ᐃᖃᓗᐃᑦ (ᓄᓇᕗᑦ) –ᓄᓇᕗᒻᒥᐅᑕᐃᑦ ᑲᓇᑕᐅᑉ ᒐᕙᒪᒃᑯᖏᑦᑕ ᐱᓕᕆᕝᕕᖏᓐᓂ ᑮᓇᐅᔭᖅᑖᖅᑎᑦᑎᓂᐊᖅᐳᑦ ᐃᓄᐃᑦ ᑮᓇᐅᔭᓕᐅᕋᓱᐊᖅᑎᖏᑦᑕ ᑎᒥᖁᑎᖏᓐᓂᒃ.
ᔮᓐ ᑕᓐᑲᓐ, ᒥᓂᔅᑕᕆᔭᐅᔪᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᓄᑦ, ᐅᓪᓗᒥ ᓇᓗᓇᐃᖅᓯᖅᑲᐅᕗᖅ ᑮᓇᐅᔭᓂᒃ $2.8 ᒥᓕᐊᓐᓂᒃ ᓴᓂᕐᕙᐃᓂᐊᕐᓂᕋᖅᖢᓂ ᐊᑐᖅᑐᒃᓴᐅᑕᐅᔪᒃᓴᓂᒃ ᓄᓇᕗᒻᒥᐅᑦ ᑮᓇᐅᔭᓕᐅᕋᓱᐊᖅᑎᖏᑦᑕ ᑎᒥᖁᑎᖏᓐᓄᑦ, ᕿᑎᕐᒥᐅᑦ ᑮᓇᐅᔭᓕᐅᕋᓱᐊᖅᑎᖏᑦᑕ ᑎᒥᖁᑎᖏᓐᓄᑦ, ᑭᕙᓪᓕᕐᒥ ᑮᓇᐅᔭᓕᐅᕋᓱᐊᕐᓂᕐᒧᑦ ᐱᕙᓪᓕᐊᔪᓕᕆᔨᖏᓐᓄᑦ ᐊᒻᒪᓗ ᑲᑭᕙᒃᑯᑦ ᑲᑐᔾᔨᖃᑎᒌᖏᓐᓄᑦ.
“ᒐᕙᒪᒃᑯᑦ ᐅᐱᑉᐳᑦ ᑖᒃᑯᓂᖓ ᑎᓴᒪᓂᒃ ᑎᒥᓐᖑᖅᑎᑕᐅᓯᒪᔪᓂᒃ ᐃᖅᑲᓇᐃᔭᖃᑎᖃᕈᓐᓇᕋᒥᒃ ᐱᓯᓂᓯᓕᕆᓂᕐᒥᒃ ᐱᕚᓪᓕᐅᑎᒃᓴᓕᕆᑎᓪᓗᒋᑦ, ᖃᐅᔨᒪᔨᑕᕆᔭᐅᑎᓪᓗᒋᑦ ᐊᒻᒪᓗ ᐃᑲᔪᖅᓱᐃᔨᐅᑎᓪᓗᒋᑦ ᓄᓇᓕᖕᓂ ᐊᒻᒪᓗ ᐃᓄᐃᑦ ᐱᓯᓂᓯᓕᕆᔨᖏᓐᓂᒃ,” ᑕᐃᒪᓐᓇ ᐅᖃᓚᐅᖅᑐᖅ ᒥᓂᔅᑕ ᑕᓐᑲᓐ, ᒥᓂᔅᑕᕆᔭᐅᓯᓐᓈᖅᑐᖅ ᐃᓄᓕᕆᔨᑐᖃᒃᑯᓐᓄᑦ ᐊᒻᒪᓗ ᑭᒡᒐᖅᑐᐃᔨᐅᓪᓗᓂ ᐃᖅᑭᓕᒡᓚᖕᓂᒃ ᐊᒻᒪᓗ ᓇᓗᓇᐃᒃᑯᑦᑎᖅᓯᒪᓐᖏᑦᑐᓂᒃ ᐃᖅᑭᓕᖕᓂᒃ.  “ᑕᒪᓐᓇ ᐆᒃᑑᑎᑦᑎᐊᕙᐅᕗᖅ ᖃᓄᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖ ᐃᖅᑲᓇᐃᔭᖃᑎᖃᕐᓂᖏᓐᓂᒃ ᐃᓄᖕᓂᒃ ᑭᓐᖒᒪᔭᒥᖕᓂᒃ ᐊᔾᔨᐅᓐᖏᑦᑐᓂᒃ ᐱᓕᕆᐊᖃᕋᓱᒃᑎᓪᓗᒋᑦ.”

“ᑕᐃᒪᐃᑦᑐᑦ ᑮᓇᐅᔭᑦ ᐊᒃᓱᐊᓗᒃ ᐃᑲᔫᑎᖃᕐᓂᐊᖅᑐᑦ ᓄᓇᕗᒻᒥᐅᓄᑦ,” ᑕᐃᒪᓐᓇ ᐅᖃᓚᐅᖅᑐᖅ ᓕᐅᓇ ᐊᒡᓘᒃᑲᖅ, ᒥᓂᔅᑕ ᐅᑭᐅᖅᑕᖅᑐᒥ ᑲᒪᔨᐅᔪᖅ ᐊᒻᒪᓗ ᐋᓐᓂᐊᖃᕐᓇᓐᖏᑦᑐᓕᕆᓂᕐᒧᑦ ᒥᓂᔅᑕ. “ᑕᐃᒪᐃᑦᑐᑦ ᑎᒥᐅᔪᑦ ᐃᓄᖕᓂᒃ ᓄᓇᓕᖕᓃᑦᑐᓂᒃ ᐃᑲᔪᕈᓐᓇᖅᑐᑦ, ᐋᖅᑭᒃᓱᐃᕙᓪᓕᐊᑎᓪᓗᒋᑦ ᐱᓯᓂᓯᑦᑎᐊᕙᐅᔪᒥᓇᖅᑐᓂᒃ, ᑮᓇᐅᔭᓕᐅᕈᑕᐅᔪᓐᓇᖅᑐᓂ ᐃᓚᐅᔪᓐᓇᕐᓗᑎᒃ ᐊᒻᒪᓗ ᐃᓕᓐᓂᐊᕐᓂᖏᑦ ᖁᕝᕙᖅᑎᒋᐊᒃᑲᓐᓂᕐᓗᒋᑦ.”

“ᑲᓇᑕᒥ ᑮᓇᐅᔭᓕᐅᕋᓱᐊᕐᓂᕐᒧᑦ ᑮᓇᐅᔭᑦ ᐊᒃᓱᐊᓗᒃ ᐃᑲᔫᑕᐅᒃᑲᓐᓂᕈᓐᓇᖅᑐᑦ ᑮᓇᐅᔭᓕᐅᕋᓱᐊᕈᑎᓄᑦ ᐊᒻᒪᓗ ᓄᓇᓕᖕᓂ ᐱᕙᓪᓕᐊᑎᑕᐅᔪᓄᑦ ᕿᑭᖅᑖᓗᖕᒥ.  ᑎᒥᓐᖑᖅᑎᑕᐅᓯᒪᔪᑦ, ᓲᕐᓗ ᑲᑭᕙᒃᑯᑦ ᐊᒻᒪᓗ ᓄᓇᕗᒻᒥ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᓐᖑᖅᑎᑕᐅᓯᒪᔪᑦ ᐱᔨᑦᑎᕈᑎᓂᒃ ᓴᖅᑭᔮᖅᑎᑦᑎᔪᓐᓇᕆᐊᓖᑦ ᐃᓄᖕᓄᑦ ᐃᓘᓐᓇᖏᓐᓂ ᓄᓇᓕᖕᓂ 13-ᖑᔪᓂ.  ᑮᓇᐅᔭᖃᖅᑎᑦᑎᔾᔪᑕᐅᔪᓐᓇᖅᑐᑦ ᑎᒥᓐᖑᖅᑎᑕᐅᓯᒪᔪᑦ ᐊᐅᓚᔾᔪᑎᖏᓐᓄᑦ, ᑮᓇᐅᔭᖃᖅᑎᑕᐅᔪᓐᓇᕐᓂᐊᕐᒪᑕ ᐃᖅᑲᓇᐃᔭᖅᑐᓕᕆᓂᕐᒧᑦ ᓴᓇᕐᕈᑎᖃᖅᑎᑦᑎᓂᕐᒧᓪᓗ ᑐᕌᖓᔪᑦ.  ᐊᒻᒪᓗ, ᑮᓇᐅᔭᑦ ᐊᕗᖓᐅᔨᒃᑲᓐᓂᕈᓐᓇᖅᑐᑦ ᐊᓯᖏᓐᓂᑦ ᑮᓇᐅᔭᖅᑖᕐᕕᐅᔪᓐᓇᖅᑐᓂᒃ ᑖᒃᑯᓂᖓ ᐊᑐᕐᓗᑎᒃ ᑐᒃᓯᕋᒃᑲᓐᓂᕐᓂᕈᑎᒃ.  ᐅᑭᐅᖅᑕᖅᑐᒥ, ᐊᐳᖅᑕᐅᑎᒃᓴᑦ ᐅᓄᕐᓂᖅᓴᐅᓲᖑᔪᑦ - ᓄᓇᓖᑦ ᐅᖓᓯᒌᓗᐊᕐᓂᖏᓐᓄᑦ, ᐱᖁᑎᕐᔪᐊᖃᐅᓐᖏᓐᓂᕐᒧᑦ, ᑮᓇᐅᔭᖅᑐᖅᑐᑦ ᐊᒥᓲᓗᐊᕐᓂᖏᓐᓄᑦ, ᐱᔨᑦᑎᕈᑏᑦ ᐅᓄᓐᖏᓗᐊᕐᓂᖏᓐᓄᑦ ᐊᒻᒪᓗ ᐊᓯᖏᓐᓄᑦ.  ᑖᓐᓇ ᐊᖅᑯᑕᐅᓗᓂ ᓄᓇᓕᖕᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑐᑭᒧᐊᒍᑎᒃᓴᖅᑕᖃᖅᑎᑦᑎᒃᑲᓐᓂᕐᓂᐊᖅᑐᑦ,: ᑕᐃᒪᓐᓇ ᐅᖃᓚᐅᖅᑐᖅ ᓕᐅᓇ ᖃᐅᒻᒪᒋᐊᖅ, ᐊᖓᔪᖅᑳᕆᔭᐅᔪᖅ ᑲᑭᕙᒃᑯᑦ ᑲᑐᔾᔨᖃᑎᒌᖏᓐᓄᑦ.

ᕿᑎᕐᒥᐅᑦ ᑮᓇᐅᔭᓕᐅᕋᓱᐊᖅᑎᖏᑦᑕ ᑎᒥᖁᑎᖏᓐᓄᑦ, ᑭᕙᓪᓕᕐᒥ ᑮᓇᐅᔭᓕᐅᕋᓱᐊᕐᓂᕐᒧᑦ ᐱᕙᓪᓕᐊᔪᓕᕆᔨᖏᓐᓄᑦ ᐊᒻᒪᓗ ᑲᑭᕙᒃᑯᑦ ᑲᑐᔾᔨᖃᑎᒌᖏᑦ ᐃᖅᑲᓇᐃᔭᖃᑎᖃᕐᓂᐊᖅᑐᑦ ᐃᓄᐃᑦ ᓄᓇᓕᖏᑦᑕ ᑎᒥᖁᑎᖏᓐᓂᒃ ᐊᒻᒪᓗ ᐱᓯᓂᓯᓕᕆᔨᖏᓐᓂᒃ.  ᐊᐅᓚᔾᔪᑎᓄᑦ ᑮᓇᐅᔭᑦ ᐊᑐᖅᑕᐅᓗᑎᒃ, ᑖᒃᑯᐊ ᑎᒥᓐᖑᖅᑎᑕᐅᓯᒪᔪᑦ ᑮᓇᐅᔭᓕᐅᕋᓱᐊᕈᑎᓂᒃ ᐸᕐᓇᐅᓯᐅᖏᓐᓇᕈᓐᓇᖅᑐᑦ, ᖃᐅᔨᒪᔨᑕᕆᔭᐅᓗᑎᒡᓗ ᑭᓱᑦ ᓄᑖᑦ ᐊᒻᒪᓗ ᐊᖏᒡᓕᒋᐊᕈᑏᑦ ᖃᓄᖅ ᑮᓇᐅᔭᖃᖅᑎᑕᐅᔪᓐᓇᕐᒪᖔᖏᑦ, ᐊᒻᒪᓗ ᐃᓕᓐᓂᐊᖅᑎᑦᑎᔾᔪᑕᐅᓗᑎᒃ ᐃᖅᑲᓇᐃᔮᖅᑖᕈᑕᐅᓗᑎᒡᓗ.  ᓄᓇᕗᒻᒥ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᓐᖑᖅᑎᑕᐅᓯᒪᔪᖅ ᓄᓇᕗᒻᒥᐅᓕᒫᓂᒃ ᐃᖅᑲᓇᐃᔭᖃᑎᖃᕐᓂᐊᖅᑐᖅ ᐱᓕᕆᐊᓐᖑᖅᑎᑕᐅᓯᒪᔪᑎᒍᑦ ᐊᑐᐊᒐᑎᒍᓪᓗ ᑐᑭᒧᐊᒃᑎᑦᑎᓂᕐᒥᒃ, ᐊᒻᒪᓗ ᖃᐅᔨᓴᐃᓂᕐᒥᒃ ᐊᔭᐅᖅᑐᐃᓂᕐᒥᒡᓗ.

ᑕᐃᒪᐃᑦᑐᓂᒃ ᑮᓇᐅᔭᖃᖅᑎᑦᑎᓂᖅ ᓴᖅᑭᑕᐅᔪᓐᓇᖅᓯᓚᐅᖅᑐᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᓂᕐᒧᑦ ᑎᑭᖁᑖᑕ ᑮᓇᐅᔭᓕᐅᕋᓱᐊᕈᑎᓕᕆᔨᖏᑦᑎᒍᑦ, ᐃᓚᒋᔭᐅᖃᑕᐅᔪᖅ ᓄᓇᖃᖅᑳᖅᓯᒪᔪᑦ ᑮᓇᐅᔭᓕᐅᕋᓱᐊᖅᑎᖏᓐᓄᑦ.  ᓄᓇᖃᖅᑳᖅᓯᒪᔪᑦ ᑮᓇᐅᔭᓕᐅᕋᓱᐊᖅᑎᖏᓐᓄᑦ ᑎᒥᖁᑖ ᐃᓚᒋᔭᐅᖃᑕᐅᕗᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᑎᒥᖁᑖᑕ ᑐᑭᒧᐊᒃᑎᓯᒪᔭᖏᑦᑎᒍᑦ ᓴᖅᑭᖃᑦᑕᖅᑕᖏᑦᑎᒍᓪᓗ ᐅᑭᐅᖅᑕᖅᑐᒥ, ᐱᔭᒃᓴᖅᑖᕆᓯᒪᓪᓗᓂᔾᔪᒡᓗ ᐊᑐᐊᒐᓕᕆᓂᖅ, ᖃᐅᔨᓴᐃᓂᖅ ᐊᒻᒪᓗ ᐊᔭᐅᖅᑐᐃᔨᐅᓂᖅ.