ᐅᓪᓗᖅ ᐄᐳᕈ 1 ᐱᒻᒪᕆᒋᔭᐅᖕᒪᑦ ᓄᓇᕗᒻᒥᐅᓄᑦ. ᐅᕙᓂᓗ ᐊᕐᕌᒍᒥ ᐱᓗᐊᒃᑲᓐᓂᖅᑐᒥᒃ ᐱᒻᒪᕆᐅᓪᓗᓂ. ᐅᓪᓗᒥ ᖁᕕᐊᓲᑎᖃᕋᑦᑕ ᐅᑭᐅᓂᒃ ᖁᓕᖕᓂᒃ ᐱᕙᓪᓕᐊᑎᑦᑎᓯᒪᓂᑦᑎᓐᓂᒃ ᓄᓇᑦᑎᐊᕙᖁᑎᑦᑎᓐᓂ. ᐃᓕᑦᓯ ᑕᒪᑦᓯ ᐃᑲᔪᖅᑐᖅᓯᒪᕗᓯ ᑕᒪᑐᒧᖓᑦ ᓇᓃᒃᑲᓗᐊᕈᑦᓯ ᓲᕐᓗ ᖁᕐᓗᖅᑐᒥ, ᐊᕐᕕᐊᓂ, ᐊᐅᔪᐃᑦᑐᒥ, ᐃᖃᓗᖕᓂᓘᓐᓃᑦ ᐊᓯᐊᓂᓘᓐᓃᑦ ᓄᓇᓕᖁᑎᑦᑎᐊᕙᑦᑎᓐᓂᒥᐅᖑᒍᑦᓯ, ᖁᕕᐊᓲᑎᖃᖃᑕᐅᖁᕙᑦᓯ ᓄᓇᕗᖃᕐᓂᑦᑎᓐᓂ. ᐅᓪᓗᒥ ᐅᐱᒍᓲᑎᒃᓴᖃᖅᑐᐃᓐᓇᐅᕗᒍᑦ. ᐱᕙᓪᓕᐊᑎᑦᑎᑦᑎᐊᖅᓯᒪᖃᑕᐅᒐᑦᑕ, ᐊᒻᒪᓗ ᓯᕗᓂᕐᒧᑦ ᐱᕚᓪᓕᖅᑎᑦᑎᒃᑲᓐᓂᕈᒫᕋᑦᑕ.

ᑕᐃᑦᓱᒪᓂ ᐅᓪᓗᖓᓂ ᐄᐳᕈ 1, 1999ᒥ ᐊᑕᐅᓯᐅᖃᑎᒌᓕᓚᐅᖅᓯᒪᒐᑦᑕ ᐊᒻᒪᓗ ᑭᓇᐅᓂᑦᑎᓐᓂ ᓴᖅᑭᔮᖅᑎᑦᑎᓚᐅᖅᐳᒍᑦ ᑲᓇᑕᒥ. ᐅᓪᓗᖅ ᑕᐃᓐᓇ ᐃᖅᑲᐅᒪᑦᑎᐊᖅᐸᕋ. ᐊᓄᕌᓚᐅᖅᖢᓂ ᐃᒃᑮᕐᓇᓚᐅᖅᖢᓂᓗ ᑭᓯᐊᓂ ᐆᒪᑎᑦᑎᓐᓂ ᐊᑲᐅᑦᑎᐊᓚᐅᖅᖢᑕ, ᖁᕕᐊᓱᖕᓂᕐᒥᓗ ᐅᐱᒍᓱᖕᓂᕐᒥᓗ ᑕᑕᑦᑎᐊᓚᐅᕋᑦᑕ. ᑕᒡᕙᓂ ᐅᓪᓗᕐᒥ ᑕᐃᑦᓱᒪᓂ 1999ᒥ ᑲᑎᓚᐅᖅᓯᒪᒐᑦᑕ ᖁᕕᐊᓲᑎᖃᓚᐅᖅᖢᑕ ᓴᖅᑭᔮᖅᑎᑦᑎᖃᑎᒌᓚᐅᕐᓂᑦᑎᓐᓂ ᐱᓕᕆᑦᑎᐊᕐᓂᒃᑯᑦ ᓴᐱᓕᖅᑕᐃᓕᒪᓂᒃᑯᓪᓗ. ᐅᑭᐅᑦ ᖁᓕᐅᓕᖅᖢᑎᒃ ᐅᐱᒍᓱᒻᒪᕆᒃᐳᖓ ᓄᓇᕗᒻᒥᐅᓂᒃ ᑭᒡᒐᖅᑎᐅᒋᐊᒃᓴᖅ ᐅᓪᓗᒥ ᑲᓇᑕᐅᑉ ᒪᓕᒐᓕᐅᕐᕕᐊᓗᐊᓂ, ᐊᒻᒪᓗ ᐱᔭᒃᓴᖃᖅᑎᑕᐅᒃᑲᓐᓂᖅᓯᒪᒐᒪ ᒥᓂᔅᑕᐅᓂᕐᒧᑦ ᐋᓐᓂᐊᖅᑐᓕᕆᓂᕐᒧᑦ ᑲᓇᑕᒥᐅᓄᑦ ᒥᓂᔅᑕᒋᔭᐅᒃᑲᓐᓂᖅᖢᖓᓗ ᐅᑭᐅᖅᑕᖅᑐᒥ ᑲᒪᒋᔭᖃᖅᖢᖓ ᑲᓇᑕᒥᐅᑦ ᐱᓪᓗᒋᑦ.

ᓄᓇᒋᔭᕗᑦ ᐊᖏᔪᐊᓗᒃ ᐊᒻᒪᓗ ᐱᔭᐅᔭᒃᓴᖅᑕᖃᐅᖅᖢᓂ. ᑭᓯᐊᓂ ᓄᓇᑦᑕ ᒥᒃᓵᓄᑦ ᐅᐱᒋᓂᖅᐹᕆᔭᕋᓕ ᐃᓅᖃᑎᒌᖕᓂᕆᔭᕗᑦ ᐊᑕᐅᓯᐅᖃᑎᒌᖕᓂᕗᑦ ᐃᓛᒃ. ᓄᓇᕗᒻᒥ ᐱᕙᓪᓕᐊᑦᑎᐊᖅᓯᒪᓂᖃᖅᑎᓪᓗᑕ ᐊᒃᓱᕈᕐᓇᖅᑐᒃᑰᖅᓯᒪᓂᖃᓚᐅᕋᑦᑕᓗ. ᑭᓯᐊᓂᑦᑕᐅᖅ ᑲᔪᓰᓐᓇᖅᓯᒪᒐᑦᑕ ᓴᐱᓕᖅᑕᐃᓕᒪᓪᓗᑕ ᑕᐃᒪᐃᑦᑑᒐᑦᑕ ᓄᓇᕗᒻᒥᐅᑎᒍᑦ.

ᐊᕐᕌᒍᒋᔭᑦᑎᓐᓂ ᐅᕙᓂ ᑭᖑᖕᒧᑦ ᑕᑯᓇᓱᒋᐊᖃᖅᐳᒍᑦ ᓴᖅᑭᔮᖅᑎᑦᑎᒍᓐᓇᓚᐅᖅᑕᑦᑎᓐᓄᑦ ᐅᐱᒋᓗᒋᓪᓗ ᖁᕕᐊᓲᑎᒋᓗᒋᓪᓗ ᒪᒃᑯᐊ ᐱᓂᐊᕐᓂᕆᓚᐅᖅᑕᕗᑦ ᐅᑭᐅᑦ ᖁᓖᑦ ᐃᓗᐊᓂ. ᓱᓕ ᑕᐃᒫᒃ ᐱᓕᕆᑦᑎᐊᕋᓱᐃᓐᓇᕈᑦᑕ ᑎᑭᑦᑐᒫᖅᐸᕗᑦ ᑐᕌᕋᓱᒃᑕᕗᑦ ᓯᕗᓂᕐᒧᑦ ᓄᓇᑦᑎᐊᕚᓗᖃᕐᓂᕐᒧᑦ ᐃᓄᑦᑎᐊᕚᓗᖃᖅᑐᒥᒃ ᐱᔭᐅᔭᒃᓴᖅᑕᖃᑦᑎᐊᖅᑐᒥᒡᓗ.

ᓄᓇᕗᒻᒥᐅᑕᐅᔪᓯ, ᑭᒡᒐᖅᑐᐃᓪᓗᓯ ᑲᑎᒪᕕᐊᓗᖕᒥ, ᖃᐅᔨᒪᖁᕙᑦᓯ ᑲᔪᓰᓐᓇᕐᓂᐊᕋᒪ ᐱᓕᕆᓗᖓ ᐱᓪᓗᓯ ᑲᓐᓲᕕᑎᒃᑯᓐᓂ ᒐᕙᒪᐅᔪᓂ ᐊᒃᓱᕈᐃᓐᓇᕐᓗᖓ ᓄᓇᕗᒻᒥᒃ ᐱᕙᓪᓕᐊᑎᑦᑎᓇᓱᐃᓐᓇᕐᓗᖓ. ᑲᔪᓯᖃᑎᒌᓐᓇᓚᐅᖅᑕ ᐊᒃᓱᕈᕐᓗᑕ ᐱᓕᕇᓐᓇᕐᓗᑕ ᐊᔪᖏᓐᓂᓕᒫᑦᑎᓐᓂ ᓯᕗᒻᒧᐊᖅᑎᓇᓱᒡᓗᒍ ᓄᓇᕗᑦ. ᖁᕕᐊᓲᑎᒋᓯᐅᒃ ᐅᓪᓗᕆᔭᓯ ᐅᓪᓗᒥ ᓄᓇᕗᒻᒥᐅᑕᐅᔪᓯ, ᖃᓄᐃᖏᑦᑎᐊᕐᓗᓯ ᐊᒻᒪᓗ ᐱᓕᕇᓐᓇᕐᓗᓯ ᓯᕗᓂᒃᓴᑦᑎᓐᓄᑦ. ᐱᓕᕆᖃᑎᒌᓚᐅᖅᑕ ᓴᖅᑭᔮᖅᑎᑦᑎᖃᑎᒌᓚᐅᕐᓂᐊᕋᑦᑕ ᓄᓇᑦᑕ ᐱᒻᒪᕆᐊᓘᓂᖓᓂᒃ ᐱᕕᒡᔪᐊᖅᑕᖃᕐᓂᖓᓂᓗ ᐱᐅᔪᒥᒃ ᓯᕗᓂᕐᒧᑦ ᑕᑯᒃᓴᐅᔪᖕᓇᓛᖅᑐᒥᒃ. ᖁᕕᐊᓲᑎᖃᑦᑎᐊᕆᑦᓯ ᐊᕐᕌᒍᑦ ᖁᓕᐅᓕᕐᓂᖏᓐᓂᑦ.