ᒫᑦᓯ 26, 2009ᒥ
ᒫᓐᓇᑦᑕᐅᑎᒋ ᓴᖅᑭᑕᐅᔭᒃᓴᖅ

ᐋᑐᕚᒥ – ᐅᓪᓗᒥ ᐃᓕᓐᓂᐊᕈᑎᒃᓴᓂᒃ ᐊᓪᓚᐃᑦ, ᐃᓄᐃᑦ, ᐊᓪᓚᖓᔪᓪᓗ ᐋᓐᓂᐊᖅᑐᓕᕆᓂᒃᓴᖏᑦᑕ ᒥᒃᓵᓅᖓᔪᓂᒃ ᑖᓐᓇ ᓕᐅᓇ ᐊᒡᓘᒃᑲᖅ ᓴᖅᑭᑎᑦᑎᓚᐅᕐᒪᑦ ᒥᓂᔅᑕᐅᓪᓗᓂ ᐋᓐᓂᐊᖅᑐᓕᕆᓂᕐᒧᑦ ᒐᕙᒪᕐᔪᐊᒃᑯᓐᓂ, ᓴᖅᑭᑎᕆᖃᑎᒋᓪᓗᓂᒋᑦ ᐃᖢᐊᖅᓴᐃᔩᑦ ᓘᒃᑖᑦ ᑲᓇᑕᒥ ᑲᑐᔾᔨᖃᑎᒌᖏᑦ ᐊᒻᒪᓗ ᓄᓇᖃᖅᑳᖅᑏᑦ ᐃᖢᐊᖅᓴᐃᔨᐅᔪᑦ ᓘᖅᑖᖑᔪᑦ ᑲᑐᔾᔨᖃᑎᒌᖏᓪᓗ.

ᓯᕗᓕᖅᑎ ᓕᐅᓇ ᐊᒡᓘᒃᑲᖅ ᐅᖃᖅᖢᓂ ᐃᒫᒃ “ᐅᑯᐊ ᐃᓕᐊᓐᓂᕈᑎᒃᓴᐃᑦ ᖃᐅᔨᒋᐊᕈᑎᒃᓴᖃᑦᑎᐊᕐᒪᑕ ᐃᖢᐊᖅᓴᐃᔩᑦ ᓘᒃᑖᑦ ᓄᓇᖃᖅᑳᖅᑏᑦ ᐃᓕᖅᑯᓯᖏᓐᓂᑦ ᑐᑭᓯᓯᒪᓂᖅᓴᐅᖁᓪᓗᒋᑦ ᓄᓇᖃᖅᑳᖅᑎᐅᔪᓂᒃ ᐋᓐᓂᐊᖅᑐᓂᒃ ᑲᒪᒋᔭᒃᓴᖃᖅᑎᓪᓗᒋᑦ.” ᐅᖃᖅᖢᓂᓗ “ᖁᕕᐊᓱᑦᑎᐊᖅᐳᒍᑦ ᑖᒃᑯᓇᓂ ᓴᖅᑭᑎᕆᒋᐊᒃᓴᖅ, ᓄᓇᖃᖅᑳᖅᑏᑦ ᑲᓇᑕᒥ ᐋᓐᓂᐊᖅᑐᓕᕆᓂᒃᑯᑦ ᖃᓄᐃᖏᓐᓂᖅᓴᐅᓂᖏᑦ ᐱᒻᒪᕆᐊᓘᖕᒪᑦ, ᒫᓐᓇ ᐱᔭᕆᐊᖃᓪᓚᕆᖕᒪᑦ ᐊᒻᒪᓗ ᐊᑐᕈᖕᓇᖅᑕᑦᑎᓐᓂ ᐊᑐᕆᐊᕐᕕᒋᒋᐊᖃᓪᓚᕆᒃᑲᑎᒍ.”

ᓯᑕᒪᐅᓕᖓᔪᑦ ᑖᒃᑯᐊ ᐃᓕᓐᓂᐊᕈᑏᑦ ᐱᑕᖃᖅᖢᑎᒃ ᐃᖢᐊᓴᕐᓂᕐᒧᑦ, ᐊᕐᓇᖅᓯᐅᑎᓕᕆᓂᕐᒧᑦ, ᐃᓱᒪᓕᕆᓂᕐᒧᑦ ᐊᒻᒪᓗ ᐃᓚᒌᓂᒃ ᐃᑲᔪᕐᓂᕐᒥᒃ ᐱᑕᖃᖅᖢᑎᒃ ᐃᓕᓐᓂᐊᕈᑎᒃᓴᓂᒃ ᐃᖢᐊᖅᓴᐃᔨᓐᖑᖅᐸᓪᓕᐊᓕᓵᖅᑐᓄᑦ ᐃᖢᐊᖅᓴᐃᔨᐅᔪᓄᓪᓗ ᖃᓄᖅ ᐱᑦᑎᐊᒃᑲᓐᓂᕈᖕᓇᕐᒪᖔᑕ ᑲᒪᒋᔭᖃᖅᑎᓪᓗᒋᑦ ᓄᓇᖃᖅᑳᖅᑎᓂᒃ ᐋᓐᓂᐊᖅᓯᐅᖅᑕᐅᔭᖅᑐᖅᓯᒪᔨᒋᔭᖏᓐᓄᑦ.  ᐃᓕᓐᓂᐊᕈᑎᒃᓴᐃᑦ ᐋᖅᑭᒃᑕᐅᓚᐅᖅᐳᑦ ᑲᒪᑎᔨᕋᓛᖑᖃᑎᒌᓄᑦ ᐱᖓᓱᓄᑦ ᐊᔾᔨᒌᓐᖏᑦᑐᓄᑦ ᐱᓕᕆᔨᖃᖅᖢᑎᒃ ᐋᓐᓂᐊᖅᑐᓕᕆᓂᕐᒧᑦ ᐃᓕᓴᕐᕕᖕᓂᑦ, ᐃᓚᖏᓪᓗ ᓄᓇᖃᖅᑳᖅᑏᑦ ᑲᑐᔾᔨᖃᑎᒌᖏᓐᓂᖔᖅᓯᒪᓪᓗᑎᒃ, ᓄᓇᖃᖅᑳᖅᑏᑦ ᐃᓐᓇᑐᖃᖁᑎᖏᓐᓂᓗ ᐊᒻᒪᓗ ᐃᓕᑦᑎᓯᒪᓂᖃᖅᑐᓂᒃ ᐃᓕᓐᓂᐊᕈᑎᒃᓴᓕᐅᕐᓂᕐᒥᒃ ᐊᓪᓚᓄᑦ, ᐃᓄᖕᓄᑦ ᐊᒻᒪᓗ ᐊᓪᓚᖓᔪᓄᑦ.

ᑖᒃᑯᐊ ᐃᓕᓐᓂᐊᕈᑎᒃᓴᐃᑦ ᐊᑐᐃᓐᓇᐅᖃᑦᑕᓛᖅᐳᑦ ᐃᖢᐊᖅᓴᐃᔨᒃᓴᐃᑦ ᐃᓕᓐᓂᐊᕐᕕᓕᒫᑦᑎᐊᖏᓐᓂ ᐊᒻᒪᓗ ᐃᓕᓐᓂᐊᕐᕕᕋᓛᖏᓐᓂ. ᐃᖢᐊᖅᓴᐃᔨᐅᓂᕐᒧᑦ ᐃᓕᓐᓂᐊᕐᕕᒃᓴᖅᑕᖃᕐᒪᑦ 49ᐸᓗᖕᓂᒃ ᐃᓕᓴᐃᕕᐅᓪᓗᑎᒃ ᐋᓐᓂᐊᖅᓯᐅᕐᓂᕐᒥᒃ, ᐊᕐᓇᖅᓯᐅᑎᓕᕆᓂᕐᒥᒃ, ᐃᓱᒪᓕᕆᓂᕐᒥᒃ ᐊᒻᒪᓗ ᐃᓚᒌᓂᒃ ᑲᒪᓂᕐᒥᒃ ᑖᒃᑯᐊᓗ ᐃᓕᓐᓂᐊᕈᑎᒃᓴᐃᑦ ᑖᒃᑯᓇᓐᖓᑦ ᐊᑐᐃᓐᓇᐅᓛᓕᕐᒪᑕ. ᐊᒻᒪᓗᑦᑕᐅᖅ ᐃᓕᓐᓂᐊᕈᑎᒃᑲᓐᓂᖏᑦ ᐃᓕᒃᑯᐊᖑᓂᕋᖅᑕᐅᔪᑦ ᐊᑐᖅᑕᐅᔪᖕᓇᓛᖅᖢᑎᒃ 700ᓄᑦ ᐊᔾᔨᒌᓐᖏᑦᑐᓄᑦ ᐃᓕᓐᓂᐊᕐᕕᕋᓛᓄᑦ.

ᐃᓕᓐᓂᐊᕈᑎᒃᑲᓐᓂᖏᑦ ᐃᓕᒃᑯᐊᖑᓂᕋᖅᑕᐅᔪᑦ ᑐᑭᓯᒋᐊᖅᐹᓪᓕᕈᑎᒃᓴᖃᖅᐳᑦ ᓄᓇᖃᖅᑳᑏᑦ ᖃᓪᓗᓈᓄᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᓂᖏᓐᓂᑦ ᓲᕐᓗ ᑐᔪᕐᒥᕕᖕᓄᑦ, ᐃᓅᓯᕐᒧᐊᖓᔪᓂᒡᓗ ᑎᒥᑦᑎᓐᓂ ᐊᒃᑐᐊᓂᐊᖅᑐᓂᒃ, ᑐᑭᓯᒋᐊᕈᑎᒃᓴᖃᖅᖢᑎᒡᓗ ᓄᓇᖃᖅᑳᖅᑏᑦ ᐃᑲᔫᑎᒃᓴᑲᓐᓂᖏᓐᓂᑦ ᐋᓐᓂᐊᖅᓯᐅᖅᑕᐅᓂᕐᒧᑦ ᓲᕐᓗ ᐊᑭᓕᖅᑕᐅᔪᖕᓇᖏᑉᐸᑕ ᐊᕕᒃᑐᖅᓯᒪᔪᑦ ᐋᓐᓂᐊᖅᑐᓕᕆᔨᖏᓐᓄᑦ ᐃᖅᑲᓇᐃᔭᖅᑎᑦᑎᔨᒋᔭᖏᑦᑎᒎᖅᑐᓄᓪᓘᓐᓃᑦ ᐊᑭᓕᖅᑕᐅᔪᖕᓇᖏᑉᐸᑕ ᒐᕙᒪᕐᔪᐊᒃᑯᑎᒍᑦ ᐃᑲᔪᖅᑕᐅᕚᓪᓕᕈᑎᒃᓴᖃᖅᑎᑕᐅᓂᖏᓐᓄᑦ ᑐᑭᓯᒋᐊᕈᑎᒃᓴᖃᕐᒥᔪᑦ ᐃᓕᓐᓂᐊᕈᑏᑦ ᐃᓗᐊᓂ. ᐃᓕᓐᓂᐊᕈᑏᑦ ᐃᓗᐊᓂᑦᑕᐅᖅ ᐃᓕᓴᐃᔨᓄᐊᖓᔪᖃᕐᒥᔪᑦ ᐃᓕᓐᓂᐊᕈᑎᒃᓴᓂᒃ ᐊᒻᒪᓗ ᐃᓕᓴᐃᑦᑎᐊᕐᓂᕐᒧᑦ ᐃᑲᔫᑎᒃᓴᓂᑦ. ᑖᒃᑯᐊᓗ ᐃᓕᓐᓂᐊᕈᑏᑦ ᒪᓕᒐᒃᓴᐅᔪᒫᖅᖢᑎᒃ ᐊᔾᔨᒌᓐᖏᑦᑐᓄᑦ ᓯᓚᑦᑐᖅᓴᕐᕕᐊᓗᖕᓄᑦ ᐃᓕᓐᓂᐊᕈᑎᒃᓴᓕᐅᑦᑎᐊᕐᓂᕐᒧᑦ ᑕᐃᒫᒃ ᐃᓕᓴᐃᖃᑕᐅᔪᒪᒍᑎᒃ ᓄᓇᖃᖅᑳᖅᑏᑦ ᐃᓕᖅᑯᓯᖏᑦᑕ ᐱᔭᕆᐊᖃᕐᓂᖏᑦᑕ ᒥᒃᓵᓄᑦ.

ᑖᒃᑯᐊ ᐱᔭᕇᖅᓯᒪᓂᖏᑦ ᐃᓱᓕᒃᑎᑦᑎᕗᖅ ᐅᑭᐅᓂ ᒪᕐᕉᖕᓂ ᐱᓕᕆᐊᖑᓚᐅᖅᑐᒥᒃ $1-ᒥᓕᐊᓐᑐᖅᑐᒥᒃ ᑲᓇᑕᐅᑉ ᐋᓐᓂᐊᖅᑐᓕᕆᔨᖏᓐᓂᑦ ᓯᕗᒻᒧᐊᖅᑎᑕᐅᓪᓗᓂ.