ᐃᖃᓗᐃᑦ, ᓄᓇᕗᒻ (ᐊᐃᕐᕆᓕ 2, 2009) – ᑦᓴᒃ ᓯᑐᕌᓪ, ᒥᓂᔅᑕᒋᔭᐅᔪᖅ ᐃᓄᓕᕆᔨᑐᖃᒃᑯᓐᓄᑦ ᐊᒻᒪ ᑭᒡᒐᖅᑐᐃᔨᐅᔪᖅ ᒐᕙᒪᑐᖃᒃᑯᓐᓂ ᐊᓪᓚᖓᔪᓄᑦ ᐃᓕᓴᕆᔭᐅᙱᑦᑐᓄᓪᓗ ᐊᓪᓚᓄᑦ, ᐊᒻᒪ ᒥᐊᓕ ᓴᐃᒪ ᐊᖓᔪᖅᑳᖅ ᐃᓄᐃᑦ ᑕᐱᕇᑦ ᑲᓇᑕᒥ, ᐅᓪᓗᒥ ᐊᑎᓕᐅᖅᓯᖃᑎᒌᒃᐴᒃ ᐃᓄᐃᑦ ᐃᓕᓐᓂᐊᕐᓂᕐᒧᑦ ᐊᖏᖃᑎᒌᒍᑎᒧᑦ.

ᑖᓐᓇ 14ᓄᑦ ᐊᖏᕐᖃᑎᒌᒍᑎᒋᔭᐅᔪᖅ ᑲᓇᑕᒥ ᐃᓄᐃᑦ ᐃᓄᐃᑦ ᑕᐱᕇᑦ ᑲᓇᑕᒥᑦ ᑭᒡᒐᖅᑐᖅᑕᐅᓪᓗᑎᒃ, ᐊᒻᒪ ᐱᓕᕆᖃᑎᒋᔭᖏᑦ ᑎᒥᐅᔪᑦ ᒐᕙᒪᐅᔪᓪᓗ, ᐋᖅᑭᒃᓯᔪᒪᒧᑦ ᑲᓇᑕᓕᒫᒨᖓᔪᒥᒃ ᐃᓕᓐᓂᐊᕐᓂᓕᕆᓂᕐᒧᑦ ᑲᑎᒪᔨᐊᓛᒥᒃ. ᑲᑎᒪᔨᐊᓛᖅ ᐱᓕᕆᖃᑎᒌᖕᓂᖃᕐᓂᐊᖅᐳᖅ ᐱᓕᕆᐊᖃᕈᓯᓕᐅᕐᓂᐊᕐᓗᑎᒃ ᐃᓕᓐᓂᐊᕐᓂᕐᒨᖓᔪᓂᒃ ᓯᕗᒧᒃᐸᓪᓕᐊᑎᑦᑎᔪᒪᓪᓗᑎᒃ ᐃᓄᐃᑦ ᐃᓕᓐᓂᐊᖅᑏᑦ ᐱᔾᔪᑎᒋᓪᓗᒋᑦ.

ᒐᕙᒪᑐᖃᒃᑯᑦ ᑲᓇᑕᑉ ᐅᑭᐅᖅᑕᖅᑐᒧᑦ ᑐᑭᒧᐊᒍᑎᒃᓴᕆᔭᖓ ᐃᓚᒍᑦᑎᐅᔾᔨᓯᒪᕗᖅ ᐱᓂᐊᕐᓂᕐᒥᒃ ᐱᕈᖅᐸᓪᓕᐊᑎᑦᑎᓂᕐᒥᒃ ᐃᓅᖃᑎᒌᒍᑎᐅᔪᓄᑦ ᐊᒻᒪ ᒪᑭᒪᔾᔪᑎᓄᑦ ᐱᕙᓪᓕᕈᑎᐅᔪᓂᒃ, ᐊᒻᒪ ᐃᓕᓴᖅᓯᓯᒪᓪᓗᑎᒃ ᐃᓄᐃᑦ ᓄᓇᓕᒋᔭᖏᑦ ᓇᓂᑐᐃᓐᓇᖅ ᑲᓇᑕᒥ ᐱᓕᕆᖃᑎᒃᓴᕐᔪᐊᖑᖕᒪᑕ ᓴᙱᓂᓕᖕᒥᒃ ᑲᔪᓰᓐᓇᕈᓐᓇᕐᓂᐊᖅᑐᒥᒃ ᐅᑭᐅᖅᑕᖅᑐᒥ ᒪᑭᒪᔾᔪᓯᐅᕆᐊᒃᓴᖅ.

“ᑲᓇᑕᐅᑉ ᒐᕙᒪᖓᑦ ᖁᕕᐊᓱᒃᐳᖅ ᐱᓕᕆᖃᑎᒋᔭᐅᖃᑕᐅᔪᓐᓇᕆᐊᒃᓴᖅ ᑖᔅᓱᒧᖓ ᐱᕐᔪᐊᖑᔪᒧᑦ ᑐᑭᒧᐊᒍᑎᒃᓴᐅᔪᒧᑦ," ᐅᖃᖅᐳᖅ ᒥᓂᔅᑕ ᓯᑐᕌᓪ, “ᐃᓄᐃᑦ ᑕᐱᕇᑦ ᑲᓇᑕᒥ ᐅᐱᒋᓂᕋᕈᒪᕙᒃᑲ ᐅᓄᖅᑐᓂᒃ ᐱᓕᕆᖃᑎᖃᐅᕐᒪᑕ ᐊᕕᒃᑐᖅᓯᒪᔪᕋᓴᖕᓂ, ᑕᒪᕐᒥᒡᓗ ᐱᓂᐊᕐᓂᖃᕐᓂᕋᖅᐳᑦ ᐱᓕᕆᖃᑎᒌᖕᓂᕐᒥᒃ ᐃᓕᓐᓂᐊᕐᓂᓕᕆᓂᕐᒨᖓᔪᒥᒃ ᑐᑭᒧᐊᒍᓯᐅᕆᐊᒃᓴᖅ ᓴᙱᒃᑎᑦᑎᒋᐊᕐᓂᐊᖅᑐᒥᒃ ᐃᓄᐃᑦ ᐃᓕᖅᓯᕆᔭᖓᓂᒃ ᑭᓇᐅᓂᕆᔭᖓᓂᒡᓗ, ᑕᐃᒪᐃᓯᓐᓈᑦ ᐃᓕᓐᓂᐊᖅᑎᓂᒃ ᐸᕐᓇᒃᐸᓪᓕᑎᑦᓯᓗᑎᒃ ᐃᓚᐅᖃᑕᐅᓂᖃᑦᑎᐊᕆᐊᒃᓴᖅ ᖃᐅᔨᒪᓂᕐᒥᒃ ᑐᙵᓕᖕᓂᒃ ᒪᑭᒪᔾᑎᓕᕆᔨᐅᖃᑕᐅᒋᐊᒃᓴᖅ.”

"ᐃᓄᐃᑦ ᐃᓕᓐᓂᐊᕐᓂᕐᒧᑦ ᐊᖏᖃᑎᒌᒍᑎ ᓇᓗᓇᐃᖅᓯᕗᖅ ᒫᓐᓇᓂᓴᐅᔪᒥᒃ ᐃᓅᓪᓗᑕ ᖃᓄᐃᓐᓂᕆᔭᑦᑎᓐᓂᒃ ᐃᓄᐃᑦ ᐊᒻᒪ ᒐᕙᒪᒋᔭᕗᑦ ᐊᖏᖃᑎᒌᖕᓂᖃᖅᑎᓪᓗᒋᑦ ᐃᓕᓐᓂᐊᖅᐸᓪᓕᐊᔾᔪᓯᕆᔭᑦᑎᓐᓂᒃ ᐋᖅᑭᐅᒪᑦᑎᐊᖅᑎᓯᒪᓂᖅ ᐊᑑᑎᓕᒻᒪᕆᐅᖕᒪᑦ ᐱᔭᕇᖅᓯᑦᑎᐊᕐᓂᑦᑎᓐᓄᑦ," ᐅᖃᖅᐳᖅ ᑲᓇᑕᒥ ᐊᖓᔪᖅᑳᖅ ᒥᐊᓕ ᓴᐃᒪᓐ. "ᐃᓄᐃᑦ ᐊᖓᔪᖅᑳᖑᔪᑦ, ᐃᓕᓴᐃᔨᐅᔪᑦ, ᓯᕗᓕᖅᑎᒋᔭᐅᔪᑦ ᐅᖃᖅᐸᒃᓯᒪᖕᒪᑕ ᐊᕐᕌᒍᒐᓴᖕᓄᑦ 'ᐃᓕᓐᓂᐊᕐᓂᓕᕆᓂᕐᒨᖓᔾᔪᓯᕗᑦ ᓈᒻᒪᒃᓯᑎᒋᐊᒃᓴᖅ' ᑐᑭᖃᖅᐳᖅ ᐃᓕᓐᓂᐊᖅᑎᓂᒃ ᐃᓱᓕᑎᑦᑎᔭᕆᐊᒃᓴᖅ ᐃᓄᐃᑦ ᐅᖃᐅᓯᖏᓪᓂᒃ ᖃᓄᐃᓐᓂᕆᕙᓚᐅᖅᑕᖏᓪᓂᒡᓗ ᐊᒻᒪ ᐱᓕᕆᐊᖃᕈᓐᓇᕆᐊᒃᓴᖅ ᓄᓇᕐᔪᐊᕐᒨᖓᔪᓂᒃ. ᐅᖓᓯᒌᖕᓂᕆᔭᖓ ᐃᔨᓐᓂᐊᖅᓯᒪᓂᕆᔭᖏᑕ ᑲᓇᑕᒥᐅᑦ ᐃᓄᐃᓪᓗ ᒥᒃᖠᒋᐊᖁᓪᓗᒍ, ᑖᓐᓇ ᐃᓕᓐᓂᐊᕐᓂᕐᒨᖓᔪᖅ ᐊᖏᖃᑎᒌᒍᑎ ᐊᑐᖅᑎᑦᑕᕆᐊᖃᕋᑦᑎᒍᑦ ᐊᑑᑎᖃᖅᓂᓕᒫᖓᓄᑦ."

“ᐊᖏᖃᑎᒌᒍᑎ ᐅᓪᓗᒥ ᐊᑎᓕᐅᖅᑕᕗᑦ ᐱᒋᐊᖅᐸᓪᓕᐊᑎᑦᓯᖕᒪᑦ ᐃᓄᐃᑦ ᓄᓇᓕᖕᑦ ᓇᓂᑐᐃᓐᓇᖅ ᐅᑭᐅᖅᑕᖅᑐᒥ ᖃᐅᔨᔭᐅᑎᑦᓯᖃᑦᑕᐅᑎᔪᓐᓇᕐᓂᐊᕐᒪᑕ ᐊᑐᖅᓯᒪᔭᒥᓂᒃ, ᐱᔪᓐᓇᕐᓂᖃᑦᑎᐊᖅᑐᓂᒃ ᐱᑕᖃᖅᑎᑦᓯᕗᖅ ᐊᒻᒪ ᐱᓕᕆᖃᒌᒍᓐᓇᕐᓂᖅᑕᖃᖅᑎᑦᓯᑉᓗᓂ ᐃᓕᓐᓂᐊᕐᓂᕐᒨᖓᔪᑦ ᐱᐅᓯᕙᓪᓕᖁᓪᓗᒋᑦ”, ᐃᓚᓯᒋᐊᖅᐳᖅᑦᑎᓂᕐᒧᑦ ᓕᐅᓇ ᐊᒡᓘᒃᑲᖅ ᒥᓂᔅᑕ ᐋᓐᓂᐊᖃᖅᑕᐃᓕᑎ, “ᐃᓄᐃᑦ ᐃᓕᓐᓂᐊᕐᓂᕐᒧᑦ ᐊᖏᖃᑎᒌᒍᑎ ᐱᓂᐊᕐᓂᖃᕐᓂᕋᖅᐳᖅ ᐃᓄᐃᑦ ᐃᓕᓐᓂᐊᖅᑎᑦ ᑐᑭᓯᓯᒪᓂᖃᕐᓂᖅᓴᐅᖁᓪᓗᒋᑦ ᓄᓇᒥᓂᒃ, ᐅᖃᐅᓯᕐᒥᓂᒃ ᐃᓕᖅᑯᓯᕐᒥᓂᒡᓗ.”

ᑲᓇᑕᓕᒫᒨᖓᔪᖅ ᑲᑎᒪᔨᐊᓛᖅ ᐃᓐᓄᒃᑕᐅᓯᒪᕗᖅ ᐃᓄᐃᑦ ᑕᐱᕇᒃᑯᖏᓐᓂᑦᑲᓇᑕᒥ, ᑎᒥᖁᑎᒋᔭᖏᓐᓂᓪᓗ, ᑲᓇᑕᐅᑉ ᒐᕙᒪᒃᑯᖏᑕ ᐱᓕᕆᖃᑎᒋᔭᖏᑦ ᐊᒻᒪ ᐃᓄᖃᕐᓂᐅᔪᑦ ᐊᕕᒃᑐᖅᓯᒪᔪᑦ ᒐᕙᒪᒋᔭᖏᓐᓂᑦ, ᑐᑭᒧᐊᒍᑎᒃᓴᓕᐅᕐᓂᐊᖅᐳᑦ ᐃᓄᐃᑦ ᐃᓕᓐᓂᐊᕐᓂᖓᓅᖓᔪᒥᒃ ᐱᔾᔪᑎᖃᖅᑐᒃᓴᒥᒃ ᐃᓕᓐᓂᐊᖅᐸᓪᓕᐊᓂᕐᒥᒃ ᐃᓄᖅᓴᕈᓐᓃᖁᓪᓗᒋᑦ ᐊᒻᒪ ᐃᓕᑉᐸᓪᓕᐊᓯᒪᓕᕐᓂᖅᑕᖃᖁᓪᓗᒍ ᐃᓄᖕᓂᒃ.

ᑲᓇᑕᐅᑉ ᒐᕙᒪᖓ, ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪ ᐊᓯᖏᑦ ᐊᑎᓕᐅᖅᓯᖃᑕᐅᔪᑦ ᐃᓕᓴᖅᓯᓯᒪᕗᑦ ᐃᓕᓐᓂᐊᕐᓂᓕᕆᓂᓕᐅᕆᐊᒃᓴᖅ ᐃᓄᐃᑦ ᐃᓅᓯᖃᖃᑎᒌᒍᓯᖓᓅᖓᔪᒥᒃ ᐃᓕᖅᑯᓯᖓᓅᖓᔪᒥᒡᓗ ᐃᓕᓐᓂᐊᑦᑎᐊᖅᓯᒪᓂᖅᑕᖃᓕᕐᓂᖅᓴᐅᔾᔪᑕᐅᓂᐊᖅᐳᖅ ᐃᓄᖕᓄᑦ.