ᐊᑐᕚ, ᒫᑦᓯ 4, 2009 - ᒥᓂᔅᑕ ᓕᐅᓇ ᐊᒡᓘᒃᑲᖅ, ᑭᒡᒐᖅᑐᐃᔪᑦ ᓄᓇᕗᒥᐅᓂᒃ ᐊᑐᕚᒥ ᑲᑎᒪᕐᔪᐊᕐᕕᖕᒥ, ᒥᓂᔅᑕᐅᓪᓗᓂᓗ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐅᑭᐅᖅᑕᖅᑐᒥᐅᓄᑦ, ᐅᓪᓗᒥ ᐃᒪᓐᓇ ᐅᖃᐅᓯᖃᓚᐅᖅᐳᖅ.

ᑲᓐᓲᕕᑎᒃᑯᑦ ᒐᕙᒪᒃᑯᖏᑦ ᖁᕕᐊᓱᖏᑉᐳᑦ ᐃᒃᐸᒃᓴᖅ ᓂᕈᐊᕈᑕᐅᓚᐅᖅᑐᒥᒃ ᑕᕆᐅᑉ ᐊᑭᐊᓂ ᑲᑎᒪᔨᕐᔪᐊᑦ ᑲᑎᒪᔨᕋᓛᖏᑦ ᓯᓚᕐᔪᐊᒥ ᓂᐅᕐᕈᑕᐅᖃᑦᑕᖅᑐᓂᒃ ᓂᐅᕕᖅᑕᐅᖃᑦᑕᖅᑐᓂᒡᓗ ᓴᐳᔾᔨᔨᑦ ᐃᑲᔪᖅᑐᐃᒍᒪᖕᒪᑕ ᒪᓕᒐᒃᓴᓕᐅᖅᑕᐅᓂᐊᖅᑐᓂᒃ ᓂᐅᕐᕈᑕᐅᖃᑦᑕᕆᐊᖃᕈᓐᓃᖁᓪᓗᒋᑦ ᓇᑦᓯᑦ ᕿᓯᑦ ᐊᒻᒪᓗ ᐃᓄᐃᑦ ᐱᔪᓐᓇᕐᓂᖏᑦ ᑭᒡᓕᖃᖅᑎᑕᐅᓕᕐᓗᑎᒃ ᓂᐅᕐᕈᑎᖃᕈᓐᓇᕐᓂᕐᒥᖕᓄᑦ ᕿᓯᖕᓂᒃ.

ᐃᓱᒫᓗᒍᑎᖃᒻᒪᕆᒃᐳᖓᓗ ᓕᐳᕈᒃᑯᑦ ᐃᑦᑐᖁᑎᖏᑦᑕ ᑲᑎᒪᔨᖏᑦ ᓴᓇᑐᒃᑯᑦ ᓴᖅᑭᑎᑎᓂᐊᕐᓂᖏᓐᓄᑦ ᐱᖁᔭᒃᓴᒥᒃ ᓇᑦᓯᖅᓯᐅᖃᑦᑕᕈᓐᓃᖁᔨᓂᕐᒧᑦ. ᓕᐳᕈᒃᑯᑦ ᒐᕙᒪᒃᑯᖏᑦ ᑕᐃᒪᖓᓂᑦ ᐊᑲᐅᖏᓕᐅᖅᑎᑎᖏᓐᓇᖃᑦᑕᖅᓯᒪᖕᒪᑕ ᓄᓇᕗᒥᐅᓂᒃ ᐊᑐᐊᒐᓕᐅᖅᖢᑎᒃ ᖃᐅᔨᒪᓪᓚᕆᖏᑕᒥᖕᓂᒃ.
ᖁᑭᐅᑎᑦ ᓇᓗᓇᐃᒃᑯᑕᖃᕆᐊᖃᕐᓂᖏᓐᓄᑦ ᒪᓕᒐᓕᐅᓚᐅᖅᓯᒪᓪᓗᑎᒡᓗ, ᐊᒻᒪᓗ ᓂᕈᐊᕐᓇᐅᓚᐅᖅᓯᒪᔪᒥ ᐅᐃᕆᓴᐅᑎᖃᓚᐅᖅᐳᑦ ᐅᖅᓱᐊᓗᖕᓄᑦ ᑖᒃᓰᔭᐃᔭᖅᑎᑎᒍᒪᓪᓗᑎᒃ ᐊᑭᑦᑐᕆᐊᕈᑕᐅᓂᐊᓚᐅᖅᖢᑎᒡᓗ ᓂᕿᓄᑦ ᐱᖁᑎᓄᓪᓗ ᓄᓇᕗᒧᑦ ᐊᐅᓪᓚᖅᑎᑕᐅᕙᒃᑐᓂᒃ ᐅᖅᓱᐊᓗᖕᓄᓪᓗ.
ᑕᐃᒪ ᐊᑲᐅᖏᓕᐅᖅᑎᑎᓕᕆᕗᑦ ᐃᓕᖁᓯᑐᖃᑦᑎᓐᓂᒃ ᓄᖅᑲᖅᑎᑎᓇᓱᐊᖅᖢᑎᒃ ᓇᑦᓯᖅᓯᐅᖃᑦᑕᕐᓂᕐᒧᑦ. ᑎᓕᐅᖅᐸᒃᑲ ᑲᓇᑕᒥᐅᑕᐃᑦ ᐃᑲᔪᖅᑎᒌᖁᓪᓗᒋᑦ ᑕᒪᓐᓇ ᐊᑐᓕᖅᑎᑕᐅᑦᑕᐃᓕᖁᓪᓗᒍ.

ᐊᒃᓱᕈᕈᑎᖃᐃᓐᓇᕐᓂᐊᖅᐳᖓ ᐱᔪᓐᓇᕐᓂᖏᓐᓂᒃ ᑲᓇᑕᒥᐅᑦ ᓇᑦᓯᖅᓯᐅᖅᐸᒃᑐᑦ ᐃᓅᓯᕆᖕᒪᒍ ᖃᑕᖑᑎᖏᑦᑕᓗ ᑕᐃᒪᓐᓇ ᒪᓕᒐᑎᒍᑦ, ᐆᒪᔪᖅᓯᐅᑦᓯᐊᕐᓂᒃᑯᓪᓗ ᐱᔾᔪᑎᖃᖅᖢᑎᒃ. ᑲᓐᓲᕕᑎᒃᑯᑦ ᒐᕙᒪᒃᑯᖏᑦ ᐱᓕᕆᐊᖃᖅᓯᒪᒻᒪᕆᖕᒪᑕ ᑮᓇᐅᔭᓂᒃ ᐊᑐᖅᓯᒪᓕᖅᖢᑎᒡᓗ ᓴᐳᔾᔨᓇᓱᐊᖅᖢᑎᒃ ᐱᒻᒪᕆᐅᓂᖓᓄᑦ ᑲᓇᑕᒥ ᓇᑦᓯᖅᓯᐅᖃᑦᑕᕐᓂᖅ, ᐊᑭᕋᖅᑐᖅᑕᐅᓯᒪᓪᓗᓂᓗ ᒐᕙᒪᒋᔭᐅᔪᓄᑦ ᑕᕆᐅᑉ ᐊᑭᐊᓂ ᓕᐳᕈᒃᑯᑦ ᒐᕙᒪᒃᑯᖏᓐᓄᓪᓗ.

ᓕᐳᕈᒃᑯᑦ ᒐᕙᒪᒃᑯᖏᑦ ᐃᑲᔪᖅᑐᖔᖏᓐᓂᖏᓐᓄᑦ ᐊᐃᑦᑖᒻᒪᕆᐅᕗᑦ ᐊᑲᐅᖏᓕᐅᕈᑎᖃᕐᓂᐊᖅᐳᓪᓗ ᑲᓇᑕᒥ ᓇᑦᓯᖅᓯᐅᖅᐸᒃᑐᑦ ᓂᕿᒃᓴᖅᓯᐅᕋᓱᐊᖅᑎᓪᓗᒋᑦ ᖃᑕᖑᑎᒥᖕᓄᑦ. ᐊᒃᓱᕈᕐᓇᐅᑎᓪᓗᒍ ᑮᓇᐅᔭᑎᒍᑦ, ᑲᓇᑕᒥᐅᑦ ᓇᑦᓯᖅᓯᐅᖅᑎᖏᑦ ᐃᑲᔪᖅᑕᐅᒋᐊᖃᕐᒪᑕ ᐅᕙᑦᑎᓐᓄᑦ ᐃᑲᔪᖅᑕᐅᒋᐊᖃᓛᖑᓕᖅᖢᑎᒃ ᒫᓐᓇᐅᓕᖅᑐᒥ ᐱᓗᐊᖅᑐᒥᒃ.

ᐃᓄᐃᑦ ᓴᕆᒪᓱᑦᓯᐊᕐᒪᑕ ᓴᓐᖏᔫᓪᓗᑎᒡᓗ ᐊᕙᑎᒥᐅᑕᒥᖕᓂᒡᓗ ᐅᐱᑦᓯᐊᖅᖢᑎᒃ ᓄᓇᒋᔭᒥᖕᓂ. ᐅᖃᓪᓚᒃᑎᐅᖏᓐᓇᕐᓂᐊᕋᒪ ᐃᓄᖕᓄᑦ ᓂᑯᕕᓐᓂᐊᖅᖢᖓᓗ ᓇᑦᓯᖅᓯᐅᖅᑕᐃᓕᒪᖁᔨᓇᓱᐊᖅᑎᓪᓗᒋᑦ ᑖᒃᑯᐊ ᓕᐳᕈᒃᑯᑦ.