ᑎᑭᕌᖅᔪᐊᖅ, ᓄᓇᕘᒥ (ᑎᓯᐱᕆ 12, 2008) – ᐅᓪᓗᒥ ᑎᑭᕌᖅᔪᐊᕐᒥ ᓄᓇᕘᒥ ᒪᑐᐃᖅᑕᐅᒍᑕᐅᖅᑲᐅᕗᖅ ᓄᑖᖅ ᑲᑎᒪᕕᒃ ᔮᓐ ᐊᑦᔪᒃᒥᒃ ᑕᐃᔭᐅᔪᖅ - ᑲᑐᔾᔭᐅᔪᖅ ᑲᓇᑕ ᐊᒻᒪ ᓄᓇᕗᑦ ᒐᕙᒪᖏᓐᓄᑦ ᓄᓇᓕᓐᓂ ᐊᖏᔫᑎᓄᑦ ᑮᓇᐅᔭᐃᑦ ᐊᑐᖅᑕᐅᓪᓗᑎᑦ.

“ᒐᕙᒪᕗᑦ ᐅᐱᒍᓱᑉᐳᑦ ᐱᓕᕆᖃᑎᒋᓚᐅᕋᑦᑎᒍ ᓄᓇᕘᒧᑦ ᒐᕙᒪᒃᑯᖓᑦ ᐃᑲᔪᖅᑐᑎᒍ ᐱᓇᓱᐊᒐᕐᓂᑦ ᓲᕐᓗ ᐅᓇᑎᑐᑦ,” ᐅᖃᓚᐅᖅᐳᖅ ᒥᓂᔅᑕ ᓕᐅᓇ ᐊᒡᓘᒃᑲᖅ, ᒥᓂᔅᑕᐅᔪᖅ ᐋᓐᓂᐊᖃᖅᑕᐃᓕᔪᓕᕆᔨᒃᑯᓐᓂ ᐊᒻᒪ ᐱᖁᔭᖅᔪᐊᓕᕆᔨᒃᑯᓐᓂ ᒪᓕᒐᓕᐅᖅᑎ ᓄᓇᕘᒧᑦ, ᑭᒡᒐᑐᖅᑐᒍ ᒥᓂᔅᑕ ᑕᒃ ᓯᑐᐊᓪ, ᒥᓂᔅᑕᕆᔭᖅ ᐃᓄᓕᕆᔨᑐᖃᒃᑯᓐᓄᑦ ᐊᒻᒪ ᒐᕙᒪᑐᖃᒃᑯᓐᓂ ᐅᖃᖅᑎᒋᔭᐅᔪᖅ ᐊᓪᓚᖓᔪᓄᑦ ᐊᒻᒪ ᐃᓕᓴᕆᔭᐅᓂᖃᙱᑦᑐᓄᑦ ᐊᓪᓚᓄᑦ. “ᐅᓇ ᑲᑎᒪᕕᒃ ᓄᑖᖅ ᓴᖅᑭᑎᑦᑎᕗᖅ ᐊᖏᖅᓯᒪᓂᑦᑎᓐᓂᑦ ᓄᓇᕘᒥᐅ ᐊᖏᔫᑎᖁᑎᖃᖁᓪᓗᒋᑦ ᓄᓇᓕᖏᓐᓄᑦ ᐃᑲᔫᑕᐅᓂᐊᖅᑐᒥᒃ.”

“ᐱᒃᑯᓲᑎᒋᕙᕗᑦ ᑎᑭᕌᖅᔪᐊᕐᒥᐅᑦ ᓄᑖᒥᒃ ᑲᑎᒪᕕᒃᑖᕋᑦᑎ ᐊᒻᒪ ᐃᓚᓕᐅᑎᓪᓗᓂ ᓄᓇᑦᑎᓐᓄᑦ,” ᐅᖃᓚᐅᖅᐳᖅ ᒥᓂᔅᑕ ᓗᐊᓐ ᖁᓱᒐᖅ, ᒥᓂᔅᑕᕆᔭᐅᔪᖅ ᓄᓇᓕᓐᓂ ᐊᒻᒪ ᒐᕙᒪᒃᑯᓐᓂ ᐱᔨᑦᑎᕋᐅᑎᓕᕆᔨᒃᑯᓐᓄᑦ. “ᐅᓇ ᓄᑖᖅ ᐃᒡᓗᖅᔪᐊᖅ ᓯᕗᒧᐊᕈᑎᑦᑎᐊᕙᐅᕗᖅ ᑎᑭᕌᖅᔪᐊᕐᒥ ᐊᖏᔫᑎᒋᔭᕆᐊᖃᖅᑕᖏᓐᓄᑦ ᐊᒻᒪᓗ ᑭᒃᑯᓕᒫᓂᑦ ᐃᑲᔪᕐᓂᖃᕐᓂᐊᖅᑐᓂ.”

“ᓄᑖᖅ ᑲᑎᒪᕕᒃᑖᕗᑦ ᐊᖏᓂᖅᓴᐅᕗᖅ ᐊᒻᒪᓗ ᐊᑑᑎᖃᒃᑲᓐᓂᕐᓂᖅᓴᐅᓂᐊᖅᑐᓂ ᑲᑎᕝᕕᐅᖃᑦᑕᕐᓂᐊᖅᑐᓂ ᓄᓇᓕᓐᓂ,” ᐅᖃᓚᐅᖅᐳᖅ ᒪᐃᔭ ᐴᓯ ᖃᑉᓗᓈ. “ᓂᕆᐅᒋᑦᑎᐊᕐᓂᐊᖅᐸᔅᓯ ᐃᓘᓐᓇᓯ ᓂᕆᑎᑦᑎᓕᕌᖓᑦᑕ, ᐱᙳᐊᖅᑎᑦᑎᓕᕌᖓᑦᑕ ᐊᓯᖏᓐᓂᓪᓗ ᑲᑎᔾᔪᑕᐅᕙᓐᓂᐊᖅᑐᓂ ᓄᓇᓕᓐᓂᒥᐅᓄᑦ ᐊᕐᕌᒍᓂᑦ ᖃᐃᔪᓂᑦ.”

ᓄᑖᖅ ᑲᑎᒪᕕᒃ ᑎᑭᕌᖅᔪᐊᕐᒥ ᐊᑦᑎᖅᑕᐅᓚᐅᖅᐳᖅ ᔮᓐ ᐊᑦᔪᒃᒥᒃ, ᐃᓄᑐᖃᕆᔭᐅᓚᐅᖅᑐᖅ ᓄᓇᓕᓐᓂ. ᐊᑦᔪᒃ ᒋᐅᕆ ᓚᐃᒃᒦᖔᕐᓂᑰᕗᖅ ᑭᓯᐊᓂ ᓄᓇᖃᑯᑖᕐᓂᖅᓴᐅᓯᒪᔪᖅ ᑎᑭᕌᖅᔪᐊᕐᒥ.