ᕕᕝᕗᐊᕆ 18, 2008
ᑲᖏᖅᖠᓂᕐᒥ – ᒥᓂᔅᑕ ᓕᐅᓇ ᐊᒡᓘᒃᑲᖅ, ᐱᖁᔭᖅᔪᐊᓕᕆᕕᒻᒥ ᒪᓕᒐᓕᐅᖅᑎ ᓄᓇᕘᒧᑦ ᐊᒻᒪ ᒥᓂᔅᑕᐅᔪᖅ ᐋᓐᓂᐊᖅᑕᐃᓕᒪᔪᓕᕆᔨᒃᑯᓐᓄᑦ, ᐊᓪᓗᒥ ᑐᓴᖅᑎᑦᑎᖅᑲᐅᕗᖅ ᐃᑲᔫᑎᒥᒃ ᒪᕐᕉᓐᓂᒃ ᑐᑉᐹᑲᑐᕐᓂᕐᒧᐊᖓᔫᓐᓂᒃ ᑕᒪᒃᑯᐊ ᓄᓇᖃᖅᑳᖅᑐᒥᓃᑦ ᐃᓅᓱᒃᑐᖁᑎᖏᑦ ᓯᕘᖅᑐᖃᑦᑕᖁᓇᒋᑦ ᐃᑲᔫᑕᐅᓂᐊᖅᑐᓂᑦ.

 “ᑲᓇᑕᐅᑉ ᒐᕙᒪᖓ ᐊᖏᖅᓯᒪᕗᑦ ᐱᓕᕆᖃᑎᖃᕈᒪᓪᓗᑎᑦ ᓄᓇᓕᓐᓂᑦ, ᑎᐅᕆᑐᐊᕆᐊᓂᑦ ᐊᒻᒪ ᐳᕌᕕᓐᓯᓂᑦ ᐱᕚᓪᓕᖅᑎᓇᓱᓐᓂᐊᕐᓗᒍ ᑲᓇᑕᒥᐅᑦ ᐋᓐᓂᐊᖃᖅᑕᐃᓕᒪᑎᑕᐅᓂᖏᓐᓄᑦ,” ᐅᖃᖅᐳᖅ ᒥᓂᔅᑕ ᐊᒡᓘᒃᑲᖅ. “ᐅᑯᐊ ᑮᓇᐅᔭᐃᑦ ᐃᑲᔫᑎᖃᕐᓂᐊᖅᐳᑦ ᐃᓕᓐᓂᐊᕐᕕᓐᓄᑦ ᐊᒻᒪ ᓄᓇᓕᓐᓂᑦ ᐃᓕᓴᐃᓇᓱᒃᑎᓪᓗᒋᑦ ᓄᓇᖃᖅᑳᖅᑐᒥᓃᑦ ᐃᓅᓱᒃᑐᖁᑎᖏᓐᓂᑦ ᓯᕘᖅᑐᕐᓂᐅᑉ ᐅᓗᕆᐊᓇᕐᓂᖓᓂᒃ ᑲᒻᒪᓗ ᐋᖅᑮᔪᓐᓇᖁᓪᓗᒋᑦ ᑐᑉᐹᑲᑐᕐᓂᕐᒥᒃ.”

ᓯᕗᓪᓕᖅ ᐱᓕᕆᐊᒃᓴᖅ, ᑕᐃᔭᐅᔪᖅ ᓄᖅᑲᕆᑦ ᓵᓚᖃᕐᓂᐊᕋᕕᑦ! ᐱᓕᕆᓐᓂᖃᓯᐅᑎᒍᑎᐃᕗᖅ ᓄᓇᖃᖅᑳᖅᑐᒥᓃᑦ ᐃᓅᓱᒃᑐᖁᑎᖏᓐᓄᑦ ᐅᑭᐅᖃᖅᑐᑦ 8ᒥᒃ 17ᒧᑦ ᓄᖅᑲᕈᒪᓂᖏᑦ ᑐᑉᐹᑲᒥᒃ ᐱᓇᓱᐊᕈᓯᒃ ᐱᖓᓲᔭᖅᑐᓂᑦ. ᓵᓚᒃᓴᕈᑕᐅᓇᓱᓐᓂᐊᖅᑐᑦ ᓇᓚᐅᒃᓵᕈᑕᐅᓗᑎᑦ ᑐᓐᓂᕆᔭᐅᕙᓐᓂᐊᖅᐳᑦ ᐱᖃᑕᐅᔪᓄᑦ ᐊᒻᒪ ᓄᖅᑲᑦᑎᐊᖅᑐᓄᑦ. ᐃᓚᒋᒻᒥᔭᖓᑦᑕᐅᖅ ᓄᓇᓕᓐᓂ ᐃᓕᓐᓂᐊᕐᕖᑦ ᐱᖃᑕᐅᓗᑎᑦ ᐃᑲᔫᑕᐅᓂᐊᕐᓗᓂ ᐃᓚᐅᔪᓄᑦ ᐊᒻᒪ ᑐᑉᐹᑲᒥᒃ ᐃᓕᓐᓂᐊᕈᑎᓂᑦ ᓴᖅᑭᑦᑐᖃᖁᓪᓗᒍ. ᐃᓕᓐᓂᐊᕐᕖᑦ ᐊᑐᓂ ᐊᕕᑦᑐᖅᓯᒪᔪᓂ ᓵᓚᒃᓴᖃᑕᐅᓇᓱᓐᓂᐊᖅᐳᑦ ᑮᓇᐅᔭᓂᑦ ᐊᑐᖅᑐᒃᓴᐅᑕᐅᔪᓂᑦ ᐱᙳᐊᕐᓂᕐᓄᑦ, ᑐᓴᕐᓂᖅᑐᓕᐅᕐᓂᕐᒧᑦ, ᖃᕆᓴᐅᔭᓕᕆᓂᕐᒧᑦ ᐅᕝᕙᓘᓐᓃᑦ ᓯᓚᒥ ᐱᙳᐊᕈᑎᓄᑦ.

ᑲᓇᑕᒥ ᐊᓪᓚᐃᑦ ᐊᒻᒪ ᐃᓄᐃᑦ ᓄᓇᓕᓐᓂ ᐋᓐᓂᐊᖅᑕᐃᓕᒪᔪᓕᕆᔨᒃᑯᑦ ᐱᑎᑕᐅᓂᐊᖅᐳᑦ $472,000-ᓂᑦ ᒐᕙᒪᑐᖃᒃᑯᑦ ᑮᓇᐅᔭᖏᓐᓂᑦ ᐅᑭᐅᓂᒃ ᒪᕐᕉᓐᓂᒃ ᑕᒪᑐᒧᙵ. ᓄᓇᕗᑦ ᒐᕙᒪᒃᑯᖓᑕ ᐋᓐᓂᐊᖅᑕᐃᓕᒪᔪᓕᕆᔨᒃᑯᖏᑦ ᐊᒻᒪᓗ Eel River ᕼᖑᑭ-ᒥ ᐊᓪᓚᐃᑦ ᑲᑐᔾᔨᖃᑎᒌᖓ New Brunswick-ᒥ ᐱᓕᕆᖃᑕᐅᓂᐊᖅᐳᑦ ᓄᓇᓕᓐᓂ ᐱᒃᑲᐅᔪᖁᑎᒋᔭᐅᓗᑎᑦ.

ᐱᓕᕆᐊᒃᓴᐅᑉ ᐊᐃᑉᐸᖓ, ᐃᓅᓱᒃᑐᓄᑦ ᐃᓅᓱᒃᑐᓂᑦ ᐱᓕᒻᒪᖅᓴᐃᔩᑦ ᐱᓕᒻᒪᖅᓴᐃᔪᑦ, ᐃᓕᓐᓂᐊᕈᑕᐅᓂᐊᖅᐳᖅ ᓄᓇᖃᖅᑳᖅᑐᒥᓃᑦ ᐃᓅᓱᒃᑐᖁᑎᖏᓐᓄᑦ ᐊᔪᕈᓐᓃᖅᓴᖅᑎᑕᐅᓗᑎᑦ ᐃᓅᓱᒃᑑᖃᑎᒥᓂᑦ ᐃᓕᓐᓂᐊᑎᑦᑎᓂᕐᒥᒃ ᐊᒻᒪ ᑐᑭᓕᐊᖅᑎᑦᑎᑦᑎᓂᐊᕐᓂᕐᒥᒃ ᑐᑉᐹᑲᐅᑉ ᐅᓗᕆᐊᓇᕐᓂᖏᓐᓂᑦ. ᐱᓇᓱᐊᒐᑎᒍᑦ ᐃᓅᓱᒃᑐᐃᑦ 32 ᓄᓇᓕᓐᓂ 16ᓂᑦ ᐱᓕᒻᒪᓴᖅᑕᐅᓂᐊᖅᐳᑦ ᑐᑉᐹᑲᒥᒃ ᓄᖅᑲᖅᑎᑦᑎᒍᑎᓂᑦ. ᓄᓇᕗᑦ ᒐᕙᒪᒃᑯᖓᑦ ᐋᓐᓂᐊᖅᑕᐃᓕᒪᔪᓕᕆᔨᒃᑯᖏᑦ ᐱᖃᑎᖃᕐᓂᐊᖅᐳᑦ ᓄᓇᓕᓐᓂ ᐋᓐᓂᐊᖅᑕᐃᓕᒪᔪᓕᕆᔨᐅᔪᓂᑦ, ᐋᓐᓂᐊᓯᐅᖅᑎᐅᔪᓂᑦ ᐊᒻᒪᓗ ᐃᓕᓴᐃᔨᐅᔪᓂᑦ ᓄᓇᕘᓕᒫᒥ ᑕᒪᑐᒥᙵ ᑲᔪᓯᑎᑦᑎᓂᐊᖅᑎᓪᓗᒋᑦ. ᑕᒪᓐᓇᓗ ᐃᓅᓱᒃᑐᓄᑦ ᐃᓅᓱᒃᑐᓂᑦ ᐱᓕᒻᒪᖅᓴᐃᔩᑦ ᐱᓕᒻᒪᖅᓴᐃᔪᑦ ᑐᓐᓂᕆᔭᐅᓂᐊᖅᐳᑦ $261,837-ᓄᑦ ᑎᑭᓪᓗᒍ ᐅᑭᐅᓂᒃ ᒪᕐᕉᓐᓂᒃ.

ᐋᓐᓂᐊᖅᑕᐃᓕᒪᔪᓕᕆᔨᒃᑯᑦ ᑲᓇᑕᒥ ᐊᖏᖅᓯᒪᕗᑦ ᑐᑉᐹᑲ ᐊᑐᖅᑕᐅᖃᑦᑕᙱᓐᓂᖅᓴᐅᖁᓪᓗᒍ ᑲᓇᑕᒥᐅᓄᑦ. ᒐᕙᒪᑐᖃᒃᑯᑦ ᑐᑉᐹᑲᒥᒃ ᐊᐅᓚᑦᑎᓂᕐᒧᑦ ᐃᓕᖅᑯᓯᖓᑕ ᐊᑖᒍᑦ, ᐋᓐᓂᐊᖅᑕᐃᓕᒪᔪᓕᕆᔨᒃᑯᑦ ᐊᔾᔨᒌᙱᑦᑐᓂᑦ ᐊᖅᑯᑎᖃᕋᓱᐊᖅᐳᑦ ᖃᔅᓰᓐᓇᐅᓂᖅᓴᐃᑦ ᐃᓅᓱᒃᑐᐃᑦ ᓯᕘᖅᑎᕆᐅᓕᖁᓪᓗᒋᑦ ᐊᒻᒪᓗ ᓯᕘᖅᑐᖅᐸᒃᑐᑦ ᓄᖅᑲᕈᒪᔪᐃᑦ ᐃᑲᔪᖅᑕᐅᔪᓐᓇᖅᓯᖁᓪᓗᒋᑦ.

ᖃᐅᔨᒋᐊᒃᑲᓐᓂᕈᓐᓇᖅᐳᓯ ᑲᓲᑎᓂᖅᔪᐊᒃᑯᑦ ᐋᓐᓂᐊᖅᑕᐃᓕᒪᔪᓕᕆᔨᒃᑯᑦ ᑲᓇᑕᒥ ᑐᑦᑕᕐᕕᖓᓐᓂ ᑕᒪᒃᑯᓂᙵ ᑐᑉᐹᑲᒥᒃ ᐊᐅᓚᑦᑎᒐᓱᐊᕈᑎᒋᔭᖏᓐᓂᑦ.

ᑐᑭᓯᒋᐊᒃᑲᓐᓂᕈᓐᓇᖅᐳᑎᑦ ᓄᖅᑲᕆᑦ ᓵᓚᖃᕐᓂᐊᕋᕕᑦ! ᒥᒃᓵᓄᑦ, ᖃᐅᔨᒋᐊᕈᓐᓇᖅᐸᐃᑦ ᑲᓇᑕᒥ ᐊᓪᓚᐃᑦ ᐊᒻᒪ ᐃᓄᐃᑦ ᓄᓇᓕᓐᓂ ᐋᓐᓂᐊᖅᑕᐃᓕᒪᔪᓕᕆᔨᒃᑯᓐᓄᑦ ᐊᖓᔪᖅᑳᖓᑦ ᑎᐊᐱ ᑎᑖ-ᒫᓐᑐᐊ ᐅᕙᓂ (450) 632-0892 ᓯᕙᓂᕐᓗᒍ.

ᑐᑭᓯᒋᐊᒃᑲᓐᓂᕈᓐᓇᖅᐳᑎᑦ ᐃᓅᓱᒃᑐᓄᑦ ᐃᓅᓱᒃᑐᓂᑦ ᐱᓕᒻᒪᖅᓴᐃᔩᑦ ᐱᓕᒻᒪᖅᓴᐃᔪᑦ ᒥᒃᓵᓄᑦ, ᖃᐅᔨᒋᐊᕈᓐᓇᖅᐸᐃᑦ ᐊᐃᓂᐊᖅ ᖁᐊᕋᒃ, ᐊᐅᓚᑦᑎᔨ, ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᑐᓴᐅᒪᑎᑦᑎᔨᒃᑯᓐᓂ, ᓄᓇᕗᑦ ᒐᕙᒪᖓᓐᓂ ᐅᕙᓂ (867) 975-5723 ᓯᕙᓂᕐᓗᒍ.