ᐊᑐᕚ, ᐋᓐᑎᐅᕆᔪ (ᒫᑦᓯ 2, 2009) - ᒪᓕᒐᖅ ᐋᖅᑭᒋᐊᖅᑕᐅᓪᓗᓂ ᐋᑎᑯ 19.2.5 ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑕᐅᓯᒪᔪᓃᑦᑐᖅ ᑐᓴᖅᑎᑎᒍᑎᖃᓚᐅᖅᐳᑦ ᐅᓪᓗᒥ ᒥᓂᔅᑕ ᓴᒃ ᓯᑖᓪ, ᒥᓂᔅᑕ ᐃᓄᓕᕆᔨᑐᖃᒃᑯᓐᓄᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓂ ᐱᓕᕆᑎᑕᐅᔪᖅ ᐃᖅᑭᓕᕐᓚᖕᓄᑦ ᐃᓕᑕᕆᔭᐅᓯᒪᖏᑦᑐᓄᓪᓗ ᒪᓕᒐᑎᒍᑦ ᐃᖅᑭᓕᕐᓄᑦ. ᑖᓐᓇ ᐋᖅᑭᒋᐊᕈᑕᐅᔪᖅ ᐱᔾᔪᑎᖃᖅᐳᑦ ᑕᒪᒃᑯᐊ ᐃᓄᐃᑦ ᓄᓇᕗᒥ ᑕᒪᐃᑎᒍᑦ ᓄᓇᒥᒃ ᓇᖕᒥᓂᖃᖅᑎᑕᐅᓂᐊᖅᐳᑦ ᓇᖕᒥᓂᕆᔭᒥᖕᓂ ᓄᓇᓂ ᖃᓄᖅ ᑕᒪᒃᑯᐊ ᓄᓇᐃᑦ ᑭᒡᓕᖏᑦ ᓇᓗᓇᐃᔭᖅᑕᐅᓗᑎᒃ ᐃᒪᓛᒃᑰᖅᑐᑦ ᖃᓄᖅ ᑐᑭᖃᖅᑎᑕᐅᓂᐊᕐᓂᖏᓐᓄᑦ ᐋᖅᑭᒃᓯᓗᓂ ᓇᖕᒥᓂᕆᔭᐅᔪᓂᒃ ᐃᒪᐅᑉ ᐃᖅᑲᖓᓃᑦᑐᓂᒃ ᑕᒪᒃᑯᓇᓂ ᐃᒪᓛᓂ.

"ᑲᓇᑕᐅᑉ ᒐᕙᒪᒃᑯᖏᑦ ᐃᑲᔪᖅᑐᐃᑦᓯᐊᖅᐳᑦ ᓄᓇᕗᒥ ᓄᓇᑖᕈᑕᐅᓯᒪᔪᑦ ᐊᖏᕈᑎᖏᑦ ᐊᑐᓕᖅᑕᐅᑦᓯᐊᖁᓪᓗᒋᑦ ᐱᓕᕆᓪᓗᑎᒡᓗ ᓴᓐᖏᔪᒥᒃ ᐱᕙᓪᓕᐊᓂᖃᑦᓯᐊᕈᓐᓇᖅᑎᑕᐅᕙᓪᓕᐊᖁᓪᓗᒋᑦ ᓄᓇᕗᒥᐅᑦ," ᐅᖃᓚᐅᖅᐳᖅ ᒥᓂᔅᑕ ᓯᑖᓪ. "ᑖᓐᓇ ᐋᖅᑭᒋᐊᕈᑕᐅᓂᐊᖅᑐᑦ ᒪᓕᒐᕐᓄᑦ ᐊᖏᕈᑎᒥ ᓴᖅᑭᔮᖅᑎᑎᒍᑕᐅᓂᐊᖅᐳᖅ ᐱᕙᓪᓕᐊᑎᑎᒋᐊᖃᕐᓂᖏᓐᓄᑦ ᐃᓅᓯᕐᒥᓄᓪᓗ ᐱᕙᓪᓕᐊᑎᑎᒋᐊᖃᕐᓂᖏᓐᓄᑦ ᐅᑭᐅᖅᑕᖅᑐᒥ ᑕᒪᒃᑯᐊ ᐋᖅᑭᐅᒪᑦᓯᐊᖏᑦᑐᑦ ᑐᑭᑖᖅᑎᑕᐅᓯᒪᑦᓯᐊᖏᑦᑐᑦ ᓄᓇᒥᒃ ᓇᖕᒥᓂᖃᕐᓂᕐᒧᑦ ᐱᔾᔪᑎᒋᓪᓗᒋᑦ ᐊᒻᒪᓗ ᐃᓄᐃᑦ ᓄᓇᕗᒥ ᐃᑲᔪᖅᑕᐅᓂᖃᕈᓐᓇᖁᓪᓗᒋᑦ ᑕᒪᐃᑎᒍᑦ ᐱᔪᓐᓇᕐᓂᖃᕈᓐᓇᖁᓪᓗᒋᑦ ᓄᓇᒥᐅᑕᓂᒃ ᐅᖅᓱᐊᓗᒃᓴᓂᒡᓗ ᓄᓇᒥᖕᓂ."

"ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦ ᖁᕕᐊᓱᒃᐳᑦ ᐋᖅᑭᒋᐊᕈᑕᐅᔪᒥᒃ ᐱᐊᓂᒃᓯᒪᓕᕐᓂᖓᓄᑦ ᐱᕚᓪᓕᕈᑕᐅᒻᒪᕆᒃᖢᓂᓗ ᑐᑭᑖᕈᑕᐅᓂᖓ ᒪᓕᑦᓯᐊᓕᖅᖢᓂᓗ ᐊᖏᕈᑎᓕᐅᕈᑕᐅᓯᒪᔪᒧᑦ, ᒫᓐᓇ ᐊᒻᒪᓗ ᓯᕗᓂᒃᓴᐅᓂᐊᖅᑐᒥ," ᐅᖃᓚᐅᖅᐳᖅ ᔩᒻᔅ ᐃᑦᑐᓗᒃ, ᓯᕗᓪᓕᖅᐹᒥ ᐊᖓᔪᖃᑉ ᑐᖏᓕᖓ ᓄᓇᕗᑦ ᑐᓐᖓᕕᒃᑯᑦ ᑎᒥᖓᓐᓂ, ᑲᑐᔾᔨᖃᑎᒌᑦ ᑭᒡᒐᖅᑐᐃᔪᑦ ᐃᓄᖕᓂᒃ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓕᐅᕈᑕᐅᓯᒪᔪᓂ. "ᐋᖅᑭᒋᐊᕈᑕᐅᔪᖅ ᐊᒃᓱᕈᕈᑕᐅᓚᐅᖅᐳᖅ ᐱᓕᕆᐊᕆᔭᐅᓪᓚᕆᓚᐅᖅᐳᕐᓗ ᐊᒥᓄᑦ ᐃᓄᖕᓄᑦ ᖁᕕᐊᓱᒃᐳᒍᓪᓗ ᐊᓂᒍᕈᑕᐅᓯᒪᓕᕐᒪᑦ ᐊᑐᖅᑕᐅᓂᐊᓕᕐᒪᑦ."

ᑕᐃᒪ, ᑖᓐᓇ ᐋᖅᑭᒋᐊᕈᑕᐅᔪᖅ ᐱᔪᓐᓇᖅᑎᑎᓂᐊᖅᐳᑦ ᐃᓄᖕᓂᒃ ᓄᓇᕗᒥᐅᓂᒃ ᑕᐃᒪᓐᓇ ᓄᓇᒥᐅᑕᓂᑦ ᐃᑲᔪᖅᑕᐅᕙᓪᓕᐊᓕᖁᓪᓗᒋᑦ ᐅᖅᓱᐊᓗᒃᓴᓂᓪᓗ ᓇᓂᔭᐅᔪᓂᑦ ᑕᒃᐹᖓᑦ, ᑕᒪᒃᑯᐊᓗ ᐊᓕᒎᔭᐃᑦ ᓇᓂᔭᐅᔪᑦ ᐊᓕᒎᔭᖃᕐᕕᒃᓴᐃᓪᓗ ᓄᓇᐅᑉ ᐊᑖᓂ ᑕᓯᐊᓛᑦ ᐊᑖᓂᓗ ᓇᓂᔭᐅᔪᑦ.

ᑲᓇᑕᐅᑉ ᒐᕙᒪᒃᑯᖏᑦ ᐱᓕᕆᖃᑎᖃᓚᐅᖅᐳᑦ ᓄᓇᕗᒥ ᓄᓇᑖᕈᑕᐅᓯᒪᔪᑦ ᐊᖏᕈᑎᖏᓐᓂᒃ ᐱᓕᕆᐊᖃᖅᑐᓂᒃ, ᓄᓇᕗᑦ ᒐᕙᒪᒃᑯᖏᓐᓂᒡᓗ ᐊᒻᒪ ᓄᓇᕗᑦ ᑐᓐᖓᕕᒃᑯᑦ ᑎᒥᖓᓐᓂᒃ, ᐊᖏᖃᑎᒌᒐᓱᐊᕐᓂᕐᒥᖕᓂ ᐊᒻᒪᓗ ᐅᖃᐅᓯᖅᑕᖏᑦ ᐋᖅᑭᒋᐊᕈᑕᐅᔪᑦ ᑎᑎᕋᖅᑕᐅᕙᓪᓕᐊᓂᖏᓐᓂ.

ᐋᖅᑭᒋᐊᕈᑕᐅᔪᑦ ᐃᑲᔪᕐᓂᖃᕐᓂᐊᖅᐳᑦ ᑐᓴᖅᑎᑕᐅᖃᑦᑕᕐᓂᐊᖅᖢᑎᒃ ᐃᑲᔪᖅᑕᐅᖃᑦᑕᕐᓂᐊᖅᖢᑎᒡᓗ ᒪᓕᒐᑎᒍᑦ ᐋᖅᑭᒃᓱᐃᓂᕐᒥᒃ ᐊᑐᓕᖅᑕᐅᕙᓪᓕᐊᑎᑕᐅᓂᖓᓄᑦ ᓄᓇᒥᒃ ᐊᑐᕐᓂᕐᒧᑦ ᐸᕐᓇᒃᓯᒪᒍᑎᑦ ᐊᒻᒪᓗ ᐊᕙᑎᒥᐅᑕᓂᒃ ᖃᐅᔨᓴᕐᓂᕐᒧᑦ ᓄᓇᕗᒥ ᓄᓇᑖᕈᑕᐅᓯᒪᔪᑦ ᐊᖏᕈᑎᖏᓐᓃᑦᑐᓂᒃ.