ᐋᑐᐊ (ᔭᓐᓄᐊᕆ 15, 2009) – ᒥᓂᔅᑕ ᑕᒃ ᓯᑐᐊᓪ, ᒥᓂᔅᑕᕆᔭᐅᔪᖅ ᐃᓄᓕᕆᔨᑐᖃᒃᑯᓐᓄᑦ ᐊᒻᒪ ᒐᕙᒪᑐᖃᒃᑯᓐᓄᑦ ᐅᖃᖅᑎᒋᔭᐅᔪᖅ ᐊᓪᓚᖓᔪᓄᑦ ᐊᒻᒪ ᐃᓕᓴᕆᔭᐅᓂᖃᙱᑦᑐᓄᑦ ᐊᓪᓚᓄᑦ, ᐱᖃᑎᒋᓪᓗᓂᐅᒃ ᒥᓂᔅᑕ ᓕᐅᓇ ᐊᒡᓘᒃᑲᖅ, ᒥᓂᔅᑕᕆᔭᐅᔪᖅ ᐋᓐᓂᐊᖃᖅᑕᐃᓕᔪᓕᕆᔨᒃᑯᓐᓄᑦ ᐊᒻᒪ ᐱᖁᔭᓕᐅᕐᕕᔾᔪᐊᒥ ᒪᓕᒐᓕᐅᖅᑎᒋᔭᐅᔪᖅ ᓄᓇᕘᒧᑦ, ᐅᓪᓗᒥ ᑐᓴᖅᑎᑦᑎᖅᑲᐅᕘᒃ ᑎᒃᑯᐊᖅᑕᐅᓂᖓᓂᒃ ᐳᕈᔅ ᐅᕌᓴᓐ ᒐᕙᒪᑐᖃᒃᑯᓄᑦ ᑭᒡᒐᖅᑐᐃᔨᐅᓂᕐᒥᒃ ᓄᓇᕘᒥ ᐱᓕᕆᐊᒃᓴᓂᑦ ᓯᐊᒻᒪᖅᑎᕆᓂᕐᒧᑦ.

 “ᓯᕗᒧᐊᖅᐸᓪᓕᐊᓂᑦᑎᓐᓂ ᒐᕙᒪᐅᓪᓗᑕ ᐅᑭᐅᖅᑕᖅᑐᒥ ᐃᓕᖅᑯᓯᕆᔭᑦᑎᓐᓂ, ᐋᖅᑮᕙᓪᓕᐊᕗᒍᑦ ᓯᐊᒻᒪᖅᑎᕆᓪᓗᑕᓗ ᐱᓕᕆᐊᒃᓴᓂᑦ ᐅᑭᐅᖅᑕᖅᑐᒥᐅᓄᑦ ᓇᒻᒥᓂᖅ ᐊᐅᓚᑦᑎᓂᖅᓴᐅᖁᓪᓗᒋᑦ,” ᐅᖃᓚᐅᖅᐳᖅ ᒥᓂᔅᑕ ᓯᑐᐊᓪ. “ᒥᔅᑕ ᐅᕌᓴᓐ ᑎᒃᑯᐊᕐᓂᕆᔭᕗᑦ ᓯᕗᒧᐊᕈᑎᓪᓚᕆᐅᕗᖅ ᐱᓕᕆᖃᑎᖃᕐᓂᑦᑎᓐᓂ ᓄᓇᕘᒥᐅᓂᑦ ᓇᒻᒥᓂᖅ ᐋᖅᑮᔪᓐᓇᕐᓂᖅ ᐅᑎᖅᑎᕙᓪᓕᐊᓇᓱᓐᓂᑦᑎᓐᓂᑦ ᓄᓇᕗᒥᐅᓄᑦ.”

“ᐅᑭᐅᖅᑕᖅᑐᒥᐅᑕᐃᑦ ᐱᓕᕆᐊᒃᓴᖃᕈᒪᕗᑦ ᐅᑭᐅᖅᑕᖅᑑᑉ ᐱᕙᓪᓕᐊᔭᖅᑕᐅᓂᖓᓂᒃ,” ᐅᖃᓚᐅᖅᐳᖅ ᒥᓂᔅᑕ ᐊᒡᓘᒃᑲᖅ. “ᐊᕕᑦᑐᖅᓯᒪᔪᐃᑦ ᐊᐅᓚᒃᓯᓂᖅᓴᐅᓂᕆᒐᔭᖅᑕᖏᑦ ᐱᒻᒪᕆᐅᓂᖃᖅᐳᖅ ᑲᓇᑕ ᑎᒍᒥᐊᖅᓯᓂᖓᓂᒃ ᐅᑭᐅᖅᑕᖅᑐᒥ. ᐱᓕᕆᖃᑎᒋᕙᕗᖅ ᓄᓇᕗᑦ ᒐᕙᒪᒃᑯᖓᑦ ᐱᓕᕆᐊᒃᓴᓂᑦ ᓯᐊᒻᒪᑎᕐᕕᐅᕙᓪᓕᐊᑎᓪᓗᒋᑦ.”

“ᖁᕕᐊᓱᒻᒪᕆᑉᐳᖓ ᒥᓂᔅᑕ ᓯᑐᐊᓪ ᑐᓴᖅᑎᑦᑎᒍᑎᖓᓂᒃ ᐅᓪᓗᒥ ᑎᒃᑯᐊᖅᓯᑎᓪᓗᒍ ᒥᔅᑕ ᐅᖃᓴᓐᒥᒃ,” ᐅᖃᓚᐅᖅᐳᖅ ᓯᕗᓕᖅᑎ ᐋᕆᐊᒃ. “ᑕᒪᑐᒨᓇ ᓯᕗᒧᐊᕈᓐᓇᖅᓯᓂᐊᓕᖅᐳᒍᑦ ᐊᖏᖃᑎᒌᓕᐅᖅᐸᓪᓕᐊᓂᑦᑎᓐᓂᑦ ᓯᕗᓂᒃᓴᒥ ᖃᓂᑦᑐᒥ. ᓯᐊᒻᒪᑎᕐᕕᐅᓂᕐᒧᑦ ᐊᖏᖃᑎᒌᖃᕐᓂᖅ ᓯᕗᓪᓕᐅᖃᓯᐅᔾᔭᐅᕗᖅ ᓄᓇᕘᒧᑦ ᐊᒻᒪᓗ ᐱᓕᕆᖃᑎᒋᓂᐊᖅᑐᑎᒍ ᑲᓇᑕᐅᑉ ᒐᕙᒪᖓ ᐊᒻᒪ ᓄᓇᕗᑦ ᑐᙵᕕᒃᑯᑦ ᐊᑐᐃᓐᓇᐅᖁᓪᓗᑕ ᐊᐅᓚᑦᑎᔨᐅᓂᒃᓴᒥᒃ ᐊᒻᒪ ᒪᓕᒐᓕᐅᖅᑎᐅᓂᕐᒥᑦ ᐱᖁᑎᒋᔭᓂᑦ ᓄᓇᑕᑦ ᖄᖓᓂ ᐊᑖᓂᓗ ᐊᒻᒪᓗ ᑕᕆᐅᑉ ᓇᑎᖓᓂ. ᐅᓪᓗᒥ ᑎᒃᑯᐊᖅᑕᐅᔪᖅ ᑕᒪᑐᒧᙵ ᓯᕗᒧᐊᕈᑎᒻᒪᕆᐅᕗᖅ ᑐᕌᒐᒧᑦ ᐊᒻᒪᓗᑦᑕᐅᖅ ᐃᓕᖅᑯᓯᐅᔪᖅ ᑮᓇᐅᔭᓕᐅᕈᑎᕗᑦ ᐃᖏᕐᕋᓂᖃᒃᑲᓐᓂᖁᓪᓗᒍ ᐊᒻᒪᓗ ᒪᓕᒐᐃᑦ ᐃᓗᐊᖅᓯᕚᓪᓕᕆᐊᕐᓂᖏᑦ ᐅᔭᕋᕐᓂᐊᓂᕐᒥ ᓄᓇᕘᒥ.”

“ᓯᐊᒻᒪᖅᑎᕆᓂᖅ ᐱᒻᒪᕆᐅᓘᕗᖅ ᓄᓇᕘᑉ ᓴᓇᔭᐅᕙᓪᓕᐊᓂᖓᓂᒃ, ᑕᒪᓐᓇᓗ ᓄᓇᕘᒥ ᓄᓇᑖᕈᑎᒧᑦ ᐊᖏᖃᑎᒌᒍᑎᐅᑉ ᐃᓗᐊᓃᑦᑐᓂ. ᓂᕆᐅᑦᑎᐊᖅᐳᖓ ᓯᐊᒻᒪᖅᑎᕆᓂᕐᒧᑦ ᐊᖏᖃᑎᒌᒃᓴᒥᒃ ᑕᒪᑦᑎᓐᓄᑦ ᐱᐅᔫᓂᐊᖅᑐᒥᒃ - ᐃᓄᓐᓄᑦ, ᓄᓇᕘᒧᑦ ᐊᒻᒪ ᑲᓇᑕᒧᑦ,” ᐅᖃᓚᐅᖅᐳᖅ ᐹᓪ ᖃᓗᔾᔭᖅ, ᐊᖓᔪᖅᑳᕆᔭᖅ ᓄᓇᕗᑦ ᑐᙵᕕᒃᑯᓐᓄᑦ.