ᐃᖃᓗᐃᑦ, ᓄᓇᕗᑦ - ᕕᕝᕗᐊᕆ 19, 2009 – ᒥᓂᔅᑕ ᑕᒃ ᓯᑐᐊᓪ, ᒥᓂᔅᑕᕆᔭᖅ ᐃᓄᓕᕆᔨᑐᖃᒃᑯᓐᓄᑦ ᐊᒻᒪ ᒐᕙᒪᑐᖃᒃᑯᓐᓄᑦ ᐅᖃᖅᑎᒋᔭᐅᔪᖅ ᐊᓪᓚᖓᔪᓄᑦ ᐊᒻᒪ ᐃᓕᓴᕆᔭᐅᓂᖃᙱᑦᑐᓄᑦ ᐊᓪᓚᓄᑦ, ᓇᓗᓇᐃᖅᓯᖅᑲᐅᕗᖅ ᐱᓇᓱᐊᒐᓂᑦ ᑮᓇᐅᔭᖅᑐᕈᑎᒃᓴᑦ 2009: ᑲᓇᑕᐅᑉ ᒪᑭᒪᔾᔪᑎᓄᑦ ᖃᓄᖅᑑᕐᓂᕐᒧᑦ ᐸᓐᓇᐅᑎᒥᒃ ᐱᔪᓂᑦ ᐃᑲᔫᑎᖃᕐᓂᐊᖅᑐᓂᑦ ᐅᑭᐅᖅᑕᖅᑐᒥ ᑲᓇᑕᒥᐅᓂᑦ, ᐱᓗᐊᖅᑐᒥ ᓄᓇᕘᒥ.

ᑭᒡᒐᑐᖅᑐᒍ ᒥᓂᔅᑕ ᑕᐃᐋᓐ ᕕᓐᓕ, ᒥᓂᔅᑕᐅᔪᖅ ᐃᖅᑲᓇᐃᔭᖅᑐᓕᕆᓂᕐᒧᑦ ᐊᒻᒪ ᐊᔪᕈᓐᓃᖅᓴᑎᑦᑎᓂᕐᒧᑦ ᐊᒻᒪ ᑲᒪᒋᔭᖃᖅᑐᖅ ᑲᓇᑕᒥ ᐃᒡᓗᓕᕆᔨᖅᔪᐊᒃᑯᓐᓂ, ᒥᓂᔅᑕ ᓯᑐᐊᓪ ᐃᓕᓴᖅᓯᓇᕋᓚᐅᖅᐳᖅ ᐃᒡᓗᖃᕆᐊᖃᕐᓂᐅᔪᓂᑦ ᐅᑭᐅᖅᑕᖅᑐᒥ, ᓇᓗᓇᐃᖅᑐᒋᓪᓗ ᒐᕙᒪᒃᑯᑦ ᐊᖏᖅᓯᒪᓂᖏᓐᓂᑦ ᑮᓇᐅᔭᖃᖅᑎᑦᑎᓂᐊᕐᓂᕐᒥᓂᑦ ᐃᓄᓕᒫᖅᓯᐅᑎᓄᑦ ᐃᒡᓗᒃᓴᓂᑦ ᐱᖓᓱᓂ ᑎᐅᕆᑐᐊᕆᐊᓂᑦ.

”ᒐᕙᒪᕗᑦ ᐃᓕᑕᖅᓯᕗᑦ ᐃᒡᓗᖃᕐᓂᖅ ᑐᙵᕕᐅᒻᒪᑦ ᐃᓅᓯᖃᑦᑎᐊᕐᓂᕐᒧᑦ,” ᐅᖃᖅᑲᐅᕗᖅ ᒥᓂᔅᑕ ᓯᑐᐊᓪ. “ᐅᑭᐅᖅᑕᖅᑐᒥ ᐃᒡᓗᐃᑦ ᐱᒻᒪᕆᐅᓗᐊᙳᐊᖅᐳᑦ, ᐊᒻᒪ ᐱᔭᕐᓂᖏᑦᑐᖃᖅᑐᓂ. ᑕᐃᒪᓐᓇᐃᓐᓂᖓᓄᑦ ᓴᓂᕐᕙᐃᓯᒪᕗᒍᑦ $100 ᒥᓕᐊᓂᑦ ᓄᓇᕘᒧᑦ ᐊᖅᑯᑎᒋᓪᓗᒍ ᑲᓇᑕᒥ ᒪᑭᒪᔾᔪᑎᓕᕆᓂᕐᒧᑦ ᖃᓄᖅᑑᕐᓂᕐᒧᑦ ᐸᓐᓇᐅᑎᒥᒃ ᑖᕙᓂ ᐃᒡᓗᖃᕆᐊᖃᕐᓂᖅ ᐊᖏᓛᖑᒻᒪᑦ.”

“ᑮᓇᐅᔭᐃᑦ ᐊᑐᖅᑕᕗᑦ ᒐᕙᒪᐅᓪᓗᑕ ᐅᓪᓗᒥ ᐃᒪᓐᓇᐃᑎᑦᑎᓂᐊᖅᐳᖅ ᐅᑭᐅᖅᑕᖅᑐᒥᐅᑦ ᐃᒡᓗᖃᖁᓪᓗᒋᑦ ᐃᓚᐅᔪᓐᓇᖅᓯᓂᐊᕐᒪᑕ ᐱᔭᒃᓴᙳᖅᐸᓪᓕᐊᔪᓂᑦ ᐅᑭᐅᖅᑕᖅᑐᒥ,” ᐅᖃᖅᑲᐅᕗᖅ ᒥᓂᔅᑕ ᓕᐅᓇ ᐊᒡᓘᒃᑲᖅ, ᒥᓂᔅᑕᐅᔪᖅ ᐋᓐᓂᐊᖅᑕᐃᓕᒪᔪᓕᕆᔨᒃᑯᓐᓄᑦ ᐊᒻᒪ ᐱᖁᔭᖅᔪᐊᓕᕆᕕᒻᒥ ᒪᓕᒐᓕᐅᖅᑎᐅᔪᖅ ᓄᓇᕘᒧᑦ, ᐃᓚᐅᖃᑕᐅᓚᐅᖅᑐᓂᓗ ᑐᓯᖅᑎᑦᑎᔾᔪᑎᒥ.

“ᓄᓇᕗᒥᐅᑦ ᐃᓅᓯᕆᔭᖓ ᐱᐅᓯᒋᐊᒃᑲᓐᓂᕈᑎᒃᓴᖓ ᓯᕗᓪᓕᐅᖃᑕᐅᕗᑦ ᒐᕙᒪᑦᑎᓐᓂ,” ᐅᖃᖅᑲᐅᕗᖅ ᓄᓇᕗᒧᑦ ᓯᕗᓕᖅᑎ ᐄᕙ ᐋᕆᐊᒃ. “ᐅᑯᐊ ᑮᓇᐅᔭᐃᑦ ᐃᒡᓗᓕᐅᕈᑕᐅᓂᐊᖅᐳᑦ 300 ᐅᖓᑖᓂ ᐊᒻᒪ ᐃᖅᑲᓇᐃᔮᒃᓴᓕᐅᕈᑕᐅᓗᑎᑦ ᓄᓇᓕᓐᓂ. ᐃᖅᑲᓇᐃᔮᒃᓴᐃᑦ, ᐊᔪᙱᔾᔪᑎᑦ ᐊᒻᒪ ᐃᒡᓗᐃᑦ ᐊᕗᖔᓘᒃᑲᓐᓂᕈᑎᒋᔪᓐᓇᖅᐸᕗᑦ ᒪᑭᒪᔾᔪᑎᕗᑦ ᓄᓇᕘᒥ ᖁᕝᕙᓯᒋᐊᖁᓪᓗᒍ.”

ᑲᓇᑕᒥ ᒪᑭᒪᔾᔪᑎᒧᑦ ᖃᓄᖅᑑᕐᓂᕐᒧᑦ ᐸᓐᓇᐅᑎᒃ ᑮᓇᐅᔭᖃᖅᑎᑦᑎᒍᑕᐅᓂᐊᖅᐳᖅ $200 ᒥᓕᐊᓂᑦ ᐅᑭᐅᓄᑦ ᒪᕐᕉᓐᓄᑦ ᐃᒡᓗᐃᑦ ᓴᓇᔭᐅᒋᐊᕈᑎᒃᓴᖏᓐᓄᑦ ᐊᒻᒪ ᓄᑖᓂᑦ ᐃᓄᓕᒫᓄᑦ ᐃᒡᓗᓕᐅᕈᑎᒃᓴᓄᑦ. ᓄᓇᕘᒥ ᐃᒡᓗᒃᓴᖃᕆᐊᖃᓛᖑᓂᖓᓄᑦ ᐊᒡᒍᑐᕐᕕᐅᓂᐊᖅᐳᑦ $100 ᒥᓕᐊᓂᑦ.

ᑮᓇᐅᔭᐃᑦ ᑐᓐᓂᕆᔭᐅᓂᐊᖅᐳᑦ ᑲᓇᑕᒥ ᐃᒡᓗᓕᕆᔨᖅᔪᐊᒃᑯᑦ ᐊᖅᑯᑎᒋᔭᐅᓗᑎᑦ ᐊᒻᒪ ᐃᓕᖅᑯᓯᐅᕙᒃᑐᒃᑯᑦ ᐋᖅᑭᒃᓯᒪᓂᖃᕐᓗᑎᑦ ᐃᒡᓗᓕᐅᕐᓂᖅ ᐊᒻᒪ ᓴᓇᔭᐅᒋᐊᕈᑎᑦ ᐱᒋᐊᖅᓵᓕᔪᓐᓇᖁᓪᓗᒋᑦ.

ᐅᓪᓗᒥ ᑐᓴᖅᑎᔾᔪᑎᒃ ᐃᑲᔪᖅᑐᐃᒍᑕᐅᕗᖅ ᐅᑭᐅᖅᑕᖅᑐᒥ ᐋᖅᑭᒃᓯᒪᓂᑦᑎᓐᓂ ᐊᒻᒪ ᑐᕌᖓᓪᓗᓂ ᐅᑭᐅᖅᑕᖅᑐᒥᒃ ᑎᒍᒥᐊᕐᓂᕆᔭᖓ ᑲᓇᑕ, ᓴᐳᒻᒥᓗᒍᓗ ᐅᑭᐅᖅᑕᖅᑑᑉ ᐊᕙᑎᖓ, ᓯᕗᒧᐊᖅᑕᐅᓗᑎᑦ ᐃᓅᓯᓕᕆᓂᒃᑯᑦ ᐊᒻᒪ ᐱᕈᖅᐸᓪᓕᐊᓂᒃᑯᑦ ᐱᕙᓪᓕᐊᔭᐅᔪᑦ, ᐊᒻᒪᓗ ᐋᖅᑭᒋᐊᖅᑕᐅᓗᓂ ᓯᐊᒻᒪᑎᖅᑕᐅᓗᑎᓪᓗ ᐅᑭᐅᖅᑕᖅᑐᒥ ᐊᐅᓚᑦᑎᓂᐅᔪᑦ.

ᑕᒪᒃᑯᐊ ᑮᓇᐅᔭᐃᑦ ᑲᔪᓯᔾᔪᑕᐅᕗᑦ ᒐᕙᒪᒃᑯᑦ ᓯᑎᐱᕆ 2008-ᒥ ᑐᓴᖅᑎᑦᑎᔾᔪᑎᒋᓚᐅᖅᑕᖓᓂᒃ $1.9 ᐱᓕᐊᓂᑦ ᐅᑭᐅᓄᑦ ᑕᓪᓕᒪᓄᐊᖓᓂᐊᖅᑐᓂᑦ ᐃᒡᓗᒃᓴᓄᑦ ᐊᒻᒪ ᐊᖏᕐᕋᖃᙱᑦᑐᓕᕆᓂᕐᒧᑦ ᑮᓇᐅᔭᓕᐅᓗᐊᙱᑦᑐᓄᑦ ᑲᓇᑕᒥᐅᓄᑦ ᐊᒻᒪᓗ $300 ᒥᓕᐊᓐ ᐅᑭᐅᖅᑕᖅᑐᒥ ᐃᒡᓗᓕᕆᓂᕐᒧᑦ ᐸᐸᑦᑎᕕᒻᒧᑦ ᑐᓴᕈᑕᐅᓚᐅᖅᓯᒪᔪᖅ 2006-ᒥ.

ᑲᑕᓇᒥ ᐃᒡᓗᓕᕆᔨᖁᑎᒋᔭᐅᓪᓗᑎᑦ ᑲᓇᑕᒥ ᐃᒡᓗᓕᕆᔨᖅᔪᐊᒃᑯᑦ ᐊᑐᖅᓯᒪᓂᖃᖅᐳᑦ ᐊᕐᕌᒍᐃᑦ 60 ᐅᖓᑖᓂ ᐃᑲᔪᖃᑦᑕᕐᓂᕐᒥᒃ ᑲᓇᑕᒥᐅᓂᑦ ᐃᒡᓗᑖᖅᐸᓪᓕᐊᑎᓪᓗᒋᑦ ᐱᐅᔾᔫᒥᔪᓂᑦ, ᐊᕙᑎᑎᒍᑦ ᑕᐃᒪᐃᓕᖓᐃᓐᓇᕈᓐᓇᖅᑐᓂᑦ ᐊᒻᒪ ᐊᑭᑐᓗᐊᙱᑦᑐᓂᑦ - ᑕᒪᒃᑯᐊᓗ ᐃᒡᓗᐃᑦ ᓄᓇᓕᑦᑎᐊᕙᖃᕐᓂᕐᒧᑦ ᐃᑲᔪᐃᓐᓇᕐᓂᐊᕆᓪᓗᑎᑦ ᑲᓇᑕᓕᒫᒥ.

ᑐᓴᒃᑲᓐᓂᕈᒪᒍᕕᑦ ᑕᒪᒃᑯᓂᙵ ᑲᓇᑕᒥ ᒪᑭᒪᔾᔪᑎᖓᓄᑦ ᖃᓄᖅᑑᕐᓂᕐᒧᑦ ᐸᓐᓇᐅᑎᐅᑉ ᒥᒃᓵᓄᑦ, ᑐᕌᖓᓂᖓᓗ ᒪᑭᒪᔾᔪᑎᒃ ᐃᖏᕐᕋᓯᒋᐊᕈᑎᒃᓴᖓᓄᑦ ᐊᒻᒪ ᓴᐳᒻᒥᔾᔪᑕᐅᓗᓂ ᐊᑦᑐᖅᑕᐅᓛᖑᔪᓄᑦ  ᑮᓇᐅᔭᓕᐅᕐᓂᐅᑉ ᑲᑕᓐᓂᖓᓄᑦ ᐅᕙᓂ ᑲᓲᑎᓂᖅᔪᐊᒃᑯᑦ ᑐᑦᑕᕐᕕᒃᑯᑦ ᖃᐅᔨᔭᒃᓴᐅᕗᖅ http://www.budget.gc.ca/2009/home-accueil-eng.asp.