ᐱᖓᑦᓯᕐᒥ, ᐄᐳᕈ 1, 2009
ᓰᐱᓯ: ᓄᓇᕗᑦ ᓇᓪᓕᐅᕐᓂᖅᓯᐅᑦᓯᐊᕐᓕ. ᐅᓪᓗᒥ ᖁᓕᓂᒃ ᐊᕐᕌᒍᖃᓕᕐᒪᑦ, ᖁᕕᐊᓱᒍᑎᒋᔭᐅᒋᐊᖃᖅᖢᓂᓗ ᓯᕗᓂᒃᓴᒧᑦ ᑕᐅᑐᒡᓗᓂ. ᓕᐅᓇ ᐊᒡᓘᒃᑲᖅ ᑲᓇᑕᐅᑉ ᒐᕙᒪᒃᑯᖏᓐᓄᑦ ᒥᓂᔅᑕᐅᕗᖅ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᒻᒪ ᓄᓇᕗᒥᐅᓂᒃ ᑭᒡᒐᖅᑐᐃᓪᓗᓂ ᐊᑐᕚᒥ ᑲᑎᒪᕐᔪᐊᕐᕕᖕᒥ.
ᓕᐅᓇ ᐊᒡᓘᒃᑲᖅ: ᒫᑦᓯ 31, 1999-ᒥ ᑕᐃᑦᓱᒪᓂ ᐃᓱᒪᓕᐅᕈᑎᒋᓚᐅᖅᐸᕋ ᑕᖃᐃᖅᓯᖅᖢᖓ ᐅᑕᕿᓪᓗᖓᓗ ᓂᕆᐅᒋᔭᓐᓂᒃ ᖃᖓᓪᓚᕆᒃ ᐊᕕᖕᓂᐊᕐᓂᑦᑎᓐᓄᑦ ᑕᐃᑦᓱᒪᓂ. ᑕᐃᒪ ᐊᒥᓱᑦ ᐃᓄᐃᑦ ᐱᓕᕆᔪᒻᒪᕆᐅᓚᐅᖅᐳᑦ ᒐᕙᒪᒃᑯᑦ ᐸᕐᓇᒃᑕᐅᓪᓗᑎᒃ ᐊᒻᒪᓗ ᐱᖁᑎᕐᔪᐊᓕᐅᖅᖢᑎᒃ ᑕᐃᑦᓱᒪᓂ ᐊᒥᓱᓪᓗ ᐱᓕᕆᖃᑕᐅᓪᓗᑎᒃ ᐊᐅᓚᔾᔭᒃᑎᓐᓇᓱᐊᖅᖢᒋᑦ ᒐᕙᒪᒃᑯᑦ ᐅᖃᐅᓐᓇᖅᐸᒃᖢᖓᓗ ᖁᔭᓐᓇᒦᒃ ᑕᐃᑦᓱᒪᓂ ᐊᕐᕌᒍᑦ 30-ᐅᑎᓪᓗᒋᑦ ᐅᖓᑖᓄᓪᓗ ᐃᓄᐃᑦ ᓯᕗᓕᖅᑎᑦ ᑕᐅᑐᖅᑰᓚᐅᖅᓯᒪᖕᒪᑕ ᐋᔩᖃᑎᖃᖅᖢᑎᒡᓗ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓂᒃ. ᑕᒪᓐᓇ ᐊᑐᓕᖅᐸᕗᑦ ᑕᐅᑐᖅᑰᖅᑕᐅᓚᐅᖅᑐᖅ ᓯᕗᓕᖅᑎᓄᑦ ᑕᐃᑦᓱᒪᓂ. ᐱᓕᕆᐊᕋ ᒥᑭᓂᖅᓴᐅᕗᖅ ᐱᓕᕆᐊᕆᔭᐅᓚᐅᖅᑐᓂᒃ ᑕᐃᒃᑯᓄᖓ. ᐃᓚᒋᔭᐅᖃᑕᐅᓚᐅᖅᖢᖓᓗ ᑲᒥᓯᓇᐅᓚᐅᐱᓪᓚᒃᑐᖅ ᑎᑎᕋᕐᕕᖕᓂ ᐃᓕᐅᖃᐃᑎᓪᓗᒍ ᐃᖅᑲᓇᐃᔭᖅᑎᑖᖅᖢᑕᓗ ᐊᐅᓪᓛᕆᐊᕈᒪᓪᓗᑕ ᐄᐳᕈ 1-ᒥ ᖁᔭᓐᓇᒦᒻᒪᕆᒃᐸᒃᑲ ᑕᐃᒃᑯᐊ ᐊᕐᕌᒍᑦ 30-ᐅᑎᓪᓗᒋᑦ ᐅᖓᑖᓄᓪᓗ ᐃᓄᐃᑦ ᐱᓕᕆᓚᐅᖅᑐᑦ ᑕᐃᒪᖓᓂᑦ ᐊᕐᕌᒍᑦ ᖁᓕᐅᓕᖅᑐᓂᑦ ᐄᐳᕈ 1, 1999-ᒥᑦ ᐱᒋᐊᖅᖢᑕ ᐱᕙᓪᓕᐊᑎᑦᓯᓯᒪᒻᒪᕆᒃᐳᒍᑦ ᓄᓇᓕᖕᓂ ᐱᓕᕆᕐᔪᐊᖅᓯᒪᓕᖅᖢᑕᓗ. ᐃᓄᐃᓪᓗ ᐊᒥᓱᖑᖅᐹᓪᓕᖅᓯᒪᓕᖅᖢᑎᒃ, ᐃᓄᐃᑦ ᑲᑐᔾᔨᖃᑎᒌᒃᑯᖏᓪᓗ, ᓄᓇᓕᖏᓪᓗ ᐊᒻᒪᓗ ᐱᓕᕆᕕᖏᑦ. ᒪᒃᑯᒃᑐᑦ ᓄᓇᕗᒥ ᑐᓴᖅᑎᑕᐅᓂᐊᖅᐳᑦ ᖃᐅᔨᑎᑕᐅᓂᐊᖅᐳᓪᓗ ᐃᓚᐅᓗᓂ ᐱᕙᓪᓕᐊᑎᑎᓂᕐᒧᑦ ᒥᑭᔫᒐᓗᐊᒥᒃ ᐱᕙᓪᓕᐊᓂᖃᕐᓂᐊᖅᐳᒍᑦ ᐊᖏᔪᓂᒡᓗ. ᐱᕙᓪᓕᐊᑎᑎᖃᑕᐅᒋᐊᖃᕋᑦᑕ ᓄᓇᑦᑎᓐᓂᒃ ᖃᐅᔨᒍᕕᓪᓗ ᐱᕙᓪᓕᐊᑎᑕᐅᔪᓐᓇᕋᔭᖅᑐᒥᒃ ᓄᓇᑦᑎᓐᓂ ᐊᑲᐅᔪᒃᑯᑦ ᐃᓚᐅᓂᐊᖅᐳᓯ. ᑕᐃᒪᓐᓇ ᑭᓯᐊᓂ ᐱᕚᓪᓕᕈᑕᐅᔪᓂᒃ ᑕᑯᕙᓪᓕᐊᓂᐊᖅᐳᒍᑦ ᓄᓇᓕᖕᓂ, ᐱᐅᔪᓂᒃ ᐱᕙᓪᓕᐊᑎᑕᐅᔪᓂᒃ ᐊᕐᕌᒍᑦ 30 ᐊᓂᒍᖅᓯᒪᓕᖅᐸᑕ ᑕᒡᕙᓃᑦᑐᐃᓐᓇᐅᓂᐊᖏᒃᑲᓗᐊᖅᐳᒍᑦ ᑕᐃᒪᓐᓇ ᐱᔪᓐᓇᕐᓂᖃᕐᓂᐊᕐᒪᑕ ᒪᒃᑯᒃᑐᑦ ᐊᐅᓚᑦᓯᓗᑎᒃ ᓄᓇᒥᐅᑕᓂᒃ, ᐊᐅᓚᑦᓯᓗᑎᒡᓗ ᓄᓇᕗᒥᒃ, ᐃᓄᖏᓐᓂᒡᓗ.
ᓰᐱᓯ: ᓕᐅᓇ ᐊᒡᓘᒃᑲᖅ ᑲᓇᑕᐅᑉ ᒐᕙᒪᒃᑯᖏᓐᓄᑦ ᒥᓂᔅᑕᐅᕗᖅ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᒻᒪ ᓄᓇᕗᒥᐅᓂᒃ ᑭᒡᒐᖅᑐᐃᓪᓗᓂ ᐊᑐᕚᒥ ᑲᑎᒪᕐᔪᐊᕐᕕᖕᒥ.
ᓰᐱᓯ ᓈᓚᐅᑎᓕᕆᔨᒃᑯᖏᑦ, ᓄᑖᖅ ᐅᓪᓗᖅ
