ᐃᖃᓗᐃᑦ (ᕕᕝᕗᐊᕆ 20, 2009) – ᒥᓂᔅᑕ ᑕᒃ ᓯᑐᐊᓪ, ᒥᓂᔅᑕᐅᔪᖅ ᐃᓄᓕᕆᔨᑐᖃᒃᑯᓐᓄᑦ ᐊᒻᒪ ᒐᕙᒪᑐᖃᒃᑯᓐᓄᑦ ᐅᖃᖅᑎᒋᔭᐅᔪᖅ ᐊᓪᓚᖓᔪᓄᑦ ᐊᒻᒪ ᐃᓕᓴᕆᔭᐅᓂᖃᙱᑦᑐᓄᑦ ᐊᓪᓚᓄᑦ, ᐅᓪᓗᒥ ᑐᓴᖅᑎᑦᑎᖅᑲᐅᕗᖅ ᑐᙵᓱᒃᑎᑦᑎᓪᓗᓂ ᑐᒃᓯᕋᕈᒪᒐᔭᖅᑐᓂᑦ ᓄᑖᒥᒃ ᑮᓇᐅᔭᖅᑖᕐᕕᒻᒥᒃ ᓄᑖᕈᒋᐊᖅᑕᐅᓂᐊᕐᓗᑎᑦ ᐅᑭᐅᖅᑕᖅᑐᒥ ᑭᓪᓕᓯᓂᐊᕐᕖᑦ.

“ᒐᕙᒪᕗᑦ ᑮᓇᐅᔭᒻᒪᕆᓐᓂᑦ ᐱᕈᖅᓴᐃᔾᔪᑎᓂᑦ ᐊᑐᐃᓐᓇᕈᐃᕗᑦ ᐅᓪᓗᒥ ᐅᖓᓯᒃᑐᒧᑦ ᐊᑑᑎᖃᕐᓂᐊᖅᑐᓂᑦ ᐊᒻᒪ ᑲᓇᑕ ᓯᕗᓪᓕᐅᖃᑕᐅᑎᑕᐅᓗᓂ ᐅᑭᐅᖅᑕᖅᑐᒥ ᑭᓪᓕᓯᓂᐊᕐᓂᕐᒥᒃ,” ᐅᖃᖅᑲᐅᕗᖅ ᒥᓂᔅᑕ ᓯᑐᐊᓪ. “ᑐᓴᖅᑎᑦᑎᓂᕗᑦ ᑕᒪᓐᓇ ᓴᖅᑭᔾᔪᑎᒋᕙᕗᑦ ᖃᓄᖅᑑᕋᓱᓐᓂᑦᑎᓐᓂᑦ ᑲᔪᓯᖁᓪᓗᒍ ᐊᒻᒪ ᓈᒻᒪᒃᑎᑕᐅᖁᓪᓗᒋᑦ ᐅᑭᐅᖅᑕᖅᑐᒧᑦ ᐋᖅᑮᓯᒪᓂᑦᑕ ᑐᕌᒐᖏᓐᓂᑦ.”

“ᑐᓴᖅᑎᑦᑎᓂᕗᑦ ᓇᓗᓇᐃᕈᑎᒋᕙᕗᑦ ᒐᕙᒪᒋᔭᕗᑦ ᐃᓕᑕᖅᓯᒻᒪᑦ ᐅᑭᐅᖅᑕᖅᑑᑉ ᐱᒻᒪᕆᐅᓂᕆᓂᐊᖅᑕᖓᓂᒃ ᑲᓇᑕᐅᑉ ᓯᕗᓂᒃᓴᖓᓄᑦ,” ᐅᖃᓚᐅᖅᐳᖅ ᒥᓂᔅᑕ ᓕᐅᓇ ᐊᒡᓘᒃᑲᖅ, ᒥᓂᔅᑕᕆᔭᖅ ᐋᓐᓂᐊᖅᑕᐃᓕᒪᔪᓕᕆᔨᒃᑯᓐᓂᑦ ᐊᒻᒪ ᐱᖁᔭᖅᔪᐊᓕᕆᕕᒻᒥ ᒪᓕᒐᓕᐅᖅᑎ ᓄᓇᕘᒧᑦ. “ᑭᓪᓕᓯᓂᐊᕐᓂᕐᒧᐊᖓᔪᖁᑎᕗᑦ ᐊᖏᔫᑎᑦ ᓴᓇᔭᕗᑦ ᐅᓪᓗᒥ ᐃᑲᔫᑎᖃᕐᓂᐊᖅᐳᖅ ᐅᑭᐅᖅᑕᖅᑐᒥᐅᓄᑦ ᐊᒻᒪ ᑲᓇᑕᒥᐅᓕᒫᓄᑦ ᐅᑭᐅᒐᓴᐅᓂᐊᖅᑐᓂᑦ ᖃᐃᔪᓂᑦ.”

“ᒐᕙᒪᕗᑦ ᑲᔪᓯᕙᓪᓕᐊᕗᖅ ᐊᖏᖅᓯᒪᔭᒥᓂᑦ ᓯᕗᒧᐊᕆᐊᖅᑕᐅᖁᓪᓗᒋᑦ ᐅᑭᐅᖅᑕᖅᑐᒥ ᑭᓪᓕᓯᓂᐊᕐᕖᑦ,” ᐅᖃᓚᐅᖅᐳᖅ ᒥᓂᔅᑕ ᒋᐊᕆ ᒍᑦᔨᐊ, ᒥᓂᔅᑕ ᐱᓕᕆᓂᕐᒧᑦ (ᑭᓪᓕᓯᓂᐊᕐᓂᕐᒧᑦ ᐊᑐᖅᑐᓄᓪᓗ ᓄᑖᓄᑦ). “ᐃᑲᔪᖅᑐᐃᕗᒍᑦ ᑭᓪᓕᓯᓂᐊᕐᓂᒃᑯᑦ ᖃᐅᔨᓴᖃᑦᑕᕐᓂᕐᒥᒃ ᐱᕙᓪᓕᐊᔭᐃᓂᕐᒥᓪᓗ ᓲᖃᐃᒻᒪ ᐃᖅᑲᓇᐃᔮᒃᓴᓂᑦ ᓴᖅᑭᑎᑦᑎᕙᒻᒪᑕ ᐊᒻᒪ ᐱᕚᓪᓕᖅᑎᑦᑎᓪᓗᑎᑦ ᐃᓅᓯᐅᑉ ᐱᐅᓂᕆᔭᖓᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐃᓚᒌᓄᑦ, ᐊᒻᒪ ᓴᙱᑦᑎᒋᐊᕆᓪᓗᑎᑦ ᒪᑭᒪᔾᔪᑕᐅᕙᒃᑐᒥᒃ ᑭᖑᕚᕆᓂᐊᖅᑕᑦᑎᓐᓄᑦ.”

ᑐᒃᓯᕋᐅᑎᓕᐅᖅᑕᐅᖁᔭᐅᔪᑦ ᐅᑭᐅᖅᑕᖅᑐᒥ ᑭᓪᓕᓯᓂᐊᕐᓂᕐᒧᑦ ᐊᖏᔫᑎᓄᑦ ᑮᓇᐅᔭᖃᕐᕕᒃᓴᒧᑦ ᑮᓇᐅᔭᖅᑐᕈᑎᒃᓴᓂᒃ 2009ᒧᑦ ᒪᑭᒪᔾᔪᓯᕐᒧᑦ ᖃᓄᖅᑑᕐᓂᕐᒧᑦ ᐸᓐᓇᐅᑎᒧᑦ ᐊᖏᖅᓯᒪᔾᔪᑕᐅᕗᖅ $85 ᒥᓕᐊᓐ ᐊᑐᖅᑕᐅᖁᓪᓗᒋᑦ ᐅᑭᐅᖑᓂᐊᖅᑑᓐᓂ ᒪᕐᕉᓐᓂ ᐱᐅᓯᒋᐊᖅᑕᐅᖁᓪᓗᒋᑦ ᐅᑭᐅᖅᑕᖅᑐᒥ ᑭᓪᓕᓯᓂᐊᕐᓂᕐᒧᑦ ᐊᒻᒪ ᐊᑐᖅᑐᓂᑦ ᓄᑖᓂᑦ ᐱᓕᕆᕕᓐᓄᑦ.

ᐊᒻᒪᓗᑦᑕᐅᖅ ᒐᕙᒪᒃᑯᑦ ᑲᔪᓯᓇᓱᓕᖅᐳᑦ $12 ᒥᐊᓕᑐᖅᑐᒥᒃ ᐱᔭᒃᓴᐅᓂᕐᒧᑦ ᖃᐅᔨᓴᕐᓂᐅᔪᒥᒃ - ᐊᒻᒪ ᐊᖏᕈᑕᐅᓯᒪᒻᒥᔪᖅ ᑮᓇᐅᔭᖅᑐᕈᑎᒃᓴᓂ 2009ᒧᑦ - ᓇᓗᓇᐃᖅᑕᐅᖁᓪᓗᒋᑦ ᓯᕗᓂᐊᓂ ᐊᑭᒋᔭᐅᒐᔭᖅᑐᑦ ᐊᒻᒪ ᑎᑎᖅᑐᒐᖅᑕᐅᔭᕆᐊᖃᕋᔭᖅᑐᑦ ᓄᑖᖅ ᓴᓇᔭᐅᖁᓪᓗᒋ ᓯᓚᖅᔪᐊᕐᒥ ᐱᐅᓂᖅᐹᖑᖃᑕᐅᒐᔭᖅᑐᖅ ᖁᑦᑎᑦᑐᒥ ᑭᓪᓕᓯᓂᐊᕐᓂᕐᒧᑦ ᖃᐅᔨᓴᕐᕕᐅᖃᑦᑕᕋᔭᖅᑐᖅ.

ᐅᓪᓗᒥ ᑐᓴᖅᑎᔾᔪᑎᒃ ᐃᑲᔪᖅᑐᐃᒍᑕᐅᕗᖅ ᐅᑭᐅᖅᑕᖅᑐᒥ ᐋᖅᑭᒃᓯᒪᓂᑦᑎᓐᓂ ᐊᒻᒪ ᑐᕌᖓᓪᓗᓂ ᐅᑭᐅᖅᑕᖅᑐᒥᒃ ᑎᒍᒥᐊᕐᓂᕆᔭᖓ ᑲᓇᑕ, ᓴᐳᒻᒥᓗᒍᓗ ᐅᑭᐅᖅᑕᖅᑑᑉ ᐊᕙᑎᖓ, ᓯᕗᒧᐊᖅᑕᐅᓗᑎᑦ ᐃᓅᓯᓕᕆᓂᒃᑯᑦ ᐊᒻᒪ ᐱᕈᖅᐸᓪᓕᐊᓂᒃᑯᑦ ᐱᕙᓪᓕᐊᔭᐅᔪᑦ, ᐊᒻᒪᓗ ᐋᖅᑭᒋᐊᖅᑕᐅᓗᓂ ᓯᐊᒻᒪᑎᖅᑕᐅᓗᑎᓪᓗ ᐅᑭᐅᖅᑕᖅᑐᒥ ᐊᐅᓚᑦᑎᓂᐅᔪᑦ.

ᑲᓇᑕᐅᑉ ᒐᕙᒪᖓ ᐊᒥᓱᓂᑦ ᐱᓕᕆᕙᓪᓕᐊᕗᑦ ᑐᕌᒐᓄᐊᖓᔪᓂᑦ ᐅᑭᐅᖅᑕᖅᑐᒥ ᐋᖅᑭᒃᓯᒪᓂᖓᓄᑦ. ᑮᓇᐅᔭᐃᑦ ᓴᖅᑭᑕᐅᓕᓵᖅᑐᑦ ᐱᖃᓯᐅᔾᔨᕗᑦ $156 ᒥᓕᐊᓐ ᐃᑲᔪᕈᑕᐅᓂᐊᖅᑐᓂᑦ ᑲᓇᑕ ᐱᖃᑕᐅᓂᕆᔭᖓᓄᑦ ᓯᓚᖅᔪᐊᕐᒥ ᑲᔾᔨᖓᓄᑦ ᐊᕐᕌᒍᕆᔭᒧᑦ, ᐊᓯᖏᓐᓂᓪᓗ ᒪᑭᒪᔾᔪᑎᓕᕆᓂᕐᒧᑦ ᖃᓄᖅᑑᕐᓂᕐᒧᑦ ᐸᕐᓇᐅᑎᒧᐊᖓᔪᓂᑦ, ᐃᓚᐅᓪᓗᑎᑦ $200 ᒥᓕᐊᓐ ᐅᖓᑖᓃᑦᑐᑦ ᐅᑭᐅᖏᓂᐊᖅᑑᓐᓂ ᒪᕐᕉᓐᓂ ᐃᒡᓗᓂᑦ ᓄᑖᖑᕆᐊᕈᑎᓂᑦ ᐊᒻᒪ ᓄᑖᓂᑦ ᐃᒡᓗᓕᐅᕐᓂᕐᒧᑦ ᐅᑭᐅᖅᑕᖅᑐᒥ, $50 ᒥᓕᐊᓐ ᐅᑭᐅᖑᓂᐊᖅᑐᓄᑦ ᑕᓪᓕᒪᓄᑦ ᐊᕕᑦᑐᖅᓯᒪᔪᓂ ᐱᕙᓪᓕᐊᔭᐃᓂᕐᒧᑦ ᑎᒥᐅᓂᐊᖅᑑᑉ ᓴᖅᑭᑎᑕᐅᓂᖓᓄᑦ, $90 ᒥᓕᐊᓐ ᐅᑭᐅᖑᓂᐊᖅᑐᓂᑦ ᑕᓪᓕᒪᓄᑦ ᐋᖅᑭᒃᓯᒪᓂᕐᒧᑦ ᑮᓇᐅᔭᐃᑦ ᐅᑭᐅᖅᑕᖅᑐᒥ ᐱᕙᓪᓕᐊᔭᐃᓂᕐᒧᐊᖓᔪᓂᑦ, ᐊᒻᒪᓗ $37.6 ᒥᓕᐊᓐ ᐃᑲᔫᑎᒃᓴᐃᑦ ᐱᒋᐊᖅᑎᑕᓄᑦ ᐳᓪᓚᒧᑦ ᓱᓪᓗᓕᒃᓴᓕᐊᖑᖁᔭᐅᔪᒥᑦ ᒪᑭᐊᓐᔨᒥ.