ᐃᖃᓗᐃᑦ, ᑎᓯᐱᕆ 12, 2008 - ᒥᓂᔅᑕ ᓕᐅᓇ ᐊᒡᓘᒃᑲᖅ, ᐱᖁᔭᓕᐅᕐᕕᔾᔪᐊᒥ ᒪᓕᒐᓕᐅᖅᑎ ᓄᓇᕘᒧᑦ ᐊᒻᒪ ᒥᓂᔅᑕᐅᓪᓗᓂ ᐋᓐᓂᐊᖃᖅᑕᐃᓕᔪᓕᕆᔨᒃᑯᓐᓄᑦ ᐊᒻᒪᓗ ᓯᕗᓕᖅᑎ ᐄᕙ ᐋᕆᐊᒃ, ᓯᕗᓕᖅᑎᐅᔪᖅ ᓄᓇᕘᒧᑦ, ᐊᓪᓗᒥ ᑐᓴᖅᑎᑦᑎᖅᑲᐅᕘᒃ ᐱᓇᓱᐊᒐᕐᒥ ᐃᓅᓱᒃᑐᐃᑦ ᓄᓇᕘᒥ ᓂᕆᑦᑎᐊᖃᑦᑕᖁᓪᓗᒋᑦ ᐊᒻᒪᓗ ᐱᓕᕆᑦᑎᐊᖁᓪᓗᒋᑦ ᒧᒥᖃᑦᑕᕐᓗᑎᑦ.

ᑕᒪᑐᒨᓇ ᐱᓇᓱᐊᒐᑎᒍᑦ ᐃᓅᓱᒃᑐᐃᑦ ᒧᒥᕐᓂᕐᒥᒃ ᐃᓕᓐᓂᐊᖃᑦᑕᕈᓐᓇᐃᓐᓇᕐᓂᐊᖅᐳᑦ ᐱᓕᕆᔾᔪᑕᐅᔪᒥᒃ ᐊᒻᒪ ᐊᐅᓚᑦᑎᓂᕐᒥᒃ ᓂᕆᐅᓐᓂᖃᑦᑎᐊᕐᓂᕐᒥᓪᓗ ᐃᑉᐱᒍᓱᓕᖁᓪᓗᒋᑦ, ᑐᕌᖓᔪᒥᒃ ᐃᓅᓱᒃᑐᐃᑦ ᓯᕗᓕᐅᖅᑎᙳᖁᓪᓗᒋᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ. ᑕᒪᒃᑯᐊᑎᒍᓪᓗ ᐃᓅᓱᒃᑐᐃᑦ ᐃᓕᓐᓂᐊᕐᓂᐊᕆᕗᑦ ᓂᕆᑦᑎᐊᕐᓂᕐᒥᒃ ᐊᒻᒪᓗ ᖃᐅᔨᓗᑎᑦ ᐋᓐᓂᐊᖅᑐᓕᕆᔾᔪᓯᕐᓂᑦ ᓄᓇᕘᒥ.

“ᓴᐳᒻᒥᒋᐊᕆᔪᒪᓂᕗᑦ ᐊᒻᒪ ᓯᕗᒧᐊᕆᐊᕆᔪᒪᓂᕗᑦ ᑲᓇᑕᒥᐅᓂᑦ, ᕿᑐᕐᖓᕗᑦ ᐱᓗᐊᖅᑐᒥᒃ, ᒐᕙᒪᑦᑎᓐᓄᑦ ᐱᒻᒪᕆᐊᓘᕗᖅ,” ᒥᓂᔅᑕ ᐊᒡᓘᒃᑲᖅ ᐅᖃᒪᐅᖅᐳᖅ. “ᕿᑐᕐᖓᑦᑎᓐᓂᑦ ᐃᓕᓐᓂᐊᖅᑎᑦᑎᔭᕆᐊᖃᖅᐳᒍᑦ ᓂᕆᑦᑎᐊᕐᓂᕐᒥᒃ ᐊᒻᒪ ᐱᓕᕆᖃᑦᑕᕐᓂᕐᒥᒃ ᐃᓅᓱᒃᑑᓱᖓᖅᑎᓪᓗᒋᑦ ᓯᕗᓂᒃᓴᒥᓂ ᐃᓕᖅᑯᓯᖃᑦᑎᐊᓛᖁᓪᓗᒋᑦ.”

ᑲᓇᑕᐅᑉ ᒐᕙᒪᒃᑯᖓ ᐱᓕᕆᖃᑎᖃᕆᕗᑦ ᓄᓇᕗᑦ ᒐᕙᒪᒃᑯᖓᓐᓂᒃ ᑐᑭᓯᒋᐊᕈᑏᑦ ᑎᒥᒃᑯᑦ ᐱᓕᕆᔾᔪᓯᕐᓂᑦ ᐊᒻᒪ ᓂᕆᑦᑎᐊᖁᔨᔾᔪᑎᓂᑦ ᓄᓇᕘᑦ ᐃᓕᓐᓂᐊᕐᕕᖏᓐᓂ 41-ᖑᔪᓂᑦ.

“ᑕᒪᑐᒨᓇ ᐊᖏᖃᑎᒌᒍᑎᑎᒍᑦ ᐊᑕᖏᐅᒪᔪᒥᒃ ᓄᓇᓕᓐᓂ ᑐᙵᓂᖃᖅᑐᒥᒃ ᐊᖅᑯᑎᖃᕈᓐᓇᖅᓯᓂᐊᖅᐳᒍᑦ ᐃᓅᓯᖃᑦᑎᐊᖁᔨᓂᕐᒥᒃ ᑲᑎᑕᐅᓗᑎᑦ ᐃᓄᐃᑦ ᐃᓕᖅᑯᓯᖏᑦ ᐊᒻᒪ ᒫᓐᓇᓂᓴᕐᓂᑦ ᐃᓕᖅᑯᓯᕆᔭᔪᓂᑦ,” ᐅᖃᓚᐅᖅᐳᖅ ᓄᓇᕘᑦ ᒥᓂᔅᑕᖓᑦ ᐋᓐᓂᐊᖅᑕᐃᓕᔪᓕᕆᔨᒃᑯᓐᓂ ᐊᒻᒪ ᐃᓄᓕᕆᔨᒃᑯᓐᓂ, ᑮᑦ ᐲᑕᓴᓐ. “ᐃᓄᓕᕆᔨᖁᑎᕗᑦ ᐊᒻᒪ ᐋᓐᓂᐊᖅᑐᓕᕆᔨᖁᑎᕗᑦ ᐊᖅᑯᑎᒋᓪᓗᒋᑦ ᐱᓕᕆᑎᓐᓇᓱᒃᐸᕗᑦ ᐃᓅᓱᒃᑐᐃᑦ ᒧᒥᕐᓂᒃᑯᑦ ᐊᒻᒪᓗ ᑐᕌᖓᓪᓚᑦᑖᖅᑐᓂᑦ ᐃᓕᓐᓂᐊᕐᓂᒃᑯᑦ ᐃᓅᓱᒃᑐᖁᑎᕗᑦ ᓂᕆᑦᑎᐊᕐᓂᕐᒥᒃ, ᓯᕗᓕᖅᑎᐅᓂᕐᒥᒃ, ᖃᓄᐃᙱᑦᑎᐊᕐᓂᕐᒥᒃ, ᐃᓱᒪᖃᑦᑎᐊᕐᓂᕐᒥᒃ ᐊᒻᒪ ᐃᒻᒥᓂᒃ ᓄᒃᑭᒃᓴᓂᕐᒥᒃ ᐃᓕᓐᓂᐊᖁᓪᓗᒋᑦ.”

“ᑲᑎᑎᕙᓪᓕᐊᓇᓱᒃᐸᕗᑦ ᐃᓄᑐᖃᐃᑦ, ᐃᓅᓱᒃᑐᐃᑦ, ᐅᖃᐅᓯᕗᓪᓗ ᐃᓕᖅᑯᓯᕗᓪᓗ ᑎᒥᒃᑯᑦ ᐱᓕᕆᓂᑎᒍᑦ,” ᐅᖃᓚᐅᖅᐳᖅ ᓄᓇᕘᒧᑦ ᒥᓂᔅᑕ ᐃᓕᖅᑯᓯᓕᕆᓂᕐᒧᑦ, ᐅᖃᐅᓯᓕᕆᓂᕐᒧᑦ, ᐃᓄᑐᖃᓕᕆᓂᕐᒧᑦ ᐊᒻᒪ ᐃᓅᓱᒃᑐᓕᕆᓂᕐᒧᑦ, ᓗᐃ ᑕᐹᖅᔪᒃ. “ᑕᒪᓐᓇ ᐱᓇᓱᐊᒐᖅ ᐊᖅᑯᑎᒋᓗᒍ ᐃᑲᔫᑎᒋᕕᔾᔪᐊᕐᓂᐊᖅᐸᕗᑦ ᓄᓇᕘᒥᐅᑦ ᐃᓚᐅᔪᓐᓇᖅᓯᖃᑕᐅᓗᑎᑦ ᓲᕐᓗ ᒧᒥᕐᓂᕐᒧᑦ ᐱᓕᕆᑦᑎᐊᕈᑕᐅᔪᓂᑦ.”

ᐅᑭᐊᒃᓵᒥ ᓄᓇᕗᑦ ᒐᕙᒪᖓᑦ ᒪᕐᕈᐊᖅᑎ ᐃᓕᓐᓂᐊᖅᑎᑦᑎᒍᑎᖃᓚᐅᖅᐳᑦ ᐅᓪᓗᓂᑦ ᑕᓪᓕᒪᓂᑦ ᐊᑐᓂ ᐃᒃᐱᐊᖅᔪᒻᒥ ᐊᒻᒪ ᒥᑦᑎᒪᑕᓕᒻᒥ ᑕᒪᓐᓇ ᐱᓇᓱᐊᒐᖅ ᐊᑐᖅᑐᒍ. ᒫᔾᔨ 2009ᒥ ᐅᑭᐅᖅᑕᖅᑐᒧᑦ ᒧᒥᕐᓂᕐᒧᑦ ᓯᕗᓕᖅᑎᐅᓂᕐᒧᓪᓗ ᑲᑎᒪᓂᖃᕈᒫᖅᐳᖅ ᕿᑭᖅᑖᓗᒻᒥ. ᐃᓕᓐᓂᐊᕈᑎᒃᑲᓐᓃᑦ ᐅᐸᓗᖓᐃᔭᖅᑕᐅᒋᕗᑦ ᐊᓯᖏᓐᓂ ᐊᕕᑦᑐᖅᓯᒪᔪᓂ.

ᑲᓇᑕᐅᑉ ᒐᕙᒪᒃᑯᖓ ᐱᓕᕆᖃᑎᖃᖅᐳᑦ ᐳᕌᕕᓐᓯᓂ ᐊᒻᒪ ᑎᐅᕆᑐᐊᕆᐊ ᒐᕙᒪᒋᔭᐅᔪᓕᒫᓂᑦ ᐃᑲᔪᖅᑐᐃᓗᑎᑦ ᑎᒥᒃᑯᑦ ᐱᓕᕆᓂᕐᒥ ᐊᒻᒪ ᓂᕆᑦᑎᐊᕐᓂᕐᒥᒃ. ᑕᒪᓐᓇᓗ ᐋᓐᓂᐊᖅᑐᓕᕆᓂᕐᒧᑦ ᐊᔾᔨᐅᙱᑦᑑᓂᖃᙱᓐᓂᖅᓴᐅᔾᔪᑕᐅᓂᐊᖅᐳᖅ ᐱᓇᓱᐊᒐᖅᑎᒍᑦ ᑐᕌᖓᔪᓂᑦ ᓄᑕᖅᑯᓄᑦ ᐊᒻᒪ ᐃᓅᓱᒃᑐᓄᑦ, ᒪᑯᓇᓂ ᐅᖓᓯᒃᑐᓂ ᓄᓇᖃᖅᑐᓂ ᐊᒻᒪᓗ ᓄᓇᖃᖅᑳᖅᑐᑦ ᓄᓇᓕᖏᓐᓂ.

ᑕᒪᓐᓇ ᐱᓇᓱᐊᒐᖅ ᑎᑭᐅᑎᑦᑎᒍᑕᐅᓂᐊᖅᐳᖅ ᑲᓇᑕᓕᒫᒥ ᓄᑕᖅᑲᓄᑦ ᐊᒻᒪ ᐃᓅᓱᒃᑐᓄᑦ ᑎᒥᒃᑯᑦ ᐱᓕᕆᓂᕐᓂᑦ ᐋᖅᑭᒃᑕᐅᓯᒪᔪᓂᑦ ᒐᕙᒪᑐᖃᒃᑯᑦ, ᐳᕌᕕᓐᓯᓂ ᐊᒻᒪ ᑎᐅᕆᑐᐊᕆᐊᓂ ᒐᕙᒪᒃᑯᓐᓄᑦ ᒪᐃ 2008-ᖑᑎᓪᓗᒍ. ᑐᑭᓯᒋᐊᒃᑲᓐᓂᕈᒪᔪᐃᑦ ᖃᐅᔨᒋᐊᕈᓐᓇᖅᐳᑦ ᑲᓲᑎᓂᖅᔪᐊᒃᑯᑦ ᐋᓐᓂᐊᖅᑐᓕᕆᔨᒃᑯᑦ ᑎᒥᖓᓐᓄ ᐅᕙᓂ www.publichealth.gc.ca.