᖅᑎᒋᔭᐅᓕᕐᓂᐊᕐᒪᑕ ᖃᐅᒃᐸᑦ. 

ᔭᒐᔾᔭᐃᖅᑎᑦᑎᔾᔪᑕᐅᓂᐊᕐᒥᔪᖅ ᐃᓄᐃᑦ ᐃᓕᖅᑯᓯᑐᖃᖏᓐᓂᒃ, ᐅᖃᐅᓯᖏᓐᓂᒃ ᐊᒻᒪᓗ ᐱᕙᓪᓕᐊᓂᕕᓂᖏᓐᓂᒃ ᐊᒃᓱᐊᓗᒃ ᐊᒃᑐᐃᓂᖃᕐᓂᑯᓂᒃ ᓄᓇᕗᑦ ᐅᓪᓗᒥ ᐊᐅᓚᑕᐅᔾᔪᓯᕆᓕᖅᑕᖓᓂᒃ.

ᑖᓇ ᐱᓕᕆᐊᖑᔪᖅ, ᓯᕗᒃᑲᖅᑕᖅᑎᖃᖅᖢᑎᒃ ᓚᕚᓪᒥ ᓯᓚᑦᑐᖅᓴᕐᕕᒡᔪᐊᕐᒥ ᓄᓇᖃᖅᑳᖅᓯᒪᔪᓂᒃ ᐃᓕᓐᓂᐊᖅᑎᑦᑎᔨᓂᒃ ᖃᐅᔨᓴᐃᔨᓂᒡᓗ, ᐊᒻᒪᓗ ᐱᖃᑎᖃᖅᖢᑎᒃ ᖃᐅᔨᓴᐃᔨᓂᒃ ᓯᓚᑦᑐᖅᓴᕐᕕᒡᔪᐊᓂᓐᖔᖅᑐᓂᒃ ᓯᓚᑦᑐᖅᓴᕐᕕᖕᓂᓐᖔᖅᑐᓂᒡᓗ ᐊᒻᒪᓗ ᑲᓇᑕᒥ ᐃᓅᓯᓕᕆᓂᕐᒧᑦ ᑲᑎᒪᔨᓂᒃ ᓯᓚᑦᑐᖅᓴᕐᕕᖕᓂ ᑲᑐᔾᔨᖃᑎᒌᖏᓐᓂᒃ.  ᑖᒃᑯᐊ ᑮᓇᐅᔭᑦ ᐊᑐᖅᑕᐅᓗᑎᒃ ᓄᓇᓖᑦ ᐊᒻᒪᓗ ᓯᓚᑦᑐᖅᓴᕐᕖᑦ ᑲᑐᔾᔨᓗᑎᒃ ᖃᐅᔨᕚᓪᓕᐅᑕᐅᔪᓐᓇᕐᓂᐊᖅᑐᑦ ᖃᓄᐃᓐᓂᐅᔪᓂᒃ ᐊᒃᑐᐃᓂᖃᖃᑦᑕᖅᑐᓂᒃ ᑲᓇᑕᒥᐅᓂᒃ.

ᓄᓇᓖᑦ-ᓯᓚᑦᑐᖅᓴᕐᕖᑦ ᖃᐅᔨᓴᐃᓂᒃᑯᑦ ᑲᑐᔾᔨᖃᑎᒌᖏᑦ ᐅᑎᖅᑎᒋᐊᑐᓐᖏᑦᑐᓂᒃ ᑮᓇᐅᔭᓂᒃ ᑐᓂᓯᖃᑦᑕᖅᑐᑦ ᑲᑐᔾᔨᓗᑎᒃ ᖃᐅᔨᓴᐃᓂᐅᓂᐊᖅᑐᓂᒃ ᑐᓐᖓᕕᓕᖕᓂᒃ ᓯᓚᑦᑐᖅᓴᕐᕕᒡᔪᐊᕐᓂᒃ ᐊᒻᒪᓗ ᓄᓇᓕᖕᓂ ᑐᓐᖓᕕᓕᖕᓂᒃ ᑎᒥᓐᖑᖅᑎᑕᐅᓯᒪᔪᓂ.  ᐱᓕᕆᐊᖑᔪᑦ ᐊᔾᔨᒌᓐᖏᕈᓘᔭᖅᑐᓂᒃ ᑲᓇᑕᒥᐅᓄᑦ ᐱᒻᒪᕆᐅᑎᑕᐅᔪᓂᒃ ᐱᓕᕆᐊᖃᓲᑦ, ᓲᕐᓗ ᓄᓇᓕᖕᓂ ᓂᕿᒃᓴᖃᑦᑎᐊᕐᓂᖅ, ᐃᓄᐃᑦ ᓯᕗᒃᑲᖅᑕᖅᑎᖏᑦ, ᐃᖅᑲᓇᐃᔮᒃᓴᓄᑦ ᓄᐃᑦᑎᒃᑲᓐᓂᕈᑎᒃᓴᓂᒃ ᐊᒻᒪᓗ ᑲᑐᔾᔨᖃᑎᒌᖕᓂᖅ ᖃᓄᖅ ᐊᒃᑐᐃᓂᖃᖃᑦᑕᕐᒪᖔᖓᓂᒃ.

ᐊᑐᓂ ᐱᓕᕆᐊᖑᔪᑦ ᐱᕚᓪᓕᐅᑕᐅᓂᐊᖅᑐᑦ ᐃᓕᓴᖅᑏᑦ ᖃᐅᔨᕙᓪᓕᐊᔭᖏᓐᓂᒃ ᐃᖅᑲᓇᐃᔭᖅᑎᒃᓴᓐᖑᕆᐅᖅᓴᐅᑎᖏᓐᓂᒡᓗ, ᖃᐅᔨᕚᓪᓕᕐᓂᖏᓐᓄᑦ, ᐱᓕᒻᒪᒃᓯᒪᓂᖏᓐᓄᑦ ᐊᒻᒪᓗ ᐃᖅᑲᓇᐃᔭᕆᐅᖅᓴᖅᓯᒪᓂᖏᑦᑎᒍᑦ ᖃᐅᔨᓴᐃᔨᒃᑯᑦ ᐊᒻᒪᓗ ᐊᑐᖅᐸᓪᓕᐊᓗᓂ ᐱᓕᒻᒪᒃᐸᓪᓕᐊᓂᖏᑦᑎᒍᑦ.

ᓄᓇᓖᑦ-ᓯᓚᑦᑐᖅᓴᕐᕖᑦ ᖃᐅᔨᓴᐃᓂᕐᒧᑦ ᑲᑐᔾᔨᖃᑎᒌᖏᑦᑎᒎᖅᑐᑦ ᑮᓇᐅᔭᖃᖅᑎᑕᑦ ᑕᑯᒋᐊᕈᓐᓇᖅᑕᑎᑦ ᐅᕘᓇ Social Sciences and Humanties Research Council website (www.sshrc.ca).