ᐊᑐᕚ, ᐋᓐᑎᐅᕆᔪ (ᐄᐳᕈ 8, 2009) - ᒥᓂᔅᑕ ᓴᒃ ᓯᑖᓪ, ᒥᓂᔅᑕ ᐃᓄᓕᕆᔨᑐᖃᒃᑯᓐᓄᑦ ᐊᒻᒪᓗ ᑲᓇᑕᒥ ᐱᓕᕆᐊᖃᖃᑕᐅᔪᖅ ᐃᖅᑭᓕᕐᓚᖕᓄᑦ (ᐊᓪᓚᖓᔪᓄᑦ) ᐃᓕᓴᕆᔭᐅᓯᒪᖏᑦᑐᓄᓪᓗ ᐃᖅᑭᓕᕐᓄᑦ, ᐅᓪᓗᒥ ᑐᓴᖅᑎᑎᓚᐅᖅᐳᖅ ᐱᒋᐊᕐᓂᐊᓕᕐᓂᖏᓐᓄᑦ ᑲᑎᒪᑎᑎᓂᕐᒧᑦ ᒪᓕᒐᒃᓴᓕᐅᕐᓂᐊᕐᓂᖏᓐᓄᑦ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑎᓂᒃ ᐊᑲᐅᖏᓕᐅᕈᑕᐅᓕᕋᔭᖅᑐᓂᒡᓗ ᖃᓄᐃᓕᐅᕈᑕᐅᓂᐊᖅᑐᓂᒃ ᓄᓇᕗᒥ ᓄᓇᐃᑦ ᐱᔾᔪᑎᒋᓪᓗᒋᑦ.

"ᑕᒪᓐᓇ ᐱᕙᓪᓕᐊᓂᕆᓂᐊᖅᑕᕗᑦ ᐱᒻᒪᕆᐅᕗᖅ ᐱᒋᐊᕈᑕᐅᓂᐊᖅᑐᖅ ᐊᒃᓱᕈᕈᑎᒋᓚᐅᖅᑕᕗᑦ ᐱᓕᕆᐊᕆᓪᓗᒍ ᐱᓕᕆᖃᑎᒋᓪᓗᒋᑦ ᒐᕙᒪᒃᑯᑦ, ᓄᓇᕗᑦ ᒐᕙᒪᒃᑯᖏᓪᓗ ᓄᓇᕗᑦ ᑐᓐᖓᕕᒃᑯᑦ ᑎᒥᖓᓪᓗ," ᐅᖃᓚᐅᖅᐳᖅ ᒥᓂᔅᑕ ᓯᑖᓪ. "ᐱᖁᔭᒃᓴᖑᖅᑎᑕᐅᓇᓱᐊᕐᓂᐊᖅᑐᖅ ᐋᖅᑭᒃᑕᐅᓯᒪᕗᖅ ᐅᑭᐅᖅᑕᖅᑐᒥ ᐸᕐᓇᐅᑎᒋᔭᖅᐳᑦ ᑐᕌᕐᓂᖃᖁᓪᓗᒋᑦ, ᐱᓗᐊᖅᑐᒥᒃ ᐊᑐᕈᒪᔭᕗᑦ ᐅᑭᐅᖅᑕᖅᑐᒥ ᐱᖁᔭᖅᑕᖃᕆᐊᖃᕐᓂᖓᓄᑦ ᑕᒪᑐᒪ ᒥᒃᓵᓄᑦ."

ᐱᖁᔪᕐᔪᐊᖑᕐᓂᐊᖅᑐᖅ ᒪᓕᖕᓂᐊᖅᐳᖅ 1993-ᒥ ᓄᓇᕗᑖᕐᓂᕐᒧᑦ ᐊᖏᕈᑕᐅᓯᒪᔪᓂᒃ, ᐊᑐᓕᖅᑕᐅᒍᑕᐅᒋᐊᖃᖅᑐᒥᒃ ᐱᖁᔭᖅ ᐅᓂᒃᑳᖅᓯᒪᓪᓗᓂ ᓄᓇᒥᒃ ᐊᑐᕐᓂᕐᒥᒃ ᐸᕐᓇᒃᓯᒪᒍᑕᐅᔪᓂᒃ ᐃᒃᐱᖕᓂᐊᕈᑕᐅᔪᓐᓇᖅᑐᓂᒡᓗ ᐊᑲᐅᖏᓕᐅᕈᑕᐅᔪᓐᓇᖅᑐᓂᒡᓗ ᓄᓇᓕᖕᓄᑦ.

"ᐱᖁᔭᕐᔪᐊᓕᐅᖅᑕᐅᓂᐊᖅᑐᖅ  ᖃᐅᔨᓐᓇᕈᑕᐅᕗᖅ ᑖᒃᑯᐊ ᒐᕙᒪᒃᑯᑦ ᐱᓕᕆᖃᑎᖃᕈᒪᑦᓯᐊᕐᒪᑕ ᐱᓕᕆᐊᕆᒋᐊᖃᖅᑕᒥᖕᓂᒃ ᐱᓕᕆᐊᖃᕐᓗᑎᒃ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑕᐅᓯᒪᔪᓃᑦᑐᓂᒃ," ᐅᖃᓚᐅᖅᐳᖅ ᒥᓂᔅᑕ ᓕᐅᓇ ᐊᒡᓘᒃᑲᖅ, ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᒥᓂᔅᑕ. "ᑐᑭᓯᓇᖅᓯᕚᓪᓕᕐᓂᐊᖅᖢᓂᓗ ᓄᓇᒥᒃ ᐸᕐᓇᒃᓯᒪᒍᑎᖃᖃᑦᑕᕐᓂᖅ ᖃᓄᖅ ᐊᑐᖅᑕᐅᔪᓐᓇᕐᓂᖓᓄᑦ ᓄᓇᓕᖕᓂᒥᐅᓪᓗ ᐃᒃᐱᖕᓂᐊᕈᓐᓇᕋᔭᖅᑐᑦ ᓄᓇ ᐊᑐᖅᑕᐅᓂᖓᓄᑦ ᖃᐅᔨᓴᖅᑕᐅᕕᐅᔪᓐᓇᕐᓂᐊᖅᖢᑎᒃ ᐊᕙᑎᒥᐅᑕᒧᑦ ᖃᓄᐃᓕᐅᕈᑕᐅᓂᐊᕐᓂᖓᓄᑦ ᓄᓇᕗᒥ ᐅᑭᐅᖅᑕᖅᑐᒥᐅᓪᓗ ᐱᕙᓪᓕᐊᑎᑕᐅᔪᓐᓇᕐᓂᖅᓴᐅᖁᓪᓗᒋᑦ."

"ᓄᓇᕗᑦ ᒐᕙᒪᒃᑯᖏᑦ ᑕᒪᑐᒥᖓ ᖁᕕᐊᒋᔭᖃᑦᓯᐊᖅᐳᑦ ᐱᖁᔭᕐᔪᐊᓕᐅᕈᑕᐅᓂᐊᖅᑐᒥᒃ ᐱᒻᒪᕆᐅᓂᖓᓄᑦ ᐱᖁᔭᐃᑦ ᐊᑲᐅᓂᖅᓴᐅᕙᓪᓕᐊᓕᕈᓐᓇᖁᓪᓗᒋᑦ ᓄᓇᕗᒥ," ᐅᖃᓚᐅᖅᐳᖅ ᓄᓇᖃᖅᑳᖅᓯᒪᔪᓕᕆᓂᕐᒧᑦ ᒥᓂᔅᑕ ᓄᓇᕗᑦ ᒐᕙᒪᒃᑯᖏᓐᓂ, ᓗᐃ ᑕᐹᕐᔪᒃ.

"ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦ ᖁᕕᐊᓱᑦᓯᐊᖅᐳᑦ ᖃᓄᐃᓕᐅᕈᑕᐅᓯᒪᔪᒥᒃ ᐋᖅᑭᒃᐸᓪᓕᐊᒍᑕᐅᓂᐊᖅᑐᒥᒃ ᐱᖁᔭᕐᔪᐊᓄᑦ. ᓂᕆᐅᒋᔭᖃᑦᓯᐊᖅᐳᒍᑦ ᑲᑎᒪᖃᑎᒌᖃᑦᑕᐃᓐᓇᕈᒪᓪᓗᑕ ᓄᓇᕗᒥ ᐱᖁᔭᕐᔪᐊᓕᕆᓂᕐᒧᑦ ᐱᓕᕆᔨᐅᖃᑕᐅᔪᓂᒃ ᕿᒥᕐᕈᑦᓯᐊᖃᑎᒋᕙᒡᓗᒋᑦ ᐱᖁᔭᕐᔪᐊᓕᐊᕆᔭᐅᓂᐊᖅᑐᖅ ᐱᐊᓂᒃᑕᐅᑦᓯᐊᕈᓐᓇᖁᓪᓗᒍ," ᐅᖃᓚᐅᖅᐳᖅ ᓄᓇᕗᑦ ᑐᓐᖓᕕᒃᑯᑦ ᑎᒥᖓᓐᓂ ᐊᖓᔪᖃ, ᐹᓪ ᖃᓗᔾᔭᖅ.

ᒐᕙᒪᒃᑯᑦ ᑕᐃᒪ ᐱᒋᐊᖅᑎᑎᔪᓐᓇᕐᓂᐊᓕᖅᐳᑦ ᑭᒃᑯᑐᐃᓐᓇᕐᓂᒃ ᑲᑎᒪᑎᑎᖃᑦᑕᕐᓗᑎᒃ ᑕᒪᓐᓇ ᐱᖁᔭᕐᔪᐊᓕᐅᖅᑕᐅᓂᐊᖅᑐᖅ ᐱᔾᔪᑎᒋᓪᓗᒍ. ᐱᓇᓱᐊᕈᓯᐅᓂᐊᖅᑐᓂ ᖃᐃᔪᓂ, ᐱᓕᕆᔪᑦ ᑕᒪᑐᒥᖓ ᑐᓴᕈᒪᓂᐊᖅᐳᑦ ᓄᓇᓕᖕᓂᑦ ᓄᓇᕗᒥ, ᓄᓇᕗᑦ ᑐᓐᖓᕕᒃᑯᑦ ᑎᒥᖓᓐᓂᑦ, ᓄᓇᕗᑦ ᒐᕙᒪᒃᑯᖏᓐᓂᑦ, ᓄᓇᕗᒥ ᐸᕐᓇᒃᑐᓕᕆᔨᒃᑯᑦ ᑲᑎᒪᔨᖏᓐᓂᑦ, ᓄᓇᕗᒥ ᖃᐅᔨᓴᖅᑎᑦ ᕿᒥᕐᕈᔨᑦ ᑲᑎᒪᔨᖏᓐᓂᑦ, ᐱᓕᕆᕕᒡᔪᐊᖃᖅᑐᓂᑦ ᐊᓯᖏᓐᓂᓪᓗ ᓄᓇᖃᖅᑳᖅᓯᒪᔪᑦ ᑎᒥᖁᑎᖏᓐᓂᑦ.

ᐅᓪᓗᒥ ᑐᓴᖅᑎᑕᐅᒍᑕᐅᔪᖅ  ᐊᑐᖅᑕᐅᓂᐊᖅᖢᓂᓗ ᒐᕙᒪᒃᑯᑦ ᐅᑭᐅᖅᑕᖅᑐᒥ ᐸᕐᓇᒃᓯᒪᒍᑎᒋᔭᖏᓐᓄᑦ ᑕᐃᒪᓐᓇ ᑲᓇᑕᒥ ᐸᐸᑦᓯᕙᓪᓕᐊᒍᒪᓂᖏᓐᓄᑦ, ᓴᐳᔾᔭᐅᒋᐊᖃᕐᓂᖏᓐᓄᓪᓗ ᐅᑭᐅᖅᑕᖅᑐᒥ ᐊᕙᑎᒥᐅᑕᐃᑦ ᐱᑐᖃᕗᑦ, ᐃᓅᓯᓕᕆᔭᐅᑦᓯᐊᕆᐊᖃᕐᓂᖏᓐᓄᑦ ᑮᓇᐅᔭᓕᐅᖅᑎᑕᐅᕙᓪᓕᐊᒋᐊᖃᕐᓂᖏᓐᓄᓪᓗ, ᐊᑲᐅᓯᕚᓪᓕᖅᑎᑎᓗᑎᒡᓗ ᐊᒻᒪᓗ ᐱᓕᕆᐊᖃᕐᓂᖅᓴᐅᔪᓐᓇᖅᑎᑕᐅᓗᑎᒃ ᐅᑭᐅᖅᑕᑐᒥ ᓄᓇᒥᖕᓂᒃ ᐊᐱᕆᓚᐅᖅᑳᖏᓪᓗᑎᒃ ᒐᕙᒪᑐᖃᒃᑯᓐᓂᒃ ᓇᖕᒥᓂᖅᓱᕐᓂᖅᓴᐅᓕᕐᓗᑎᒃ.

ᑲᓇᑕᐅᑉ ᒐᕙᒪᒃᑯᖏᑦ  ᐱᓕᕆᐊᖃᖅᐳᑦ ᐊᔾᔨᒌᖏᑦᑐᓂᒃ ᐅᑭᐅᖅᑕᖅᑐᒥ ᐸᕐᓇᒃᓯᒪᒍᑎᒋᓂᐊᖅᑕᓂ ᐱᕙᓪᓕᐊᓂᖃᖁᓪᓗᒋᑦ.
ᑕᒪᒃᑯᐊ ᐅᑯᐊᖑᓪᓗᑎᒃ ᐅᑯᐊ ᐃᓚᒋᔭᐅᓪᓗᑎᒃ:

• $156 ᒥᓕᔭᓐᑖᓚᐃᑦ ᐃᑲᔪᕈᑕᐅᓂᐊᖅᑐᑦ ᑲᓇᑕᒥᐅᑦ ᐃᓚᐅᖁᓪᓗᒋᑦ ᓯᓚᕐᔪᐊᒥ ᐊᕐᕌᒍᖃᖅᑎᑕᐅᓂᖓᓄᑦ ᐅᑭᐅᖅᑕᖅᑐᖅ;
• $200 ᒥᓕᔭᓐᑖᓚᐃᑦ ᐊᕐᕌᒍᓂ ᒪᕐᕉᖕᓂ ᐊᑐᖅᑕᐅᓂᐊᖅᑐᑦ ᓄᑖᖑᖅᑎᕆᓂᕐᒧᑦ ᓴᓇᓂᕐᒧᓪᓗ ᐃᒡᓗᒃᓴᓂᒃ ᓄᑖᓂᒃ ᐅᑭᐅᖅᑕᖅᑐᒥ;
• $50 ᒥᓕᔭᓐᑖᓚᐃᑦ ᐊᕐᕌᒍᓂ ᑕᓪᓕᒪᓂ ᐊᑐᖅᑕᐅᓂᐊᖅᑐᑦ ᑮᓇᐅᔭᓕᐅᕈᑎᒃᓴᐅᓂᐊᖅᑐᓄᑦ ᐅᑭᐅᖅᑕᖅᑐᒥ ᐱᕙᓪᓕᐊᑎᑎᓂᖅ;
• $85 ᒥᓕᔭᓐᑖᓚᐃᑦ ᐊᕐᕌᒍᓂ ᒪᕐᕉᖕᓂ ᑕᒪᒃᑯᐊ ᐊᐅᓚᑕᐅᖏᓐᓇᖁᓪᓗᒋᑦ ᓄᑖᖑᖅᑎᑕᐅᖁᓪᓗᒋᓪᓗ ᐅᑭᐅᖅᑕᖅᑐᒥ ᖃᐅᔨᓴᕐᕕᑦ;
• $90 ᒥᓕᔭᓐᑖᓚᐃᑦ ᐊᕐᕌᒍᑦ ᑕᓪᓕᒪᑦ ᐅᖓᑖᓂ ᐊᑐᖅᑕᐅᓂᐊᖅᑐᑦ ᓄᑖᖑᖅᑎᑕᐅᓯᒪᖁᓪᓗᒍ ᐅᑭᐅᖅᑕᖅᑐᒥ ᑮᓇᐅᔭᓕᐅᕐᓂᕐᒧᑦ ᐱᕙᓪᓕᐊᒍᑎᒃᓴᐃᑦ ᐱᖁᑎᑖᕈᑎᒃᓴᐃᓪᓗ; ᐊᒻᒪ
• $37.6 ᒥᓕᔭᓐᑖᓚᐃᑦ ᐃᖅᑲᓇᐃᔭᕐᕕᖕᓄᐊᖅᑕᐅᓂᐊᖅᖢᑎᒃ ᒐᕙᒪᒃᑯᓐᓂ ᑎᒥᐅᔪᓂᓗ ᐱᕙᓪᓕᐊᑎᑕᐅᒃᑲᓐᓂᖁᓪᓗᒍ ᑕᒪᓐᓇ ᒪᑲᓐᓯᒥ ᒑᓯᒃᓴᖅᓯᐅᕐᓂᕐᒧᑦ ᐊᖅᑯᑎᒋᔭᐅᓂᐊᖅᑐᖅ.