ᐱᖓᑦᓯᖅ, ᐄᐳᕈ 1, 2009
ᓰᐱᓯ: ᓄᓇᕗᒥᐅᑦ ᖁᕕᐊᓱᒍᑎᖃᓚᐅᖅᐳᑦ ᐊᕐᕌᒍᓂᒃ ᖁᓕᓂᒃ ᓇᓪᓕᐅᕐᓂᖅᓯᐅᖅᑎᓪᓗᒍ ᓄᓇᕗᑖᕐᓇᐅᓚᐅᖅᑐᖅ ᐊᒻᒪ ᐃᓄᐃᑦ ᓯᕗᓕᖅᑎᖏᑦ ᐊᕐᕌᒍᓂᒃ ᖁᓕᐅᓯᒪᓕᖅᑐᓂᒃ ᐃᓱᒪᒃᓴᖅᓯᐅᕈᑎᖃᓚᐅᖅᐳᑦ. ᐅᖃᓚᐅᖅᐳᖅ ᑭᖑᒻᒧᑦ ᑕᑯᒋᐊᕐᓗᑎᒃ ᑕᓯᐅᖅᑕᐅᒍᑎᖃᕐᓂᐊᕐᒪᑕ ᐊᖅᑯᑎᒋᓂᐊᖅᑕᒥᖕᓂᒃ ᓯᕗᓂᒃᓴᐅᓂᐊᖅᑐᒧᑦ. ᑭᕙᓪ ᖃᑉᓗᐃᑦᓯᐊᖅ ᐅᓂᒃᑳᖅᑐᖅ.
ᐱᕙᓪᓕᐊᔪᓕᕆᔨ: ᐅᓐᓄᐊᖑᓕᖅᑎᓪᓗᒍ 12-ᒥ ᐊᕐᕌᒍᑦ ᖁᓕᐅᓚᐅᖅᓯᒪᔪᓂ ᖁᕕᐊᓱᒡᔪᐊᓚᐅᖅᐳᑦ ᓄᑖᒥᒃ ᓄᓇᕗᑖᖅᓯᒪᓕᖅᖢᑎᒃ. ᓂᕆᐅᒋᔭᖃᑦᓯᐊᖅᖢᑎᒡᓗ. ᐅᓪᓗᒥᐅᓕᖅᑐᖅ ᐊᖓᔪᖃᖓᑦ ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦᑕ ᐃᖅᑲᐅᒪᕗᖅ ᑕᐃᑦᓱᒪᓂᒧᑦ ᐹᓪ ᖃᓗᔾᔭᖅ ᐅᖃᓚᐅᖅᐳᖅ ᐊᒥᓱᓂᒃ ᐱᐅᔪᓂᒃ ᓴᖅᑭᑦᑐᖃᖅᓯᒪᓕᕐᓂᖓᓄᑦ ᐊᕐᕌᒍᓂ ᖁᓕᐅᓯᒪᓕᖅᑐᓂ ᓱᓕ ᐱᕚᓪᓕᕈᑎᖃᖅᐸᓪᓕᐊᓂᐊᖅᖢᑎᒃ.
ᐹᓪ ᖃᓗᔾᔭᖅ: ᖃᐅᔨᒪᔪᖓ ᓱᓕ ᐱᓕᕆᒋᐊᖃᕋᑉᑕ ᓴᐱᓕᕆᐊᖃᖏᓐᓇᑉᑕ ᓂᕆᐅᒋᔭᖃᕆᐊᖃᕋᑉᑕᓗ ᐱᕚᓪᓕᕈᑎᖃᕈᓐᓇᖁᑉᓗᑕ.
ᐱᕙᓪᓕᐊᔪᓕᕆᔨ: ᓄᓇᕗᒥ ᑲᑎᒪᔨᕐᔪᐊᖑᖃᑕᐅᔪᖅ ᐊᑐᕚᒥ ᐊᖏᕐᕋᖅᓯᒪᕗᑦ ᓄᓇᕗᒥ ᐅᓪᓗᒥ ᓄᓇᕗᒥᐅᑕᖃᑎᒥᓂᒃ. ᓕᐅᓇ ᐊᒡᓘᒃᑲᖅ ᐃᖅᑲᐅᒪᕗᑦ ᑕᐃᑦᓱᒪᓂ ᓄᓇᕗᑦ ᐱᒋᐊᕐᓂᕆᓚᐅᖅᑕᓯᒪᖏᓐᓂᒃ ᐅᓪᓗᒥᐅᓕᖅᑐᒥᓗ.
ᓕᐅᓇ ᐊᒡᓘᒃᑲᖅ: ᑕᐃᑦᓱᒪᓂ ᐊᕐᕌᒍᓂ 30-ᐅᓯᒪᓕᖅᑐᓂ ᐅᖓᑖᓄᓪᓘᓐᓃᑦ ᐃᓄᐃᑦ ᓯᕗᓕᖅᑎᑦ ᑕᐅᑐᒐᖃᓚᐅᖅᐳᑦ ᐋᔩᖃᑎᒌᒍᒪᓪᓗᑎᒡᓗ ᓄᓇᑖᕐᓂᕐᒧᑦ ᐊᖏᕈᑎᓂᒃ ᑕᒪᒃᑯᐊ ᑕᒡᕙ ᐃᖅᑲᐅᒪᔭᐅᕗᑦ ᑕᐅᑐᒐᖃᑦᓯᐊᓚᐅᕐᓂᖏᓐᓄᑦ.
ᐱᕙᓪᓕᐊᔪᓕᕆᔨ: ᐊᒻᒪᓗ ᑕᐃᒪᓐᓇ ᑕᐅᑐᒐᖃᖅᖢᓂ ᑭᖑᒻᒧᑦ ᐊᒡᓘᒃᑲᖅ ᓯᕗᓂᒃᓴᒧᑦ ᑕᑯᓐᓇᐅᑎᖃᖅᐳᑦ ᑐᓴᖅᑎᑎᒍᒪᓪᓗᓂᓗ ᒪᒃᑯᒃᑐᓂᒃ.
ᐊᒡᓘᒃᑲᖅ: ᐊᒻᒪ ᑕᑯᒍᑦᓯ ᐱᕙᓪᓕᐊᒍᑕᐅᔪᓐᓇᖅᑐᒥᒃ ᐊᑲᐅᓂᖅᓴᐅᓕᕈᑕᐅᔪᓐᓇᖅᑐᒥᒃ ᓄᓇᑦᓯᖕᓄᑦ ᐃᓚᐅᖃᑦᑕᕐᓂᐊᖅᐳᓯ.
ᐱᕙᓪᓕᐊᔪᓕᕆᔨ: ᐅᓪᓗᒥ ᓯᕗᓕᖅᑎ ᐄᕙ ᐋᕆᐊᒃ ᓄᓇᕗᑦ ᒐᕙᒪᒃᑯᖏᓐᓄᑦ ᓯᕗᓕᖅᑎᐅᕗᖅ. ᐅᖃᓚᐅᖅᐳᕐᓗ ᒫᓐᓇ ᖃᐅᔨᓴᕆᐊᖃᓕᕐᒪᑕ ᖃᓄᐃᓕᐅᖅᓯᒪᓕᕐᓂᕐᒥᖕᓄᑦ ᓄᓇᕗᒥ ᓯᕗᓂᒃᓴᐅᓂᐊᖅᑐᒥ ᖃᓄᐃᓕᐅᕆᐊᕈᑎᒃᓴᖃᕐᓗᑎᒡᓗ.
ᐄᕙ ᐋᕆᐊᒃ: ᓄᓇᖃᑎᖃᕐᓗᓂ ᐋᓐᓂᐊᕐᓇᖏᑦᑐᒦᑦᑐᓂᒃ ᖃᑕᖑᑎᒌᓂᒃ ᓴᓐᖏᔪᓂᒡᓗ ᓄᓇᓕᖕᓂ ᐱᒋᐊᕈᑕᐅᕗᖅ, ᑕᐃᓐᓇ ᓴᓐᖏᓕᖅᑎᑎᕙᓪᓕᐊᓪᓗᓂ ᓄᓇᓕᖕᓂᒃ.
ᐱᕙᓪᓕᐊᔪᓕᕆᔨ: ᑕᒪᕐᒥᒃ ᐱᖓᓱᒃ ᐃᓄᐃᑦ ᓯᕗᓕᖅᑎᖏᑦ ᐅᖃᓚᐅᖅᐳᑦ ᐃᓄᐃᑦ ᑕᒪᕐᒥᒃ ᐱᓕᕆᖃᑎᒌᒋᐊᖃᕐᓂᖏᓐᓄᑦ ᑕᐅᑐᖅᑰᖅᑕᒥᖕᓄᑦ ᐱᓇᓱᐊᕈᑎᖃᕐᓗᑎᒃ ᐱᓪᓚᕆᐅᓕᖁᓪᓗᒍ. ᑭᕙᓪ ᖃᑉᓗᑦᓯᐊᖅ, ᓯᐲᓰᑯᓐᓄᑦ ᐱᕙᓪᓕᐊᔪᖅ ᐃᖃᓗᖕᓂ.
ᓰᐱᓯ/CFFb ᓈᓚᐅᑎᓕᕆᔨ (ᐃᖃᓗᖕᓂ)
ᐱᖓᑦᓯᕐᒥ 01 ᐄᐳᕈ 2009
